Indlela Abakunceda Ngayo Abalusi AbangamaKristu

KWIINDAWO ezininzi unokubabukela abalusi xa besalusa imihlambi yabo. Bayazikhokela, bazikhusele yaye bazilungiselele izinto ezizifunayo izimvu zabo. Oku kubalulekile kubadala abangamaKristu, ekubeni umsebenzi wabo uquka umsebenzi wokwalusa. Eneneni, yimbopheleleko yabo ‘ukwalusa ibandla likaThixo nokunikela ingqalelo kuwo wonke umhlambi.’—IZenzo 20:28.

Ukuba ulilungu lebandla lamaKristu, abalusi bokomoya banokukunceda njani? Yaye ufanele usabele njani kwimigudu yabo yokukunceda? Kutheni ibandla lilufuna uncedo lwabo?

Likhuselwa Entwenini?

Mandulo iingonyama namanye amarhamncwa asendle ayeyingozi kwimihlambi yaye imvu ehamba yodwa yayilixhoba lawo. Abalusi kwakufuneka bazikhusele. (1 Samuweli 17:34, 35) Khumbula, uSathana uMtyholi “uhambahamba njengengonyama egqumayo, efuna ukuqwenga uthile.” (1 Petros 5:8) Elugcwabevu ngumsindo ulwa kungekhona nentlangano kaYehova esemhlabeni kuphela kodwa kwanomkhonzi ngamnye kaThixo. Luyintoni usukelo lukaSathana? Ufuna ukudimaza abantu bakaYehova ade abathintele ‘ekugcineni imiyalelo kaThixo’ nasekwenzeni ‘umsebenzi wokunikela ubungqina kuYesu.’—ISityhilelo 12:17.

UYehova wababek’ ityala lokungabi nankathalo abalusi borhulemente woSirayeli wamandulo kuba izimvu zakhe ‘zazidliwa ngamarhamncwa asendle.’ (Hezekile 34:8) Noko ke, abadala abangamaKristu banomnqweno osuk’ entliziyweni wokubakhusela abo basebandleni ukuze kungabikho namnye ulahlekayo ngenxa yokungakhathalelwa okanye ngenxa yempembelelo kaSathana, yehlabathi, okanye yabawexuki abafana ‘neengcuka.’ (IZenzo 20:29, 30) Abalusi bawanceda njani onke amalungu omhlambi ukuba ahlale ephaphile yaye elumkile? Enye indlela kungokunikela iintetho ezilungiselelwe kakuhle ezisekelwe eZibhalweni kwiHolo yoBukumkani. Enye indlela kungeencoko ezakhayo nezikhuthazayo ngaphambi nasemva kweentlanganiso. Kwakhona enye indlela esebenzayo kungokuzityelela ‘izimvu’ emakhayeni azo. (Thelekisa INdumiso 95:7.) Kodwa luyintoni utyelelo lokwalusa? Lufanele lwenziwe njani olo tyelelo? Yaye ngubani ofanele atyelelwe?

Luyintoni Utyelelo Lokwalusa?

Utyelelo lokwalusa asilotyelelo nje lobuhlobo ekuncokolwa izinto ezingenamsebenzi kulo. Omnye umdala wathi: “Inkoliso yabavakalisi ikunandipha ngokwenene ukufunda isibhalo okanye ukuxubusha ngomntu othile oseBhayibhileni. Kakade ke, umdala akathethi yedwa. Umvakalisi woBukumkani otyelelweyo ngokuqhelekileyo uye akuvuyele ukuvakalisa iingcamango zakhe ngeBhayibhile, yaye ngokwenjenjalo womeleza ukholo lwakhe. Umdala usenokuza nephephancwadi IMboniselo okanye uVukani! ukuze baxubushe inqaku elakhayo. Mhlawumbi yile ngxubusho yezinto zokomoya eyahlula utyelelo lokwalusa kutyelelo lobuhlobo.”

Omnye umdala onamava wathi: “Ngaphambi kotyelelo, umdala uye achithe ixesha ecinga ngomvakalisi aza kumtyelela. Ziintoni ezinokumakha lo mvakalisi? Ukumncoma ngokusuk’ entliziyweni kuyinxalenye ebalulekileyo yotyelelo lokwalusa, kuba kuyamomeleza loo mntu ukuba anyamezele.” Ewe, utyelelo lokwalusa asilotyelelo nje lobuhlobo olunokwenziwa nangubani na ebandleni.

Kutheni Umalusi Ekutyelela?

Xa umdala etyelela ikhaya elithile, ukulungele ukukhuthaza amanye amakholwa nokuwanceda omelele elukholweni. (Roma 1:11) Ngoko xa umdala omnye okanye ababini benqwenela ukukutyelela, usabela njani? Omnye umveleli ohambahambayo wathi: “Ukuba amatyelelo okwalusa enziwa xa kukho ingxaki, umvakalisi uya kusabela ngolu hlobo xa abadala becela ukumtyelela, ‘Ngaba kukho into embi endiyenzileyo?’” Abalusi bokomoya abanothando baxelisa uYehova, owamnyamekelayo umdumisi yaye esoloko ‘ewuhlaziya umphefumlo wakhe,’ (NW) ngokukodwa xa wayecinezelekile nangamaxesha kaxakeka.—INdumiso 23:1-4.

Injongo yotyelelo lokwalusa ‘kukwakha kungekhona ukuchitha.’ (2 Korinte 13:10) Akhuthaza ngenene amazwi abonakalisa ukuluxabisa unyamezelo, inzondelelo, nomsebenzi wokuthembeka walowo utyelelweyo. Omnye umdala wathi: “Ebudeni botyelelo lokwalusa, akufanelekanga ukudlulisela ingcamango yokuba injongo yolo tyelelo kukufuna nokuxubusha iingxaki. Kakade ke, umvakalisi usenokufuna ukuthetha ngengxaki ethile. Yaye ukuba imvu iyaqhwalela okanye iyazinxwema emhlambini, umdala kufuneka enze okuthile ukuze ayincede.”

Ngokungathandabuzekiyo abalusi abangamaKristu baya kubanyamekela ngokukhethekileyo nabaphi na abafana nabo bachazwe kule ndinyana: “Ezilahlekileyo ndiya kuzifuna [mna Yehova], ndibuyise eziziintsali, ndibophe ezaphukileyo, ndizomeleze ezifayo.” (Hezekile 34:16) Ewe, izimvu kusenokufuneka zifunwe, zibuyiswe, zibotshwe okanye zomelezwe. Abalusi bakwaSirayeli bazityeshela ezi mbopheleleko. Ukwenza loo msebenzi kufuna ukuba umalusi asondele kwimvu ethile aze ayinyamekele. Ngokusisiseko, le ifanele ibe yinkalo ebalaseleyo kutyelelo ngalunye lokwalusa namhlanje.

Izimvu Eziphilileyo Kufuneka Zinyanyekelwe

Ngaba sifanele sigqibe kwelokuba akuyomfuneko ngabalusi bokomoya banamhlanje ukubonakalisa umdla kwizimvu eziphilileyo? Kaloku, xa imvu yokoqobo ingena engxakini, kulula ngakumbi ukuyinceda ukuba iyamthemba umalusi wayo. Enye incwadi ithi “ngokwemvelo izimvu ziyaboyika abantu, yaye ukuzenza zikuthembe akusoloko kulula.” Phakathi kwezinye izinto, le ncwadi icebisa olu khokelo lusisiseko ekwenzeni izimvu zikuthembe: “Thetha nazo rhoqo izimvu zakho. Ziye ziliqhele ilizwi lakho, nto leyo ezenza zikuthembe. Zityelele rhoqo izimvu edlelweni.”—Alles für das Schaf. Handbuch für die artgerechte Haltung (Iinkcukacha Ngezimvu. Incwadana Engendlela Yokuzinyamekela Kakuhle).

Ngoko ke ulwalamano olusondeleyo lubalulekile ukuba kuza kubakho ukuthembana phakathi komalusi nezimvu. Kukwanjalo nakwibandla lamaKristu. Omnye umdala wathi: “Ukwaziwa ebandleni njengomdala ozityelela rhoqo izimvu kwenza kube lula ukutyelela oneengxaki.” Ngoko ke, abalusi bokomoya abafanele bazame ukuzondla nokuzinyamekela eHolweni yoBukumkani kuphela izimvu. Ngokuvuma kweemeko, abadala bafanele bazazi izimvu ngokwenza amatyelelo okwalusa emakhayeni azo. Omnye umKristu ukhumbula ukuba xa wayesandul’ ukumiselwa njengomdala, watsalelwa umnxeba ngumveleli webandla emcela ukuba atyelele aze athuthuzele umzalwana owayesandul’ ukuphulukana nentombazana yakhe kwingozi embi yenqwelo-mafutha. Lo mdala uthi: “Hayi indlela endaba buhlungu ngayo, ekubeni ndingazange ndimtyelele lo mzalwana ngaphambili yaye ndingamazi nalapho ahlala khona! Ndavuya gqitha xa omnye umdala okhulileyo wavuma ukuhamba nam.” Ewe, abadala bayancedisana kumatyelelo okwalusa.

Xa elungiselela yaye esenza amatyelelo okwalusa athile, umdala usenokuhamba nesicaka solungiselelo esizabalazela “umsebenzi omhle” wokuba ngumveleli. (1 Timoti 3:1, 13) Hayi indlela esikuxabisa ngayo isicaka solungiselelo ukubona indlela umdala ayinceda ngayo imvu ebudeni botyelelo lokwalusa! Ngaloo ndlela abadala nezicaka zolungiselelo basondelelana ngakumbi nabo bonke abasebandleni, litsho lomelele iqhina lothando nomanyano lwamaKristu.—Kolose 3:14.

Ukuceba Ixesha Lokwenza Amatyelelo Okwalusa

Xa elinye iqumrhu labadala lakuyekela kubaqhubi beZifundo Zencwadi Zebandla ukwenziwa kwamatyelelo okwalusa, kwamanye amaqela ezifundo zencwadi kwatyelelwa bonke abavakalisi kwisithuba seenyanga ezintandathu, ngoxa kwamanye amaqela kungazange kutyelelwe namnye. Oku kwashukumisela omnye umdala ukuba athi: “Kubonakala ukuba abanye abadala bawukhuthalele yaye bawenza kakhulu umsebenzi wokwalusa, kodwa abanye basafuna ukukhuthazwa ngabanye abadala ukuba benjenjalo.” Ngoko amanye amaqumrhu abadala enza amalungiselelo okuba bonke abavakalisi batyelelwe ngabalusi emva kwexesha elithile elimisiweyo.

Kakade ke, umdala okanye nawuphi na umvakalisi unokumtyelela uthile osebandleni ngaphandle kokulindela ukuba kwenziwe amalungiselelo akhethekileyo. Ngaphambi kokwenza utyelelo lokwalusa, omnye umdala uye atsale umnxeba aze athi, “Nyanga nganye kubakho intsapho endiyityelelayo. Ngaba ndingakutyelela kangangethuba elingangeyure kule nyanga izayo? Luluphi usuku oluya kukulungela?”

Iintsikelelo Zokwenza Amatyelelo Okwalusa

Njengoko iingcinezelo zale nkqubo ingendawo ziqhubeka zisanda, amatyelelo akhuthazayo enziwa ngabalusi abanolwazelelelo ayingenelo kakhulu. Xa wonke umhlambi ukhuthazwa yaye uncedwa ngokwenziwa kwamatyelelo okwalusa, imvu nganye iziva ikhuselekile yaye inqabisekile.

Ngokuphathelele ibandla elalinabavakalisi boBukumkani ababetyelelwa rhoqo ngabalusi, kwathethwa oku: “Abavakalisi bahlala bekhangele phambili kumatyelelo okwalusa. Kwakuyinto eqhelekileyo ukuba umvakalisi aye komnye wabadala aze ambuze ukuba wayeza kuphinda amtyelele nini na, ngenxa yokuba umvakalisi lowo wayeyinandiphile ingxubusho eyakhayo ababa nayo ebudeni botyelelo oludluleyo. Amatyelelo okwalusa anegalelo ekuphuculeni umoya webandla.” Ezinye iingxelo zibonisa ukuba xa abalusi bebonakalisa uthando ngokulungiselela ngaloo ndlela, kubakho uthando, umanyano, nokufudumala okungakumbi ebandleni. Enjani yona intsikelelo!

Abalusi abangamaKristu batyelela ukuze bomeleze impilo yokomoya yemvu. Abadala bayawakhuthaza baze bawomeleze amakholwa akunye nabo. Ukuba kuvela ingxaki enzulu efuna isiluleko ebudeni botyelelo, kusenokuba kokona kulungileyo ukwenza amalungiselelo engxubusho ekhethekileyo ngelinye ixesha, ngokukodwa ukuba umdala uhamba nesicaka solungiselelo. Sekunjalo, kufanelekile ukuqukumbela utyelelo lokwalusa ngomthandazo.

Ngaba umalusi wokomoya ufuna ukukutyelela ekhayeni lakho kungekudala? Ukuba kunjalo, lulindele unovuyo ukhuthazo oza kulufumana. Utyelela ukuze akuncede aze akomeleze kwisigqibo owasenzayo sokuhlala kwindlela esa kubomi obungunaphakade.—Mateyu 7:13, 14.

[Ibhokisi ekwiphepha 26]

AMACEBISO Ngamatyelelo Okwalusa

◻ Mcele kusengaphambili: Ngokuqhelekileyo kuhle ukumcela kusengaphambili. Ukuba umdala uceba ukusingatha ingxaki enzulu, kuya kuba kuhle ukumazisa umvakalisi ngako oku kusengaphambili.

◻ Ukulungiselela: Cinga ngobuntu nemeko yaloo mntu. Mncome ngokusuka entliziyweni. Kwenze usukelo lwakho ukumnika ‘isiphiwo sokomoya’ ngokumkhuthaza nangokomeleza ukholo lwakhe.—Roma 1:11, 12.

◻ Umntu ofanele uhambe naye: Omnye umdala okanye isicaka solungiselelo esifanelekayo.

◻ Ebudeni botyelelo: Umdala ufanele akhululeke, abonakalise uthando, abe lukhuthazo yaye abe bhetyebhetye. Mbuze ngentsapho yakhe, intlalo-ntle yayo, njalo njalo. Phulaphula ngenyameko. Ukuba kuvela ingxaki enzulu, kusenokuba kokona kulungileyo ukulungiselela ukwenza utyelelo olukhethekileyo lokwalusa.

◻ Ubude botyelelo: Ligcine ixesha ebenilimisile, yaye hamba ngoxa lowo umtyeleleyo esalunandipha utyelelo.

◻ Ukuqukumbela utyelelo: Umthandazo ufanelekile yaye uya kuxatyiswa kakhulu.—Filipi 4:6, 7.

[Umfanekiso okwiphepha 24]

Abalusi abangamaKristu bayakhusela ngokomoya

[Imifanekiso ekwiphepha 26]

Amatyelelo okwalusa avelisa amathuba amahle okukhuthazana ngokomoya