Yiba Nesimo Sengqondo Sokulinda!
“Ndiza kubonisa isimo sengqondo sokulindela kuThixo wosindiso lwam. UThixo wam uya kundiva.”—MIKA 7:7.
1, 2. (a) Isimo sengqondo esibi sawenzakalisa njani amaSirayeli entlango? (b) Yintoni enokwenzeka kumKristu ongasihlakuleliyo isimo sengqondo esifanelekileyo?
ZININZI izinto ebomini ezinokujongwa njengezilungileyo okanye ezingalunganga, kuxhomekeka kwisimo sengqondo sethu. Xa amaSirayeli ayesentlango, alungiselelwa imana ngommangaliso. Ayefanele akhangele loo mqwebedu uwangqongileyo kwaye ayeza kuba nombulelo ngokwenene kuYehova ngokuwalungiselela isixhaso. Loo nto yayiya kubonakalisa ukuba anesimo sengqondo esikhuthazayo. Kunoko, akhumbula ooni nooni bokutya kwaseYiputa aza akhalaza esithi imana iyawadika. Esinjani ukungakhuthazi isimo sengqondo!—Numeri 11:4-6.
2 Nanamhlanje ke isimo sengqondo somKristu sinokuzenza izinto zibonakale ziqaqambile okanye zimfiliba. Xa engenasimo sengqondo sifanelekileyo, umKristu unokuphulukana lula novuyo lwakhe, kwaye inokuba yingozi loo nto kuba, njengoko uNehemiya watshoyo: “Uvuyo lukaYehova ligwiba [lethu].” (Nehemiya 8:10) Isimo sengqondo esikhuthazayo nesokuvuya siyasinceda sihlale somelele yaye sikhuthaza uxolo nomanyano ebandleni.—Roma 15:13; Filipi 1:25.
3. Isimo sengqondo esifanelekileyo samnceda njani uYeremiya nangona wayephila kumaxesha obunzima?
3 UYeremiya wabonakalisa isimo sengqondo esikhuthazayo nangona wayephila kumaxesha anzima. Kwanaxa wabona amasikizi awayesenzeka xa kwakusiwa iYerusalem ngowama-607 B.C.E., wakwazi ukubona nezinto ezikhuthazayo. UYehova wayengayi kumlibala uSirayeli, kwaye olo hlanga lwaluya kuqhubeka lukho. UYeremiya wabhala kwincwadi yeZililo esithi: “Zizenzo zobubele bothando bukaYehova ukuba sibe asifikanga esiphelweni sethu, ngenxa yokuba iinceba zakhe ngokuqinisekileyo aziyi kuphela. Zintsha ntsasa nganye. Kukhulu ukuthembeka kwakho.” (IZililo 3:22, 23) Ukutyhubela imbali, xa bephantsi kweemeko ezimaxongo, abakhonzi bakaThixo bebeye bazimisele ukugcina isimo sengqondo esikhuthazayo nesokuvuya.—2 Korinte 7:4; 1 Tesalonika 1:6; Yakobi 1:2.
4. Sisiphi isimo sengqondo esalondolozwa nguYesu, yaye samnceda njani?
4 Kwiminyaka engama-600 emva koYeremiya, uYesu wancedwa ukuba anyamezele ngenxa yesimo sengqondo sakhe esikhuthazayo. Sifunda oku: “Ngenxa yovuyo olwalubekwe phambi kwakhe [uYesu] wasinyamezela isibonda sentuthumbo, elidela ihlazo, waza wahlala phantsi ngasekunene kwetrone kaThixo.” (Hebhere 12:2) Kuyo nayiphi na inkcaso okanye intshutshiso awayejamelana nayo uYesu—kwanentlungu yokuthuthunjiswa esibondeni—wayecinga ‘ngovuyo olwalubekwe phambi kwakhe.’ Olo vuyo yayililungelo lokuthethelela ulongamo lukaYehova nokungcwalisa igama lakhe kuquka nethemba lokuzisa iintsikelelo ezizukileyo kubantu abathobelayo kwixesha elizayo.
Yiba Nesimo Sengqondo Sokulinda
5. Yiyiphi imeko ngokomzekelo esinokuthi isimo sengqondo sokulinda sisincede kuyo ukuze sibe nembono efanelekileyo ngezinto?
5 Ukuba sihlakulela isimo sengqondo esifana nesikaYesu, asiyi kuphulukana novuyo lukaYehova kwanokuba izinto azisoloko zisenzeka ngendlela nangexesha esilindele ngalo. Umprofeti uMika wathi: “Kodwa mna ke, ndiza kuhlala ndikhangele kuYehova. Ndiza kubonisa isimo sengqondo sokulindela kuThixo wosindiso lwam.” (Mika 7:7; IZililo 3:21) Nathi sinako ukubonisa isimo sengqondo sokulinda. Njani? Zininzi iindlela esinokukwenza ngazo oku. Mhlawumbi sinokuvakalelwa ukuba umzalwana othile okwisikhundla segunya uye wenza impazamo kwaye kufuneka elungiswe ngokukhawuleza. Isimo sengqondo sokulinda siya kusenza sicinge ukuba, ‘Ngaba ngokwenene wenze impazamo, okanye ndim lo uphazamayo? Ukuba wenze isiphoso, ngaba akungebi uYehova uvumela ukuba izinto zenzeke ngolo hlobo kuba evakalelwa kukuba loo mntu uza kuphucula kwaye amanyathelo akhawulezileyo okumlungisa akayomfuneko?’
6. Isimo sengqondo sokulinda siya kumnceda njani umntu onengxaki yobuqu?
6 Kusenokufuneka sibe nesimo sengqondo sokulinda xa sikhathazwa yingxaki yobuqu okanye sinobuthathaka obuthile. Masithi mhlawumbi sicela uncedo kuYehova, kodwa loo ngxaki iyaqhubeka ikho. Makuthiweni xa kunjalo? Simele siqhubeke sisenza konke okusemandleni ethu ukuyicombulula loo ngxaki size sibe nokholo kumazwi kaYesu athi: “Qhubekani nicela, niya kunikwa; qhubekani nifuna, niya kufumana; qhubekani ninkqonkqoza, niya kuvulelwa.” (Luka 11:9) Qhubeka uthandaza uze ulindele kuYehova. UYehova uya kuyiphendula imithandazo yakho ngexesha elifanelekileyo nangendlela yakhe.—1 Tesalonika 5:17.
7. Yiyiphi indlela isimo sengqondo sokulinda esinokuyinceda ngayo imbono yethu ngendlela ehlaziywa ngokuthe ngcembe esiyiqonda ngayo iBhayibhile?
7 Njengoko iziprofeto zeBhayibhile zizaliseka, indlela esiziqonda ngayo iZibhalo iyahlaziywa. Noko ke, maxa wambi sisenokucinga ukuba ingcaciso yento ethile iyacotha. Xa ingafiki ngexesha ebesingathanda ukuba ifike ngalo, ngaba siye sikulungele ukulinda? Khumbula, uYehova wakubona kufanelekile ukutyhila “imfihlelo engcwele kaKristu” ngokuthe ngcembe yaye eyityhila ukutyhubela iminyaka emalunga nama-4 000. (Efese 3:3-6) Ngoko ngaba sinesizathu sokuphelelwa ngumonde? Ngaba siyathandabuza ukuba “ikhoboka elithembekileyo neliyingqondi” limiselwe ukunika abantu bakaYehova ‘ukutya kwabo ngexesha elifanelekileyo’? (Mateyu 24:45) Kutheni sizibandeza uvuyo lobuthixo kuba nje singayiqondi ngokupheleleyo yonke into? Khumbula, nguYehova ogqiba ngexesha nangendlela yokutyhila ‘imicimbi yakhe eyimfihlo.’—Amosi 3:7.
8. Umonde kaYehova uye wangqineka uyingenelo njani kwabaninzi?
8 Bambi basenokudimazeka kuba bevakalelwa kukuba emva kokuba bekhonze ngokuthembeka kangangeminyaka, ‘imini kaYehova enkulu nebangela uloyiko’ isenokufika sele bengasaphili. (Yoweli 2:30, 31) Kodwa ke, kusenokubakhuthaza ukukhangela kwinkalo eyingenelo kulo mba. UPetros wacebisa: “Wugqaleni umonde weNkosi yethu njengosindiso.” (2 Petros 3:15) Umonde kaYehova uye wavumela izigidi ezingakumbi zabantu abantliziyo zilungileyo ukuba zifunde inyaniso. Ngaba asiyonto intle na leyo? Ngaphezu koko, okukhona uYehova esiba nomonde, kokukhona sifumana ithuba elingakumbi ‘lokuhlala silufezekisa usindiso lwethu ngoloyiko nangokungcangcazela.’—Filipi 2:12; 2 Petros 3:11, 12.
9. Ukuba oko sinokukwenza enkonzweni kaYehova kusikelwe umda, isimo sengqondo sokulinda sinokusinceda njani siyinyamezele loo meko?
9 Isimo sengqondo sokulinda siyasinceda ukuba singadimazeki xa inkcaso, ukugula, ukwaluphala okanye ezinye iingxaki zisithintela enkonzweni yoBukumkani. UYehova ulindele ukuba simkhonze ngentliziyo epheleleyo. (Roma 12:1) Noko ke, uNyana kaThixo, oba “nosizi ngesisweli nangehlwempu,” akafuni okungaphaya koko sinokukunikela ngokusengqiqweni; unjalo ke noYehova. (INdumiso 72:13) Ngaloo ndlela, siyakhuthazwa ukuba senze oko sinokukwenza, silinde ngomonde de iimeko zitshintshe—enoba kukule nkqubo yezinto okanye kukuleyo izayo. Khumbula: “UThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe, ngokuthi nilungiselele abangcwele yaye nisaqhubeka nibalungiselela.”—Hebhere 6:10.
10. Luluphi utyekelo olungelolwabuthixo olunokuphetshwa ngokuba nesimo sengqondo sokulinda? Cacisa.
10 Isimo sengqondo sokulinda sikwasinceda siphephe ukukhukhumala. Bambi abaye baba ngabawexuki baye abakulungela ukulinda. Basenokuba bebevakalelwa kukuba kufuneka kwenziwe uhlengahlengiso oluthile, mhlawumbi kwindlela eqondwa ngayo iBhayibhile okanye kwimicimbi yentlangano. Ukanti eyona nto bangayiqondiyo kukuba ngumoya kaYehova oshukumisela ikhoboka elithembekileyo neliyingqondi ukuba lenze uhlengahlengiso ngexesha Lakhe elifanelekileyo, kungekhona xa thina sivakalelwa kukuba luyimfuneko. Kwaye naluphi na uhlengahlengiso lumele luvisisane nokuthanda kukaYehova, kungekhona iingcamango zethu zobuqu. Abawexuki bavumela ukukhukhumala ukuba kujije iingqondo zabo kuze kubakhubekise. Kodwa ukuba bebamkele isimo sengqondo sikaKristu, ngebelulondolozile uvuyo lwabo baza bahlala phakathi kwabantu bakaYehova.—Filipi 2:5-8.
11. Sinokulisebenzisa ngokuyingenelo njani ixesha esilichitha silindile, yaye siya kuba silandela umzekelo woobani?
11 Kakade ke, ukulondoloza isimo sengqondo sokulinda akuthethi kuthi yiba livila okanye inqenerha. Kukho izinto esimele sizenze. Ngokomzekelo, kufuneka sizigcine sixakekile lufundisiso lobuqu lweBhayibhile size ngaloo ndlela sibe nomdla onzulu kwizinto zokomoya njengabaprofeti abathembekileyo neengelosi. Ethetha ngomdla onjalo, uPetros uthi: “Ngokuphathelele lona kanye olu sindiso babuzisa ngenkuthalo baza benza nophengululo lwenyameko abaprofeti . . . Kwaneengelosi zinqwenela ukuqondela kwezi zinto.” (1 Petros 1:10-12) Asilofundisiso lobuqu kuphela olufunekayo kodwa kwanokuya rhoqo kwiintlanganiso nokuthandaza kuyimfuneko. (Yakobi 4:8) Abo bayiphaphelayo intswelo yabo yokomoya ngokuzondla rhoqo ngokutya kokomoya nangokunxulumana namanye amaKristu babonisa ukuba basamkele isimo sengqondo sikaKristu.—Mateyu 5:3.
Yiba Nembono Esengqiweni
12. (a) Yiyiphi inkululeko eyafunwa nguAdam noEva? (b) Ube yintoni umphumo wokulandela koluntu ikhondo lika-Adam noEva?
12 Xa uThixo wadala isibini sokuqala esingabantu, ilungelo lokumisela imilinganiselo yokulungileyo nokubi laqhubeka lilelakhe. (Genesis 2:16, 17) UAdam noEva bapheq’ idyokhwe baza baphuncula kulwalathiso lukaThixo, ibe umphumo waloo nto leli hlabathi lisingqongileyo namhlanje. Umpostile uPawulos wathi: “Isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.” (Roma 5:12) Iminyaka engama-6 000 yembali yomntu, esusela kwixesha lika-Adam, iye yawangqina eyinyaniso amazwi kaYeremiya athi: “Ndazi kakuhle, Yehova, ukuba ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.” (Yeremiya 10:23) Ukuvuma ukuba amazwi kaYeremiya ayinyaniso akuthethi kuthi soyiswa lula. Kukuzijonga ngendlela esengqiqweni izinto. Achaza zonke ezo nkulungwane zininzi athe ‘umntu walawula umntu yaza yaba kukwenzakala kwakhe’ kuba kaloku abantu bebelawula bengayamanga ngoThixo.—INtshumayeli 8:9.
13. Yiyiphi imbono esengqiqweni amaNgqina kaYehova anayo ngoko kunokuphunyezwa ngabantu?
13 Xa ejonga imeko yoluntu, amaNgqina kaYehova ayaqonda ukuba oko kunokuphunyezwa kule nkqubo yezinto ikhoyo kulinganiselwe. Isimo sengqondo esakhayo sinokusinceda sihlale sivuya, kodwa ke eso ayisosicombululo kuyo yonke into. Ebutsheni beminyaka yee-1950, umfundisi waseMerika wapapasha incwadi eyathengwa kakhulu ethi The Power of Positive Thinking. Le ncwadi yathi inkoliso yemiqobo inokoyiswa xa kuhlangatyezwana nayo ngesimo sengqondo esikhuthazayo. Ngokuqinisekileyo ukucinga ngendlela eyakhayo kuyinto entle. Kodwa amava abonisa ukuba ulwazi, ubuchule, izinto eziphathekayo kunye nentaphane yabanye oothunywashe zikusikel’ umda oko kunokuphunyezwa ngubani. Kwaye xa kujongwa iingxaki zehlabathi, zinkulu gqitha ukuba ziconjululwe ngabantu ngempumelelo—enoba indlela yabo yokucinga ikhuthaza kangakanani na!
14. Ngaba amaNgqina kaYehova anesimo sengqondo esingakhuthaziyo? Cacisa.
14 Ngenxa yembono esengqiqweni anayo ngemibandela enjalo, maxa wambi amaNgqina kaYehova aye atyholwe ngokuba nesimo sengqondo esingakhuthaziyo. Kunoko, akukhuthalele ukuxelela abantu ngaLowo unokuphucula imeko yoluntu ngokusisigxina. Nalapho axelisa isimo sengqondo sikaKristu. (Roma 15:2) Kwaye azixakekisa ngokunceda abantu ukuba bakhe ulwalamano olulungileyo noThixo. Ayazi ukuba ethubeni, oko kuya kuba nomphumo omhle kakhulu.—Mateyu 28:19, 20; 1 Timoti 4:16.
15. Umsebenzi wamaNgqina kaYehova ubaphucula njani abantu ngabanye?
15 AmaNgqina kaYehova akazityesheli iingxaki zasekuhlaleni—ngokukodwa imikhwa engcolisayo ngokomoya—ewangqongileyo. Ngaphambi kokuba umntu onomdla abe liNgqina likaYehova, wenza iinguqulelo ezithile, kudla ngokufuneka oyise ukukhotyokiswa zizenzo ezingendawo ezingamkholisiyo uThixo. (1 Korinte 6:9-11) Ngaloo ndlela, amaNgqina kaYehova aye abanceda abo basabelayo ukuba boyise ukunxila, ukukhotyokiswa ziziyobisi, ukuziphatha okubi, nokuba likhoboka lokungcakaza. Abo bantu baguqukileyo baye bafunda ukondla iintsapho zabo ngendlela ebonakalisa ukuqola nenyanisekileyo. (1 Timoti 5:8) Xa abantu ngabanye kunye neentsapho zincedwa ngolu hlobo, ziyancipha iingxaki ekuhlaleni—aba mbalwa amakhoboka eziyobisi, aba mbalwa amatyeli ogonyamelo lwentsapho, njalo njalo. Ngokuba ngabemi abathobela umthetho nangokunceda abanye baphucule ubomi babo, amaNgqina kaYehova ayawuphungula umthwalo wamagosa amsebenzi wawo ikukuhlangabezana neengxaki zentlalo.
16. Kutheni amaNgqina kaYehova engabandakanyeki kwimizabalazo yehlabathi yokuguqula izinto?
16 Ke, ngaba amaNgqina kaYehova aye ayiguqula imo yokuziphatha ehlabathini? Kaloku, kwishumi elidluleyo leminyaka, inani lamaNgqina akhutheleyo liye lantinga ukusuka kwangaphantsi kancinane kwizi-3 800 000 laya kutsho kufutshane nezi-6 000 000. Olo lulwando olumalunga nezi-2 200-000, uninzi lwabo oluye lwalahla imikhwa engeyoyabulungisa xa lusiba ngamaKristu. Mininzi ngokwenene imiphefumlo ephuculiweyo! Sekunjalo, eli nani lifana nethontsi emphandeni xa lithelekiswa nokwanda kwabemi behlabathi ebudeni beli xesha linye—abazizi-875 000 000! AmaNgqina kaYehova aye akufumanisa kuluvuyo ukunceda abo basabelayo, nangona eqonda ukuba bambalwa kubantu abaza kuhamba ngendlela esa ebomini. (Mateyu 7:13, 14) Ngoxa amaNgqina elindele ukuba ihlabathi liphela liguquke lize libe bhetele, nto leyo enokwenziwa nguThixo kuphela, akabandakanyeki kwimizabalazo yehlabathi yokuguqula izinto, edla ngokuqaliswa ngeenjongo ezintle kodwa igqibele ngokuba ngumdudo woononkala yaye inogonyamelo.—2 Petros 3:13.
17. Yintoni eyenziwa nguYesu ukuze ancede abo babemngqongile, kodwa yintoni angazange ayenze?
17 Xa elandela eli khondo, amaNgqina kaYehova abonakalisa intembelo kuYehova efana naleyo yabonakaliswa nguYesu xa wayesemhlabeni. Emva phayaa kwinkulungwane yokuqala, uYesu wenza imimangaliso ngokuphilisa abantu. (Luka 6:17-19) Wada wavusa nabafileyo. (Luka 7:11-15; 8:49-56) Kodwa akazange akutshayele ukugula okanye aloyise utshaba olukukufa. Wayesazi ukuba lalingekafiki ixesha elimiselwe nguThixo lokwenza oko. Ekubeni wayenamandla amakhulu omntu ofezekileyo, kusenokwenzeka ukuba uYesu wayenokwenza okungakumbi ekucombululeni iingxaki ezinzulu zezobupolitika nezentlalo. Kuyabonakala ukuba abanye abantu ababephila ngexesha lakhe babefuna athabathe ulawulo aze enze loo nto kanye, kodwa uYesu akazange avume. Sifunda oku: “Abantu bakubona imiqondiso ayenzileyo, bathi: ‘Lo ngokuqinisekileyo ngumprofeti owayeza kuza ehlabathini.’ Ngoko ke uYesu, esazi ukuba babesele beza kuza, bambambe bamenze ukumkani, wemka kwakhona waya entabeni eyedwa.”—Yohane 6:14, 15.
18. (a) UYesu ebesoloko esibonakalisa njani isimo sengqondo sokulinda? (b) Umsebenzi kaYesu uye watshintsha njani ukususela ngowe-1914?
18 UYesu akazange avume ukubandakanyeka kwezobupolitika okanye ukuba ngunontlalo-ntle kuba wayesazi ukuba lalingekafiki ixesha lokuba athabathe ulawulo lobukumkani nelokuba enze imimangaliso yokuphilisa wonk’ ubani kuyo yonk’ indawo. Kwanasemva kokuba enyuselwe ezulwini waza waphila njengesidalwa somoya esingenakufa, wakulungela ukulindela ixesha elimiselwe nguYehova ngaphambi kokuba athabathe amanyathelo. (INdumiso 110:1; IZenzo 2:34, 35) Noko ke, ukususela ekubekweni kwakhe etroneni njengoKumkani woBukumkani bukaThixo ngowe-1914, uyaphuma “esoyisa nokuze akuphelelise ukoyisa kwakhe.” (ISityhilelo 6:2; 12:10) Hayi indlela esivuya ngayo kuba sizithoba kuye njengokumkani, ngoxa abanye abazingomb’ isifuba besithi bangamaKristu bekhetha ukungazazi iimfundiso zeBhayibhile eziphathelele uBukumkani!
Ukulinda—Ngaba Kubangela Unxunguphalo Okanye Uvuyo?
19. Kuxa kutheni apho ukulinda ‘kugulisa intliziyo,’ yaye kuxa kutheni apho kubangela uvuyo?
19 USolomon wayesazi ukuba ukulinda kunokukhokelela ekuphoxekeni. Wabhala: “Ulindelo olubanjezelweyo lugulisa intliziyo.” (IMizekeliso 13:12) Ngokuqinisekileyo, ukuba umntu unolindelo olungaqinisekiswanga, intliziyo inokugula okanye iphoxeke. Noko ke, ukulindela iziganeko ezivuyisayo—mhlawumbi umsitho womtshato, ukuzalwa komntwana, okanye ukuphinda sibonane nabantu esibathandayo—zinokusenza sibe nolindelo olukhatshwa luvuyo nakuba lusekude usuku lokuba zenzeke. Olo vuyo luyakhula xa silisebenzisa ngobulumko ixesha esilinde ngalo, sisenza amalungiselelo eso siganeko sizayo.
20. (a) Ziziphi iziganeko ezimangalisayo esilindele ngentembelo ukuzibona? (b) Sinokulufumana njani uvuyo ngoxa silindele ukuba kuzalisekiswe iinjongo zikaYehova?
20 Xa sinentembelo epheleleyo yokuba ulindelo lwethu luza kuzalisekiswa—kwanokuba asazi ukuba luya kuzalisekiswa nini na—akuyomfuneko ukuba ixesha esilinde ngalo ‘liyigulise intliziyo.’ Abanquli abathembekileyo bakaThixo bayazi ukuba uLawulo lukaKristu Lweminyaka Eliwaka sele lusemnyango. Banentembelo yokuba baza kubona isiphelo sokufa nezifo. Ngentumekelelo ekhatshwa luvuyo balinde ixesha abaya kwamkela ngalo abantu abangamawaka ezigidi abaphuma kwelabafileyo, kuquka nabafileyo ababathandayo. (ISityhilelo 20:1-3, 6; 21:3, 4) Kweli xesha lokuphatheka kakubi kwezidalwa nemeko-bume, bayalixabisa ithemba eliqinisekileyo lokubona iParadesi imiselwe emhlabeni. (Isaya 35:1, 2, 7) Ngoko ke, hayi indlela ekububulumko ngayo ukulisebenzisa kakuhle ixesha esilinde ngalo, ‘sisoloko sinokuninzi kokwenza emsebenzini weNkosi’! (1 Korinte 15:58) Qhubeka usitya ukutya kokomoya. Yakha ulwalamano olusondele nangakumbi noYehova. Funa abanye abantliziyo zabo zibashukumisela ukuba bakhonze uYehova. Khuthaza amanye amakholwa. Lisebenzise ngokunengenelo naliphi na ithuba uYehova asalivumelayo. Ukuba wenjenjalo, soze ukulindela kuYehova ‘kuyigulise intliziyo yakho.’ Kunoko, kuya kukwenza uvuye!
Ngaba Unokucacisa?
• UYesu wasibonakalisa njani isimo sengqondo sokulinda?
• Kukwiziphi iimeko apho amaKristu kufuneka abe nesimo sengqondo sokulinda?
• Kutheni amaNgqina kaYehova anelisekile kukulindela kuYehova?
• Ukulindela kuYehova kunokwenziwa njani kube ngumthombo wovuyo?
[Imifanekiso ekwiphepha 12]
UYesu wanyamezela ngenxa yovuyo olwalubekwe phambi kwakhe
[Umfanekiso okwiphepha 13]
Kwanasemva kokuba sikhonze kangangeminyaka, sinako ukuhlala sivuya
[Imifanekiso ekwiphepha 15]
Izigidi zabantu ziye zabuphucula ubomi bazo ngokuba ngamaNgqina kaYehova