Yiba Nesimo Sengqondo Esifana NesikaKristu
“Ngamana ke uThixo onika unyamezelo nentuthuzelo anganenza nibe nesimo sengqondo esifanayo neso wayenaso uKristu Yesu.”—ROMA 15:5.
1. Ubomi bukabani bunokuchatshazelwa njani sisimo sengqondo sakhe?
ISIMO sengqondo siphumeza indima enkulu ebomini. Isimo sengqondo sokungakhathali okanye sokukhuthala, isimo sengqondo esikhuthazayo okanye esingakhuthaziyo, isimo sengqondo sobundlobongela okanye sentsebenziswano, isimo sengqondo sokukhalaza okanye sokuba nombulelo zinokuba negalelo kakhulu kwindlela ubani azisingatha ngayo iimeko nendlela abanye abantu abasabela ngayo kuye. Xa ubani enesimo sengqondo esilungileyo, unokonwaba kwanakwezona meko zinzima. Kumntu onesimo sengqondo esibi, ayikho nje into ebonakala ilungile, nangona—xa uqwalasela kakuhle—izinto zihamba kakuhle ebomini.
2. Umntu uzifunda njani izimo zengqondo?
2 Izimo zengqondo—ezilungileyo okanye ezibi—zinokufundwa. Enyanisweni zimele zifundwe. Xa ithetha ngemveku, iCollier’s Encyclopedia ithi: “Isimo sengqondo eba naso ekugqibeleni imele isifumane okanye isifunde, kanye njengokuba imele ifumane okanye ifunde ulwimi okanye nabuphi na ubugcisa.” Sizifunda njani ke izimo zengqondo? Ngoxa zininzi izinto ezifak’ isandla, imeko-bume kunye nonxulumano ziba nempembelelo gqitha. Le ntyilalwazi ichazwe ngasentla ithi: “Siye sizifunde okanye sizifunxe, oku kweziponji, izimo zengqondo zabo sinxulumana ngokusondeleyo nabo.” Kumawaka eminyaka eyadlulayo, iBhayibhile yathetha into efanayo isithi: “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.”—IMizekeliso 13:20; 1 Korinte 15:33.
Umzekelo Wesimo Sengqondo Esifanelekileyo
3. Ngubani owayenesimo sengqondo esingumzekelo, yaye sinokumxelisa njani?
3 Kuzo zonke izinto, kwanakumba wesimo sengqondo, uYesu Kristu wamisela owona mzekelo mhle. Wathi: “Ndinibekela umzekelo, ukuze, kanye njengoko ndenjenjalo kuni, nenjenjalo nani.” (Yohane 13:15) Ukuze sifane noYesu, kuqala simele sifunde ngaye.a Sifundisisa ngobomi bukaYesu sinenjongo yokwenza oko umpostile uPetros wakuncomelayo: “Nabizelwa kulo eli khondo, kuba noKristu wabandezeleka ngenxa yenu, enishiya nomzekelo, ukuze nilandele emanyathelweni akhe ngokusondeleyo.” (1 Petros 2:21) Usukelo lwethu kukuba njengoYesu kangangoko sinako. Oko ke kuquka ukuhlakulela isimo sengqondo awayenaso.
4, 5. Yiyiphi inkalo yesimo sengqondo sikaYesu ebalaseliswayo kweyabaseRoma 15:1-3, yaye amaKristu anokumxelisa njani?
4 Yintoni ebandakanyekileyo ekubeni nesimo sengqondo sikaKristu uYesu? Isahluko se-15 sencwadi kaPawulos eyayisiya kwabaseRoma siyasinceda ekuphenduleni loo mbuzo. Kwiindinyana ezimbalwa zokuqala zesi sahluko, uPawulos ubhekisela kuphawu olubalaseleyo lukaYesu xa esithi: “Ngoko, thina bomeleleyo sifanele sithwale ubuthathaka babo bangomelelanga, singazikholisi thina ngokwethu. Ngamnye wethu makakholise ummelwane wakhe koko kulungileyo ukuze akheke. Kuba kwanoKristu akazange azikholise yena ngokwakhe; kodwa kunjengokuba kanye kubhaliwe kwathiwa: ‘Ungcikivo lwabo babekungcikiva luphezu kwam.’”—Roma 15:1-3.
5 Ukuze axelise isimo sengqondo sikaYesu, amaKristu ayakhuthazwa ukuba akulungele ukukhonza iimfuno zabanye ngokuthobeka kunokuba afune ukukholisa iziqu zawo kuphela. Okunene ukukulungela ngokuthobeka okunjalo ukukhonza abanye kuluphawu lwabo “bomeleleyo.” UYesu, owayomelele ngokomoya ngaphezu kwakhe nawuphi na umntu owakha waphila, wathetha wenjenje ngaye siqu: “UNyana womntu weza, kungekhona ukuze alungiselelwe, kodwa ukuze alungiselele nokuze anikele ngomphefumlo wakhe ube yintlawulelo ngenxa yabaninzi.” (Mateyu 20:28) NjengamaKristu, nathi sifuna ukuzabalazela ukukhonza abanye, kuquka “abo bangomelelanga.”
6. Sinokuyixelisa njani indlela uYesu awasabela ngayo kwinkcaso nakugculelo?
6 Olunye uphawu oluhle olwabonakaliswa nguYesu yindlela yokucinga neyokwenza izinto eyayisoloko isakha. Akazange avumele isimo sengqondo esingakhuthaziyo sabanye ukuba siphembelele esakhe isimo sengqondo esihle ekukhonzeni uThixo; nathi ke asifanele senjenjalo. Xa wayegculelwa yaye etshutshiswa ngenxa yokunqula uThixo ngokuthembeka, uYesu wanyamezela ngomonde yaye engakhalazi. Wayesazi ukuba inkcaso evela kubantu abangakholwayo nabangenakuqonda inokulindelwa ngabo bazama ukukholisa ummelwane wabo “koko kulungileyo ukuze akheke.”
7. UYesu wawubonakalisa njani umonde, yaye kutheni sifanele simxelise?
7 UYesu wabonakalisa isimo sengqondo esifanelekileyo nangezinye iindlela. Akazange avakalise ukuphelelwa ngumonde kuYehova kodwa walindela ngomonde ukuphunyezwa kweenjongo Zakhe. (INdumiso 110:1; Mateyu 24:36; IZenzo 2:32-36; Hebhere 10:12, 13) Ngaphezu koko, uYesu akazange aphelelwe ngumonde kubalandeli bakhe. Wabaxelela oku: “Nifunde kum”; ekubeni ‘wayenomoya wobulali,’ imfundiso yakhe yayisakha yaye ihlaziya. Kwaye ngenxa yokuba ‘wayethobekile ngentliziyo,’ akazange asebenzise amazwi ayindumbisa okanye akhukhumale. (Mateyu 11:29) UPawulos usikhuthaza ukuba sizixelise ezi nkalo zesimo sengqondo sikaYesu xa esithi: “Hlalani ninesi simo sengqondo wayenaso noKristu Yesu, owathi, nangona wayekubume bukaThixo, akacinga ngokurhwaphiliza, ukuze azenze alingane noThixo. Hayi khona, kodwa waziqongqotha waza wathabatha ubume bekhoboka, wafana nabantu.”—Filipi 2:5-7.
8, 9. (a) Kutheni sifanele sikusebenzele ukuhlakulela isimo sengqondo sokungazicingeli? (b) Kutheni singafanele sityhafe xa singawulandeli umzekelo owamiselwa nguYesu, yaye uPawulos waba ngumzekelo omhle njani kuloo nto?
8 Kulula ukuthi sifuna ukukhonza abanye yaye sifuna ukubeka iintswelo zabo phambili kunezethu. Kodwa xa sisihlola ngokunyaniseka isimo sengqondo sethu sisenokufumanisa ukuba iintliziyo zethu azityekelanga ngokupheleleyo kuloo nto. Ngoba? Okokuqala, kungenxa yokuba sinotyekelo lokucinga ngeziqu zethu esaluzuz’ ilifa kuAdam noEva; okwesibini, siphila kwihlabathi elikhuthaza ukuba umntu acinge ngesiqu sakhe. (Efese 4:17, 18) Ukuhlakulela isimo sengqondo sokungazicingeli kudla ngokuthetha ukuhlakulela indlela yokucinga engqubana nobuntu bethu obungafezekanga. Oko kufuna uzimiselo nomgudu.
9 Ukungafezeki kwethu okuzicaceleyo, xa kuthelekiswa nomzekelo ofezekileyo uYesu awasishiya nawo, maxa wambi kusenokusityhafisa. Sisenokuthandabuza kwanokuba ukuba nesimo sengqondo esifana neso uYesu wayenaso kunokwenzeka. Kodwa phawula amazwi akhuthazayo kaPawulos: “Ndiyazi ukuba kum, oko kukuthi, kwinyama yam, akuhlali nto ilungileyo; kuba umnqweno ukho kum, kodwa amandla okwenza oko kuhle akakho. Kuba okulungileyo endikunqwenelayo andikwenzi, kodwa okubi endingakunqweneliyo kuko endikuqheliselayo. Ngokwenene ndiyayoliswa ngumthetho kaThixo ngokomntu endinguye ngaphakathi, kodwa ndibona omnye umthetho emalungwini am usilwa nomthetho wengqondo yam yaye undithimbela emthethweni wesono osemalungwini am.” (Roma 7:18, 19, 22, 23) Kuyinyaniso ukuba, ukungafezeki kukaPawulos kwakumphazamisa kumphazamisile ekwenzeni ukuthanda kukaThixo ngendlela awayenqwenela ngayo, kodwa isimo sakhe sengqondo—indlela awayecinga nawayevakalelwa ngayo ngoYehova nangomthetho Wakhe—sasingumzekelo. Nesethu sinokuba njalo.
Ukulungisa Izimo Zengqondo Ezingalunganga
10. Sisiphi isimo sengqondo uPawulos awakhuthaza abaseFilipi ukuba basihlakulele?
10 Ngaba kunokwenzeka ukuba bambi kufuneke balungise isimo sengqondo esingalunganga? Ewe. Kucacile ukuba kwakunjalo kwamanye amaKristu enkulungwane yokuqala. Kwincwadi yakhe eyayisiya kwabaseFilipi, uPawulos wathetha ngokuba nesimo sengqondo esilungileyo. Wabhala: “Asikuko nokuba sele ndilufumene [uvuko lokuqala olukhokelela kubomi basezulwini] okanye sele ndenziwe ndagqibelela, kodwa ndinosukelo lokuzuza oko nam ndizuzelwe kona nguKristu Yesu. Bazalwana, andizigqali njengosele ekuzuzile; kodwa kukho into enye ngako: Ndiyazilibala izinto ezingasemva ndize ndolulele kwizinto ezingaphambili, ndisukela umvuzo wobizo lwaphezulu lukaThixo ngoKristu Yesu. Ngoko ke, sonke thina baqolileyo, masibe nesi simo sengqondo.”—Filipi 3:12-15.
11, 12. Ziziphi iindlela uYehova asibonisa ngazo isimo sengqondo esifanelekileyo?
11 Amazwi kaPawulos abonisa ukuba nabani na othi, akuba ebe ngumKristu, angayiboni imfuneko yokwenza inkqubela unesimo sengqondo esingalunganga. Loo mntu akasamkelanga isimo sengqondo sikaKristu. (Hebhere 4:11; 2 Petros 1:10; 3:14) Ngaba umntu onjalo unguncanyelweni? Akunjalo konke konke. UThixo unako ukusinceda siguqule isimo sengqondo sethu ukuba ngokwenene siyafuna. UPawulos uhlabela mgama esithi: “Ukuba ninolunye utyekelo lwengqondo, uThixo uya kunityhilela esi simo sengqondo singasentla.”—Filipi 3:15.
12 Noko ke, ukuba sinqwenela ukuba uYehova asityhilele isimo sengqondo esifanelekileyo, nathi simele siphumeze indima yethu. Ukulifundisisa ngokunyaniseka iLizwi likaThixo sincedwa naziimpapasho zamaKristu ezilungiselelwa “likhoboka elithembekileyo neliyingqondi” kuya kwenza abo ‘banolunye utyekelo lwengqondo’ bakwazi ukuhlakulela isimo sengqondo esifanelekileyo. (Mateyu 24:45) Abadala abangamaKristu, abamiselwe ngomoya oyingcwele ‘ukuba balaluse ibandla likaThixo,’ baya kukuvuyela ukunikela inkxaso. (IZenzo 20:28) Hayi indlela esinombulelo ngayo kuba uYehova enolwazelelo ngezenzo zethu zokungafezeki yaye enikela uncedo ngothando! Masilwamkele ke.
Ukufunda Kwabanye
13. Yintoni esiyifundayo ngesimo sengqondo esifanelekileyo kwingxelo yeBhayibhile engoYobhi?
13 KweyabaseRoma isahluko se-15, uPawulos ubonisa ukuba ukucamngca ngemizekelo yamandulo kunokusinceda silungise isimo sengqondo sethu. Uyabhala: “Zonke izinto ezabhalwa kwixesha langaphambili zabhalelwa ukuyalela thina, ukuze ngonyamezelo lwethu nangentuthuzelo yeZibhalo sibe nethemba.” (Roma 15:4) Abanye babakhonzi abathembekileyo bakaYehova bamandulo kwakufuneka balungise iinkalo ezithile zezimo zabo zengqondo. Ngokomzekelo, ubukhulu becala isimo sengqondo sikaYobhi sasisihle. Akazange athi nguYehova owayemhlisele ububi, yaye engazange avumele ukubandezeleka ukuba kugungqise intembelo yakhe kuThixo. (Yobhi 1:8, 21, 22) Ukanti, wayetyekele ekuzithetheleleni. UYehova walathisa uElihu ukuba aye kunceda uYobhi alungise olo tyekelo. Kunokuba azive ethukwa, ngokuthobeka uYobhi wayamkela into yokuba kufuneka atshintshe isimo sakhe sengqondo ibe waqalisa ukwenjenjalo.—Yobhi 42:1-6.
14. Sinokufana njani noYobhi xa silulekwa ngesimo sengqondo esinaso?
14 Ngaba besiya kusabela ngendlela uYobhi awasabela ngayo ukuba ngobubele omnye umKristu ebesixelela ukuba sibonakala ngathi sinesimo sengqondo esingalunganga? NjengoYobhi, ngamana ‘singangabaleli nantoni na engafanelekanga kuThixo.’ (Yobhi 1:22) Xa sibandezeleka ngokungafanelekanga, ngamana singangaze sikhalaze okanye sityhole uYehova ngobunzima esityhubela kubo. Ngamana singakuphepha ukuzama ukuzithethelela, sikhumbule ukuba enoba ngawaphi na amalungelo esivavwe ngawo enkonzweni kaYehova, ‘singamakhoboka angancedi nganto’ nje kuphela.—Luka 17:10.
15. (a) Sisiphi isimo sengqondo esingalunganga esabonakaliswa ngabanye babalandeli bakaYesu? (b) UPetros wasibonakalisa njani isimo sengqondo esihle?
15 Ebudeni benkulungwane yokuqala, bambi ababephulaphula uYesu baba nesimo sengqondo esingafanelekanga. Ngenye imini, uYesu wathetha into ekwakunzima ukuyiqonda. Besabela kuloo nto, “abaninzi kubafundi bakhe, bakukuva oku, bathi: ‘Le ntetho iyothusa; ngubani na onako ukuyiphulaphula?’” Kucacile ukuba abo babethetha ngolu hlobo babenesimo sengqondo esingalunganga. Kwaye isimo sengqondo sabo esiphosakeleyo sakhokelela ekubeni bayeke ukuphulaphula uYesu. Ingxelo ithi: “Ngenxa yoko abaninzi kubafundi bakhe baphindela kwizinto ezisemva baza ababi sahamba naye.” Ngaba bonke babenesimo sengqondo esingalunganga? Akunjalo. Le ngxelo ihlabela mgama: “Ngoko ke uYesu wathi kwabalishumi elinesibini: ‘Ngaba nani nifuna ukumka?’ USimon Petros wamphendula wathi: ‘Nkosi, siya kumka siye kubani na?’” Ngokungathi kunjalo, uPetros waziphendula esithi: “Nguwe onamazwi obomi obungunaphakade.” (Yohane 6:60, 66-68) Esinjani ukuba sihle isimo sengqondo! Xa sidibana neengcaciso okanye nokulungiswa kwendlela esiziqonda ngayo iZibhalo ekuqaleni esinokuyifumanisa kunzima ukuyamkela, ngaba bekungayi kuba kuhle ukuba nesimo sengqondo esabonakaliswa nguPetros? Hayi indlela ebekuya kuba bubudenge ngayo ukuyeka ukukhonza uYehova okanye ukuthetha ngendlela enxamnye ‘namazwi aphilileyo’ kuba nje kunzima ukuziqonda ezinye izinto ekuqaleni!—2 Timoti 1:13.
16. Sisiphi isimo sengqondo esothusayo esabonakaliswa ziinkokeli zonqulo ezingamaYuda zomhla kaYesu?
16 Iinkokeli zonqulo zamaYuda zenkulungwane yokuqala zasilela ukuba nesimo sengqondo uYesu awayenaso. Ukuzimisela kwazo ukungamphulaphuli uYesu kwabonakala xa wavusa uLazaro kwabafileyo. Kuye nabani na onesimo sengqondo esihle, loo mmangaliso umele ukuba waba bubungqina obubambekayo bokuba uYesu wayevela kuThixo. Noko ke, sifunda oku: “Ngenxa yoko ababingeleli abaziintloko nabaFarisi bahlanganisela ndawonye iSanhedrin baza bathi: ‘Yintoni na emasiyenze, ngenxa yokuba lo mntu wenza imiqondiso emininzi? Ukuba siyamyeka ngale ndlela, bonke baya kukholwa kuye, aze amaRoma eze ayithabathe indawo yethu nohlanga lwethu.’” Saba yintoni ke isicombululo? “Ukususela ngaloo mini baceba ukumbulala.” Ngaphezu kokuceba ukubulala uYesu, bazimisela ukubulala ubungqina obuphilayo bokuba ungumenzi wemimangaliso. “Ababingeleli abaziintloko baceba ukubulala kwanoLazaro.” (Yohane 11:47, 48, 53; 12:9-11) Hayi indlela ebesiya kuba lizothe ngayo ukuba besinokuba nesimo sengqondo esifanayo size siphazanyiswe okanye sicatshukiswe zizinto enyanisweni ebesifanele ukuba siyazivuyela! Hayi indlela okuyingozi ngayo oko!
Ukulandela Isimo Sengqondo Esikhuthazayo SikaKristu
17. (a) Kuphantsi kwaziphi iimeko awathi uDaniyeli wabonakalisa isimo sengqondo sokuba nenkalipho? (b) UYesu wazibonakalisa njani ukuba ukhaliphile?
17 Abakhonzi bakaYehova balondoloza isimo sengqondo esikhuthazayo. Xa iintshaba zikaDaniyeli zajija iyelenqe lokuba kuwiswe umthetho owalela ukuba kuthandazwe kuye nawuphi na uthixo okanye umntu ngaphandle kokumkani kangangeentsuku ezingama-30, uDaniyeli wayeqonda ukuba oko kwakuza kuchaphazela ulwalamano lwakhe noYehova uThixo. Ngaba wayeza kuyeka ukuthandaza kuThixo kangangeentsuku ezingama-30? Unotshe, ngenkalipho waqhubeka ethandaza kuYehova izihlandlo ezithathu ngosuku ngokwesiqhelo. (Daniyeli 6:6-17) NoYesu akazange avume ukoyikiswa ziintshaba zakhe. Ngenye iSabatha wadibana nendoda eyayinesandla esomileyo. UYesu wayesazi ukuba amaYuda amaninzi awayelapho ayengayi kuyithanda into yokuba aphilise umntu ngeSabatha. Wawangqala efuna uluvo lwawo ngalo mba. Athi akungavumi, uYesu wayiphilisa loo ndoda. (Marko 3:1-6) UYesu akazange oyike ukuzalisekisa uthumo lwakhe awayevakalelwa kukuba lufanelekile.
18. Kutheni abanye besichasa nje, kodwa sifanele sisabele njani kwisimo sengqondo sabo esingakhuthaziyo?
18 Namhlanje amaNgqina kaYehova ayaqonda ukuba nawo akamele oyikiswe yinto yokuba abachasi besenokungasabeli kakuhle. Kungenjalo, ebeya kuba akabonakalisi isimo sengqondo sikaYesu. Baninzi abawachasayo amaNgqina kaYehova, bambi besenjenjalo ngenxa yokungazi yaye abanye kuba bewathiyile amaNgqina okanye isigidimi sawo. Kodwa singaze sivumele ukungabi nabuhlobo kwabo kuchaphazele isimo sengqondo sethu esikhuthazayo. Asifanele sivumele abanye balawule indlela esinqula ngayo.
19. Sinokusibonakalisa njani isimo sengqondo esifana nesikaYesu Kristu?
19 UYesu wayebonakalisa isimo sengqondo esikhuthazayo ngalo lonke ixesha kubalandeli bakhe nakumalungiselelo kaThixo, enoba kwakunzima kangakanani ukwenjenjalo. (Mateyu 23:2, 3) Sifanele siwulandele umzekelo wakhe. Kuyavunywa ukuba abazalwana bethu abafezekanga, kodwa ke nathi asifezekanga. Kwaye sinokuzifumana phi ke izinxulumani ezibhetele nabahlobo abanyaniseke ngokwenene ngaphandle kobuzalwana behlabathi lonke? UYehova akakasiniki ukuliqonda ngokupheleleyo iLizwi lakhe elibhaliweyo, kodwa liliphi iqela lonqulo eliliqonda ngakumbi? Masihlale sinesimo sengqondo esilungileyo ngalo lonke ixesha, isimo sengqondo uYesu Kristu awayenaso. Phakathi kwezinye izinto, oku kuquka ukwazi indlela yokulindela kuYehova, njengoko siza kuxubusha kwinqaku elilandelayo.
[Umbhalo osemazantsi]
a Impapasho ethi Oyena Mntu Ubalaseleyo Wakha Waphila, epapashwe yiWatchtower Bible and Tract Society of New York, Inc., ixubusha ngobomi nobulungiseleli bukaYesu.
Ngaba Unokuchaza?
• Ubomi bethu buchatshazelwa njani sisimo sengqondo sethu?
• Chaza isimo sengqondo awayenaso uYesu Kristu.
• Yintoni esinokuyifunda kwisimo sengqondo sikaYobhi?
• Sisiphi isimo sengqondo esilungileyo esifanele sibe naso xa sichaswa?
[Imifanekiso ekwiphepha 7]
UmKristu onesimo sengqondo esilungileyo wenza unako-nako ukuze ancede abanye
[Umfanekiso okwiphepha 9]
Ukulifundisisa ngokunyaniseka iLizwi likaThixo kuyasinceda sibe nesimo sengqondo awayenaso uKristu