Ngaba Ufanele Wenze Uphando Ngezinye Iinkonzo?

“NDANDISELE ndiza kugqiba unyaka ndisiya kwiintlanganiso zamaKristu, ibe ndandikunandipha ukuxelela abanye ngoBukumkani bukaThixo,” utsho uMiguel, ngoku ongomnye wamaNgqina kaYehova eMzantsi Merika. “Ndandula ke ndaqalisa ukuphulaphula iinkqubo zonqulo ezidlala kunomathotholo ndaza ndabukela nabashumayeli kumabonwakude. Ndandicinga ukuba ezo nkqubo zazinokundinceda ndibaqonde bhetele abantu bezinye iinkonzo. Ndandisazi ukuba iimfundiso zabo azivisisani neBhayibhile, kodwa ke ndandifuna ukwazi.”

Kwakwelo lizwe linye, uJorge wayekuzondelele ukufundisa abanye ngonqulo lokwenyaniso. Ukanti, ngaxa lithile, naye waqalisa ukuphulaphula iinkqubo zonqulo zikanomathotholo nezikamabonwakude. “Kuyafuneka kaloku uzazi izinto ezicingwa ngabanye abantu,” wayedla ngokutsho. Xa ebuzwa ngeengozi ezinokubangelwa koko kuzichanaba kwiimfundiso zobuxoki, wayedla ngokuphendula athi: “Ayikho into enokuloyisa ukholo lomntu oyaziyo inyaniso yeBhayibhile.” La mava aphakamisa umbuzo obalulekileyo othi, Ngaba kububulumko ukuphulaphula oko abanye bakukholelwayo?

Ukuqonda UbuKristu Bokwenyaniso

Emva kokufa kwabapostile, unqulo lokwenyaniso lwangcoliswa kukukhula kweendidi ngeendidi zoosingamaKristu. Ekubona kusengaphambili oko, uYesu wachaza enye yeendlela zokwahlula oosingamaKristu kubuKristu bokwenyaniso. Okokuqala, walumkisa esithi: “Baphapheleni abaprofeti bobuxoki abeza kuni ngezambatho zeegusha, kodwa ngaphakathi beziingcuka eziqwengayo.” Wandula wongezelela esithi: “Nobaqonda ngeziqhamo zabo.” (Mateyu 7:15-23) Abalandeli bokwenene bakaYesu baqhelisela oko wakufundisayo, yaye baqondwa lula ngeziqhamo zabo ezihle. Kanye njengoko uYesu wenzayo, batyelela abantu baze babachazele ngoBukumkani bukaThixo besebenzisa iZibhalo. Belandela umzekelo kaYesu, bacezela kude neengxwabangxwaba zezobupolitika zehlabathi nezentlalo. Bamkela iBhayibhile njengeLizwi likaThixo yaye bayayihlonela njengeyinyaniso. Bayalazisa igama likaThixo. Yaye ekubeni bezabalazela ukuqhelisela uthando afundisa ngalo uThixo, ababi nanxaxheba kwiimfazwe. Kunoko, baphathana njengabazalwana.—Luka 4:43; 10:1-9; Yohane 13:34, 35; 17:16, 17, 26.

Ngokutsho kweZibhalo, sinako ‘ukuwubona umahluko phakathi kwelungisa nongendawo, phakathi kwalowo ukhonza uThixo nalowo ungamkhonzanga.’ (Malaki 3:18) Abanquli bokwenyaniso banamhlanje bacinga ntonye yaye benza ntonye, kanye njengokuba amaKristu enkulungwane yokuqala ayesenza. (Efese 4:4-6) Wakuba ulifumene elo qela lamaKristu okwenyaniso, yintoni ke ekwenza uphande okanye ufun’ ukwazi iinkolelo zabanye?

Balumkele Abafundisi Bobuxoki

IBhayibhile iyavuma ukuba kwanasemva kokuba ufunde inyaniso yeBhayibhile, ikho ingozi yokungcoliswa ngokomoya ziimfundiso zobuxoki. Umpostile uPawulos walumkisa: “Lumkani, ningathabatheki ziintanda-bulumko nayinkohliso elambathayo esekelwe kwizithethe zabantu, nakwizinto eziziziqalelo zehlabathi, kungekhona kuKristu.” (Kolose 2:8) Hayi indlela ocace ngayo umfanekiso esiwuzotyelwa yile ndinyana! Njengamarhamncwa afuna ukusithabatha aze asiqwenge, abafundisi bobuxoki banokuba yingozi ngokwenene.

Kuyinyaniso ukuba uPawulos wakuphawula oko babekukholelwa abanye. Ngesinye isihlandlo waqalisa intetho ngala mazwi: “Madoda aseAthene, ndiyabona ukuba ezintweni zonke nibonakala ngathi nizinikele ngakumbi ekoyikeni izithixo kunokuba abanye benjalo. Ngokomzekelo, ngoxa bendidlula ndaza ndaqwalasela ngenyameko izinto zenu ezihlonelwayo ndifumene nesibingelelo ekubhalwe kuso kwathiwa ‘Kongaziwayo uThixo.’” (IZenzo 17:22, 23) Noko ke, uPawulos wayengasoloko esondla ingqondo yakhe ngeentanda-bulumko zamaciko amaGrike.

Ukwazi iimvelaphi kunye neenkolelo zeenkonzo zobuxoki kwahlukile ekuzondleni ngazo.a UYehova umisele “ikhoboka elithembekileyo neliyingqondi” ukuba lilungiselele imfundiso esekelwe kwiLizwi lakhe. (Mateyu 4:4; 24:45) UPawulos wabhala: “Aninakuba nenxaxheba ‘etafileni kaYehova’ nasetafileni yeedemon. Okanye ‘simenza abe nekhwele na uYehova’?”—1 Korinte 10:20-22.

Abanye kwaba bafundisi bobuxoki basenokuba babengamaKristu okwenyaniso, kodwa ethubeni baphambuka enyanisweni baya kokuphosakeleyo. (Yude 4, 11) Oku akufanele kusimangalise. Emva kokuthetha ‘ngekhoboka elithembekileyo neliyingqondi’ elimela iqumrhu lamaKristu athanjisiweyo, uYesu wathetha ‘ngekhoboka elinobubi,’ udidi olukhalaza lusithi, “Inkosi yam iyalibala,” luze luqalise ukubetha amakhoboka angamadlelane alo. (Mateyu 24:48, 49) Ngokufuthi, aba bantu kunye nabalandeli babo abanazo iimfundiso ezizezabo; eyona nto bayifunayo kukutshabalalisa ukholo lwabanye. Ethetha ngabo, umpostile uYohane wabhala: “Ukuba umntu uza kuni, engazisi yona le mfundiso, ningaze nimamkele emakhayeni enu okanye nimbulise.”—2 Yohane 10; 2 Korinte 11:3, 4, 13-15.

Abantu abanyanisekileyo nabafuna inyaniso benza kakuhle xa bebek’ iliso elibukhali koko bakuva kwiinkonzo ngeenkonzo. Ethubeni, uThixo uza kubasikelela abantliziyo zinyanisekileyo abafuna inyaniso. IBhayibhile ithetha yenjenje ngobulumko bobuthixo: “Ukuba uyaqhubeka ubufuna njengesilivere, ubuphande njengobuncwane obufihliweyo, uya kwandula . . . ukufumane ukumazi uThixo.” (IMizekeliso 2:4, 5) Akuba ekufumene ukumazi uThixo ngeBhayibhile nangebandla lamaKristu yaye akuba eyibonile indlela uYehova abasikelela ngayo abo bakhokelwa lolo lwazi, amaKristu okwenyaniso akaqhubeki ephulaphula iimfundiso zobuxoki zonqulo.—2 Timoti 3:14.

[Umbhalo osemazantsi]