Kutheni Sifanele Sihlakulele Isidima?

KUTSHANJE indoda esele iqinile yaseJapan egama linguKunihito iye yafudukela eUnited States.a Kwiiveki nje emva kokufika kwayo, yajamelana nemeko eyayisenokonakalisa umsebenzi wayo. UKunihito uyabalisa: “Xa umphathi wam wandibuza enoba ndinokukwazi ukusingatha imbopheleleko ethile, ndazimisela ukuyamkela. Sekunjalo, ngenxa yokuba ndakhuliselwa ukuba ndikujonge ukuthozama njengesidima, ndaphendula ndathi: ‘Andiqinisekanga ukuba ndinako ukuyenza, kodwa ndiza kwenza unako-nako.’ Ndavakala ngokungathi andifanelekanga yaye andizithembanga kulo mphathi waseMerika. Ndathi ndakukubona oko, ndaqonda ukuba kufuneka ndenze uhlengahlengiso.”

UMaria, ohlala kwisiXeko saseNew York, wayengumfundi ophuma emagqabini, yaye wayesoloko ekuvuyela ukunceda abo wayefunda nabo. UJuan wayefunda naye yaye ngamathub’ athile wayencedwa nguMaria. Kodwa waba nomdla wokuthandana naye waza wazama ukuzithandisa kuye. Nakuba wayenqwenela ukuhlala enyulu, uMaria wanikezela kwizenzo zikaJuan waza wabandakanyeka ekuziphatheni okubi ngokwesini.

Ngokwenene kulucelomngeni ukuba nesidima kweli hlabathi lanamhlanje elineendlela zokuphila ezahlukahlukeneyo neliwohlokileyo ngokuziphatha. Ngoko ke, kutheni sifanele sihlakulele isidima? Ngenxa yokuba ihambo enesidima iyamkholisa uThixo, yaye inkoliso yethu inqwenela ukumkholisa.

ILizwi likaThixo, iBhayibhile, libongoza abo balifundayo ukuba bahlakulele isidima. Ngokomzekelo, umpostile uPawulos ubhala esithi: ‘Hlalani nicinga ngezinto ezinesidima, nezincomekayo.’ (Filipi 4:8) Yaye umpostile uPetros usibongoza ukuba ‘senze umgudu wenyameko size elukholweni lwethu songezelele isidima.’ (2 Petros 1:5) Kodwa siyintoni isidima? Ngaba sinokufundiswa eklasini? Sinokusihlakulela njani?

[Umbhalo osemazantsi]