Yimani Ngokuqinileyo Nangolweyiseko Oluqinileyo

“Umsebenzi Omkhulu Wobugcisa”

UKUSUSELA ekuqaleni komsebenzi wawo wale mihla, amaNgqina kaYehova ebenomdla ngokunzulu kwesinye seziprofeto zikaYesu Kristu esithi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:14) Njengoko owe-1914—ukuqalisa ‘kwemihla yokugqibela’—wawusondela, aBafundi BeBhayibhile abanyanisekileyo baqalisa ngolweyiseko oluqinileyo iphulo elingenakuthelekiswa nanto emhlabeni wonke lemfundo esekelwe kwiZibhalo Ezingcwele.—2 Timoti 3:1.

Ukuze bafikelele usukelo lwabo lokuvakalisa iindaba ezilungileyo emhlabeni wonke, aba bakhonzi bakaYehova basebenzisa inkqubo entsha, necacileyo. Ukuze sazi okungakumbi ngayo, makhe sibuye umva.

Indlela Entsha Yokuvakalisa Iindaba Ezilungileyo

NguJanuwari wonyaka we-1914. Yiba nomfanekiso-ngqondweni wakho uhleli phakathi kwabantu abangama-5 000 kwiholo emnyama kwisiXeko saseNew York. Phambi kwakho kukho iscreen esikhulu semifanekiso eshukumayo. Kweso screen kuvela indoda eneenwele ezimhlophe inxibe idyasi ema emadolweni. Ubuqhele ukubona imifanekiso eshukumayo ethe cwaka, kodwa le ndoda iyathetha, yaye uyakuva oko ikuthethayo. Ukumboniso wokuqala womsebenzi wobugcisa ohlaziyiweyo, yaye isigidimi sawo sikhethekile. Esi sithethi nguCharles Taze Russell, umongameli wokuqala weWatch Tower Society, yaye lo mboniso yi-“Photo-Drama of Creation.”

UC. T. Russell waphawula ukuba imifanekiso eshukumayo yayinokufikelela abantu abaninzi kakhulu. Ngoko ke, ngowe-1912, waqalisa ukulungiselela i-“Photo-Drama of Creation.” Ekugqibeleni, wavelisa imifanekiso eshukumayo yeslides ethabatha iiyure ezisibhozo, enemibala-bala nenesandi.

Njengoko yayilungiselelwe ukuba iboniswe ngokwamacandelo amane, i-“Photo-Drama” yabonisa ababukeli ukususela endalweni ukutyhubela imbali yoluntu ukusa kuvuthondaba lwenjongo kaYehova uThixo ngomhlaba nangoluntu ekupheleni koLawulo lukaKristu Lweminyaka Eliwaka. Kwakuza kudlula iminyaka emininzi ngaphambi kokuba ubugcisa obunjalo busetyenziswe ngokuphumelelayo kwezorhwebo. Ukanti, izigidi zabantu zayibukela simahla i-“Photo-Drama of Creation”!

Kwalungiselelwa umculo orekhodiweyo wodidi oluphezulu neentetho ezingama-96 ezishicilelwe kumacwecwe egramafoni ukuze ezi zinto zisetyenziswe kwi-“Photo-Drama.” Kwenziwa uhlobo oluthile lweslides ngemifanekiso emihle ebonisa imbali yehlabathi. Kanjalo kwafuneka kwenziwe amakhulu emizobo emitsha. Eminye imifanekiso yeslides emibalabala yayenziwe ngesandla. Yaye oku kwenziwa ngokuphindaphindiweyo, kuba ekuhambeni kwexesha kwalungiselelwa ezingama-20, ngasinye sinamacandelo amane. Oku kwabangela ukuba kuboniswe inxalenye ye-“Photo-Drama” kwizixeko ezahlukahlukeneyo ezingama-80 ngosuku olunye!

Okwakusenzeka Emfihlekweni

Yintoni eyayisenzeka emfihlekweni ngoxa kwakuboniswa i-“Photo-Drama”? “Kuloo Drama kwaqala kwavela umfanekiso kaMzalwan’ uRussell,” watsho njalo uMfundi WeBhayibhile ogama linguAlice Hoffman. “Njengoko evela kwiscreen imilebe yakhe yaqalisa ukushukuma, yaye kwakudlalwa igramafoni . . . kwaye sasikunandipha ukuphulaphula ilizwi lakhe.”

Ethetha ngokwenziwa kwemifanekiso ethabatha ixesha elide ikhawuleze, uZola Hoffman ukhumbula oku: “Ndahlala apho ndibambe ongezantsi njengoko sasibukele oko kwakusenzeka ekudalweni komhlaba. Sasibukele ukuvuleka kweentyatyambo zenyibiba ngokuthe ngcembe.”

Umthandi womculo uKarl F. Klein weQumrhu Elilawulayo lamaNgqina kaYehova wongezelela esithi: “Njengoko kwakuboniswa le mifanekiso, kwakudlalwa umculo omnandi kakhulu, uncuthu lweengoma ezifana nethi Narcissus nethi Humoreske.”

Zikho nezinye iziganeko ezingalibalekiyo. UClayton J. Woodworth, Omnci. uthi: “Maxa wambi kwakusenzeka iimpazamo ezihlekisayo. Ngesinye isihlandlo kwakudlala icwecwe lengoma ethi ‘Sabela Entabeni Yakho Njengentaka,’ yaye kwiscreen kwavela umfanekiso wesilwanyana esikhulu kakhulu esasikho ngaphambi koMkhukula”!

Ngaphandle kwe-“Photo-Drama of Creation” eqhelekileyo, kungekudala kwabakho neeseti ze-“Eureka Drama”. (Bona ibhokisi.) Enye yayineentetho ezirekhodiweyo, kunye nomculo orekhodiweyo. Ukanti enye yayinomculo orekhodiweyo neslides. Nangona i-“Eureka Drama” yayingenayo imifanekiso eshukumayo, yayiboniswa ngokuphumelelayo kwimimandla engenabemi baninzi.

Isixhobo Sokushumayela Esinamandla

Ngasekupheleni kowe-1914, i-“Photo-Drama” yayibonwe ngabantu abafikelela kwizi-9 000 000 eMntla Merika, eYurophu naseOstreliya. Nangona babembalwa, aBafundi BeBhayibhile babenolweyiseko oluqinileyo olwalufuneka ukuze bavakalise iindaba ezilungileyo ngale ndlela intsha. Ngovuyo banikela imali eyayifuneka ukuze kuqeshwe iindawo ezifanelekileyo ekwakuza kwenzelwa kuzo le miboniso. Ngoko i-“Photo-Drama of Creation” yaba negalelo elikhulu ekuqhelaniseni ababukeli neLizwi likaThixo neenjongo zakhe.

Omnye umntu owayebhalela uC.T. Russell ileta, wabhala wenjenje: “Ukuqala kwam ukutyelela iDrama yakho kwabangela utshintsho ebomini bam; okanye, mhlawumbi mandithi, kwabangela utshintsho kwindlela endandiyazi ngayo iBhayibhile.” Omnye wathi: “Ndandisele ndiza kwaphukelwa ngumkhombe wokholo lwam yaye ndivakalelwa kukuba ndasindiswa yi-‘Photo-Drama of Creation’ eye yaboniswa apha kwihlobo elidluleyo. . . . Ngoku ndinoxolo olungenakufunyanwa kweli hlabathi yaye andinakwahlukana nalo ngenxa yabo bonke ubutyebi beli hlabathi.”

UDemetrius Papageorge, ekukudala waba ngomnye wamalungu ekomkhulu loMbutho, wagqabaza wenjenje: “I-‘Photo-Drama’ yayingumsebenzi omkhulu wobugcisa, xa sicinga ngenani elincinane laBafundi BeBhayibhile nemali engephi eyayikho. Ngokwenene yayixhaswa ngumoya kaYehova!”

[Ibhokisi/Imifanekiso ekwiphepha 8, 9]

I-“Eureka Drama”

Kwiinyanga ezisibhozo emva kokuba kuboniswe i-“Photo-Drama,” okwesihlandlo sokuqala, uMbutho wabona kuyimfuneko ukuba uvelise olunye uhlelo olubizwa ngokuba yi-“Eureka Drama.” Ngoxa i-“Photo-Drama” epheleleyo yaqhubeka iboniswa kwizixeko ezikhulu, i-“Eureka” yayidlulisela isigidimi esifanayo ngokusisiseko kwiidolophana nasemaphandleni. Olunye uhlelo lwe-“Eureka Drama” lwachazwa njengolunika “oodade ithuba elikhethekileyo” lokushumayela. Ngoba? Ngenxa yokuba ibhokisi eyayifaka amacwecwe egramafoni yayinobunzima obuziikhilogram ezili-14 kuphela. Kakade ke, xa kusenziwa umboniso kwakuya kufuneka kuphathwe igramafoni.