Isaziso Esikhethekileyo
XA KWAKUQUKUNJELWA intlanganiso yonyaka yeWatch Tower Bible and Tract Society of Pennsylvania ngo-Oktobha 7, 2000, usihlalo, uJohn E. Barr weQumrhu Elilawulayo, wenza isaziso esikhethekileyo. Esi saziso sasekelwa kwiintetho ezazinikelwe ngaphambilana ngolo suku nguTheodore Jaracz noDaniel Sydlik.—Bona iphepha 12-16 nephepha 28-31 leli phephancwadi.
Etyhila ingongoma ebalulekileyo, uMzalwan’ uBarr wathi: “‘Ikhoboka elithembekileyo neliyingqondi’ neQumrhu lalo Elilawulayo beliphathiswe izilangazelelo ezibalulekileyo neziquka okungakumbi kunoko kuvumelekileyo kwimibutho esemthethweni. Umgaqo-siseko wombutho ngamnye uqulethe imibandela nje elinganiselweyo xa ithelekiswa nomsebenzi walo. Noko ke, iNkosi yethu, uYesu Kristu, uye wamisela udidi lwekhoboka elithembekileyo ‘kwimpahla’ yakhe yonke, okanye izilangazelelo zoBukumkani apha emhlabeni.”—Mateyu 24:45-47.
Ngokuphathelele umbutho wasePennsylvania, uMzalwan’ uBarr wongezelela ngelithi: “Ukususela ekusekweni kwayo ngowe-1884, iWatch Tower Bible and Tract Society of Pennsylvania iye yanendima ebalulekileyo kwimbali yethu yale mihla. Sekunjalo, ingumbutho osemthethweni ofumanekayo osetyenziswa ‘likhoboka elithembekileyo neliyingqondi’ xa kuyimfuneko.”
Kwiintetho zabo, uMzalwan’ uSydlik noMzalwan’ uJaracz baye bachaza ukuba ukuphathiswa ‘kwekhoboka elithembekileyo neliyingqondi’ impahla esemhlabeni yeNkosi akuthinteli udidi lwekhoboka ukuvumela amadoda afanelekayo aphakathi ‘kwezinye izimvu’ ukuze anyamekele iimbopheleleko zolawulo ezithile. (Yohane 10:16) Kungekho nasizathu seZibhalo esithi onke amalungu okanye nabani na kubalathisi bemibutho esemthethweni esetyenziswa ngamaNgqina kaYehova umele abe ngumKristu othanjisiweyo.
UMzalwan’ uBarr waxelela abaphulaphuli ukuba kutshanje amalungu athile eQumrhu Elilawulayo lamaNgqina kaYehova abekhonza njengabalathisi namagosa aye arhoxa ngokuzithandela kumaqumrhu abalathisi ayo yonke imibutho esetyenziswa “likhoboka elithembekileyo neliyingqondi” eUnited States. Abazalwana abathembekileyo bodidi lwezinye izimvu banyulwa ukuba bangene ezihlangwini zabo.
Eneneni esi sigqibo siyingenelo. Sivumela amalungu eQumrhu Elilawulayo ithuba lokuba achithe ixesha elingakumbi ekulungiseleleni ukutya kokomoya nasekunyamekeleni iimfuno zokomoya zobuzalwana behlabathi lonke.
Equkumbela, usihlalo wathi kubaphulaphuli abachwayitileyo: “Nangona imisebenzi eyahlukahlukeneyo esemthethweni neyolawulo iye yabelwa abaveleli abanamava, . . . bonke bakhonza phantsi kolwalathiso lokomoya lweQumrhu Elilawulayo. . . . Sonke sikhangele kuYehova ngomthandazo ukuba asikelele imigudu yethu emanyeneyo yokwenza ukuthanda kwakhe, kuze kuzise imbeko nozuko kwigama lakhe elikhulu.”