Ukufumana Unqabiseko Kwihlabathi Elizaliswe Ziingozi

UKUHAMBA kwindawo ekutyalwe kuyo izigcayiseli kunokubulala. Noko ke, ngaba bekungayi kwenza mahluko ukuba ubunemaphu ebonisa iindawo ezityalwe kuzo izigcayiseli? Ngaphezu koko, masithi ubuqeqeshelwe ukwahlula izigcayiseli ezahlukahlukeneyo. Ngokucacileyo, ulwazi olunjalo beluya kuyinciphisa kakhulu ingozi yokuba wenzakale okanye ufe.

IBhayibhile inokuthelekiswa naloo maphu kunye nokuqeqeshelwa ukwazi izigcayiseli. IBhayibhile iqulethe ubulumko obungenakuthelekiswa nanto xa kufikelelwa kumba wokuphepha iingozi nokusingatha iingxaki ezivelayo ebomini.

Phawula esi sithembiso siqinisekisayo esifumaneka kwiMizekeliso 2:10, 11: “Xa ubulumko bungena entliziyweni yakho nolwazi luthandeka emphefumlweni wakho, amandla okucinga aya kukulinda, ukuqonda kuya kukulondoloza.” Ubulumko nokuqonda okukhankanywe apha akuveli mntwini kodwa kuvela kuThixo. “Yena ke ondiphulaphulayo, uya kuhlala ngonqabiseko aze angaphazamiseki ekunkwantyiseni kwentlekele.” (IMizekeliso 1:33) Makhe sibone indlela iBhayibhile enokulwandisa ngayo unqabiseko nenokusinceda ngayo ukuze siphephe iingxaki ezininzi.

Ukuphepha Iingozi Ezibulalayo

Amanani apapashwe kwiWorld Health Organization (WHO) kutshanje abonisa ukuba abantu abafa minyaka le ehlabathini lonke kwiingozi zendlela bamalunga nesi-1 171 000. Phantse abanye abazizigidi ezingama-40 bayenzakala, yaye abangaphezu kwezigidi ezisi-8 baba neziphene ixesha elide.

Nangona kungenakwenzeka ukuba ubani akhuseleke ngokupheleleyo ngoxa eqhuba, sinqabiseka ngakumbi xa sithobela imithetho yendlela. Xa ithetha ngamagunya karhulumente, amisa nagunyazisa imithetho yendlela, iBhayibhile ithi: “Yonke imiphefumlo mayiwathobele amagunya awongamileyo.” (Roma 13:1) Abaqhubi beenqwelo-mafutha abalandela eli cebiso bayawanciphisa amathuba okufumana ingozi, nemiphumo edla ngokuba manyumnyezi.

Enye into ebangela abantu baqhube ngokukhuselekileyo kukuhlonela ubomi. IBhayibhile ithi ngoYehova uThixo: “Kuba ukuwe umthombo wobomi.” (INdumiso 36:9) Ngoko ke ubomi sisipho esivela kuThixo. Ngenxa yoko, asinalungelo lakusithabatha eso sipho nakubani na okanye lokungabuhloneli ubomi, kuquka nobethu.—Genesis 9:5, 6.

Ngokuqhelekileyo, ukuhlonela ubomi bomntu kuquka ukuqiniseka ukuba inqwelo-mafutha yethu nekhaya lethu zikhuseleke ngokusengqiqweni kangangoko kunokwenzeka. KuSirayeli wamandulo, ukukhuseleka kwakusiza kuqala kuzo zonke iinkalo zobomi. Ngokomzekelo, xa kusakhiwa indlu, uMthetho kaThixo wawufuna ukuba uphahla lwayo—indawo eyayisetyenziswa kakhulu yintsapho ukwenza izinto ezahlukahlukeneyo—lube nongqameko. “Umele ulwenzele ungqameko uphahla lwakho, ukuze ungazisi tyala lagazi endlwini yakho xa athe wawa owayo kuyo.” (Duteronomi 22:8) Ukuba othile uwe ngenxa yokuba ungalandelwanga lo mthetho, uThixo wayembek’ ityala umninimzi. Alithandabuzeki elokuba, ukusebenzisa imigaqo enothando ekulo mthetho kwakuya kuzinciphisa iingozi kwindawo ekusetyenzelwa kuzo nakwezokuzihlaziya.

Ukulwa Nobukhoboka Obubulalayo

Ngokutsho kweWHO, abantu abatshayayo ngoku bangaphezu kwewaka lesigidi emhlabeni, yaye nyaka ngamnye abantu abamalunga nezigidi ezine babulawa licuba. Kulindeleke ukuba eli nani linyuke liye kutsho kwabamalunga nezigidi ezili-10 kwiminyaka engama-20 ukuya kwengama-30 ezayo. Izigidi zabanye abantu abatshayayo, kwanabo basebenzisa iziyobisi “zokuzihlaziya,” baya konakalisa impilo nobomi babo ngenxa yobukhoboka babo.

Nangona iLizwi likaThixo lingakukhankanyi ngokukhethekileyo ukusebenzisa icuba nokusebenzisa kakubi iziyobisi, imigaqo yalo inokusikhusela kule mikhwa. Ngokomzekelo, eyesi-2 kwabaseKorinte 7:1 isicebisa ukuba: “Masizihlambulule kuko konke ukudyobheka kwenyama nokomoya.” Akuthandabuzeki ukuba icuba neziyobisi zingcolisa inyama ngemichiza emininzi eyingozi. Ngapha koko, uThixo ufuna imizimba yethu ibe “ngcwele,” oko kuthetha ukuhlambuluka nokucoceka. (Roma 12:1) Ngaba akuvumi ukuba ukusebenzisa le migaqo kuya kuyinciphisa ngokuphawulekayo ingozi ebomini bomntu?

Ukoyisa Imikhwa Eyingozi

Abantu abaninzi batya yaye basela ngokugqithiseleyo. Imiphumo yokutya ngokugqithiseleyo inokuquka isifo seswekile, umhlaza nesifo sentliziyo. Ukusebenzisa kakubi utywala kukhokelela kwiingxaki ezongezelelekileyo, njengokukhotyokiswa butywala, ukuqina kwesibindi, ukuqhekeka kweentsapho neengozi zendlela. Kwelinye icala, ukunciphisa ukutya ngokugqithiseleyo kunokuba yingozi yaye kunokukhokelela kwizifo zokutya ngokungalungelelananga ezifana neanorexia nervosa.

Nangona iBhayibhile ingeyoncwadi yezonyango, inikela icebiso elingqalileyo ngokuphathelele ukutya nokusela ngendlela elungeleleneyo. “Wena ke, nyana wam, yiva uze ube nobulumko, ukhokele intliziyo yakho endleleni. Musa ukuba phakathi kwabasela iwayini kakhulu, phakathi kwabadli benyama abangamadla-kudla. Kuba inxila nedla-kudla baya kuhlwempuzeka.” (IMizekeliso 23:19-21) Sekunjalo, iBhayibhile ithi ukutya nokusela kufanele kunanditshwe. “Wonk’ umntu ufanele adle, asele aze ngokwenene abone okulungileyo kuko konke ukusebenza kwakhe nzima. Sisipho sikaThixo eso.”—INtshumayeli 3:13.

IBhayibhile ikwasikhuthaza ukuba sibe nesimo sengqondo esilungeleleneyo ngokwenza umthambo, iyavuma ukuba “ingqeqesho yomzimba iyingenelo kancinane.” Kodwa iqhubeka isithi: “Lona uzinikelo lobuthixo luyingenelo kuzo zonke izinto, njengoko lusinika ithemba kobu bomi nakobo buzayo.” (1 Timoti 4:8) Unokuzibuza uthi, ‘Uzinikelo lobuthixo luyingenelo njani ngoku?’ Ngeendlela ezininzi. Ngaphandle kokongezelela kubomi bokomoya bukabani, uzinikelo lobuthixo lukhulisa iimpawu eziyingenelo ezinjengothando, uvuyo, uxolo nokuzeyisa—konke oku kukhokelela kwisimo sengqondo esifanelekileyo nempilo entle.—Galati 5:22, 23.

Imiphumo Ebuhlungu Yokuziphatha Okubi

Namhlanje, izigidi zabantu ziyilahlile yonke imilinganiselo yokuziphatha. Ubhubhani onguGawulayo ngomnye wemiphumo. Ngokutsho kweWHO, abantu abangaphezu kwezigidi ezili-16 baye bafa ukususela ekuqaleni kobhubhani uGawulayo, yaye ngoku, malunga nezigidi ezingama-34 zisulelwa yiHIV, intsholongwane ebangela uGawulayo. Abantu abaninzi abanesi sifo basifumana ngokuziphatha okubi, izirinji ezosulelweyo ezisetyenziswa ngamakhoboka eziyobisi, okanye utofelo-gazi oludyojiweyo.

Eminye imiphumo yemilinganiselo ephantsi yokuziphatha iquka amadyunguza, ubhobhozo, ihepatitis B neC negcushuwa. Nangona amagama anjalo ezonyango ayengasetyenziswa ngamaxesha okubhalwa kweBhayibhile, amalungu achaphazelekayo zizifo ezithile ezidluliselwa ngeentlobano zesini ezazikho ngelo xesha ayesaziwa. Ngokomzekelo, IMizekeliso 7:23 ichaza imiphumo eyothusayo yohenyuzo ‘njengotolo olusicanda sivuleke isibindi.’ Igcushuwa ihlasela isibindi, ngokufanayo nehepatitis. Ewe, sisexesheni yaye sinothando ngokwenene isiluleko seBhayibhile sokuba amaKristu ‘akhwebuke egazini nakuhenyuzo’!—IZenzo 15:28, 29.

Umgibe Wokuthanda Imali

Befuna ukuba zizityebi ngokukhawuleza, abantu abaninzi babeka imali yabo esichengeni. Okubuhlungu kukuba, ukuzichanaba engozini ngolo hlobo ngokufuthi kukhokelela ekuphelelweni yimali. Noko ke, kumkhonzi kaThixo iBhayibhile ithi: “Makasebenze nzima, esenza umsebenzi olungileyo ngezandla zakhe, ukuze abe nento yokwabela lowo usweleyo.” (Efese 4:28) Enyanisweni, umntu osebenza nzima akasoloko eba sisityebi. Sekunjalo, unoxolo lwengqondo, uyazihlonela, yaye mhlawumbi ukwanayo nemali yokwenza izinto ezifanelekileyo.

IBhayibhile ilumkisa isithi: ‘Abo bazimisele ukuba zizityebi beyela ekuhendweni nasemgibeni, nakwiminqweno emininzi engekho ngqiqweni neyenzakalisayo, ekhokelela entshabalalweni nasekonakaleni. Kuba ukuthanda imali yingcambu yazo zonke iintlobo zobubi, yaye ngenxa yokusukelana nolo thando bambi baye bazingxwelerha ngeentlungu ezininzi.’ (1 Timoti 6:9, 10) Alinakukhanyelwa elokuba abaninzi ‘abazimisela ukuba zizityebi’ baba zizityebi. Kodwa oko kuthetha ukuphulukana nantoni? Ngaba akuyonyaniso ukuba impilo, intsapho, ubumoya nobuthongo babo buyachaphazeleka?—INtshumayeli 5:12.

Umntu osisilumko uyaqonda ukuba ‘ubomi abuphumi kwizinto anazo.’ (Luka 12:15) Imali nezinye izinto ubani anazo ziyimfuneko kubantu abaninzi. Enyanisweni, iBhayibhile ithi ‘imali iyakhusela,’ kodwa iqhubeka isithi “ingenelo yolwazi kukuba ubulumko bubagcina bephila abo banabo.” (INtshumayeli 7:12) Ngokungafaniyo nemali, ulwazi olufanelekileyo nobulumko zinokusinceda kuzo zonke iimeko, kodwa ingakumbi kwimibandela echaphazela ubomi bethu.—IMizekeliso 4:5-9.

Xa Siya Kukhuselwa Bubulumko Kuphela

Ubulumko bokwenyaniso kungekudala buya ‘kugcina kuphela abo banabo’ ngendlela engenakuthelekiswa nanto—bubakhusele ‘kwimbandezelo enkulu’ eza ngokukhawuleza, xa uThixo etshabalalisa abangendawo. (Mateyu 24:21) Ngelo xesha abantu baya kulahla imali yabo ezitratweni ‘njengento eyenyanyekayo,’ ngokutsho kweBhayibhile. Ngoba? Kuba baya kuba befunde ngendlela ebuhlungu ukuba igolide nesilivere aziyi kubathengela ubomi “ngemini yokuvutha komsindo kaYehova.” (Hezekile 7:19) Kwelinye icala, “isihlwele esikhulu,” ‘esiziqwebela ubuncwane ezulwini’ ngokubeka izinto zokomoya kuqala ebomini baso, siya kungenelwa kutyalo-mali lwaso size sifumane ubomi obungunaphakade kwiparadesi esemhlabeni.—ISityhilelo 7:9, 14; 21:3, 4; Mateyu 6:19, 20.

Sinokulifumana njani ikamva elinqabisekileyo? UYesu waphendula esithi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” (Yohane 17:3) Izigidi ziye zafumana olu lwazi kwiLizwi likaThixo, iBhayibhile. Abo abanathemba elingummangaliso lekamva nje kuphela, kodwa khona ngoku bafumana uxolo nonqabiseko ngomlinganiselo othile. Kunjengokuba umdumisi watshoyo: “Xa kukho uxolo ndiya kungqengqa ndize ndilale ngoxolo, Kuba nguwe wedwa, Yehova, ondenza ndihlale ndinqabisekile.”—INdumiso 4:8.

Ngaba ukho omnye umthombo wenkcazelo onokucinga ngawo onokunceda ukunciphisa iingozi kwimpilo nakubomi bakho njengeBhayibhile? Ayikho enye incwadi enegunya njengeBhayibhile, yaye ayikho enye incwadi enokukunceda ufumane unqabiseko lokwenyaniso kwihlabathi lanamhlanje elizaliswe ziingozi. Kutheni ungayihloli ngokubhekele phaya?

[Ibhokisi/Umfanekiso okwiphepha 6]

Impilo Nonqabiseko Olulunge Ngakumbi—Ngoncedo LweBhayibhile

Lifuna ukuphepha iingxaki zobomi, elinye ibhinqa eliselula elinguJanea lalinomkhwa wokusebenzisa intsangu, icuba, icocaine, iamphetamines, iLSD nezinye iziyobisi. Kwakhona lalisela kakhulu. Ngokutsho kukaJane, umyeni wakhe wayefana nqwa naye. Ikamva labo lalimfiliba. Wandula ke uJane wadibana namaNgqina kaYehova. Waqalisa ukuya kwiintlanganiso zamaKristu waza wafunda IMboniselo nephephancwadi eliliqabane layo, uVukani!, awayesabelana ngawo nomyeni wakhe. Bobabini baqalisa ukufundisisa iBhayibhile namaNgqina. Njengoko baqalisa ukuqonda imilinganiselo kaYehova, bayeka ukusebenzisa kakubi iziyobisi. Waba yintoni umphumo? Kwiminyaka kamva uJane wabhala esithi: “Ubomi bethu obutsha buye basizisela uvuyo. Ndimbulela kakhulu uYehova ngamandla okucoca eLizwi lakhe nangobomi obukhululekileyo nobusempilweni ngoku esibuphilayo.”

Ukubaluleka kokuba ngumqeshwa onyanisekileyo kuboniswe kwimeko kaKurt, omsebenzi wakhe wawubandakanya ukunyamekela iinkqubo zekhompyutha. Kwakufuneka izixhobo ezitsha, yaye umqeshi kaKurt wamthuma ukuba azithenge ngexabiso elihle. UKurt wafumana umthengisi ofanelekileyo, yaye bavumelana ngexabiso. Noko ke, umabhalana walo mthengisi wenza impazamo kwiphepha awayebhale kulo, kangangokuba ixabiso lahliswa ukusa kwii-R290 000. Ebona le mpazamo, uKurt waqhagamshelana nale nkampani, yaye umphathi wathi kwiminyaka engama-25 esenza lo msebenzi, akazange abone umntu onyaniseke kangako. UKurt wacacisa ukuba isazela sakhe sasixonxwe yiBhayibhile. Umphumo waba kukuba lo mphathi wacela imibhalo engama-300 yenkupho kaVukani! ethetha ngokunyaniseka kwezoshishino ukuze anike abo asebenza nabo. Yena uKurt wanyuselwa emsebenzini ngenxa yokunyaniseka kwakhe.

[Umbhalo osemazantsi]

[Umfanekiso okwiphepha 7]

“Mna, Yehova, ndinguThixo wakho, Lowo ukufundisa okuyingenelo kuwe.”—ISAYA 48:17