Isahluko 14

Ukuhlonela Isipho Sobomi

1, 2. Kungani sifanele sibonakalise intlonelo enzulu ngesipho sobomi?

UKUSIHLONELA ngokunzulu isipho sobomi kusisiseko soxolo nonqabiseko lokwenyaniso. Kodwa ukubuhlonela ngolo hlobo ubomi akukho ngokulusizi namhlanje. Abantu baye baba ngamachule ekubulaleni, kodwa akukho namnye kubo unokububuyisela ubomi ekupheleni nje kwabo.

² Ukuhlonela ubomi kuyimfanelo engcwele kuMniki-bomi, uYehova uThixo. Umdumisi wathi ngaye: “Ngokuba likuwe ithende lobomi.” (INdumiso 36:9) Ubomi bethu buxhomekeke kuThixo, kungekhona nje kuba wadala umntu kodwa kwakhona kungenxa yokuba uvumele uluntu ukuba luqhubeke kude kube ngoku ibe ulungiselele iindlela zokuzimasa ubomi. (IZenzo 14:16, 17) Ngaphezu koko, walungiselela ukuba uNyana wakhe abe nguMkhululi okanye uMhlawuleli, wentsapho engabantu, eyithenga ngegazi lobomi bakhe. (Roma 5:6-8; Efese 1:7) Ngenxa yoko, kubo bonke abaya kulamkela unikela ithuba lokuphila ngonaphakade kuLungelelwaniso Olutsha lobulungisa. Ngenxa yako konke oku, sinokuyibonisa njani intlonelo yethu enzulu noxabiso ngesipho sikaThixo sobomi?

3. Ukubukela ugonyamelo ngokuzonwabisa kusichaphazela njani isimo sengqondo somntu ngobomi?

³ Phakathi kwezinye izinto, ukuba sizimisele ukubonakalisa intlonelo ngobomi, asiyi kubathelela abo bathi, ngenxa nje yokuziyolisa bondle iingqondo zabo ngokuzonwabisa okubalaselisa ugonyamelo. Ukwamkela ugonyamelo “njengokuzonwabisa” kubangele abaninzi baba lukhuni baza ababi namvakalelo ngokubandezeleka kwabantu nokuphulukana nobomi. Kodwa ukuba sinombulelo ngokulunga kukaThixo nethemba alinikelayo, siya kuwuxhathisa umoya onjalo. Siya kuhlakulela ukuxabisa ubomi njengesipho esivela kuThixo. Oku kuya kuchaphazela indlela esibusebenzisa ngayo ubomi bethu, indlela esibaphatha ngayo abanye abantu, kwanendlela esibajonga ngayo abangekazalwa.

Ukuhlonela Ubomi Bongekazalwa

4. (a) Ubomi budluliselwa nini kwinzala kabani? (b) Yintoni ebonisa enoba uThixo unomdla na kubomi babantu ngaphambi kokuzalwa?

⁴ Amandla okudlulisela ubomi alilungelo elizukileyo, anikelwa nguThixo. Obo bomi abudluliselwa ngexesha lokuzalwa kodwa budluliswa ngexesha lokukhawulwa. Njengokuba iEncyclopædia Britannica ichaza, lingoku ixesha “lokuqalisa kwembali yobomi bomntu, njengento eyahlukileyo nedla ubomi.” Kwakhona ithi: “Umntu omtsha udalwa xa idlozi elifanelekileyo lidibana neqanda.”⁠⁶⁰ Ngokufanayo, umdla kaThixo kubomi babantu uqalisa ngaphambi kokuzalwa. Umdumisi uDavide wabhala esithi ngoThixo: “Wandibiyela esizalweni sikama. . . . Amehlo akho andibona ndiseyimbumba, zazibhalwe encwadini yakho iimini zonke ziphela.”—INdumiso 139:13-16; INtshumayeli 11:5.

5. Kungani iimpikiswano ezenziwayo ngomgudu wokuthethelela ukuqhomfa zingekho ngqiqweni nje?

⁵ Ubomi bezigidi zabantwana abangekazalwa nyaka ngamnye bucinywa ngabom ngokuqhomfa. Ngaba oku kulungile? Bambi baphikisa ngelithi usana olungekazalwa aluyiqondi into obuyiyo ubomi ibe alunakuphila xa lungaphandle kwesibeleko. Kodwa oko kukwanjalo ngokusisiseko ngosana olusandul’ ukuzalwa. Ekuzalweni aluyiqondi intsingiselo yobomi, ibe alunakuqhubeka luphila ngaphandle kokunyanyekelwa ngokuzingisileyo. Iseli ephilileyo eyilwe ekukhawuleni iba lusana olunjalo ukuba ayiphazanyiswanga. Ngoko ukuba ukubulala usana olusandul’ ukuzalwa kujongwa njengolwaphulo-mthetho phantse kuzo zonk’ iindawo, ibe kusenziwa imigudu ukuhlangula kwaneentsana ezizelwe ngaphambi kwexesha, ngoko, kutheni ingelolwaphulo-mthetho nje ukubulala usana olungekazalwa? Kutheni le nto ubomi bumele bujongwe njengobungcwele kuphela emva kokuba bushiye isibeleko kungekhona ngoxa busengaphakathi esibelekweni?

6. IBhayibhile iyibonisa njani imbono kaThixo ngokucinywa ngabom kobomi bomntwana ongekazalwa?

⁶ Into ebalulekileyo asiyondlela nje abantu abayijonga ngayo imicimbi kodwa koko uThixo, uMniki wobomi, akuthethayo. Ubomi bomntwana ongekazalwa buxabisekile kuYehova, asinto kunokudlalwa ngayo. Wanika amaSirayeli akudala umthetho ngokungqalileyo okhusela obo bomi. Ukuba, ngokulwa kwamadoda amabini, umfazi omithiyo wenzakalisiwe okanye uphume isisu, lo mthetho wandlala izohlwayo eziqatha. (Eksodus 21:22, 23) Ukucima ubomi bomntwana ongekazalwa ngabom kwakuya kuba kokubi ngokude kwangakumbi. Ngokutsho komthetho kaThixo, nabani na owayesithi ngabom acime ubomi bomntu wayemele agwetyelwe ukufa njengombulali. (Numeri 35:30, 31) UThixo usabuxabise ngokufanayo ubomi nangoku.

7. Yintoni esizikhusela kuyo xa sihlonela ukuthanda kukaThixo ngobomi bomntwana ongekazalwa?

⁷ Ukukuhlonela ngokunzulu ukuthanda kukaThixo ngokubhekisele kubomi bomntwana ongekazalwa kuphumela kwingenelo yokwenene. Ngokwenza abazali babe nembopheleleko epheleleyo ngobu bomi, uYehova uthintela isini esivakalala nayo yonke imiphumo yaso emibi. Oku kuquka izifo ezidluliswa ngeentlobano zesini, ukumitha okungafunwayo, abantwana abayimigqakhwe, iintsapho ezaphukileyo noxinezeleko lwengqondo lwesazela esingacocekanga. Ngaloo ndlela, ukuhlonela ubomi kunokufak’ isandla kuxolo lwentsapho ngoku ibe kungunobangela obalulekileyo ekuzuzeni kwethu iintsikelelo zexa elizayo.

Ukuhlonela Obakho Ubomi

8. Kungani sifanele sikuhlonele ukuthanda kukaThixo ngendlela esiyiphatha ngayo imizimba yethu?

⁸ Kuthekani ngendlela esibuphatha ngayo ubomi bethu? Abantu abaninzi bathi: ‘Andizikhethelanga ukuba ndizalwe. Into endiyenza ngobomi bam ixhomekeke kum. Ndiya kwenza nantoni na endiyifunayo.’ Kodwa ngaba isipho simele kukucelwa ukuze umamkeli asixabise? Ubomi bumnandi ngokungenakukhanyelwa. Kukungafezeki nokwenzakalisa abantu kuphela okuphanga ubomi uvuyo lwabo olukhulu. UYehova uThixo akamele kubekwa tyala ngako oko. Ibe uthembisa ukukulungisa oku ngorhulumente wakhe obuBukumkani. Ngoko, simele sibuphile ubomi asinika bona ngendlela ebonakalisa ukuhlonela ukuthanda nenjongo yakhe.—Roma 12:1.

9. Ithini iBhayibhile ngobudlakudla nobunxila?

⁹ Enye indlela esinokulubonakalisa ngayo uxabiso olunjalo kungobungcathu ekudleni nasekuseleni. Ubudlakudla nobunxila zizinto ezigwetywayo nguThixo. (IMizekeliso 23:20, 21) Kwakhona, kanye njengokuba ukudla ngobungcathu kufanelekile kukwafanelekile nokusebenzisa iziselo ezinxilisayo ngobungcathu. Oku kuboniswa zizibhalo ezininzi.—Duteronomi 14:26; Isaya 25:6; Luka 7:33, 34; 1 Timoti 5:23.

10. (a) Inxila likubonisa njani ukungabuxabisi ubomi? (b) Njengoko kuboniswe kweyoku-1 yabaseKorinte 6:9, 10, kungani kubalulekile nje ukuphepha ubunxila?

¹⁰ Ngoko asikokusela okugwetywayo yiBhayibhile. Kukusebenzisa kakubi isiselo esinxilisayo. Ibe ke ngesizathu esilungileyo, oko kungenxa yokuba konakalisa umzimba, kubangela abasiselayo benze ngobuyatha ibe sinokude sibabangele babe nobungozi kwabanye. (IMizekeliso 23:29-35; Efese 5:18) EUnited States kuphela, ubuncinane ngabantu abali-10 lezigidi abathwaxwa kukukhotyokiswa butywala, omnye umphumo ngowokufa kwabantu abangaphezu kwama-30 000 nyaka ngamnye ngenxa yesifo sesibindi. IBhunga Lesizwe Lokukhotyokiswa Butywala lithi: “Indleko epheleleyo kwilizwe iphantse ibe ziidola ezingama-43 amawaka ezigidi [ama-86 amawaka ezigidi zeerandi] ngonyaka ngenxa yokungabikho kwabantu emsebenzini, impilo nentlalontle, ukonakaliswa kwempahla neenkcitho zamayeza. . . . Kuzo zonke iingozi zokufa kwabantu ezenzeka ezindleleni namhlanje, ezingama-50 ekhulwini zibandakanya utywala. Abantu abangaphezu kwama-80 ekhulwimi ababulawa ngumlilo, abantu abarhaxwayo abangama-65 ekhulwini, iingozi zasekhaya ezingama-22 ekhulwini, ukuwa kwabantu okungama-77 ekhulwini, iingozi zabahamba ngeenyawo ezingama-36 ekhulwini nokubanjwa kwabantu abangama-55 ekhulwini, zonke ezi zinto zinxityelelaniswa nokusetyenziswa kotywala. Abaqhubi beenqwelo-moya abafikelela kuma-44 ekhulwini ababebandakanyeke kwiingozi bebesele utywala. Ukuziphatha ngogonyamelo okubangelwe kukusetyenziswa kotywala ekubulaweni kwabantu kuphantse kube ngama-65 ekhulwini, ukubethwa kwabantu kungama-40 ekhulwini, ukudlwengulwa kwabantu kungama-35 ekhulwini, olunye ulwaphulo-mthetho lwesini lungama-30 ekhulwini, ukuzibulala kwabantu kungama-30 ekhulwini, imilo okanye ukubethwa kwabantu ekhaya kungama-55 ekhulwini nokuhlaselwa kwabantwana ngesini kungama-60 ekhulwini.”⁠⁶¹ Umonakalo okumakhaya aqhekekileyo, ubomi obonakeleyo nokubandezeleka kwabantu kuyinto engenakubalwa. Ngaloo ndlela akumangalisi ukuba iLizwi likaThixo libe lithi: “Musani ukulahlekiswa; abenza umbulo, . . . namanxila, nabatshabhisi, nabaphangi, abayi kubudla ilifa ubukumkani bukaThixo.”—1 Korinte 6:9, 10.

11. Ngaba kusengqiqweni ukuzama ukuphepha iingxaki zobuqu ngokusela gqitha?

¹¹ Kuyinyaniso ukuba, bambi bawuva gqitha umphumo odandathekisayo wehlabathi. Iimfazwe zalo, ulwaphulo-mthetho, ukunyuka kwamaxabiso ezinto, ubuhlwempu nokunxunguphala kwalo neengcinezelo zalo, zonke ezi zinto zifak’ isandla kwiingxaki zobuqu. Kodwa akukho nto izuzwayo ngokuzama ukusaba kwezi zinto ngokusela ngokugqithisa okwenzakalisayo. Oku kudala nje iingxaki ezingakumbi emntwini nakwabanye ibe, ekuhambeni kwexesha, kutshabalalisa isidima sikabani, injongo ekuphileni nokuma noThixo.

Ukusetyenziswa Kweziyobisi

12. Kungani abantu abaninzi bephethukela ekusebenziseni iziyobisi?

¹² Ngokuzama ukuphepha iingxaki zobomi, abantu abaninzi baphethukele kwiziyobisi eziyoba ingqondo. Abasebenzisi beziyobisi ezinjalo endaweni yokujongana nezinto ngokwenene banemvakalelo yokuphupha okanye yokuba kwimeko yokuyobeka. Abaninzi basebenzisa iziyobisi ezinamandla ezinjengeheroin necocaine. Bambi basebenzisa izixa ezininzi zeziyobisi ezahlukahlukeneyo ezinjengeepilisi. Buchatshazelwa njani ubomi babo?

13. Ezinye zezi ziyobisi zinayiphi imiphumo kumsebenzisi wazo, ibe iBhayibhile ilumkisa njani ngako oku?

¹³ Ukusebenzisa kwabo ezi ziyobisi ngokulula kukhokelela ekuphelelweni kukuzeyisa, kuvelisa imiphumo efana naleyo ibonwa kumntu onxilileyo. (IMizekeliso 23:29-34) Ibe ngokuqhelekileyo kuyaqondwa ukuba ezi ziyobisi zinokuba yingozi. Ngokomzekelo, kwisiXeko saseNew York, ukukhotyokiswa yiheroin kungunobangela ophambili wokufa kwabantu abaphakathi kobudala be-18 nama-35. Okunjani ukungahlonelwa ngokunzulu kwesipho sobomi!

14, 15. Kungani abo batshaya umya bengabonisi ntlonipho ngesipho sobomi?

¹⁴ Kodwa kuthekani ngesiyobisi esingenamandla esingumya? Nawo unokuba yingozi ngeendlela eziliqela. Abasebenzisi bomya badla ngokuchanabeka kwiziyobisi ezinamandla ngokudibana nabathengisi beziyobisi nabanye abasebenzisi bazo. Kwakhona, abaninzi abaye baxhomekeka kwesi siyobisi, bekholelwa ukuba siza kushenxisa unxunguphalo nodandatheko, kunokwenzeka ukuba basebenzise iziyobisi ezinamandla.

¹⁵ Kodwa nokuba oku akwenzeki, ukutshaya umya kuyingozi. Kunezinto ezingakumbi ezibangela umhlaza ngaphezu kwemidiza, ibe kuyonakalisa ngakumbi imiphunga. Ukuzisebenzisa ngokuqhubekayo kunokubangela umonakalo wesibindi, iziphene kwimfuza nokonakala kobuchopho. UMbutho WaseKhanada Wokuphanda Ngokukhotyokiswa Ziziyobisi uthi umya “usisiyobisi esinamandla esinomlinganiselo obanzi weengozi empilweni.”⁠⁶² Ingcaphephe yeziyobisi yathi: “Umya sisiyobisi esiyingozi gqitha. Kwiminyaka eli-10 edluleyo amaphepha anokuba li-10 000 aye apapashwa kwezenzululwazi echaza ngengozi engokwasempilweni.” Yakhankanya “ingozi embi nenzulu gqitha kubantwana abafikisa ebuntwini abazama ukucengceleza,” ngendlela yokuba ubulala inkumbulo namandla okuzikis’ ingqondo. Ithetha ngomsebenzisi womya, yathi: “Akanakuyiqhuba ngokufanelekileyo inqwelo-mafutha okanye asebenzise umatshini wokuchwetheza. Ukuwusebenzisa ngokuqhubekayo kubangela umonakalo onzulu ngakumbi kwinkqubo yokukhuseleka kwizifo ethintela umzimba kwizifo.”⁠⁶³ Abafazi abatshaya umya ekumitheni kwabo banobungozi obungakumbi bokuba nabantwana abanomonakalo wobuchopho. Ngenxa yako konke oku, ngaba kunokutshiwo ukuba ukusebenzisa umya kubonakalisa ukuhlonela isipho sobomi?

16. Kukuyiphi enye ingozi embi okunokuthi ukusetyenziswa kweziyobisi kuchanabe umntu kuyo, ibe oku kufanele kuyichaphazele njani imbono yethu ngalo mcimbi?

¹⁶ Kukho nesinye isizathu esinamandla sokuphepha ukusebenzisa iziyobisi. Zinokuvulela indlela yokuba umntu abe phantsi kolawulo lweedemon. Oku kuhlanganiswa kweziyobisi nobugqwirha bomlingo asinto intsha kwaphela. Kwixa elidluleyo amagqwirha ayesebenzisa iziyobisi. IExpository Dictionary of New Testament Words kaVine ithi: “Ebugqwirheni, ukusetyenziswa kweziyobisi, enoba zezingenamandla okanye zezinamandla, ngokuqhelekileyo kwakuphelekwa ngamakhubalo nazizibongozo zokubhenela kumandla obugqwirha bomlingo.” La magqabaza enziwa ngokunxibelelene negama lesiGrike eliguqulelwe ngokuthi “ukukhafula” (phar·ma·kiʹa, ngokoqobo elithetha “ubuthi”) kumaGalati 5:20. (Bona kwaneSityhilelo 9:21; 18:23.) Ngoko iziyobisi zinokuchanaba ubani kwimpembelelo yeedemon. Angathini na umntu omhlonelayo uMniki-bomi wakhe azichanabe kuloo ngozi ngenxa nje yemvakalelo yokwexeshana?

17, 18. (a) Sisiphi esinye isiqhamo esibi esiye sanxulunyaniswa nokusetyenziswa kweziyobisi? (b) Ngoko, amangqina kaYehova angamaKristu akujonga njani ukusebenzisa iziyobisi?

¹⁷ Kuyinto eyaziwa kakuhle ukuba ukusetyenziswa kweziyobisi kunxibelelene ngendlela engenakwahlulwa nolwaphulo-mthetho nokonakala kokuziphatha okuhle ebuthweni. Ukuthengiswa kweziyobisi ngokungekho mthethweni kungumthombo oyintloko wengeniso yolwaphulo-mthetho olulungelelanisiweyo. Amakhoboka amaninzi eziyobisi ayeba ukuze axhase umkhwa wawo. Abanye baphethukela kubunongogo. Iintsapho ziyaqhekeka xa ilungu lisiba likhoboka. Oomama abakhulelweyo badlulisela ubukhoboka kwiintsana zabo, ezithi maxa wambi zife ngoxa zisatyhubela iintlungu zokwahlukana nobo bukhoboka. Ibe kumazwe amaninzi ukuba neziyobisi ezinjalo nokuzisebenzisa ngezizathu ezingezizo ezamayeza kuyinto engekho mthethweni.—Mateyu 22:17-21.

¹⁸ Ngaba ufuna ukuba nento yokwenza noqheliselo olunxulumene nezo ziqhamo zibi? AmaNgqina kaYehova akakwenzi oko! Akazisebenzisi iziyobisi ngenxa yoyolo okanye ukubaleka kwizinto zokwenene. Abuxabise ngokunzulu ubomi yaye afuna ukubusebenzisa ngendlela evisisana nokuthanda kukaThixo.

Ukusebenzisa Icuba Neemveliso Ezifana Nalo

19. Kutheni le nto ukuhlonela isipho sobomi kunxulumana nembono kabani ngokusebenzisa icuba, ibetel nut namagqabi omthi oyicoca?

¹⁹ Namhlanje into eqheleke ngakumbi kukusetyenziswa kwecuba ibe, kumazwe athile, yibetel nut namagqabi ecoca. Nganye yonakalisa umzimba ibe, kwiimeko ezithile, yonakalisa nengqondo. Oorhulumente baye balumkisa ngokunxulumana kwecuba nezifo ezinjengomhlaza wemiphunga, izifo zentliziyo, nokhohlokhohlo olungayekiyo nokuvaleka kwemiphunga. Ngaba ukusebenzisa iimveliso ezikhobokisa neziyingozi ngolo hlobo kubonisa ukusihlonela isipho sobomi?

20, 21. (a) Ngaba isibakala sokuba iBhayibhile ingayigxeki imikhwa enjalo ngokuyibiza ngamagama sithetha ukuba yonke ilungile? (b) Yiyiphi imigaqo yeBhayibhile ebonisa ukuba imikhwa enjalo ayinandawo kubomi bomkhonzi kaThixo?

²⁰ Ubani usenokuthi ezi zinto zonke zidalwe nguThixo. Oko kuyinyaniso, kodwa kunjalo nangeenkowane. Kanti iintlobo ezithile zingqineka zibulala zakudliwa. Omnye usenokuthi iBhayibhile ayiyigwebi ngokungqalileyo imikhwa enjalo. Ayiyigwebi, kodwa, njengoko sesibonile, zininzi izinto ezingagwetywa ngokungqalileyo eBhayibhileni ngokucacileyo eziphosakeleyo. Akukho ndawo apho iBhayibhile ethi ngokungqalileyo yalele ukusetyenziswa kwentendelezo engemva yommelwane kabani njengendawo yokulahla amabibi. Kanti umyalelo wayo ‘wokuthanda ummelwane wakho njengoko uzithanda ngako’ umele ube ngowaneleyo kuye nawuphi na kuthi ukuqonda indlela ebekuya kuphosakala ngayo oko. Ngokufanayo, ukutshaya kubonakalisa ukungabi naluthando, ekubeni umsi usenokubacaphukisa abanye ibe unokude wonakalise nempilo yabo.—Mateyu 22:39.

²¹ Kweyesi-2 yabaseKorinte 7:1 iLizwi likaThixo lisixelela ukuba “masizihlambulule kuko konke ukudyobheka kwenyama nokomoya sibufeza ubungcwele, sisoyika uThixo.” Ukuze into ibe “ngcwele” kuthetha ukuba “yecocekileyo, engangcolanga, engadyobhekanga.” UYehova uzigcina ecocekile ekonakaleni, akaze azithobele ekuziphatheni ngendlela engengcwele. Ngokufanelekileyo usilindele ukuba siqhubeke “sibufeza ubungcwele” kangangoko kunokwenzeka ebantwini. (Roma 12:1) Kwakhona, usilindele ukuba ‘simthande ngentliziyo, ngomphefumlo, ngengqondo nangamandla ethu ephela.’ Kodwa ubani angakwenza njani oku ukuba uzifica kuqheliselo olungcolisa umzimba wakhe, olonakalisa impilo yakhe luze lucuthe ubomi bakhe?—Marko 12:29, 30.

22. Yintoni enokwenza umntu ahlukane nokubanjwa ngumkhwa ombi ngolo hlobo?

²² Nangona omnye wemikhwa enjalo usenokubonakala umcinezele umntu, unokuwoyisa aze akhululeke. Ukwazi uThixo neenjongo zakhe kunikela intshukumisa enamandla yokwenjenjalo. Umntu ‘unokuhlaziywa kumoya wengqiqo yakhe.’ (Efese 4:23) Oku kuya kuvula indlela entsha yobomi ebangelwa kukwaneliseka ngokobuqu nokuzukisa uThixo.

Ukuhlonela Ubomi Njengoko Bumelwa Ligazi

23. (a) Yiyiphi ekuphela kwendlela yokusetyenziswa kwegazi eyavunywayo nguThixo emthethweni wakhe kuSirayeli? (b) Kungani intsingiselo yaloo madini ifanele isibangele sikucinge ngenyameko ukuthanda kukaThixo kulo mcimbi?

²³ Negazi lethu, likufanele ukuqwalaselwa xa sithetha ngobomi. UThixo unyule igazi labantu nelezilwanyana njengomqondiso wobomi. Oku kucaca kumthetho awawunika uNowa ibe kamva wawunika uhlanga lwakwaSirayeli. Ekuphela kwendlela ekholekileyo yokusetyenziswa kwegazi yayingokwedini. (Genesis 9:3, 4; Levitikus 17:10-14) Onke amadini ayefanekisela idini elinye likaYesu, awathi ngalo waphalaza igazi lobomi bakhe ngenxa yoluntu. (Hebhere 9:11-14) Oku kumele kusibangele sinikele ingqalelo epheleleyo ekuthandeni kukaThixo kulo mcimbi.

24. Zithini IZenzo 15:28, 29 ngokubhekisele kwimbono amaKristu amele abe nayo ngokusebenzisa igazi?

²⁴ Ngaba isalelo sikaThixo esingokusetyenziswa kwegazi sisasebenza kumaKristu okwenyaniso? Ewe sisasebenza, njengoko kuboniswa ngamazwi angokwasemthethweni awathethwa ngabapostile namanye amadoda amakhulu ebandleni lamaKristu enkulungwane yokuqala. Phantsi kokhokelo lomoya kaThixo, babhala oku: “Kwabonakala kulungile kuye uMoya oyiNgcwele, nakuthi, ukuba kungabekwa phezu kwenu mthwalo ungaphezu kwezi ndawo zifunekayo: zokuba nizile izinto ezibingelelwe kwizithixo, negazi, nento ekrwitshiweyo [ekubeni ingophiswanga] nombulo; enothi nakuzigcina kuzo, nibe niyalungisa.”—IZenzo 15:28, 29.

25. Ihlabathi libonisa ngaluphi uqheliselo ukungakuhloneli ukuthanda kukaThixo ngegazi?

²⁵ Abantu abaninzi bayakutyeshela ukuthanda kukaThixo ngokubhekisele kwigazi. Balisebenzisa ekutyeni, kwezamayeza, nakwiimveliso zorhwebo. Kodwa oku akumele kusimangalise, ekubeni ihlabathi lingasikhathalele isipho sobomi. Noko ke, ukuba siyabuxabisa ubomi nokuziphendulela kwethu kuThixo, asiyi kukutyeshela ukuthanda kwakhe okanye simnyelise ngokwaphula imiyalelo yakhe.

26, 27. Kutheni imigudu yokulondoloza ubomi bukabani obukhoyo ngokungamthobeli uThixo ingabonisi ntlonelo ngaye?

²⁶ Ngaloo ndlela, nangona simele siyixhalabele impilo yethu size sifune ukukhusela ubomi bethu, kukho imida ethile esimele siyigcine. UYesu wakucacisa oku xa wathi: “Lowo uwuthandayo umphefumlo wakhe [okanye, ubomi], wolahlekelwa nguwo; lowo uwuthiyayo umphefumlo wakhe kweli hlabathi, wowulondolozela ubomi obungunaphakade.”—Yohane 12:25.

²⁷ Ukuba kuyimbambano yokujongana nokufa ngenxa yokuthobela uThixo okanye yokungamthobeli ukuze uphephe ukufa, umkhonzi kaThixo uya kukhetha ukufa kunokungathobeli. Ngokungathobeli uThixo, uYesu ngewayekuphephile ukufa. Kodwa akazange enjenjalo. Ibe abantu ababengaphambi kwakhe babebonakalise uzinikelo olufanayo olungenakwaphulwa kuThixo. (Mateyu 26:38, 39, 51-54; Hebhere 11:32-38) Abazange babuvumele ubomi babo obukhoyo buvale indlela yokufanelekela kwabo ubomi obungunaphakade.

28. Ngokuhlakulela ukuxabisa imbono yeBhayibhile ngobomi, yintoni esilungiselela yona?

²⁸ Ngaba nawe ubujonga ngaloo ndlela ubomi? Ngaba uyaqonda ukuba ukuze ubomi bube nentsingiselo yokwenene, umele uphile ngokuvisisana nokuthanda kukaThixo? Ukuhlakulela loo mbono ngoku kuyinxalenye yokulungiselela ubomi kuLungelelwaniso Olutsha lukaThixo. Hayi indlela esiya kuziva sinqabiseke yaye sikhuseleke ngayo ngoko naphi na nangaliphi na ixesha, sisazi ukuba bonke abo baphila emhlabeni basihlonela ngokwenyaniso isipho sikaThixo sobomi!