Ibali Lobomi
Ndomelezwa NguYehova Zonke Iintsuku Zobomi Bam
NGOKUBALISWA NGUFORREST LEE
Amapolisa ayesandul’ ukuthimba iigramafoni noncwadi lwethu lweBhayibhile. IMfazwe Yehlabathi II yayisisingxengxezo sabachasi sokuba bacenge umphathi omtsha waseKhanada ukuba athi umsebenzi wamaNgqina kaYehova awukho mthethweni. Oku kwenzeka ngoJulayi 4, 1940.
SINGOYIKISWA koko kwenzekileyo, safumana uncwadi olungakumbi apho lwalugcinwa khona saza saqhubeka nokushumayela kwethu. Ndiya kuhlala ndiwakhumbula amazwi awathethwa nguTata ngeso sihlandlo: “Asiyeki lula. UYehova usiyalele ukuba sishumayele.” Ngelo xesha, ndandilityendyana elidlamkileyo elineminyaka elishumi ubudala. Kodwa nanamhlanje, ukuzimisela kukaTata nenzondelelo yakhe ngobulungiseleli zisandikhumbuza ukuba uThixo, uYehova, uyabomeleza abantu bakhe abanyanisekileyo.
Xa amapolisa aphinda asimisa, awazange athabathe uncwadi lwethu kuphela kodwa athabatha noTata amsa entolongweni, eshiya uMama yedwa nabantwana abane. Oko kwenzeka ngoSeptemba 1940 eSaskatchewan. Kungekudala emva koko ndagxothwa esikolweni ngenxa yokuba isazela sam esisekelwe eBhayibhileni sasingandivumeli ndikhahlel’ indwe okanye ndicule umhobe wesizwe. Ukufunda ndisekhaya kwandenza ndaba bhetyebhetye ngocwangciso lwam, yaye ndaba nesabelo ngokuzeleyo kumsebenzi wokushumayela.
Ngowe-1948 kwacelwa oovulindlela, abalungiseleli bexesha elizeleyo bamaNgqina kaYehova, ukuba bafudukele kunxweme lwempuma yeKhanada. Ndaya kuba nguvulindlela eHalifax, eNova Scotia naseCape Wolfe, ePrince Edward Island. Kunyaka olandelayo, ndamkela isimemo sokusebenza iiveki ezimbini kwiofisi yesebe yamaNgqina kaYehova eToronto. Ezo veki zimbini zaba yiminyaka emithandathu yenkonzo enomvuzo. Ekugqibeleni, ndadibana noMyrna, owabelana nam ngothando endinalo ngoYehova, saza satshata ngoDisemba 1955. Sahlala eMilton, eOntario, yaye kungekudala kwasekwa ibandla elitsha apho. Umgangatho wangaphantsi wekhaya lethu waba yiHolo yoBukumkani.
Umnqweno Wokwandisa Ubulungiseleli Bethu
Kwiminyaka eyalandelayo, sazala abantwana abathandathu ngokulandelelanayo. Owokuqala yintombi yethu uMiriam. Kwaza kwalandela uCharmaine, uMark, uAnnette, uGrant kwaza kwagqibela uGlen. Ngokufuthi xa ndivela emsebenzini ndandifika ekhaya aba bancinane behleli phantsi bothe umlilo, uMyrna ebafundela iBhayibhile, ecacisa iingxelo zeBhayibhile yaye etsolisa kwiintliziyo zabo uthando lokwenene ngoYehova. Ngenxa yenkxaso yakhe enothando, bonke abantwana bethu bazuza ulwazi olwaneleyo lweBhayibhile besebancinane.
Inzondelelo katata ngobulungiseleli yashiya uphawu olungacimekiyo engqondweni nasentliziyweni yam. (IMizekeliso 22:6) Ngoko ke, ngowe-1968, xa iintsapho zamaNgqina kaYehova zacelwa ukuba zifudukele kuMbindi nakuMzantsi Merika ukuze zincedise kumsebenzi wokushumayela, intsapho yethu yanqwenela ukusabela kweso sicelo. Ngelo xesha abantwana bethu babephakathi kweminyaka emi-5 neli-13 ubudala, yaye kwakungekho namnye kuthi owayesazi iSpanish. Ngokulandela umyalelo esiwunikiweyo, ndahamba ndaya kumazwe awahlukahlukeneyo ukuze ndihlole iimeko zokuphila. Ekubuyeni kwam, njengentsapho sathandaza sicinga ngokhetho lwethu saza senza isigqibo sokufudukela eNicaragua.
Ukukhonza ENicaragua
Ngo-Oktobha 1970 sasikwikhaya lethu elitsha, yaye kwiiveki nje ezintathu ndabelwa inxalenye emfutshane kucwangciso lwentlanganiso yebandla. Ndasokola kuyo yonke loo nxalenye ngeSpanish sam esincinane yaye ndaqukumbela ngokumemela ibandla lonke ekhaya ukuba lizele icerveza ngoMgqibelo ngentsimbi ye-9:30 ekuseni. Ndandifuna ukuthi servicio, igama elithetha inkonzo yasentsimini, kodwa eneneni ndandimema wonk’ ubani ukuba azokusela utywala. Eneneni ukufunda ulwimi kwakulucelomngeni!
Ekuqaleni, ndandibhala intshumayelo esandleni ndize ndiyiqhelisele xa ndisiya endlwini. Ndandisithi: “Le ncwadi ihamba nesifundo seBhayibhile sekhaya sesisa.” Omnye umntu owasamkelayo isifundo kamva wathi kwakuza kufuneka aze kwiintlanganiso zethu ukuze afumanise ngoko bendizama ukumxelela kona. Le ndoda yaba ngomnye wamaNgqina kaYehova. Hayi indlela ekubonakala ngayo ukuba nguThixo okhulisa iimbewu zenyaniso ezintliziyweni ezithobekileyo, njengoko umpostile uPawulos wakuphawulayo oko!—1 Korinte 3:7.
Emva kweminyaka enokuba mibini kwikomkhulu lesixeko saseManagua, sacelwa ukuba sifudukele kwinxalenye esemzantsi weNicaragua. Apho sasebenza nebandla eliseRivas namaqela aselumelwaneni abantu abanomdla abakwanti. Xa ndisiya kula maqela ndandiphelekwa nguPedro Peña, iNgqina elithembekileyo elikhulileyo. Elinye lalikwisiqithi esinentaba-mlilo eLake Nicaragua, apho kwakukho intsapho enye kuphela yamaNgqina kaYehova.
Nangona le ntsapho yayingenazinto zininzi eziphathekayo, yenza umgudu omkhulu ukubonisa uxabiso ngotyelelo lwethu. Ngobusuku esafika ngabo, sasisesilungiselelwe ukutya. Sahlala iveki, yaye abantu abaninzi abathandekayo balapho ababethanda iBhayibhile babelana nathi ngokutya kwabo. Savuya gqitha sakuba nabantu abali-101 ababeze kwintetho yesidlangalala yeBhayibhile ngeCawa.
Ndivakalelwa kukuba amandla kaYehova omelezayo abonakala xa, ngesinye isihlandlo, sasifanele sityelele iqela labantu abanomdla kwiintaba ezikufuphi nomda waseCosta Rica. Ngosuku esasifanele sihambe ngalo, uPedro weza kundiphuthuma, kodwa ndandilele ndinesifo seengcongconi. Ndathi: “Andinakuhamba, Pedro.” Ebeka isandla sakhe ebunzini lam, waphendula wathi: “Unecesina, kodwa umele uze sihambe! Abazalwana balindile.” Wandula ke watsho ngomnye weyona mithandazo esuka entliziyweni endakhe ndawuva.
Emva koko, ndathi: “Hamba uye kuzithengela ifresco (isiselo seziqhamo). Ndiza kube ndilungile kwimizuzu enokuba lishumi.” Kwindawo esasiyityelele kwakuhlala iintsapho ezimbini ezingamaNgqina, yaye zasiphatha kakuhle gqitha. Ngosuku olulandelayo sahamba nazo saya kushumayela, nangona ndandisebuthathaka ngenxa yecesina. Hayi indlela ekwakusomeleza ngayo ukubona abantu abangaphezu kwabalikhulu ababeze kwintlanganiso yethu yangeCawa!
Ukufuduka Kwakhona
Ngowe-1975 kwazalwa umntwana wethu wesixhenxe, uVaughn. Kunyaka olandelayo, sasifanele sibuyele eKhanada ngenxa yezizathu zemali. Kwakungelula ukuhamba eNicaragua kuba saweva ngokwenene amandla kaYehova omelezayo ngoxa sasihleli apho. Ngexesha esahamba ngalo apho, kwakusiza abantu abangaphezu kwabangama-500 ezintlanganisweni kwintsimi yebandla lethu.
Ngaphambilana, xa mna nentombi yethu uMiriam samiselwa njengoovulindlela abakhethekileyo eNicaragua, uMiriam wandibuza: “Tata, ukuba kufuneka ubuyele eKhanada ngenye imini, ngaba ungandivumela ndihlale apha?” Ndandingazimiselanga ukuhamba, ngoko ndathi: “Kakade kuya kuba njalo!” Ngoko ukuhamba kwethu, uMiriam wasala ukuze aqhubeke nenkonzo yexesha elizeleyo. Kamva, watshata noAndrew Reed. Ngowe-1984 baya kwiklasi yama-77 yaseGiliyadi, isikolo sabavangeli basemazweni abangamaNgqina kaYehova, esasiseBrooklyn, eNew York ngelo xesha. Ngoku uMiriam nomyeni wakhe bakhonza kwiDominican Republic, ezalisekisa umnqweno wakhe owafakwa ngabavangeli basemazweni eNicaragua.
Ebudeni belo xesha, ndandisoloko ndicinga ngamazwi kaTata athi, “asiyeki lula.” Ngoko ngowe-1981 xa sasonge imali eyaneleyo yokubuyela kuMbindi Merika, safuduka kwakhona, ngoku sisinge eCosta Rica. Ngoxa sasikhonza apho, samenywa ukuze sincedise ekwakheni isebe elitsha. Noko ke, ngowe-1985 unyana wethu uGrant wayefuna unyango, ngoko sabuyela eKhanada. UGlen wahlala eCosta Rica ukuze asebenze kumsebenzi wokwakha wesebe, ngoxa uAnnette noCharmaine babekhonza njengoovulindlela abakhethekileyo. Thina esasishiye iCosta Rica asizange sicinge ukuba sasingayi kuze siphinde sibuyele apho.
Ukuhlangabezana Nobunzima
NgoSeptemba 17, 1993, kwakuyimini eyaqala kakuhle nelanga ligqats’ ubhobhoyi. Mna nonyana wethu omdala, uMark, sasibethelela uphahla. Sasisebenza kunye yaye sincokola ngezinto zokomoya, njengoko kwakulisiko lethu. Ngandlel’ ithile ndatyibilika ndaza ndaya kuwa phantsi. Xa ndibuyela ezingqondweni, ndandibona nje kuphela izibane eziqaqambileyo nabantu abanxibe iimpahla ezimhlophe. Yayiligumbi lonyango longxamiseko lasesibhedlele.
Ngenxa yoko iBhayibhile ikuthethayo, into nje yokuqala endayithethayo ndathi: “Andilifuni igazi, andilifuni igazi!” (IZenzo 15:28, 29) Hayi indlela okomeleza ngayo ukuva uCharmaine esithi: “Kulungile, Tata. Sonke sikho.” Ndafumanisa kamva ukuba oogqirha bayibona ingxelo yam yezonyango, yaye ukungasebenzisi kwam igazi akuzange kube yimbambano. Ndandaphuke intamo yaye ndifelwe ngamalungu onke omzimba, ndingakwazi nokuphefumla.
Ndingakwazi ukuzenzela nto, ndandikufuna ngamandla kunanini na ngaphambili ukomelezwa nguYehova. Itracheotomy, utyando olwenzelwa ukufakela umbhobho womatshini wokuphefumla, yavala indlela yomoya oya kwimiphimbo. Ndandingakwazi ukuthetha. Kwakufuneka abantu bajonge imilebe yam ukuze bakuqonde oko ndizama ukukuthetha.
Iindleko zanda ngokukhawuleza. Ekubeni umfazi wam nenkoliso yabantwana bam bekwinkonzo yexesha elizeleyo, ndandizibuza enoba kwakuya kufuneka bashiye inkonzo ukuze banyamekele ezi ndleko kusini na. Noko ke, uMark wakwazi ukufumana umsebenzi owanceda ukugubungela inkoliso yezi ndleko kwiinyanga nje ezintathu. Ngenxa yoko, bonke bakwazi ukuhlala kwinkonzo yexesha elizeleyo ngaphandle kwam nomfazi wam.
Amakhulu amaqweqwe neeleta ezivela kumazwe amathandathu awahlukahlukeneyo ayezele iindonga zegumbi lam lasesibhedlele. UYehova wayendomeleza ngokwenene. Nebandla lanceda intsapho yam ngokutya kwinxalenye yeenyanga ezintlanu ezinesiqingatha ngoxa ndandikwicandelo labagulela ukufa ngayo. Suku ngalunye, umdala ongumKristu wayechitha injikalanga nam, endifundela eBhayibhileni nakwiimpapasho zeBhayibhile, yaye ekwandibalisela amava akhuthazayo. Amalungu amabini entsapho ayelungiselela nam intlanganiso nganye yebandla, ngoko andizange ndikuphose ukutya okubalulekileyo kokomoya.
Ngoxa ndandisesibhedlele, kwenziwa amalungiselelo okuba ndiye kwindibano ekhethekileyo yosuku olunye. Abasebenzi basesibhedlele balungiselela umongikazi ovunyiweyo negcisa elaliza kundincedisa ukuphefumla ngomatshini ukuba bahambe nam usuku lonke. Hayi indlela okwakumnandi ngayo ukuba kunye nabazalwana noodade bam abangamaKristu kwakhona! Andisokuze ndikulibale ukubona amakhulu eme emgceni, elindele ukuza kundibulisa.
Ukuhlala Ndiphilile Ngokomoya
Malunga nonyaka emva kwale ngozi, ndakwazi ukubuyela ekhaya kwintsapho yam, nangona ndandisafuna ukunyanyekelwa ngalo lonke ixesha. Iveni eyenziwe ngendlela ekhethekileyo yenza ndikwazi ukuya kwiintlanganiso, nto leyo endingafane ndiyiphose. Noko ke, ndimele ndivume ukuba, akulula ukuya. Ekubeni ndibuyele ekhaya, ndiye ndakwazi ukuya kuzo zonke iindibano zesithili.
Ekugqibeleni, ngoFebruwari 1997, ndakwazi kwakhona ukuthetha ukusa kumkhamo othile. Abanye abongikazi bam bandiphulaphula ngenyameko njengoko ndisabelana nabo ngethemba endinalo elisekelwe eBhayibhileni. Omnye umongikazi uye wandifundela yonke incwadi ethi AmaNgqina KaYehova—Abavakalisi BoBukumkani BukaThixo kwakunye nezinye iimpapasho zeWatch Tower. Ndibhalelana nabantu abathile ngokusebenzisa ukhuni ukuze ndisebenzise ikhompyutha. Nangona ukuchwetheza ngale ndlela kungumsebenzi oyindinisa, kunomvuzo ukuba nesabelo kubulungiseleli.
Ndiqaqanjelwa kakhulu yimithambo-luvo. Kodwa kubonakala ngathi xa ndisabelana ngeenyaniso zeBhayibhile nabanye okanye ndiphulaphule bendifundela, ndiva isiqabu. Maxa wambi, ndinikela ubungqina esitratweni nomfazi wam ondixhasayo, onditolikelayo xa ndifuna uncedo. Kwizihlandlo eziliqela ndiye ndakwazi ukukhonza njengovulindlela ongumncedani. Ukukhonza njengomdala ongumKristu kuyandonwabisa, ingakumbi xa abazalwana besiza kum ezintlanganisweni okanye bendityelela ekhaya yaye ndiyakwazi ukubanceda ndize ndibakhuthaze.
Ndimele ndivume ukuba kulula ukudandatheka. Ngoko nanini na ndiziva ndidakumbile, ngokukhawuleza ndithandazela ukuba ndibe novuyo. Ubusuku nemini ndithandazela ukuba uYehova aqhubeke endomeleza. Ileta okanye ukutyelelwa ngothile kusoloko kundivuyisa. Kwakhona ukufunda amaphephancwadi IMboniselo noVukani! kuzalisa ingqondo yam ngeengcinga ezakhayo. Maxa wambi abongikazi abahlukahlukeneyo bayandifundela la maphephancwadi. Ekubeni ndenzakala, ndiye ndaphulaphula ufundo lwayo yonke iBhayibhile kwiikhasethi izihlandlo ezisixhenxe. Ezi zezinye zeendlela uYehova aye wandomeleza ngazo.—INdumiso 41:3.
Ukutshintsha kweemeko zam kuye kwandinceda ndaba nethuba lokucamngca ngendlela uMyaleli Ozukileyo, uYehova asifundisa ngayo ebomini. Usinika ulwazi oluchanileyo ngokuthanda nangenjongo yakhe, ubulungiseleli obunenjongo, icebiso ngemfihlelo yolonwabo lwentsapho, nokwazi oko simele sikwenze xa sisebunzimeni. UYehova uye wandisikelela ngomfazi othembekileyo nomhle. Nabantwana bam baye bandixhasa ngokunyanisekileyo, yaye kuluvuyo kum ukuba bonke beye banenxaxheba kubulungiseleli bexesha elizeleyo. Enyanisweni, ngoMatshi 11, 2000, unyana wethu uMark nomfazi wakhe, uAllyson, baphumelela kwiklasi ye-108 kwiSikolo saseGiliyadi baza babelwa eNicaragua. Mna nomfazi wam sakwazi ukuya xa babethweswa isidanga. Ngokunyanisekileyo ndingatsho ukuba ubunzima buye babutshintsha ubomi bam kodwa kungekhona intliziyo yam.—INdumiso 127:3, 4.
Ndiyambulela uYehova ngobulumko aye wandinika bona ukuze ndikwazi ukudlulisela kwintsapho yam ilifa lokomoya endalifumanayo. Ndiyomelezwa yaye kuyandikhuthaza ukubona abantwana bam bekhonza uMdali ngesimo sengqondo esifanayo nesikatata, owathi, “Asiyeki lula. UYehova wasiyalela ukuba sishumayele.” Eneneni, uYehova uye wandomeleza mna nentsapho yam yonke imihla yethu.
[Umfanekiso okwiphepha 24]
NdinoTata, abakhuluwa bam, nodade wethu, ecaleni kwendlu yethu enamavili, eyayisetyenziswa ngeentsuku zobuvulindlela. Ndingasekunene
[Umfanekiso okwiphepha 26]
Ndinomfazi wam, uMyrna
[Umfanekiso okwiphepha 26]
Umfanekiso wakutshanje wentsapho yethu
[Umfanekiso okwiphepha 27]
Ndisanikela ubungqina ngeeleta