Ibali Lobomi

Ukukhulisa Abantwana Abasibhozo Ngeendlela ZikaYehova Kwakunzima Kodwa Kubangela Uvuyo

KUBALISA UJOYCELYN VALENTINE

Ngowe-1989 umyeni wam waya kusebenza kwelinye ilizwe. Wathembisa ukuba uza kundithumelela imali ukuze ndinyamekele abantwana bam abasibhozo. Kwaqengqeleka iiveki neenyanga kungekho nto ndiyivayo. Ndahlala ndizomeleza ngelithi, ‘Zakuthi nje izinto zakuba cala-nye abuye.’

EKUBENI ndandingenamali yokunyamekela intsapho yam, ndaxhalaba gqitha. Ndandingalali buhlayo, ndizibuza ukuba, ‘Angayenza njani into enje kwintsapho yakhe?’ Ekugqibeleni, nangona kwakubuhlungu ndayamkela into yokuba umyeni wam usishiye kwesinomhlwa. Sele kumalunga neminyaka eli-16 wasishiyayo, akakabuyi nangoku. Ngenxa yoku, kwanyanzeleka ukuba ndikhulise abantwana bam ngaphandle kweqabane. Oku bekungeyondlwan’ iyanetha, kodwa ukubona abantwana bam besamkela iindlela zikaYehova kuye kwandivuyisa gqitha. Noko ke, ngaphambi kokuba ndikuxelele indlela esiye sawa sivuka ngayo njengentsapho, makhe ndikuxelele indlela endakhuliswa ngayo.

Ukufuna Ukhokelo LweBhayibhile

Ndazalwa ngowe-1938 kwisiqithi seCaribbean eJamaica. Nangona uTata engazange abe lilungu lecawa, wayezigqala njengomntu ohlonel’ uThixo. Ebusuku wayedla ngokucela ukuba ndimfundele incwadi yeBhayibhile yeeNdumiso. Kungekudala, ndakwazi ukucengceleza iindumiso ezininzi. UMama wayelilungu lecawa yasekuhlaleni, yaye maxa wambi wayedla ngokuhamba nam xa esiya khona.

Apho sasixelelwa ukuba, uThixo uthabatha abantu abalungileyo abase ezulwini aze abangendawo abatshise ngonaphakade esihogweni. Sasixelelwa nokuba uYesu unguThixo futhi uyabathanda abantwana. Ndadideka ndaza ndamoyika uThixo. Ndandizibuza, ‘Kunokwenzeka njani ukuba uThixo osithandayo athuthumbise abantu emlilweni?’

Ndandithi ndakucinga ngesihogo ndingakwazi nokulala. Ekuhambeni kwexesha, ndangenela izifundo zeBhayibhile ngokubhalelana neCawa yamaSabatha. Ayefundisa ukuba abantu abangendawo abazukuthuthunjiswa ngonaphakade, kodwa baza kutshiswa babe luthuthu kwidangatye lomlilo. Oku kwavakala kusengqiqweni, yaye ndaqalisa ukuya kwiintlanganiso zawo zonqulo. Kodwa ndafumanisa ukuba iimfundiso zawo ziyadida, yaye oko ndandikufunda kwakungayilungisi indlela ephosakeleyo endandikujonga ngayo ukuziphatha.

Ngelo xesha, abantu ngokuqhelekileyo babevuma ukuba ukuhenyuza kuphosakele. Sekunjalo, mna nabanye abaninzi sasikholelwa ukuba kuphela ngabo baneentlobano zesini namaqabane amaninzi abahenyuzayo. Ngaloo ndlela, abantu ababini abangatshatanga ababa neentlobano zesini bobabini kuphela kungekhona namanye amaqabane, babengenzi sono. (1 Korinte 6:9, 10; Hebhere 13:4) Loo nkolelo, yaba negalelo ekubeni ndibe nabantwana abathandathu ngaphandle komtshato.

Ukwenza Inkqubela Ngokomoya

Ngowe-1965, uVaslyn Goodison noEthel Chambers beza kuhlala eBath kufuphi nalapho sihlala khona. Babengoovulindlela, okanye abalungiseleli bexesha elizeleyo bamaNgqina kaYehova, yaye ngenye imini bathetha notata. Wasamkela isifundo seBhayibhile. Xa besityelele babedla ngokuthetha nam xa ndikho. Nangona amaNgqina kaYehova ndandingawaqondi kakuhle, ndagqiba ekubeni ndifundisise iBhayibhile nawo ukuze ndiwabonise ukuba akachananga.

Ngoxa sifunda, ndandibuza imibuzo emininzi, yaye amaNgqina ayeyiphendula yonke esebenzisa iBhayibhile. Ngoncedo lwawo, ndafumanisa ukuba abafileyo abazinto yaye ababandezeleki sihogweni. (INtshumayeli 9:5, 10) Ndafunda nangethemba lobomi obungunaphakade kumhlaba oyiParadesi. (INdumiso 37:11, 29; ISityhilelo 21:3, 4) Nangona utata wayekayo ukufunda iBhayibhile, ndaqalisa ukuya kwiintlanganiso zebandla lasekuhlaleni lamaNgqina kaYehova. Ukuqhutywa kwezo ntlanganiso ngoxolo nangocwangco kwandenza ndafunda ngakumbi ngoYehova. Ndandisiya nakwiindibano zesiphaluka nezesithili, iindibano ezinkulu zamaNgqina. Ukufunda iBhayibhile kwandenza ndanomnqweno wokukhonza uYehova ngendlela efanelekileyo. Noko ke, kwakukho umqobo othile okhoyo.

Ngelo xesha, ndandinabantwana abathandathu ndihlala notata wabantwana bam abathathu singatshatanga. Ndafunda eBhayibhileni ukuba uThixo uyakugweba ukuba neentlobano zesini ngaphandle komtshato, yaye ndaqalisa ukutyiwa sisazela. (IMizekeliso 5:15-20; Galati 5:19) Njengoko ndandiya ndiyithanda gqitha inyaniso, ndandilangazelela ukuphila ngokuvisisana nomthetho kaThixo. Ekugqibeleni, ndenza isigqibo. Ndaxelela iqabane lam ukuba kuza kufuneka sitshate okanye kungenjalo sahlukane. Nangona lalingazamkeli iinkolelo zam, ngoAgasti 15, 1970, satshata, emva kweminyaka emihlanu amaNgqina aqalisa ukuthetha nam. NgoDisemba 1970, ndafuzisela ukuzahlulela kwam kuYehova ngokubhaptizwa emanzini.

Andisayi kuze ndilulibale usuku lwam lokuqala ukuba nenxaxheba kumsebenzi wokushumayela. Ndandisoyika ndingazi ukuba ndiqale ngaphi ukuncokola ngeBhayibhile. Enyanisweni, kwathi xibilili xa umninikhaya wokuqala wayiphelisa ngokukhawuleza incoko yethu. Noko ke, kungekudala ndayeka ukoyika gqitha. Ekupheleni kosuku, ndavuyiswa gqitha kukuba ndiye ndathetha ngokufutshane nabantu abaliqela ngeBhayibhile ndaza ndabashiyela ezinye zeempapasho zethu ezisekelwe eBhayibhileni.

Ukugcina Intsapho Yomelele Ngokomoya

Ngowe-1977 sasisele sinabantwana abasibhozo. Ndandizimisele ukwenza konke okusemandleni am ukuze ndincede intsapho yam ikhonze uYehova. (Yoshuwa 24:15) Ngoko ndenza umgudu wokuqhuba isifundo seBhayibhile sentsapho rhoqo. Maxa wambi ngenxa yokudinwa, ndandiye ndibiwe bubuthongo ngoxa omnye umntwana efunda isiqendu, kuze kufuneke bandivuse. Sekunjalo ukudinwa akuzange kwenze singafundi iBhayibhile njengentsapho.

Ndandisoloko ndithandaza nabantwana bam. Babesithi bakuba bekhulule, ndibafundise ukuzithandazela kuYehova. Ndandiqinisekisa ukuba ngamnye kubo uyathandaza ngaphambi kokuba alale. Ndandithandaza nomntwana ngamnye osemncinane ukuba angazithandazela.

Ekuqaleni umyeni wam wayengafuni ukuba ndihambe nabantwana ukuya kwiintlanganiso zebandla. Noko ke, into yokuba kwakuza kufuneka asale nabantwana ngoxa ndikwiintlanganiso yamthomalalisa. Ebusuku, wayethanda ukuya kubutha nabahlobo bakhe, kodwa ukuhamba negquba labantwana abasibhozo wayengakuginyi ncam! Kamva, waqalisa ukundincedisa ukuze abantwana balungele ukuya kwiHolo yoBukumkani.

Kungekudala abantwana bayiqhela into yokuya kuzo zonke iintlanganiso nasentsimini. Ebudeni beeholide zehlobo, babedla ngokushumayela noovulindlela, okanye abalungiseleli bexesha elizeleyo, ebandleni. Oku kwanceda abantwana bam abaselula ukuba balithande ngokunzulu ibandla nomsebenzi wokushumayela.—Mateyu 24:14.

Amaxesha Eemvavanyo

Ukuze akwazi ukunyamekela intsapho yethu kakuhle ngemali, umyeni wam waqalisa ukumana esiya kusebenza kwamanye amazwe. Wayedla ngokuhamba ithuba elide kodwa abuye ngexesha lekhefu. Noko ke, ngowe-1989, akazange abuye. Njengoko ndiye ndatsho ngaphambilana, ukusishiya komyeni wam kwandidandathekisa gqitha. Izihlandlo ezininzi ebusuku ndandilila ndithandaza kuYehova ndimcela ukuba andithuthuzele ndize ndinyamezele, yaye ndavakalelwa kukuba uwuphendule umthandazo wam. Izibhalo ezinjengoIsaya 54:4 neyoku-1 kwabaseKorinte 7:15 zandinika uxolo lwengqondo namandla okuqhubeka nobomi bam. Kwibandla lamaKristu, abahlobo nezalamane nabo bandithuthuzela baza bandixhasa ngezinto eziphathekayo. Ndimbulela ngokungazenzisiyo uYehova nabantu bakhe ngokundinceda.

Zikho nezinye iimvavanyo esajamelana nazo. Enye yeentombi zam yakha yasuswa ebandleni ngenxa yokuziphatha ngokuchasene nezibhalo. Ndibathanda gqitha abantwana bam, sekunjalo eyona nto ibalulekileyo kum kukunyaniseka kuYehova. Ngoko ebudeni belo xesha, mna nabanye abantwana salandela ngokuqinileyo ulwalathiso lweBhayibhile ngendlela esimele sibaphathe ngayo abo basuswe kubudlelane. (1 Korinte 5:11, 13) Abantu abangayiqondiyo imeko yethu babesigxeka. Noko ke, emva kokuba intombi yam ibuyiselwe ebandleni, umyeni wayo wandixelela ukuba ukubambelela kwethu ngokuqinileyo kwimigaqo yeBhayibhile kwamchukumisa. Ngoku ukhonza uYehova nentsapho yakhe.

Ukujamelana Neengxaki Zemali

Xa umyeni wam wasishiyayo, ndandingenamvuzo usisigxina, yaye naye ngoku wayengasasixhasi ngemali. Le meko yasenza saneliseka bubomi obulula saza saxabisa ubutyebi bokomoya kunokusukela izinto eziphathekayo. Njengoko abantwana babefunda ukuthandana nokuncedana, bakhula besondelene. Abo badala bathi bakuqalisa ukusebenza, ngokuzithandela baxhasa abancinane. Umafungwashe wam, uMarseree, wanceda udadewabo omncinane, uNicole ukuba agqibe isikolo samabanga aphakamileyo. Ukongezelela, ndakwazi ukuba nevenkile encinane ethengisa ukutya. Loo madlana yandinceda ndakwazi ukuthenga izinto ezithile esizisweleyo.

UYehova akazange asishiye. Ngesinye isihlandlo, ndaxelela omnye udade ongumKristu ukuba ngenxa yemali asikwazi kuya kwindibano yesithili. Wandiphendula wathi: “Dade Val, xa usiva ukuba kuza kubakho indibano, qalisa ukulungiselela ukuya khona! UYehova uya kukunyamekela.” Ndalilandela icebiso lakhe. UYehova wandinyamekela, yaye usaqhubeka esenjenjalo. Asizange nakanye khe siphoswe yindibano yesiphaluka okanye yesithili ngenxa yokuba singenamali.

Ngowe-1988, iJamaica yadlakazeliswa yiNkanyamba uGilbert, saza sashiya ikhaya lethu sabalekela kwindawo ekhuselekileyo. Xa esi saqhwithi sazola okwethutyana, mna nonyana wam sabaleka saya kujonga ikhaya lethu elalilibhodlo. Ngoxa sasivumbulula enkunkumeni, ndabona into endandifuna ukuyisindisa. Ngesiquphe, kwavuthuza umoya kwakhona, sekunjalo ndayibamba ndayiqinisa le nto. “Mama beka phantsi umabonwakude. Kutheni ungumfazi kaLote?” (Luka 17:31, 32) Loo mazwi onyana wam andibuyisela ezingqondweni. Ndawulahla phantsi lo mabonwakude wawumanzi tixi yimvula, saza sabalekela kwindawo ekhuselekileyo.

Ndaye ndangcangcazela ndakucinga ukuba ndibeke ubomi bam esichengeni ngenxa nje kamabonwakude. Kodwa ndiye ndichukumiseke xa ndicinga amazwi awathethwa ngunyana wam ngeso sihlandlo awayebonisa ukuba uphaphile ngokomoya. Ngenxa yoqeqesho lweBhayibhile aye walufumana ebandleni lamaKristu, wakwazi ukundinceda ndiphephe ukwenzakala ngokoqobo mhlawumbi nangokomoya.

Le nkanyamba yashiya ikhaya lethu nezinto zethu zingamabhodlo, yaye yasishiya sidimazekile. Kwandula ke kwafika abazalwana bethu abangamaKristu. Basikhuthaza ukuba sikholose ngoYehova ngoxa sijamelene nale lahleko size siqhubeke nomsebenzi wokushumayela, yaye basinceda ngokusivusela ikhaya lethu. Lo msebenzi wokuzincama nowenziwa ngothando ngamaNgqina angamatsha-ntliziyo aseJamaica navela kwamanye amazwe, wasichukumisa gqitha.

Ukubeka UYehova Kwindawo Yokuqala

Emva kokugqiba isikolo, umntwana wam wesibini uMelaine, waba nguvulindlela. Emva koko wamkela isimemo sokuba nguvulindlela kwelinye ibandla, nto leyo eyayithetha ukuba uza kushiya umsebenzi wakhe wempangelo. Nangona loo msebenzi wawumnceda akwazi ukusixhasa ngemali, saba nentembelo yokuba uYehova uya kusixhasa ukuba sibeka uBukumkani kwindawo yokuqala. (Mateyu 6:33) Kamva, unyana wam uEwan, naye wafumana isimemo sokuba nguvulindlela. Wayesixhasa ngemali, kodwa sambongoza ukuba asamkele eso simemo saza samnqwenelela ukuba uYehova amsikelele. Andizange khe ndibadimaze abantwana bam ekubeni bandise inkonzo yabo yoBukumkani, yaye nathi thina basala ekhaya asizange saswela nto. Kunoko, siye saba novuyo olungakumbi, yaye maxa wambi siye sakwazi ukunceda abasweleyo.

Namhlanje, kundivuyisa gqitha ukubona abantwana bam ‘behamba enyanisweni.’ (3 Yohane 4) Omnye weentombi zam, uMelaine, uhamba nomyeni wakhe kumsebenzi wokutyelela amabandla njengomveleli wesiphaluka. Intombi yam uAndrea nomyeni wakhe bangoovulindlela abakhethekileyo, yaye uhamba nomyeni wakhe xa etyelela amabandla njengomveleli wesiphaluka obambeleyo. Unyana wam, uEwan, nenkosikazi yakhe bangoovulindlela abakhethekileyo, yaye ungumdala webandla. Enye intombi yam, uAva-Gay, isebenza nomyeni wayo kwiofisi yesebe lamaNgqina kaYehova eJamaica. UJennifer, uGenieve noNicole bakhonza kunye nabayeni nabantwana babo njengamalungu akhutheleyo emabandleni abo. UMarseree uhlala nam, yaye sikwiBandla lasePort Morant. UYehova undisikelele gqitha, kuba bonke abantwana bam abasibhozo baqhubeka bemkhonza.

Njengoko iminyaka ihamba neengxaki zempilo nazo ziyanda. Ngoku ndinesifo samathambo, kodwa ndisenguvulindlela. Noko ke, kwiminyaka edluleyo kuye kwanzima gqitha ukushumayela kulo mmandla wethu uneenduli. Ndazama ukuqhuba ibhayisekile ndaza ndafumanisa kulula ukuhamba ngayo kunokuhamba ngeenyawo. Ngoko ndazithengela ibhayisekile engentsha kangako ndaza ndasebenzisa yona. Ekuqaleni, abantwana bam babengathandi ukundibona ndiqhuba ibhayisekile ekubeni ndiphethwe sisifo samathambo. Sekunjalo, bavuya kakhulu kukundibona ndiqhubeka ndishumayela njengoko ndandinqwenela ukwenjenjalo.

Kundivuyisa gqitha ukubona abantu endandifunda nabo besamkela inyaniso yeBhayibhile. Ndisoloko ndithandaza kuYehova ukuba ancede yonke intsapho yam ihlale inyanisekile kuye kweli xesha lesiphelo de kube ngunaphakade. Ndiyamdumisa yaye ndimbulela uYehova ‘umphulaphuli Omkhulu wemithandazo,’ ngokundenza ndikwazi ukuhlangabezana nengxaki yokukhulisa abantwana bam abasibhozo ngeendlela zakhe.—INdumiso 65:2.

[Umfanekiso okwiphepha 10]

Ndikunye nabantwana bam, amaqabane abo nabazukulwana bam

[Umfanekiso okwiphepha 12]

Ngoku ndisebenzisa ibhayisekile kubulungiseleli bam