Nyamekela Umoya Uze Uphile!
“Ukunyamekela umoya kuthetha ubomi.”—ROMA 8:6.
1, 2. IBhayibhile yenza wuphi umahluko phakathi ‘kwenyama’ ‘nomoya’?
AKUNTO ilula ukuhlala ucocekile ngokuziphatha phambi koThixo phakathi kwebutho labantu eliziphethe kakubi nelizukisa ukwanelisa iminqweno yenyama. Noko ke, iZibhalo zithelekisa “inyama” ‘nomoya,’ zibonisa umahluko okhoyo phakathi kwemiphumo emanyumnyezi yokuvumela ukulawulwa yinyama enesono nemiphumo eyintsikelelo yokuvumela ukuphenjelelwa ngumoya oyingcwele kaThixo.
2 Ngokomzekelo, uYesu Kristu wathi: “Ngumoya onika ubomi; inyama ayisebenzi nto konke konke. Amazwi endiwathethileyo kuni angumoya yaye abubomi.” (Yohane 6:63) Ebhalela amaKristu aseGalati, umpostile uPawulos wathi: “Iminqweno yenyama inxamnye neyomoya, ukanti neyomoya inxamnye neyenyama; kuba ezo zinto zichasene.” (Galati 5:17) UPawulos waphinda wathi: “Lowo uhlwayelela eyakhe inyama uya kuvuna ukonakala ngokwasenyameni, kodwa lowo uhlwayelela umoya uya kuvuna ubomi obungunaphakade ngokwasemoyeni.”—Galati 6:8.
3. Yintoni efunekayo ukuze sizikhwebule kwiminqweno notyekelo oluphosakeleyo?
3 Umoya oyingcwele kaYehova—amandla akhe asebenzayo—unokuyishenxisa ngempumelelo ‘iminqweno yenyama’ engacocekanga nokulawulwa okuyingozi yinyama yethu enesono. (1 Petros 2:11) Ukuze sizikhwebule kubukhoboka botyekelo oluphosakeleyo, kubalulekile ukuba sizuze uncedo lomoya kaThixo, kuba uPawulos wabhala esithi: “Ukunyamekela inyama kuthetha ukufa, kodwa ukunyamekela umoya kuthetha ubomi noxolo.” (Roma 8:6) Kuthetha ntoni ukunyamekela umoya?
“Ukunyamekela Umoya”
4. Kuthetha ntoni “ukunyamekela umoya”?
4 Xa uPawulos wabhala ‘ngokunyamekela umoya,’ wasebenzisa igama lesiGrike elithetha “indlela yokucinga, ingqondo,. . . injongo, umnqweno, ukulwa.” Isenzi esinxulumene noku sithetha “ukucinga, ukuqiqa ngendlela ethile.” Ngaloo ndlela, ukunyamekela umoya kuthetha ukulawulwa nokuqhutywa ngamandla kaYehova asebenzayo. Kubonisa ukuba ngokuzithandela sivumela indlela yethu yokucinga, utyekelo neminqweno yethu iphenjelelwe ngokupheleleyo ngumoya oyingcwele kaThixo.
5. Sifanele sizithobe ukusa kuwuphi umlinganiselo kwimpembelelo yomoya oyingcwele?
5 UPawulos wagxininisa umlinganiselo esifanele sizithobe ngawo kwimpembelelo yomoya oyingcwele xa wathetha ngokuba ‘ngamakhoboka omoya.’ (Roma 7:6) Ngesizinzi sokholo lwawo kwidini likaYesu lentlawulelo, amaKristu aye akhululwa ekulawulweni sisono yaye ngaloo ndlela aye ‘afa’ kwimeko yawo yangaphambili yokuba ngamakhoboka aso. (Roma 6:2, 11) Abo bafe ngaloo ndlela yokomfuziselo basaphila enyameni yaye bakhululekile ngoku ukuba balandele uKristu “njengamakhoboka obulungisa.”—Roma 6:18-20.
Utshintsho Oluphawulekayo
6. Luluphi utshintsho olwenziwa ngabo baba ‘ngamakhoboka obulungisa’?
6 Ukutshintsha ekubeni ‘ngamakhoboka esono’ sibe ngabakhonzi bakaThixo “njengamakhoboka obulungisa” lutshintsho oluphawulekayo ngokwenene. Ngokuphathelele abanye abenza utshintsho olunjalo, uPawulos wabhala: “Niye nahlanjwa nahlambuluka, niye nangcwaliswa, niye navakaliswa ningamalungisa egameni leNkosi yethu uYesu Kristu nangomoya kaThixo wethu.”—Roma 6:17, 18; 1 Korinte 6:11.
7. Kutheni kubalulekile ukujonga izinto ngendlela uYehova azijonga ngayo?
7 Ukuze senze olo tshintsho luphawulekayo, okokuqala kufuneka sifunde indlela uYehova azijonga ngayo izinto. Kwiinkulungwane ezadlulayo, umdumisi uDavide wabongoza uThixo ngokusuk’ entliziyweni esithi: “Ndazise iindlela zakho, Yehova. . . Ndihambise enyanisweni yakho undifundise.” (INdumiso 25:4, 5) UYehova wamphulaphula uDavide, yaye unako ukuwuphendula nomthandazo onjalo wabakhonzi bakhe bale mihla. Ekubeni iindlela zikaThixo nenyaniso yakhe zicocekile yaye zingcwele, ukucamngca ngazo kuya kuba luncedo ukuba sijamelana nesilingo sokwanelisa iminqweno engacocekanga yenyama.
Indima Ebalulekileyo YeLizwi LikaThixo
8. Kutheni kubalulekile ukuba sifundisise iBhayibhile?
8 ILizwi likaThixo, iBhayibhile yimveliso yomoya wakhe. Ngaloo ndlela, enye indlela ebalulekileyo kukuvumela loo moya usebenze kuthi ngokufunda nokufundisisa iBhayibhile—yonke imihla ukuba kunokwenzeka. (1 Korinte 2:10, 11; Efese 5:18) Ukuzalisa ingqondo nentliziyo yethu ngeenyaniso nemilinganiselo yeBhayibhile kuya kusinceda ukuba simelane nokuhlaselwa kobumoya bethu. Ewe, xa kuvela izilingo zokuziphatha okubi, umoya kaThixo unokusenza sikhumbule iZibhalo nemigaqo ekhokelayo leyo inokuqinisa isigqibo sethu sokwenza ngokuvisisana nokuthanda kukaThixo. (INdumiso 119:1, 2, 99; Yohane 14:26) Ngoko ke, asikhohliselwa ukulandela ikhondo eliphosakeleyo.—2 Korinte 11:3.
9. Ukufundisisa iBhayibhile kusiqinisa njani isigqibo sethu sokulondoloza ulwalamano lwethu noYehova?
9 Njengoko siqhubeka nofundisiso lwethu lweZibhalo ngoncedo lweempapasho ezisekelwe eBhayibhileni, umoya kaThixo uphembelela ingqondo nentliziyo yethu, ubangela ukuba intlonelo yethu ngemilinganiselo kaYehova ibe nzulu. Ulwalamano lwethu noThixo luba yeyona nto ibalulekileyo ebomini bethu. Xa sijamelene nesilingo, asicingi ngendlela ekunokuba mnandi ngayo ukubandakanyeka ekwenzeni okuphosakeleyo. Kunoko, inkxalabo esiba nayo ngelo xesha kukulondoloza ingqibelelo yethu kuYehova. Ukuba noxabiso olunzulu ngolwalamano lwethu kunye naye kusishukumisela ukuba soyise naluphi na utyekelo olunokulonakalisa okanye lulutshabalalise.
“Hayi Indlela Endiwuthanda Ngayo Umthetho Wakho!”
10. Kutheni kuyimfuneko ukuthobela umthetho kaYehova ukuze sinyamekele umoya?
10 Ukuze sinyamekele umoya, ukuba nolwazi lweLizwi likaThixo akwanelanga. UKumkani uSolomon wayeyazi kakuhle imilinganiselo kaYehova, kodwa wasilela ukuphila ngayo ebudeni benxalenye yokugqibela yobomi bakhe. (1 Kumkani 4:29, 30; 11:1-6) Ukuba sinotyekelo lokomoya, asiyi kubona imfuneko yokwazi nje oko kuthethwa yiBhayibhile kodwa siya kuthobela umthetho kaThixo ngentliziyo iphela. Oku kuthetha ukuyihlolisisa ngenyameko imilinganiselo kaYehova size sizabalazele ukuyilandela ngenkuthalo. Umdumisi wayenesimo sengqondo esinjalo. Wavuma esithi: “Hayi indlela endiwuthanda ngayo umthetho wakho! Imini le yonke ndiwuxhalabele.” (INdumiso 119:97) Xa sikuxhalabele ngokwenene ukulandela imithetho kaThixo, siqalisa ukubonisa iimpawu zobuthixo. (Efese 5:1, 2) Kunokuba sitsaleleke ekwenzeni okuphosakeleyo njengabantu abangenakuzinceda, sibonakalisa isiqhamo somoya, yaye umnqweno wokukholisa uYehova uyasithintela ‘kwimisebenzi yenyama’ emibi.—Galati 5:16, 19-23; INdumiso 15:1, 2.
11. Ungakuchaza njani ukuba umthetho kaYehova owalela uhenyuzo ukhusela thina?
11 Sinokukuhlakulela njani ukuwuhlonela ngokunzulu nokuwuthanda umthetho kaYehova? Enye indlela kukuhlolisisa ngenyameko ukuxabiseka kwawo. Khawucinge ngomthetho kaThixo ovumela iintlobano zesini kubantu abatshatileyo kuphela nokwalelayo ukuhenyuza nokukrexeza. (Hebhere 13:4) Ngaba ukuthobela lo mthetho kusibandeza okuthile okulungileyo? Ngaba uBawo wasezulwini onothando ebeya kwenza umthetho osithintelayo ukuba sifumane into eyingenelo? Ngokuqinisekileyo akunjalo! Khangela nje oko kwenzekayo kubantu abaninzi abangaphili ngokuvisisana nemilinganiselo kaYehova yokuziphatha. Ngokufuthi ukumitha okungafunwayo kubakhokelela ekuqhomfeni okanye ekutshateni ngaphambi kwexesha nakwimitshato ekungekho lonwabo kuyo. Abaninzi kufuneka bakhulise umntwana bengenamyeni okanye bengenankosikazi. Ngaphezu koko, abo bahenyuzayo bazibeka esichengeni sokwasulelwa zizifo ezidluliselwa ngesini. (1 Korinte 6:18) Yaye ukuba umkhonzi kaYehova uyahenyuza, indlela avakalelwa ngayo emva koko inokudandathekisa kakhulu. Ukuzama ukungakunanzi ukutyiwa sisazela kunokubangela ukuphuthelwa ebusuku nokunxunguphala. (INdumiso 32:3, 4; 51:3) Ngoko, ngaba ayicacanga into yokuba umthetho kaYehova owalela uhenyuzo wenzelwe ukukhusela thina? Ewe, eneneni kuyingenelo kakhulu ukulondoloza ukucoceka ngokuziphatha!
Thandazela Uncedo LukaYehova
12, 13. Kutheni kufanelekile ukuthandaza xa sikhathazwa yiminqweno yesono?
12 Ngokuqinisekileyo ukuze sinyamekele umoya kufuneka sithandaze ngokusuk’ entliziyweni. Kufanelekile ukucela uncedo lomoya kaThixo, kuba uYesu wathi: “Ukuba. . . niyakwazi ukunika abantwana benu izipho ezilungileyo, wobeka phi na ke yena uYihlo osezulwini ukubanika umoya oyingcwele abo bamcelayo!” (Luka 11:13) Xa sithandaza, sinokuvakalisa indlela esixhomekeke ngayo kuncedo lomoya ngokuphathelele ubuthathaka bethu. (Roma 8:26, 27) Xa siphawula ukuba siyachaphazeleka yiminqweno yesono okanye zizimo zengqondo ezithile, okanye ukuba elinye ikholwa elinothando lizisa oku engqalelweni yethu, bekuya kuba bubulumko ukuyichaza ngokungqalileyo ingxaki yethu xa sithandaza size sicele uncedo lukaThixo ukuze soyise olu tyekelo.
13 UYehova unokusinceda ukuba sinikele ingqalelo kwizinto ezibubulungisa, ezinyulu ezinesidima nezincomekayo. Yaye hayi indlela ekufaneleke ngayo ukumbongoza ngokunyanisekileyo ukuze “uxolo lukaThixo” lulondoloze iintliziyo zethu namandla ethu engqondo! (Filipi 4:6-8) Ngoko ke masithandazele uncedo lukaYehova ukuze ‘siphuthume ubulungisa, uzinikelo lobuthixo, ukholo, uthando, unyamezelo, umoya wobulali.’ (1 Timoti 6:11-14) Ngoncedo lukaBawo wethu osezulwini, amaxhala nezilingo aziyi kukhula ukusa kwinqanaba lokuba singakwazi ukuzilawula. Kunoko, ubomi bethu buya kuba noxolo oluvela kuThixo.
Musa Ukuwenza Buhlungu Umoya
14. Kutheni umoya kaThixo ungamandla ococeko?
14 Abakhonzi bakaYehova abaqolileyo basebenzisa isiluleko sikaPawulos esithi: “Musani ukuwucima umlilo womoya.” (1 Tesalonika 5:19) Ekubeni umoya kaThixo ‘ingumoya wobungcwele,’ ucocekile, unyulu, yaye ungcwele. (Roma 1:4) Xa usebenza kuthi, loo moya uba ngamandla obungcwele okanye okucoceka. Usinceda sihlale sikwindlela yobomi ecocekileyo ebonakala ngokuthobela uThixo. (1 Petros 1:2) Naluphi na uqheliselo olungacocekanga lubonisa ukuwugatya loo moya, yaye oko kunokuba nemiphumo emibi. Njani?
15, 16. (a) Sinokuwenza buhlungu njani umoya kaThixo? (b) Sinokukuphepha njani ukuwenza buhlungu umoya kaYehova?
15 Kaloku, uPawulos wabhala: “Musani ukuwenza buhlungu umoya oyingcwele kaThixo, eniye natywinwa ngawo ukwenzela imini yokukhululwa ngentlawulelo.” (Efese 4:30) IZibhalo zichaza umoya kaYehova njengetywina, okanye “umqondiso woko kuzayo,” kumaKristu athanjisiweyo athembekileyo. Yaye obo bubomi bokungafi ezulwini. (2 Korinte 1:22; 1 Korinte 15:50-57; ISityhilelo 2:10) Umoya kaThixo unokukhokelela abo bathanjisiweyo namaqabane abo anethemba lasemhlabeni kubomi bokuthembeka yaye unokubanceda ukuba baphephe imisebenzi yesono.
16 Umpostile walumkisa nxamnye notyekelo lokuxoka, ubusela, ihambo elihlazo, njalo njalo. Ukuba siye sazivumela ukuba sitsalelekele kwizinto ezinjalo, besiya kuba senza ngokuchaseneyo nesiluleko seLizwi likaThixo eliphefumlelwe ngumoya. (Efese 4:17-29; 5:1-5) Ngaloo ndlela, besiya kuba siwenza buhlungu umoya kaThixo ukusa kumlinganiselo othile, nto leyo ngokuqinisekileyo esifuna ukuyiphepha. Ngapha koko, ukuba nawuphi na kuthi uqalisa ukusityeshela siluleko seLizwi likaYehova, usenokuqalisa ukuba nesimo sengqondo okanye imikhwa enokuphumela ekoneni ngabom nasekuphulukaneni nenkoliseko kaThixo ngokupheleleyo. (Hebhere 6:4-6) Enoba asenzi sono ngoku, kusenokwenzeka ukuba sityekele kwelo cala. Ukuba senza ngokuchasene nokhokelo lomoya, siya kuwenza buhlungu. Kanjalo, siya kuba siyamchasa yaye simenza buhlungu uYehova, umthombo womoya oyingcwele. Njengabantu abathanda uThixo, asifuni nakancinane ukwenjenjalo. Kunoko, ngokufanelekileyo sinokuthandazela uncedo lukaYehova ukuze singawenzi buhlungu umoya wakhe kunoko sikwazi ukuzukisa igama lakhe elingcwele ngokuqhubeka sinyamekela umoya.
Qhubeka Unyamekela Umoya
17. Luluphi usukelo lokomoya esinokuzibekela lona, yaye kutheni kunokuba bubulumko ukwenza oku?
17 Indlela ebalaseleyo yokuba siqhubeke sinyamekela umoya kukuzibekela usukelo lokomoya size sisebenzele ukulufikelela. Kuxhomekeka kwiintswelo neemeko zethu, usukelo lwethu lunokuquka ukuphucula imikhwa yethu yofundisiso, ukwandisa isabelo sethu kumsebenzi wokushumayela, okanye ukuzabalazela ukufikelela ilungelo elithile lenkonzo, njengobulungiseleli bobuvulindlela bexesha elizeleyo, inkonzo yaseBheteli okanye umsebenzi wobuvangeli basemazweni. Oku kuya kugcina ingqondo yethu ixakeke zizilangazelelo zokomoya yaye kuya kusinceda sixhathise ukuze singanikezeli kubuthathaka bethu bobuntu okanye siqweqwediswe lusukelo lwezinto eziphathekayo neminqweno engavisisaniyo nezibhalo exhaphakileyo kule nkqubo yezinto. Ngokuqinisekileyo eli likhondo lobulumko, kuba uYesu wabongoza: “Musani ukuziqwebela ubuncwane emhlabeni, apho kudla khona inundu nomhlwa, nalapho amasela aqhekeza khona ebe. Kunoko, ziqwebeleni ubuncwane ezulwini, apho inundu nomhlwa zingadliyo khona, nalapho amasela angaqhekeziyo ebe. Kuba apho bukhoyo ubuncwane benu, nentliziyo yenu yoba lapho.”—Mateyu 6:19-21.
18. Kutheni kubaluleke kangaka ukuqhubeka sinyamekela umoya kule mihla yokugqibela?
18 Ukunyamekela umoya nokulawula iminqweno yehlabathi ngokuqinisekileyo likhondo lobulumko kule ‘mihla yokugqibela.’ (2 Timoti 3:1-5) Ngapha koko, “ihlabathi liyadlula nenkanuko yalo, kodwa lowo wenza ukuthanda kukaThixo uhleli ngonaphakade.” (1 Yohane 2:15-17) Ngokomzekelo, ukuba umKristu oselula unosukelo lokungenela inkonzo yexesha elizeleyo, oku kunokusebenza njengokhokelo kwiminyaka elucelomngeni yokufikisa okanye yokukhulela ebuntwini obukhulu. Xa eqhutyelwa ukuba alalanise, umntu onjalo unokuba nombono ocacileyo woko afuna ukukuphumeza enkonzweni kaYehova. Loo mntu uzixabisayo izinto zokomoya uya kukugqala njengento engebobulumko, kwanebubudenge ukuncama ukufikelela usukelo lokomoya ngenxa nje yezinto eziphathekayo okanye naluphi na uyolo ekubonakala lunokufumaneka ngokwenza isono. Khumbula ukuba uMoses owayetyekele kwizinto zokomoya ‘wanyula ukuphathwa kabuhlungu kunye nabantu bakaThixo kunokuziyolisa ngesono okwexeshana.’ (Hebhere 11:24, 25) Enoba sibancinane okanye sibadala, senza ukhetho olufanayo xa siqhubeka sinyamekela umoya kunokunyamekela inyama enesono.
19. Ziziphi iingenelo esiya kuzinandipha ukuba siqhubeka sinyamekela umoya?
19 “Ukunyamekela inyama kuthetha ubutshaba noThixo,” ngoxa “ukunyamekela umoya kuthetha ubomi noxolo.” (Roma 8:6, 7) Ukuba siqhubeka sinyamekela umoya, siya kufumana uxolo nto leyo exabisekileyo. Iintliziyo namandla ethu engqondo aya kukhuselwa ngokupheleleyo kwimpembelelo yotyekelo lwethu lwesono. Siya kukwazi ngakumbi ukuxhathisa izilingo zokubandakanyeka ekwenzeni okuphosakeleyo. Yaye siya kufumana uncedo lukaThixo ukuze siphumelele kumlo oqhubekayo phakathi kwenyama nomoya.
20. Kutheni sinokuqiniseka ukuba sinako ukoyisa kumlo ophakathi kwenyama nomoya?
20 Ngokuqhubeka sinyamekela umoya, silondoloza ikhonkco elibalulekileyo elisinxibelelanisa noYehova, umthombo wobomi nomoya oyingcwele. (INdumiso 36:9; 51:11) USathana uMtyholi namahlakani akhe benza konke okusemandleni ukuze bonakalise ulwalamano lwethu noYehova uThixo. Bazama ukulawula iingqondo zethu, besazi ukuba ukuba siyanikezela, ekugqibeleni oko kuya kusikhokelela ekubeni ziintshaba zikaThixo nasekufeni. Kodwa sinokoyisa kulo mlo uphakathi kwenyama nomoya. UPawulos waba naloo mava, kuba xa wayebhala ngokubhekisele kowakhe umlo, waqala wabuza wathi: “Ngubani na oya kundihlangula kulo mzimba usisisulu sokufa?” Wandula ke ebonisa ukuba wayenako ukuhlangulwa, wadanduluka esithi: “Ndiyambulela uThixo ngaye uYesu Kristu iNkosi yethu!” (Roma 7:21-25) Nathi sinokumbulela uThixo ngoKristu ngokusilungiselela indlela yokuhlangabezana nobuthathaka bobuntu size siqhubeke sinyamekela umoya sinethemba elimangalisayo lobomi obungunaphakade.—Roma 6:23.
Uyakhumbula Na?
• Kuthetha ukuthini ukunyamekela umoya?
• Sinokuwuvumela njani umoya kaYehova usebenze kuthi?
• Chaza isizathu sokuba, kumlo wethu nxamnye nesono, kubalulekile ukuba sifundisise iBhayibhile, sithobele umthetho kaYehova, size sithandaze kuye.
• Ukuzibekela usukelo lokomoya kunokusenza njani sihlale sikumendo wobomi?
[Umfanekiso okwiphepha 16]
Ukufundisisa iBhayibhile kuyasinceda simelane nokuhlaselwa kobumoya bethu
[Umfanekiso okwiphepha 17]
Kufanelekile ukuthandazela uncedo lukaYehova ukuze soyise iminqweno yesono
[Imifanekiso ekwiphepha 18]
Usukelo lokomoya lunokusinceda siqhubeke sinyamekela umoya