Ukulwa Namandla Esono Kwinyama Ebuthathaka
“Ukunyamekela okwenyama kuthetha ukufa; kodwa ukunyamekela okomoya kuthetha ubomi noxolo.”—ROMA 8:6, NW.
1. Abantu badalwa ngayiphi injongo?
“WAMDALA ke uThixo umntu ngokomfanekiselo wakhe; wamdala ngokomfanekiselo kaThixo; wadala indoda nenkazana.” (Genesis 1:27) Umfanekiselo yimbonakaliso yento ethile okanye yomthombo. Ngaloo ndlela, abantu badalelwa ukuba babe yimbonakaliso yozuko lukaThixo. Ngokubonakalisa iimpawu zikaThixo—ezinjengothando, ukulunga, okusesikweni nobumoya—kuyo yonke imigudu yabo, bazisa indumiso nembeko kuMdali, yaye bona bazizisela ulonwabo nolwaneliseko.—1 Korinte 11:7; 1 Petros 2:12.
2. Isibini sokuqala esingabantu sayiphosa njani injongo?
2 Isibini sokuqala esingabantu, esadalwa sifezekile, sasiyixhotyiselwe ngokona kona le ndima. Njengezipili ezikhazimliswe zabengezela kakhulu, sasinako ukubonakalisa uzuko lukaThixo ngobuqaqawuli nangokunyaniseka. Noko ke, savumela oko kubengezela kwafiphala xa ngabom sakhetha ukungamthobeli uMdali noThixo waso. (Genesis 3:6) Emva koko, sasingasenakukwazi ukubengezelisa uzuko lukaThixo ngokugqibeleleyo. Sasilela eluzukweni lukaThixo, sayiphosa injongo yokudalwa kwaso ngokomfanekiselo kaThixo. Ngamanye amazwi, sona.a
3. Sisebenza njani ngokwenene isono?
3 Oku kusinceda siqonde indlela esisebenza ngayo ngokwenene isono, esiphazamisa ukubonakalisa komntu ukufana nozuko lukaThixo. Isono senza umntu angabi ngcwele, oko kukuthi, angacoceki yaye adyobheke ngokomoya nangokokuziphatha. Lonke uluntu, ngenxa yokuba luyinzala ka-Adam noEva, luzalwa lukuloo meko yokudyobheka neyokungacoceki, alukufikeleli oko uThixo akulindeleyo kulo njengabantwana bakhe. Yaye uyintoni umphumo? IBhayibhile iyawuchaza: “Njengokuba isono sangena ngamntu mnye ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.”—Roma 5:12; thelekisa uIsaya 64:6.
Amandla Esono Kwinyama Ebuthathaka
4-6. (a) Inkoliso yabantu isijonga njani isono namhlanje? (b) Uyintoni umphumo wendlela esijongwa ngayo isono namhlanje?
4 Inkoliso yabantu namhlanje ayizigqali njengengacocekanga, edyobhekileyo okanye enesono. Enyanisweni, igama elithi, isono, abasalisebenzisi tu kwaphela abantu abaninzi. Mhlawumbi bayathetha ngeempazamo, iziphoso nokwenza izinto phosakeleyo. Kodwa ngaba bayathetha ngesono? Kunqabile! Kwanabo basathi bayakholelwa kuThixo, uAlan Wolfe, unjingalwazi kwinzululwazi ngoluntu uthi ngabo, “iimfundiso zakhe ziluludwe lweenkolelo zokuziphatha kunokuba zibe yimithetho yokuziphatha, kunokuba zibe yimithetho eli-10 ‘ngamacebiso ali-10.’”
5 Uyintoni umphumo wokucinga ngolu hlobo? Kukubukhanyela, okanye ubuncinane ukubutyeshela, ubukho besono. Oku kuvelise isizukulwana sabantu esineembono ezigqwetheke ngokulusizi ngokulungileyo nokubi, esivakalelwa kukuba sikhululekile ukuba singazenzela eyaso imigaqo yokuziphatha nesivakalelwa kukuba asiyi kuphendula nakubani ngayo nantoni na esikhetha ukuyenza. Kubantu abanjalo, ukonwaba kuphela kwendlela abagqiba ngayo enokuba ikhondo lifanelekile okanye alifanelekanga.—IMizekeliso 30:12, 13; thelekisa iDuteronomi 32:5, 20.
6 Ngokomzekelo, kudliwano-ndlebe olwalukumabonwakude, kwacelwa abantu abaselula ukuba bavakalise iimbono zabo ngezono ezisixhenxe ekuthiwa ziyabulala.b Omnye wabo babenenxaxheba wathi: “Ikratshi alisosono. Umele uzithande ungumntu.” Ngokuphathelele ubuvila, omnye wathi: “Bulungile ngamanye amaxesha. . . . Maxa wambi kuhle ukuhlala uziphumlele.” Kwanombalisi wenza la magqabantshintshi: ‘Izono ezisixhenxe ezibulalayo asizozenzo zibi kodwa, kunoko, lutyekelo olusebantwini olusenokucaphukisa nolusenokunandipheka gqitha.’ Ewe, enye into eyaphela nesono kukuziva unetyala, kuba, ngapha koko, ityala lichasene nokonwaba.—Efese 4:17-19.
7. Ngokutsho kweBhayibhile, abantu bachatshazelwa njani sisono?
7 Ngokuchasene nako konke oku, ngokucacileyo iBhayibhile ithi: “Bonile bonke, basilela eluzukweni lukaThixo.” (Roma 3:23) Kwanompostile uPawulos wavuma: “Ndiyazi ukuba ngaphakathi kwam, oko kukuthi enyameni yam, akumi okulungileyo; kuba ukuthanda kukho ukubakho oku kum; ke kona ukukusebenza okuhle andikufumani. Kuba okulungileyo endikuthandayo, andikwenzi; khona okubi, endingakuthandiyo, oko ndiyakwenza.” (Roma 7:18, 19) Apha uPawulos wayengazami kuzisizela. Kunoko, ngenxa yokuba wayeyiqonda kakuhle indlela abantu ababesilele ngayo eluzukweni lukaThixo, wayewaqonda kakuhle gqitha amandla esono kwinyama ebuthathaka. Wathi: “Athi ke mna, mntu uludwayi! Azi, ngubani na oya kundihlangula kulo mzimba woku kufa?”—Roma 7:24.
8. Yiyiphi imibuzo esifanele sizibuze yona? Ngoba?
8 Wena uwujonga njani lo mbandela? Usenokuba uyavuma ukuba njengenzala ka-Adam, nawe, njengabantu bonke, akufezekanga. Kodwa ukwazi oko kuyichaphazela njani indlela ocinga ngayo nophila ngayo? Ngaba uyamkela njengenye yezinto ezingenakuguqulwa ebomini uze uqhubeke uhamba ngoyibonayo? Okanye ngaba usoloko uzama ukulwa namandla esono kwinyama yakho ebuthathaka, uzabalazela ukulubonakalisa ngokuqaqambe kangangoko uzuko lukaThixo kuko konke okwenzayo? Oku kufanele kube yinto esiyixhalabeleyo ngokwenene sonke ngabanye ngenxa yoko uPawulos wakuthethayo: “Abo bangokwenyama banyamekela izinto zasenyameni; abo ke bangokoMoya banyamekela izinto zaseMoyeni. Kuba [“ukunyamekela okwenyama kuthetha ukufa, kodwa ukunyamekela okomoya kuthetha ubomi,” NW] noxolo.”—Roma 8:5, 6.
Ukunyamekela Okwenyama
9. Kutheni sisithi “ukunyamekela okwenyama kuthetha ukufa”?
9 Wayethetha ukuthini uPawulos xa wathi “ukunyamekela okwenyama kuthetha ukufa”? Igama elithi ‘inyama’ ngokufuthi eBhayibhileni lisetyenziselwa ukuchaza umntu kwimeko yakhe yokungafezeki, njengalowo ‘ukhawulwe esonweni’ njengenzala ka-Adam onemvukelo. (INdumiso 51:5; Yobhi 14:4) Ngaloo ndlela, uPawulos wayeluleka amaKristu ukuba angamiliseli iingqondo zawo kutyekelo lwesono, iintshukumisa neminqweno yenyama engafezekanga, ebuthathaka. Ngasiphi isizathu? Kwenye indawo uPawulos wasixelela oko ikuko imisebenzi yenyama waza wongezelela esi silumkiso: “Abazenzayo izinto ezinjalo abayi kubudla ilifa ubukumkani bukaThixo.”—Galati 5:19-21.
10. Kuthetha ukuthini “ukunyamekela”?
10 Kodwa ngaba awukho mkhulu umahluko phakathi kokunyamekela into nokuyenza? Liyinyaniso elokuba ukucinga ngento akusoloko kukhokelela ekuyenzeni. Noko ke, ukunyamekela into kungaphezu kokuyicinga okomzuzwana nje kuphela. Igama elasetyenziswa nguPawulos lithi phroʹne·ma ngesiGrike, ibe libonisa “indlela yokucinga, (utyekelo) lwengqondo, . . . injongo, umnqweno, umzamo.” Ngoko ke, “ukunyamekela okwenyama” kuthetha ukulawulwa, ukuphathwa, ukonganyelwa nokuqhutywa yiminqweno yenyama ebuthathaka.—1 Yohane 2:16.
11. UKayin wayenyamekela inyama njani, ibe waba yintoni umphumo?
11 Le ngongoma icaciswa kakuhle likhondo elalandelwa nguKayin. Xa ikhwele nomsindo zavukayo entliziyweni kaKayin, uYehova uThixo wamlumkisa: “Yini na ukuba uqumbe, yini na ukuba busangane ubuso bakho? Ukuba uthe walungisa, abuyi kuswabuluka ubuso yini na? Ukuba uthe akwalungisa, isono sibuthumile ngasesangweni, singxamele wena; ke wena, silawule.” (Genesis 4:6, 7) UKayin wayemele akhethe. Ngaba wayeza ‘kulungisa,’ oko kukuthi, ingqondo, injongo nomnqweno wakhe awumilisele ekwenzeni okulungileyo? Okanye ngaba wayeza kuqhubeka enyamekela inyama aze atsolise ingqondo yakhe kutyekelo olubi olusentliziyweni yakhe? Njengokuba uYehova wachazayo, isono ‘sasibuthumile ngasesangweni,’ silindele ukuxhumela size siqwenge uKayin ukuba wayesivumela. Kunokuwulwa aze ‘awulawule’ umnqweno wakhe wenyama, uKayin wawuvumela wamlawula—ukusa kwisiphelo esiyintlekele.
12. Sifanele senze ntoni ukuze singahambi “ngendlela kaKayin”?
12 Kuthekani ngathi namhlanje? Ngokuqinisekileyo asifuni kuhamba “ngendlela kaKayin,” njengokuba uYuda wakhalaza ngabathile phakathi kwamaKristu enkulungwane yokuqala. (Yuda 11) Asifanele sizingxengxezele size sicinge ukuba ukuzifica nje kancinane okanye ukuyaphula nje apha naphaya imithetho akunabungozi. Ngokuchasene noko, sifanele sikuphaphele ukuphawula nayiphi na impembelelo yokungahloneli Thixo eyonakalisayo esenokuba ingene entliziyweni nasengqondweni yethu size sikhawuleze ukuyikhupha ngaphambi kokuba intshule. Ukulwisana namandla esono kwinyama ebuthathaka kuqala ngaphakathi.—Marko 7:21.
13. Umntu ‘unokubanjiswa njani yeyakhe inkanuko’?
13 Ngokomzekelo, usenokuthi ntla ngento eyothusayo okanye ehambis’ umzimba okanye umfanekiso ovuselela inkanuko. Kusenokwenzeka ukuba ngumfanekiso osencwadini okanye kwiphephancwadi, umboniso kumfanekiso oshukumayo okanye kumabonwakude, isibhengezo kwibhodi yezentengiso, okanye into eyenzeka ngokwenene. Oko akufanele kukothuse, ekubeni kusenokwenzeka—ibe kusenzeka. Noko ke, nangona lo mfanekiso okanye lo mboniso, usenokuba uwubone imizuzwana embalwa kuphela, usenokuhlala engqondweni uze umane uvela amathuba ngamathuba. Wenzani ke xa oko kusenzeka? Ngaba ngokukhawuleza wenza okuthile ukuze ulwe naloo ngcamango uze uyikhuphe engqondweni yakho? Okanye ngaba uyayivumela ihlale engqondweni yakho, mhlawumbi ucinga ngoko kwenzekayo sihlandlo ngasinye loo ngcamango isithi qatha? Ukwenza oku kuchazwe mva kukuzibeka engozini yokuba kwenzeke izinto uYakobi awazichazayo: “Elowo ke uhendwa akutsalwa, abanjiswe, yeyakhe inkanuko. Ithi inkanuko, yakuba ithabathile, izale isono; sithi ke isono, sakuba sikhulelwe, sizale ukufa.” Kungenxa yoko uPawulos wathi: “Ukunyamekela okwenyama kuthetha ukufa.”—Yakobi 1:14, 15; Roma 8:6, NW.
14. Sijamelana nantoni mihla le, ibe sifanele sisabele njani?
14 Ekubeni siphila kweli hlabathi ukuziphatha kakubi ngokwesini, ugonyamelo nokuthanda izinto eziphathekayo okuzukiswayo kulo—kuboniswa ngokukhululekileyo ezincwadini, kumaphephancwadi, kwimifanekiso eshukumayo, kwiinkqubo zikamabonwakude nakumculo othandwayo—sisoloko sixhinxwa ngeengcamango neembono eziphosakeleyo umhla nezolo. Usabela njani? Ngaba konke oku kuyakuhlekisa yaye kukonwabise? Okanye ngaba uvakalelwa ngendlela awayevakalelwa ngayo uLote olilungisa, ‘owacatshukiswa kukuhamba eburheletyweni kwabangenammiselo, ewuthuthumbisa umphefumlo wakhe olungisayo, ngemisebenzi yabo echasene nomthetho’? (2 Petros 2:7, 8) Ukuze siphumelele ekulweni namandla esono kwinyama ebuthathaka, kufuneka sizimisele ukwenza njengomdumisi: “Andiyi kubeka phambi kwamehlo am nto inobutshijolo. Ukwenza ngokunxaxha ndikuthiyile, akuyi kunamathela kum.”—INdumiso 101:3.
Ukunyamekela Okomoya
15. Luluphi uncedo esinalo lokulwa namandla esono kuthi?
15 Into enokusinceda ekulweni namandla esono kwinyama ebuthathaka koko uPawulos wahlabela mgama wakuthetha: “Ukunyamekela okomoya kuthetha ubomi noxolo.” (Roma 8:6, NW) Ngaloo ndlela, kunokulawulwa yinyama, simele sivumele ingqondo yethu iphenjelelwe ngumoya ize iphile ngezinto zomoya. Ziintoni? KweyabaseFilipi 4:8, uPawulos uyazidwelisa: “Elokugqiba, bazalwana, ndithi, iinto zonke eziyinene, iinto zonke ezindilekileyo, iinto zonke ezibubulungisa, iinto zonke ezinyulu, iinto zonke ezithandekayo, iinto zonke eziludumo lulungileyo, ukuba kukho sidima, ukuba kukho ndumiso, zithelekeleleni ezo zinto.” Makhe siziqwalasele size siziqonde kakuhle ezi zinto sifanele siqhubeke sizithelekelela.
16. Ziziphi iimpawu uPawulos awakhuthaza ukuba siqhubeke ‘sizithelekelela,’ ibe ngalunye lubandakanya ntoni?
16 Okokuqala, uPawulos wadwelisa iimpawu zokuziphatha ezisibhozo. Kakade ke, siyaqonda ukuba amaKristu akamele aphelele nje ngokucinga ngemicimbi yeZibhalo neyemfundiso kuphela ngamaxesha onke. Kukho imibandela okanye imixholo emininzi esinokumilisela iingqondo zethu kuyo. Kodwa okubalulekileyo kukuba imele ifikelele iimpawu zokuziphatha uPawulos awazikhankanyayo. Udidi ngalunye ‘lwezinto’ uPawulos awalucaphulayo sifanele silunikele ingqalelo. Makhe siziqwalasele.
◻ “Eziyinene” zibandakanya okungaphezulu kunokuba yinyaniso okanye bubuxoki nje kuphela. Zithetha ukuba nenyaniso, ukuthi tye nokuthembeka, into eyinene, kungekuphela nje ebonakala injalo.—1 Timoti 6:20.
◻ “Ezindilekileyo” zibhekisela kwizinto ezinesidima nezihlonelekayo. Zibangela uloyiko, into ephakamileyo, ekudidi oluphezulu nebekekileyo kunaleyo eziintloni nephantsi.
◻ “Ezibubulungisa” zithetha ezifikelela kwimilinganiselo kaThixo, kungekhona eyabantu. Abantu behlabathi baxakekisa iingqondo zabo ngamacebo angengawobulungisa, kodwa simele sicinge size sonwatyiswe zizinto ezibubulungisa emehlweni kaThixo.—Thelekisa INdumiso 26:4; Amosi 8:4-6.
◻ “Ezinyulu” zithetha ubumsulwa nobungcwele kungekuphela nje ngehambo (ngokwesini okanye ngezinye iindlela) kodwa kwanakwiingcinga neentshukumisa. UYakobi uthi: “Ubulumko baphezulu ukuqala bunyulu.” UYesu, ‘onyulu’ unguMzekelo ogqibeleleyo esimele siwuqwalasele.—Yakobi 3:17; 1 Yohane 3:3.
◻ “Ezithandekayo” zezo zishukumisa zize zibangele uthando kwabanye. Simele “sinyamekelane, ukuba silolane eluthandweni nasemisebenzini emihle,” kunokuba similisele iingqondo zethu kwizinto eziphembelela intiyo, ingqumbo nokukruthakruthana.—Hebhere 10:24.
◻ “Eziludumo lulungileyo” akuthethi “ukuduma kakuhle” okanye “ukwaziwa kakuhle” nje kuphela kodwa, kwanokuba ngowakhayo noncomayo. Iingqondo zethu sizimilisela kwizinto eziluncedo nezakhayo kunezithobayo nezicaphukisayo.—Efese 4:29.
◻ ‘Isidima’ ngokuyintloko sithetha “ukulunga” okanye “ukubalasela ngokuziphatha,” kodwa sisekwanokuthetha ukubalasela nangayiphi na indlela. Ngaloo ndlela, sinokuzixabisa iimpawu ezixabisekileyo, ubuchule babo noko kufezwa ngabanye ngokuvisisana nemilinganiselo kaThixo.
◻ Izinto ‘ezinokudunyiswa’ zinjalo ngokwenene ukuba indumiso leyo ivela kuThixo okanye kwigunya aligqalayo yena.—1 Korinte 4:5; 1 Petros 2:14.
Idinga Lobomi Noxolo
17. Sifumana ziphi iintsikelelo ‘ngokunyamekela okomoya’?
17 Xa silandela isiluleko sikaPawulos size siqhubeke ‘sizithelekelela ezo zinto,’ siya kuphumelela ‘ekunyamekeleni okomoya.’ Umphumo asiyontsikelelo yobomi kuphela, oko kukuthi, ubomi obungunaphakade kwihlabathi elitsha elithenjisiweyo, kodwa kwanoxolo. (Roma 8:6) Ngoba? Ngenxa yokuba iingqondo zethu ziyakhuselwa kwiimpembelelo ezingendawo zezinto zokwenyama, ibe asisachatshazelwa kakhulu ngumlo ongcungcuthekisayo ophakathi kwenyama nomoya ochazwe nguPawulos. Ngokuxhathisa impembelelo yenyama, sikwafumana uxolo noThixo “ngokokuba ukunyameka kwenyama kububutshaba kuThixo.”—Roma 7:21-24; 8:7.
18. USathana ulwa liphi idabi, ibe sinokoyisa njani?
18 USathana namahlakani akhe benza konke okusemandleni abo ukudyobha indlela esilubonakalisa ngayo uzuko lukaThixo. Bazama ukulawula iingqondo zethu ngokuzixhinxa ngeminqweno yenyama, besazi ukuba ekugqibeleni oku kuya kukhokelela kubutshaba noThixo nasekufeni. Kodwa sinokoyisa kweli dabi. NjengoPawulos, nathi sinokuthi: “Ndiyabulela kuThixo ngoYesu Kristu, iNkosi yethu” kuba esinike indlela yokulwa namandla esono kwinyama ebuthathaka.—Roma 7:25.
[Imibhalo esemazantsi]
a Ngokuqhelekileyo iBhayibhile isebenzisa isenzi sesiHebhere esithi cha·taʼʹ nesenzi sesiGrike esithi ha·mar·taʹno ukuchaza “isono.” Omabini la magama athetha “ukuphosa,” ngengqiqo yokuphosa okanye ukungafikeleli usukelo, uphawu okanye injongo.
b Izinto ekukholelwa ukuba, zizono ezisixhenxe ezibulalayo likratshi, ukubawa, inkanuko, umona, ubudlakudla, umsindo nobuvila.
Ungacacisa?
◻ Siyintoni isono, yaye sinokuba namandla njani kwinyama ebuthathaka?
◻ Sinokulwa njani ‘nokunyamekela okwenyama’?
◻ Sinokwenza ntoni ukukhuthaza “ukunyamekela okomoya”?
◻ “Ukunyamekela okomoya” kubuzisa njani ubomi noxolo?
[Umfanekiso okwiphepha 15]
UKayin wavumela utyekelo lwenyama lwamlawula nto leyo eyamenzakalisayo
[Imifanekiso ekwiphepha 16]
Ukunyamekela okomoya kuthetha ubomi noxolo