Unokuphumelela Ingakhathaliseki Indlela Okhuliswe Ngayo

UNICHOLAS wayevukela kwasebuntwaneni.a Ekuhambeni kwexesha, ukungabi naluxolo kwakhe kwamkhokelela ekusebenziseni kakubi iziyobisi nokusela ngokugqithiseleyo. UNicholas ucacisa esithi: “Utata wayelikhoboka lotywala, kwaye mna nodade wethu sabandezeleka kakhulu.”

Abazali bakaMalinda babebonakala bengamalungu ecawa ahlonelwayo kwibutho labo. Kodwa babebandakanyeke ngokunzulu kwihlelo. UMalinda, ngoku okwiminyaka yakhe yama-30 uthi: “Ezinye izinto ababezenza kweli hlelo zazindixhaphaza yaye zindicaphukisa njengomntwana.” Wongeza ngelithi: “Endikukhumbulayo kukuba bendihlala ndingenathemba yaye ndiziva ndingaxabisekanga.”

Ngubani onokukukhanyela ukuba abantwana abaninzi bakhulele phakathi kogonyamelo, bexhatshazwa, betyeshelwa ngabazali naphakathi kwezinye izinto ezimbi? Amanxeba okuziva ungonwabanga ebuntwaneni asenokuba nzulu. Kodwa ngaba amanxeba anjalo amele akuthintele ngokupheleleyo ekwamkeleni inyaniso yeLizwi likaThixo nokufumana umlinganiselo othile wolonwabo? Nangona bakhuliswa ngendlela abakhuliswa ngayo, ngaba uNicholas noMalinda banokuphumelela njengabantu abagqibeleleyo? Okokuqala cinga ngomzekelo kaKumkani uYosiya wakwaYuda.

Umzekelo OseZibhalweni

UYosiya walawula kwaYuda kangangeminyaka engama-31 kwinkulungwane yesixhenxe ngaphambi kweXesha Eliqhelekileyo. (659-629 B.C.E.) Kwixesha lokubekwa kukaYosiya etroneni, emva kokubulawa kukayise, iimeko kwaYuda zazimbi kakhulu. KwaYuda naseYerusalem kwakuzele abanquli bakaBhahali nabo benza izifungo ngothixo wama-Amoni, uMalekom. Umprofeti kaThixo welo xesha uZefaniya wathi iinkosana zakwaYuda “zaziziingonyama ezigqumayo” yaye abagwebi “babeziingcuka zangokuhlwa.” Ngenxa yoko elo lizwe lalizele lugonyamelo nokuqhatha. Abaninzi babesithi ezintliziyweni zabo: “UYehova akayi kwenza okulungileyo, engayi kwenza nokubi.”—Zefaniya 1:3–2:3; 3:1-5.

UYosiya waba ngumlawuli onjani? Umbhali wengxelo yeBhayibhile uEzra wabhala esithi: “[UYosiya] waqhubeka esenza okulungileyo emehlweni kaYehova waza wahamba ezindleleni zikaDavide ukhokho wakhe; yaye akazange aphambukele ngasekunene okanye ngasekhohlo.” (2 Kronike 34:1, 2) Kuyabonakala ukuba, uYosiya waphumelela ekwenzeni oko kulungileyo emehlweni kaThixo. Kodwa yayinjani intsapho yakowabo?

Ngaba Ungumntwana Okhuliswe Kakuhle Okanye Kakubi?

Ukuzalwa kukaYosiya ngowama-667 B.C.E., uyise, uAmon, wayeneminyaka eli-16 kuphela ubudala, yaye uyisemkhulu wakhe uManase wayelawula kwaYuda. UManase wayengoyena kumkani ungendawo ngokugqithiseleyo owakhe walawula kwaYuda. Esisa izibingelelo kuBhahali, “wenza okubi emehlweni kaYehova ngomlinganiselo omkhulu.” Wayedlulisa oonyana bakhe emlilweni, eqhelisela umlingo, evumisa, wenza abaneshologu yaye ebulala abantu abaninzi abanyanisekileyo. UManase wayezisa imifanekiso eqingqiweyo yesibonda esingcwele awayenzayo endlwini kaYehova. Wamlukuhla uYuda neYerusalem “ukuba benze okubi ngakumbi kuneentlanga ezo uYehova wayezibhubhisile phambi koonyana bakaSirayeli.”—2 Kronike 33:1-9.

UManase wayembi kakhulu kangangokuba uYehova wamenza wafakwa amakhamandela wasiwa eBhabhiloni, esinye sezixeko zasebukhosini zomlawuli waseAsiriya. Ngoxa wayethinjiwe uManase waguquka, wazithoba, waza wacela ukuxolelwa nguYehova. UThixo wasiva isicelo sakhe waza wambuyisela kubukumkani eYerusalem. UManase walungisa iihambo zakhe waza waphumelela.—2 Kronike 33:10-17.

Ububi bukaManase nokuguquka kwakhe kamva, kwaba naliphi igalelo kunyana wakhe uAmon? Waba ngongendawo. Xa uManase waguqukayo waza wenza umgudu wokucoca uhlanga kukungcola awakubangelayo, uAmon akazange aguquke. Xa wabekwa etroneni eneminyaka engama-22 ubudala, uAmon “waqhubeka esenza okubi emehlweni kaYehova kanye njengoko wenzayo uManase.” Kunokuba azithobe phambi kukaYehova, “uAmon walandisa ityala.” (2 Kronike 33:21-23) UYosiya wayeneminyaka emithandathu kuphela ubudala xa uAmon waba ngukumkani kwaYuda. Hayi indlela awakhuliswa kakubi ngayo uYosiya!

Ulawulo olubi luka-Amon lwaphela emva kweminyaka emibini xa abakhonzi bakhe bamenzela iyelenqe baza bambulala. Noko ke, abantu belo lizwe babaxabela bonke abo babemenzele iyelenqe uAmon baza benza unyana wakhe, uYosiya, ukumkani.—2 Kronike 33:24, 25.

Nangona wakhula kabuhlungu, uYosiya waqhubeka esenza okulungileyo emehlweni kaYehova. Ulawulo lwakhe lwaphumelela kangangokuba iBhayibhile ithi: “Phambi kwakhe akuzange kubekho kumkani unjengaye owabuyela kuYehova ngentliziyo yakhe yonke nangomphefumlo wakhe wonke nangamandla akhe onke, ngokuvisisana nawo wonke umthetho kaMoses; nasemva kwakhe akuzange kuvele unjengaye.”—2 Kumkani 23:19-25.

Hayi indlela angumzekelo okhuthazayo ngayo uYosiya kwabo banyamezela ukukhuliswa kakubi! Sinokufunda ntoni kulo mzekelo? Yintoni eyanceda uYosiya ukuba akhethe ikhondo elifanelekileyo aze ahlale kulo?

Funa Ukumazi UYehova

Esemncinane uYosiya wafumana impembelelo kayisemkhulu uManase. IBhayibhile ayithethi ngonxibelelwano ababenalo, nokuba wayeneminyaka emingaphi uYosiya xa uManase walungisa iindlela zakhe. Ekubeni iintsapho zamaYuda zazisondelelene, uManase umele ukuba wazama ukumhlangula umzukulwana wakhe kwiimpembelelo ezonakalisayo ezazimngqongile ngokubethelela entliziyweni yomzukulwana wakhe ukumhlonela uThixo oyinyaniso, uYehova, nelizwi lakhe. Naziphi iimbewu zenyaniso uManase awazityalayo entliziyweni kaYosiya, mhlawumbi ezihlanganiswe nezinye iimpembelelo ezintle, ekugqibeleni zavelisa isiqhamo. Kunyaka wakhe wesibhozo esetroneni yakwaYuda, uYosiya oneminyaka eli-15 ubudala wafuna ukumazi uYehova nokwenza ukuthanda kwakhe.—2 Kronike 34:1-3.

Abanye abantu baye baba nonxibelelwano lokomoya kuphela nesalamane esikude, umntu abamaziyo okanye ummelwane besakhula. Sekunjalo, ukuba ziyakhuliswa, iimbewu ezityaliweyo zinokuvelisa iziqhamo ezihle kamva. UMalinda, okhankanywe ngaphambilana, wayenommelwane osele ekhulile owayezisa IMboniselo noVukani! rhoqo ekhayeni lakhe. Emkhumbula ngovuyo, uthi: “Eyona nto endandiyithanda ngommelwane wam kukuba wayengazibhiyozeli iiholide. Oku kwakubalulekile kum kuba iHalloween nezinye iiholide yayizizihlandlo zezithethe kwihlelo labazali bam.” Kwiminyaka elishumi kamva, xa umhlobo wamema uMalinda ukuba eze kwiintlanganiso zamaKristu kwiHolo yoBukumkani yamaNgqina kaYehova, wamkhumbula lo mmelwane waza wasamkela esi simemo. Oku kwamnceda ekufuneni inyaniso.

Zithobe Phambi KoThixo

Ebudeni bolawulo lukaYosiya kwabakho iinguqu ezinkulu elunqulweni kwilizwe lakwaYuda. Emva kwephulo lakhe lokuphelisa unqulo-zithixo nelokucoca ilizwe lakwaYuda iminyaka emithandathu, uYosiya waqhubeka elungisa indlu kaYehova. Ngoxa loo msebenzi wawusaqhubeka, hayi indlela exabiseke ngayo into eyafunyanwa nguMbingeleli Omkhulu uHilekiya! Wafumana umbhalo wantlandlolo ‘wencwadi yomthetho kaYehova.’ Ephathiswa nguHilekiya oku kukhulu akufumeneyo, uShafan unobhala wanikela ingxelo kukumkani ngoko kwenzekileyo. Ngaba oko kwafezwayo kwamenza waba nekratshi uYosiya oneminyaka engama-25 ubudala?—2 Kronike 34:3-18.

“Kwathi kamsinya nje akuweva ukumkani amazwi omthetho,” uEzra uyabhala, “ngoko nangoko wazikrazula izambatho zakhe.” Le yayiyimbonakaliso yokuba buhlungu esuka entliziyweni kuba waqonda ukuba asiyiyo yonke imiyalelo kaThixo eyayigcinwa ngookhokho babo. Eneneni wabonakalisa ukuthobeka! Ngokukhawuleza ukumkani wathuma amadoda amahlanu ukuba abuze ngoYehova kumprofetikazi uHulda. Aba babethunyiwe babuya nengxelo ethi: ‘Kuya kubakho intlekele ngenxa yokungawuthobeli uMthetho kaYehova. Kodwa ngenxa yakho, uKumkani uYosiya, uye wazithoba, uya kuhlanganiselwa engcwabeni lakho unoxolo yaye akuyi kuyibona intlekele.’ (2 Kronike 34:19-28) UYehova wakholiswa sisimo sengqondo sikaYosiya.

Enoba injani imvelaphi yethu, nathi sinokuzithoba phambi kukaThixo, uYehova, size simhlonele yena neLizwi lakhe, iBhayibhile. UNicholas, okhankanywe ekuqaleni, wakwenza oku. Uthi: “Nangona ndandineengxaki ezininzi ebomini bam ngenxa yokusebenzisa kakubi iziyobisi yaye ndisela ngokugqithiseleyo, ndandinomdla eBhayibhileni yaye ndandifuna kwakude kudala ukuba nenjongo ebomini. Ekugqibeleni, ndadibana namaNgqina kaYehova, ndatshintsha ubomi bam, ndaza ndamkela inyaniso.” Ewe, sisenokuba nesimo sengqondo sentlonelo ngoThixo neLizwi lakhe enoba siphantsi kweziphi na iimeko.

Ukungenelwa Kwilungiselelo LikaYehova

UYosiya wayenentlonelo enzulu ngabaprofeti bakaYehova. Akazange afune ukwazi ngomprofetikazi uHulda kuphela kodwa waphenjelelwa kakhulu nangabanye abaprofeti bomhla wakhe. Ngokomzekelo, uYeremiya noZefaniya babexakekile bevakalisa ngokutshatyalaliswa konqulo-zithixo kwaYuda. Hayi indlela okumele ukuba kwamomeleza ngayo uYosiya xa enikela ingqalelo kwisigidimi sabo njengoko wayekwiphulo lokuphelisa unqulo lobuxoki!—Yeremiya 1:1, 2; 3:6-10; Zefaniya 1:1-6.

“Inkosi,” uYesu Kristu, iye yamisela iqumrhu labalandeli bayo abathanjisiweyo—“ikhoboka elithembekileyo neliyingqondi”—ukuba lilungiselele ukutya kokomoya ngexesha elifanelekileyo. (Mateyu 24:45-47) Ngeempapasho ezisekelwe eBhayibhileni nelungiselelo lebandla, udidi lwekhoboka lunikela ingqalelo kwiingenelo zokuthobela isiluleko seBhayibhile yaye lunikela amacebiso asebenzisekayo nendlela esinokuwasebenzisa ngayo kubomi bethu bemihla ngemihla. Hayi indlela ekufaneleke ngayo ukuba sisebenzise ilungiselelo likaYehova ukuze lisincede soyise naziphi izimo zengqondo ezingafanelekanga ezendeleyo! Esengumntwana, uNicholas wayengalithandi kwaphela igunya. Kwanaxa wayefunda inyaniso yeLizwi likaThixo, obu buthathaka bamenza akakwazi ukumkhonza ngokuzele ngakumbi uYehova. Ukutshintsha esi simo sengqondo kwakungelula kuye. Kodwa, ekuhambeni kwexesha, waphumelela. Njani? “Ngoncedo lwabadala ababini abaqondayo,” ucacisa esitsho uNicholas, “ndayivuma ingxaki endinayo ndaza ndaqalisa ukusebenzisa isiluleko sabo sothando esivela eZibhalweni.” Wongezelela esithi: “Nangona ngezihlandlo ezithile ndimana ukuba nomsindo ongephi, ngoku ndiyakwazi ukusilawula isimo sam semvukelo.”

Naye uMalinda ufuna icebiso labadala xa esenza izigqibo ezibalulekileyo ebomini bakhe. Xa ehlangabezana nokungabi nathemba nokuziva engaxabisekanga okwaqala esemncinane, akufumanisa kuxabiseke ngakumbi ngamanqaku ahlukahlukeneyo eMboniselo noVukani! Uthi: “Maxa wambi kwinqaku kubakho isiqendu okanye isivakalisi esinye—intwana nje—esindichukumisayo. Malunga neminyaka esithoba eyadlulayo, ndaqalisa ukugcina amanqaku anjalo kwincwadi yokubhala amanqaku ukuze ndikwazi ukuwafumana lula.” Namhlanje, iincwadi zakhe zokubhala amanqaku ezintathu ziqulethe amanqaku angama-400!

Hayi, akuyomfuneko ukuba abantu bahlale bengamaxhoba obomi obubi bentsapho. Ngoncedo lukaYehova banokuphumelela ngokomoya. Njengokuba ukukhuliswa kakuhle kungathethi ukuba umntu uya kuba ngogqibeleleyo, ukukhuliswa kakubi komntu akumthinteli ekubeni oyike uThixo.

Emva kokufumana incwadi yoMthetho xa kwakulungiswa itempile, uYosiya ‘waqhubeka esenza umnqophiso phambi kukaYehova wokulandela uYehova nokumthobela ngentliziyo yakhe yonke nangomphefumlo wakhe wonke.’ (2 Kronike 34:31) Yaye akazange aphambuke kwesi sigqibo de kwaba sekufeni kwakhe. Ngokufanayo, uMalinda noNicholas bazimisele ukuhlala benyanisekile kuYehova uThixo baze baphumelele njengabantu abagqibeleleyo. Ngamana nawe unokuzimisela ukuhlala usondele kuThixo uze umkhonze ngokuthembekileyo. Unokuqiniseka ukuba uya kuphumelela, kuba uYehova uthembisa esithi: “Musa ukoyika, kuba ndinawe. Musa ukubhekabheka, kuba ndinguThixo wakho. Ndiza kukuqinisa. Ndiza kukunceda ngokwenene. Ndiza kukubamba nkqi ngokwenene ngesandla sam sasekunene sobulungisa.”—Isaya 41:10, 13.

[Umbhalo osemazantsi]

[Imifanekiso ekwiphepha 26]

Nangona wakhula kakubi, uYosiya wafuna ukumazi uYehova waza waphumelela ebomini

[Umfanekiso okwiphepha 28]

Abadala banokukunceda woyise imikhwa yobuntu eyendeleyo

[Umfanekiso okwiphepha 28]

“IMboniselo” “noVukani!” zinokukunceda ugcine ingqibelelo