Nime Ngokuqinileyo Ningahexi
‘Khangelani! Isihlwele Esikhulu!’
LO YAYINGUMBUZO owawudide abakhonzi bakaYehova kangangamashumi eminyaka. Kwakukudala kusenziwa umzamo wokuwuphendula ngokweZibhalo. Lo mbandela waphumela kwiingxubusho ezininzi. Kodwa ekugqibeleni yafunyanwa impendulo yeBhayibhile, yaye yabavuyisa kakhulu ababekho kwindibano eWashington, D.C., ngonyaka we-1935.
Eyona nto kwakuxutyushwa ngayo yayingumbuzo oqhelekileyo othi: Ngoobani le “ndimbane enkulu” (King James Version), okanye “isihlwele esikhulu,” (Inguqulelo Yehlabathi Elitsha), esikhankanywe kwiSityhilelo 7:9? Ngaba eli qela lamakholwa laliza kuhlala ezulwini?
Umbuzo Ekudala Ukho
Ukususela ngomhla wompostile uYohane ukuza kuthi ga kulo wethu, amaKristu ayengayazi le “ndimbane enkulu.” ABafundi beBhayibhile babesijonga isihlwele esikhulu njengodidi lwesibini oluza kuya ezulwini, iqela elalinolwazi ngenyaniso yeBhayibhile kodwa elingenanxaxheba ingako ekuyisasazeni.
Noko ke, babekho abathile ababenxulumene namaKristu athanjisiweyo ababenenzondelelo enkulu kumsebenzi wokushumayela. Babengakulangazeleli ukuya ezulwini. Eneneni, ithemba labo lalihambisana nentetho yesidlangalala eyayisithi “Izigidi Eziphilayo Ngoku Azisayi Kuze Zife,” eyayinikelwa ngabantu bakaYehova ukususela ngowe-1918 ukusa kowe-1922. Abantu abanjalo baza kusikelelwa ngobomi obungunaphakade emhlabeni.
IMboniselo (yesiNgesi) kaOktobha 15, 1923, yaxubusha umzekeliso kaYesu wezimvu neebhokhwe yaye yathi: “Izimvu zimela zonke izizwe zeentlanga, ezingazalwanga ngomoya ezithanda ubulungisa ezithi engqondweni zivume ukuba uYesu Kristu uyiNkosi yaye zikhangele phambili ibe zinethemba lokufumana ixesha elilungileyo phantsi kolawulo lwakhe.”—Mateyu 25:31-46.
Ukukhanya Okungakumbi
Ngowe-1931, iNcwadi Yokuqala ethi Vindication, yaxubusha ngoHezekile isahluko 9 yaza yachaza abo baphawulwe emabunzini ukuze bakwazi ukusindiswa ekupheleni kwehlabathi njengezimvu zomzekeliso kaYesu. INcwadi Yesithathu ethi Vindication, (eyapapashwa ngowe-1932), yachaza ngesimo sengqondo esithe tye sentliziyo kaYehonadabhi, owakhwela kwinqwelo yokulwa yoKumkani othanjisiweyo wakwaSirayeli uYehu waza wahamba naye ukuze abone inzondelelo kaYehu ekubulaleni abanquli bobuxoki. (2 Kumkani 10:15-28) Le ncwadi yathi: “UYehonadabhi wayemela okanye wayefanekisela udidi lwabantu abasemhlabeni abangavisisaniyo nentlangano kaSathana, abamela ubulungisa, yaye ngabo iNkosi iya kubasindisa ebudeni bexesha leArmagedon, ibe baphumele ngaphaya kwaloo nkathazo, ize ibanike ubomi obungunaphakade emhlabeni. Aba bantu babumba udidi ‘lwezimvu.’”
Ngowe-1934, IMboniselo (yesiNgesi) yakwenza kwacaca ukuba amaKristu anethemba lokuphila emhlabeni afanele azahlulele kuYehova aze abhaptizwe. Ukukhanya okuphathelele olu didi lwasemhlabeni ngokwenene kwakukhanya kakhulu kunangaphambili!—IMizekeliso 4:18.
Ukuqonda Okubalaseleyo
Ukuqondwa kweSityhilelo 7:9-17 kwakusele kuza kukhanya ngokupheleleyo. (INdumiso 97:11) IMboniselo yayivakalise ukuba indibano eyayicwangciselwe ukuqhutywa ngoMeyi 30 ukusa kuJuni 3, 1935, eWashington, D.C., eUnited States, yayiya kuba “yintuthuzelo nengenelo yokwenene” kwabo babefanekiselwa nguYehonadabhi. Yaye ngenene kwaba njalo!
Kwintetho evus’ ihlombe ethi “Indimbane Enkulu,” eyanikelwa kubantu ababeze kuloo ndibano abamalunga nama-20 000, uJ. F. Rutherford wanikela ubungqina obungokweZibhalo bokuba ‘ezinye izimvu’ zomhla wethu ziyafana ‘nesihlwele esikhulu’ seSityhilelo 7:9. (Yohane 10:16) Ekupheleni kwale ntetho, isithethi sabuza: “Ngaba bangaphakama abo banethemba lokuphila ngonaphakade emhlabeni?” Njengoko inxalenye enkulu yabaphulaphuli yema ngeenyawo, lo kaRutherford wabhengeza: “Khangelani! Indimbane enkulu!” Kwathi nzwanga, kwaza kwalandela intswahla yemincili. Ngosuku olulandelayo, kwabhaptizwa amaNgqina kaYehova amatsha angama-840, uninzi lwawo lusithi lungabesihlwele esikhulu.
Ubukho Obuphawulekayo
Ngaphambi kowe-1935, inani elikhulu labo basabelayo kwisigidimi seBhayibhile baza babonakalise inzondelelo ngomsebenzi wokushumayela iindaba ezilungileyo lalinethemba lokuphila ngonaphakade kwiParadesi esemhlabeni. Babengenamnqweno wokuya ezulwini, kuba uThixo akazange abanike ithemba lobomi basezulwini. Ukuzifanisa kwabo nesihlwele esikhulu sezinye izimvu kwabonakalisa ukuba ngowe-1935 ukukhethwa kwamaKristu athanjisiweyo ali-144 000 kwakuphantse kube kugqityiwe.—ISityhilelo 7:4.
Xa kwaqalisa IMfazwe Yehlabathi II, uSathana uMtyholi wazama kangangoko anako ukuwuphelisa umsebenzi wokuhlanganiswa kwesihlwele esikhulu. Umsebenzi wokushumayela ngoBukumkani wabekelwa imiqathango kumazwe amaninzi. Ebudeni belo xesha lobumnyama, nangaphambi kokuba afe ngoJanuwari 1942, uJ. F. Rutherford wathi: “Kubonakala ngathi ‘indimbane enkulu’ ayiyi kuba nkulu kangako.”
Kodwa ngenxa yentsikelelo yobuthixo, izinto ziye zaguquka. ‘Beme ngokuqinileyo yaye bengahexi,’ abathanjiswa namaqabane abo, ezinye izimvu, bazalisekisa uthumo lokwenza abafundi. (Kolose 4:12; Mateyu 24:14; 28:19, 20) Ngowe-1946 inani lamaNgqina kaYehova ashumayela emhlabeni wonke lalingama-176 456—uninzi lwawo ingabesihlwele esikhulu. Ngowama-2000, amaNgqina angaphezu kwe-6 000 000 ebekhonza uYehova ngokuthembeka kumazwe angama-235—ngenene sisihlwele esikhulu! Yaye eli nani liyaqhubeka lisanda.