Yintoni Exabiseke Ngokwenene?

Ukuba nento ethile exabiseke ngokwenene kunokubangel’ imincili. Kodwa yintoni leyo? Ngaba yintywenka yemali? Ngaba lilitye elinqabileyo elixabisa imali eninzi nelingaqhelekanga? Ngaba ludumo okanye ukubalasela? Abantu abaninzi bazixabisa kakhulu ezi zinto. Ukuba nazo kunokubangela ubani afumane inkxaso yokuphila, kubangele ubomi bube nentsingiselo ngakumbi okanye kwanelise umnqweno wokufumana ingqalelo yabanye nowokuzuza impumelelo. Ngaba sizabalazela ukufumana ezo zinto, ngethemba lokuba ziya kusenza sifikelele usukelo lwethu nezilangazelelo zethu zekamva?

NGOKUQHELEKILEYO, into exatyiswa ngabantu yinto eyanelisa iintswelo zabo okanye iminqweno yabo yobuqu. Siyazixabisa izinto ezisibangela sizive singabantu nezisinika ithemba lekamva elinqabisekileyo. Siyazixabisa izinto ezinika isiqabu esikhawulezileyo, intuthuzelo, nezisenza saziwe ngabanye. Ukanti, ukugqala izinto ezithile njengezixabisekileyo ngokusekelwe kwiminqweno yethu eguquguqukayo kukuzimfamekisa. Enyanisweni, eyona nto ixabiseke ngokwenene yinto esicinga ukuba siyifuna gqitha.

Yintoni eyona nto siyifuna gqitha? Ayikho into exabisekileyo ngaphandle kokuba ibandakanya eyona nto ibalulekileyo—ubomi. Ngaphandle kobomi, asiphili. UKumkani uSolomon kaSirayeli wamandulo wabhala: “Kodwa abafileyo, abazi nto konke konke . . . Akukho msebenzi nakuyila nakwazi nakulumka eShiyol [ingcwaba eliqhelekileyo loluntu].” (INtshumayeli 9:5, 10) Xa sisifa, kuyanyanzeleka ukuba sincame yonke into esinayo. Ngoko ke, eyona ntswelo yethu kukuba sizuze into eya kulondoloza ubomi bethu. Yintoni enokulondoloza ubomi bethu?

Yintoni Enokulondoloza Ubomi Bethu?

UKumkani uSolomon wathi: ‘Imali iyakhusela.’ (INtshumayeli 7:12) Xa sinemali eyaneleyo, sinokuzithengela ukutya nekhaya elitofotofo. Imali inokusenza sizuze uyolo lokukhenkethela kumazwe akude. Inokusinceda sihlangabezane neemfuno zethu xa singasakwazi ukusebenza ngenxa yokwaluphala nokugula. Zininzi iingenelo zokuba nemali. Ukanti, imali ayinakubulondoloza ubomi bethu. Umpostile uPawulos wayalela uTimoti esithi: “Bayale abo bazizityebi kule nkqubo yezinto ukuba bangaziphakamisi, bangathembeli kubutyebi obungaqinisekanga, kodwa mabathembele kuThixo.” (1 Timoti 6:17) Iyonke imali esehlabathini asinakuthenga ubomi ngayo.

Khawucinge ngamava endoda egama linguHitoshi. Ekubeni wayekhuliswe yintsapho engamahlwempu, uHitoshi wayekunqwenela ngokunzulu ukuba sisityebi. Wayekholelwa ukuba imali inokukwenzela nokuba yintoni na kangangokuba wayecinga ukuba nabantu babenokuthengwa ngemali. Kwandula ke ngenye imini kwafika ndoda ithile endlwini kaHitoshi yaza yambuza enoba wayesazi na ukuba uYesu Kristu wamfela. Lo mbuzo wabangela ukuba uHitoshi abe nomdla ngenxa yokuba wayevakalelwa kukuba akukho mntu wayenokufela umntu onjengaye. Waya kuphulaphula intetho yesidlangalala yeBhayibhile yaye wamangaliswa kukuva isiluleko ‘sokugcina iliso lingenakumbi.’ Isithethi sachaza ukuba iliso ‘elingenakumbi’ likhangela kwikamva yaye lijoliswa kwizinto zokomoya. (Luka 11:34) Kunokuba abulalekele imali, uHitoshi waqalisa ukubeka izinto zokomoya kwindawo yokuqala ebomini bakhe.

Izinto eziphathekayo zinokubangela ukuba sizinze yaye sinqabiseke ukusa kumlinganiselo othile. Ukuba nentabalala yezinto kunokusenza singabi naxhala ngeentswelo zethu zemihla ngemihla. Ukuba nekhaya elihle kwindawo entle kunokusenza sizive siphumeze okuthile. Impahla yefashoni nenqwelo-mafutha entle zinokusenza sixatyiswe ngabanye.

Kuyintsikelelo ‘ukubona okulungileyo kuko konke ukusebenza kwethu nzima.’ (INtshumayeli 3:13) Yaye ukuba nentabalala yezinto kunceda abo bathandekayo ukuba ‘bakhululeke, batye, basele baze baziyolise.’ Noko ke, ixabiso lezinto eziphathekayo liphela ngokukhawuleza. Elumkisa nxamnye nokubawa, uYesu Kristu wathi: “Kwanaxa umntu enentabalala ubomi bakhe abuphumi kwizinto anazo.” (Luka 12:15-21) Izinto esinazo, kungakhathaliseki ukuba zingakanani okanye zinexabiso elingakanani, azinakusinika ubomi.

Ngokomzekelo, uLiz wayetshate nendoda eyayinemali. Uyabalisa: “Sasinekhaya elihle neenqwelo-mafutha ezimbini, yaye ngenxa yemali esasinayo sasikwazi ukufumana zonke izinto eziphathekayo esasizifuna . . . Nangona kusenokuvakala kumangalisa, ndandisakhathazeka ngemicimbi yemali.” Uthi: “Sasilahlekelwa kokuninzi. Kubonakala ngathi okukhona unezinto ezininzi, kokukhona uziva unganqabisekanga.”

Abaninzi balugqala udumo nokubalasela njengezinto ezixabiseke kakhulu ngenxa yokuba zinokwenza ubani athandwe aze axatyiswe ngabanye. Kwihlabathi lanamhlanje xa umntu izinto zimhambela kakuhle emsebenzini, abanye bayakunqwenela oko. Ukuhlakulela ukuba nobuchule okanye ubugcisa kunokusinceda ukuba sizenzele igama. Abanye basenokusincoma, babe noxabiso ngezimvo zethu, baze bafune ukuba sibathande. Konke oku kunokubangela imincili nolwaneliseko. Noko ke, ekugqibeleni kuyaphela konke oko. USolomon wayenalo lonke uzuko namandla awayenokuba nawo ukumkani, kodwa wakhalaza esithi: “Asikhunjulwa ngakumbi isilumko kunesiyatha . . . Ngokuqinisekileyo wonk’ ubani uyalityalwa.” (INtshumayeli 2:16) Udumo nokubalasela akubangeli ubani afumane umvuzo wobomi.

Umkroli ogama linguCelo wathanda into eyayixabiseke ngaphezu kodumo. Ekubeni wayengumntu onesiphiwo, waya kwisikolo esamenza wahambisela phambili ubuchule bakhe. Kungekudala, wafumana udumo ngomsebenzi wakhe kumaphephandaba nakubahlalutyi bezobugcisa. Uninzi lwemifanekiso yakhe ekroliweyo kwakuboniswa ngalo kwizixeko ezikhulu zaseYurophu. UCelo uyabalisa: “Ndimele ndivume ukuba okwexeshana umsebenzi wobugcisa wawuyeyona nto yayibalulekile ebomini bam. Noko ke, ndaqonda ukuba, ukuqhubeka nalo msebenzi wam kwakuya kufana nokuzama ukukhonza iinkosi ezimbini. (Mateyu 6:24) Ndandeyisekile kukuba eyona nto ibalulekileyo ndandinokuyenza yayikukushumayela iindaba ezilungileyo zoBukumkani bukaThixo. Ngoko ndenza isigqibo sokuwuyeka umsebenzi wam wokukrola.”

Yintoni Eyona Nto Ixabiseke Kakhulu?

Ekubeni kungekho nto ixabisekileyo ngaphandle kobomi, yintoni esinokuyizuza enokusenza siqiniseke ukuba siya kuqhubeka siphila? Bonke ubomi buvela kuYehova uThixo. (INdumiso 36:9) Eneneni, “ngaye sinobomi siyashukuma yaye sikho.” (IZenzo 17:28) Abo abathandayo ubanika ubomi obungunaphakade njengesipho. (Roma 6:23) Yintoni esimele siyenze ukuze sisifanelekele esi sipho?

Ukufumana isipho sobomi obungunaphakade kuxhomekeke ekubeni sibe nolwalamano olusenyongweni noYehova. Ngoko ke, ukufumana inkoliseko yakhe kuxabiseke ngaphezu kwayo nantoni na esinokuyifumana. Xa siyifumene, siba nethemba lokufumana ulonwabo lokwenene nolungunaphakade. Noko ke, xa singenayo inkoliseko kaThixo sijamelene nentshabalalo kanaphakade. Ngoko ke, ngokucacileyo nantoni na eya kusinceda sizuze ulwalamano oluhle noYehova ixabiseke kakhulu.

Oko Simele Sikwenze

Impumelelo yethu ixhomekeke ekuzuzeni ulwazi. Umthombo wolwazi oluchanileyo liLizwi likaYehova, iBhayibhile. Lilo kuphela elisixelela oko simele sikwenze ukuze sikholise uThixo. Ngoko ke, kufuneka sizifundisise ngenyameko iZibhalo. Xa sifunda ngenkuthalo konke esinokukufunda ngoYehova uThixo noYesu Kristu sifumana ‘ulwazi oluthetha ubomi obungunaphakade.’ (Yohane 17:3) Olo lwazi bubutyebi obuxabisekileyo!—IMizekeliso 2:1-5.

Ulwazi esilufumana kwiLizwi likaThixo lusixhobisela ukuba sithabathe inyathelo elilandelayo—ukuba nokholo kuYesu Kristu. UYehova umise umyalelo wokuba bonke abo beza kuye bamele beze ngoYesu. (Yohane 14:6) Eneneni, “akukho lusindiso kuye nabani na ongomnye.” (IZenzo 4:12) Usindiso lwethu lokugqibela luxhomekeke, kungekhona ‘kwisilivere okanye kwigolide . . . , kodwa kwigazi elixabisekileyo likaKristu.’ (1 Petros 1:18, 19) Simele sibonakalise ukholo lwethu ngokuzikholelwa iimfundiso zikaYesu size silandele umzekelo wakhe. (Hebhere 12:1-3; 1 Petros 2:21) Yaye hayi indlela elixabiseke ngayo idini lakhe! Ukusetyenziswa kweengenelo zalo kuthetha ikamva elingunaphakade kulo lonke uluntu. Xa lisetyenziswa ngokuzeleyo ngenxa yethu, sifumana isipho sobomi obungunaphakade esixabiseke ngokwenene.—Yohane 3:16.

UYesu wathi: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela.” (Mateyu 22:37) Ukuthanda uYehova kuthetha ‘ukugcina imiyalelo yakhe.’ (1 Yohane 5:3) Imiyalelo yakhe ifuna ukuba sihlale sahlukile ehlabathini, silondoloze ihambo ethe tye, size sibuxhase ngokunyanisekileyo uBukumkani bakhe. Leyo yindlela ‘esinyula ngayo ubomi’ ingekuko ukufa. (Duteronomi 30:19) Ukuba ‘sisondela kuThixo, uya kusondela kuthi.’—Yakobi 4:8.

Ukuqinisekiswa ngenkoliseko kaThixo kuxabiseke ngakumbi kunabo bonke ubutyebi behlabathi. Abo banayo bangabona bantu bazizityebi emhlabeni! Ngoko ke, ngamana singazabalazela ukuzuza ubutyebi obuxabiseke ngokwenene—inkoliseko kaYehova. Ngazo zonke iindlela, masithobele isiluleko sikampostile uPawulos esithi: “Phuthuma ubulungisa, uzinikelo lobuthixo, ukholo, uthando, unyamezelo, umoya wobulali. Yilwa umlo omhle wokholo, bubambe ngokuqinileyo ubomi obungunaphakade.”—1 Timoti 6:11, 12.

[Imifanekiso ekwiphepha 21]

Yintoni oyixabise kakhulu? Ngaba yimali, izinto eziphathekayo, udumo okanye enye into?

[Umfanekiso okwiphepha 23]

Kufuneka sifundisise iZibhalo ngenyameko