Abantu Banako Ukuphila Ubomi Obunenjongo!
ABANTU abaninzi baphilela imali nezinto abanokuzithenga ngayo. Bambi bafuna ukuduma ehlabathini. Abanye bafuna ukusulungekisa ubugcisa babo. Bakho ke nabo baphilela ukunceda abanye. Kodwa abaninzi abayazi eyona nto bayiphilelayo okanye isizathu sokuba bekho.
Kuthekani ngawe? Ngaba ukhe ucingisise ngesizathu sokubakho kwakho? Kutheni ungakhe ucingisise ngezinto ezidla ngokusukelwa ngabantu uze ubone enoba zibenza baneliseke ngokwenene kusini na? Bufumaneka njani ubomi obunenjongo?
Imali Neziyolo Zinendima Yazo Ebomini
KwiNtshumayeli 7:12, iBhayibhile ithi: “Ubulumko buyakhusela njengokuba nemali ikhusela; kodwa ingenelo yolwazi kukuba ubulumko bubagcina bephila abo banabo.” Ewe, imali iluncedo. Kufuneka imali ukuze uphile, ingakumbi xa unembopheleleko yokondla intsapho.—1 Timoti 5:8.
Bunganjani ubomi ngaphandle kwezinye iindlela zokonwaba ezifuna imali? Nakuba uYesu Kristu, uMseki wobuKristu, wavumayo ukuba wayengenayo nendawo le yokufaka intloko, maxa wambi wayekhe azonwabise ngokutya newayini yodidi oluphezulu. Naye wayelinxib’ ilaphu elibizayo.—Mateyu 8:20; Yohane 2:1-11; 19:23, 24.
Noko ke, uYesu akazange aphilele iziyolo. Wayezazi kakuhle ezona zinto zibalulekileyo. Wathi: “Kuba kwanaxa umntu enentabalala ubomi bakhe abuphumi kwizinto anazo.” Emva kokutsho wenza umzekeliso wesityebi esithile esafumana isivuno esikhulu saza saqiqa ngelithi: “Ndiya kwenza ntoni na, ekubeni ngoku kungekho naphi na apho ndingahlanganisela khona izilimo zam? . . . Ndiza kubachitha oovimba bam ndize ndakhe abakhulu ngakumbi, yaye ndiza kuhlanganisela apho konke ukutya kwam okuziinkozo nazo zonke izinto zam ezilungileyo; kwaye ndiza kuthi kumphefumlo wam: ‘Mphefumlo, unezinto ezininzi ezilungileyo eziqwetyelwe iminyaka emininzi; khululeka, yitya, sela, ziyolise.’” Yintoni esasiphazama kuyo esi sityebi? Lo mzekeliso uqhubeka uthi: “UThixo wathi kuso, ‘Wena ungenangqiqo, ngobu busuku bayawufuna kuwe umphefumlo wakho. Ziya kuba zezikabani na ke ezo zinto uziqwebileyo?’” Kwanokuba umntu uye waziqwebela isivuno, akanako ukunandipha obo butyebi aziqwebela bona xa efile. Kumqukumbelo wakhe, uYesu wabafundisa esi sifundo abaphulaphuli bakhe: “Kuba njalo ngomntu oziqwebela ubuncwane kodwa engesosityebi kuThixo.”—Luka 12:13-21.
Ewe, iyafuneka imali nolonwabo ebomini. Kodwa, asizizo ezona zinto zibalulekileyo ezo. Eyona nto ibalulekileyo nesimele sizabalazele yona kukuba zizityebi kuThixo, siphile ngendlela emkholisayo.
Ngaba Kubalulekile Ukuzenzela Igama?
Abantu abaninzi baphilela ukuzenzela igama. Akukho nto iphosakeleyo ngokunqwenela ukukhunjulwa ngabanye abantu. IBhayibhile ithi: “Igama lilunge ngakumbi kuneoli elungileyo, yaye umhla wokufa ulunge ngaphezu komhla wokuzalwa.”—INtshumayeli 7:1.
Xa umntu esifa kuba ngathi ingxelo yakhe sele ibhalwe phantsi kuba ikho into enokuthethwa ngaye. Ukuba ufeze izinto ezintle, umhla wokufa kwaloo mntu ulunge ngakumbi kunomhla wokuzalwa kwakhe ngexesha apho kwakungekabikho kwanto inokuthethwa ngaye, kungaziwa nento awayeza kuba yiyo.
Umbhali wencwadi yeBhayibhile yeNtshumayeli nguKumkani uSolomon. Umkhuluwa kaSolomon uAbhisalom wayefuna ukuzenzela igama. Kodwa, kubonakala ukuba oonyana bakhe abathathu awayenokuzigcinela ngabo igama ukusa kwizizukulwana ezilandelayo bafa beselula. Wenza ntoni ke uAbhisalom? IZibhalo zithi: ‘UAbhisalom wathabatha intsika waza wazimisela yona, eseNtilini yoKumkani, kuba wathi: “Andinanyana ukuze akhumbule igama lam.” Ngoko loo ntsika wayibiza ngegama lakhe.’ (2 Samuweli 14:27; 18:18) Iintsalela zaloo ntsika azikafunyanwa nangoku. Yena uAbhisalom, eyona nto aziwa ngayo ngabafundi beBhayibhile kukuba ngumvukeli owenza iyelenqe lokubhukuqa uyise, uDavide.
Abaninzi namhlanje bazama ukuba bakhunjulwe ngezinto abazenzileyo. Bafuna ukuzukiswa ngabantu abatshintshatshintshayo kwizinto abazithandayo, kuxhomekeka kwixesha abaphila kulo. Kuye kwenzeke ntoni ke kolo dumo lwabo? Kwincwadi ethi The Culture of Narcissism, uChristopher Lasch uthi: “Kweli xesha lethu, apho kuthiwa impumelelo yomntu ixhomekeke kubutsha, ubuhle nendlela ahluke ngayo, udumo yinto ekhawuleza idlule nanini na, ibe abo bathandwayo ngabantu bahlala benexhala lokulahlwa.” Ngenxa yoko, abaninzi abadumileyo babhenela kwiziyobisi nasetywaleni, nto leyo esoloko ibenza bufutshane ubomi babo. Ngokwenene, kulilize ukusukela udumo.
Ngubani ke esimele sizenzele igama elihle kuye? Ethetha ngabathile ababegcina uMthetho wakhe, uYehova wathi ngomprofeti uIsaya: “Ndiza kubanika endlwini yam naphakathi kweendonga zam lona kanye ilitye lesikhumbuzo negama . . . Ndiya kubanika igama ukusa kwixesha elingenammiselo, elingayi kunqunyulwa.” (Isaya 56:4, 5) Ngenxa yokuthobela kwabo uThixo, abo bamkelekileyo kuye baya kuba ‘nelitye lesikhumbuzo negama.’ UThixo uya kulikhumbula igama labo “ukusa kwixesha elingenammiselo” ngoko abayi kunqunyulwa. Lolo ke uhlobo lwegama iBhayibhile esikhuthaza ukuba sizenzele lona—igama elihle kuYehova, uMdali wethu.
UIsaya wayeprofeta ngexesha apho abo bathembekileyo beya kuzuza ubomi obungunaphakade kumhlaba oyiParadesi. “Ubomi obungunaphakade” kwiParadesi ‘bubomi benene’—ubomi uThixo awayenenjongo yokuba sibuphile xa wayesidala. (1 Timoti 6:12, 19) Kunokuphila ubomi obufutshane nobunganelisiyo, ngaba asimele sizabalazele ukufumana ubomi obungunaphakade?
Ukuphilela Ubugcisa Okanye Ukunceda Abanye Akusenzi Saneliseke Ngokwenene Ebomini
Amagcisa amaninzi anomnqweno wokusulungekisa umsebenzi wawo ukuze ube kwizinga acinga ukuba lelona ligqibeleleyo. Obu bomi bufutshane gqitha ukuba bangafezekisa loo mnqweno. Xa wayeneminyaka engama-90 ubudala, uHideo, igcisa elikhankanywe kwinqaku elandulela eli, wayesazama ukuphucula ubuchule bakhe kobo bugcisa. Nokuba igcisa lingade laneliswe ngumsebenzi walo, ngelo xesha alisakwazi kwenza zinto zininzi njengokuba belinokwenza xa liselula. Kuthekani ukuba beliphila ubomi obungunaphakade? Cinga ngawo onke amathuba ebeliya kuba nawo lisulungekisa ubugcisa balo!
Kuthekani ngokuphilela ukunceda abanye abantu? Yinto entle nencomekayo ukukhumbula amahlwempu, usebenzise ubuncwane bakho ukunceda abasweleyo. IBhayibhile ithi: “Kunoyolo ngakumbi ukupha kunokwamkela.” (IZenzo 20:35) Ukuxhalabela impilo-ntle yabanye kunokwenza umntu azive anelisekile. Noko ke, kungakanani okunokufezwa ngumntu kwanokuba ebenokuchitha ubomi bakhe bonke esenza oku? Kusikelwe umda gqitha oko kunokwenziwa ngabantu ukunceda abo basentlungwini. Nokuba sesisikhulu kangakanani na isipho esibanika sona asinako ukwanelisa intswelo esisiseko abayityeshelayo abaninzi kubomi babo. Yiyiphi loo ntswelo?
Simele Sanelise Intswelo Esizalwa Nayo
KwiNtshumayelo yakhe yaseNtabeni, uYesu wabhekisela kwintswelo engundoqo esizalwa nayo xa wathi: “Banoyolo abo bayiphapheleyo intswelo yabo yokomoya, kuba ubukumkani bamazulu bobabo.” (Mateyu 5:3) Ngoko, ngokutsho kweBhayibhile, ulonwabo lokwenene aluxhomekekanga ekubeni sisityebi, ukuduma, ukuphum’ izandla kubugcisa, okanye ukuphilela ukunceda abanye. Luxhomekeke ekwaneliseni intswelo yokomoya esinayo—intswelo yokunqula uThixo.
Umpostile uPawulos wakhuthaza abo babengamazi uMdali ukuba bamfune. Wathi: “[UThixo] wazenza ngokuphuma kumntu omnye zonke iintlanga zabantu, ukuba zihlale phezu komhlaba uphela, waza wamisa amaxesha amisiweyo nemida emiselweyo yokuhlala kwabantu, ukuze bona bafune uThixo, ukuba bangamphuthaphutha baze ngokwenene bamfumane, nangona, enyanisweni, engekude kuye ngamnye wethu. Kuba ngaye sinobomi siyashukuma yaye sikho.”—IZenzo 17:26-28.
Ukwanelisa le ntswelo yokunqula uThixo oyinyaniso ngoyena ndoqo ukuze siphile ubomi obanelisa ngokwenene. Ukwanelisa intswelo esinayo yokomoya kusinika nethemba lokuzuza “ubomi benene.” Cinga ngomzekelo kaTeresa, owenza imbali kumabonwakude welizwe lakhe, xa waba ngumdaka wokuqala eMerika ukudlala indima ephambili kwidrama yeyure yonke ebhalwe nguye. Noko ke, zange kube kudala wakushiya konke oko. Kwakutheni? Wathi: “Ndeyisekile ukuba ukuthobela isiluleko seLizwi likaThixo yeyona ndlela ibhetele yokuphila.” UTeresa wayengafuni konakalisa ulwalamano lwakhe noThixo ngokufak’ isandla kumdlalo kamabonwakude owawukhuthaza iintlobano zesini nogonyamelo. Wayeka ukuba yintandane kumabonwakude waya kuphila ubomi obanelisa ngokwenene, kuba waba ngumshumayeli weendaba ezilungileyo zoBukumkani bukaThixo ixesha elizeleyo, ezama ukunceda abanye babe nolwalamano oluhle noThixo.
Ethetha ngokuyeka kukaTeresa ukudlala kumabonwakude omnye owayesebenza naye wathi: “Ndaba buhlungu gqitha kukumbona elahla elo thuba ndandicinga ukuba liya kumbeka ezinkwenkwezini. Kodwa kuyacaca ukuba ufumene eyona nto ibhetele nebaluleke ngakumbi.” Kamva uTeresa wafa kwingozi yemoto. Noko ke, emva kokufa kwakhe, kwaloo mntu wayesebenza naye wathi: “Ebonwabe gqitha, ibe yiloo nto efunekayo ebomini. Bangaphi kuthi abanokuthi bonwabile?” Kwabo babeka ulwalamano noThixo kwindawo yokuqala ebomini baze bafe, kukho ithemba elimangalisayo lokuba baya kuvuka kulawulo loBukumkani.—Yohane 5:28, 29.
UMdali unenjongo ngomhlaba nabantu abaphila kuwo. Ufuna uyazi le njongo ukuze unandiphe ubomi obungunaphakade kumhlaba oyiParadesi. (INdumiso 37:10, 11, 29) Ngoku lixesha lokuba ufunde okungakumbi ngoYehova, uMdali wamazulu nomhlaba nangeenjongo anazo ngawe. AmaNgqina kaYehova akwindawo ohlala kuyo aya kukuvuyela ukukunceda ufumane olo lwazi. Nceda uqhagamshelane nawo, okanye ubhalele abapapashi beli phephancwadi.
[Umfanekiso okwiphepha 5]
Yintoni eyayiphosakele kwindlela esasiqiqa ngayo isityebi somzekeliso kaYesu?
[Umfanekiso okwiphepha 7]
Ngaba ungathanda ukunandipha ubomi obungunaphakade kwiParadesi esemhlabeni?