Isitshixo Sokufumana Ihlabathi Elinolonwabo

“IPHEPHANCWADI iTime lathi: “Oyena mntu unamandla—kungekhona kula mawaka mabini eminyaka kodwa kuyo yonke imbali yoluntu—ibisoloko inguYesu waseNazarete.” Xa uYesu wayesemhlabeni, amawaka abantu abantliziyo zinyanisekileyo aqonda, kungekhona nje ukuba namandla kwakhe kuphela, kodwa nokubaxhalabela kwakhe abanye abantu. Ngoko ke, akumangalisi ukuba bafune ukumenza ukumkani. (Yohane 6:10, 14, 15) Ukanti, njengoko kuchaziwe kwinqaku elingaphambili, uYesu wala ukubandakanyeka kwezobupolitika.

INDLELA awasabela ngayo uYesu yayisekelwe ubuncinane kwizizathu ezithathu: imbono kaYise ngokuzikhethela indlela koluntu, nto leyo equka ulawulo lwabantu; ukuqonda kukaYesu ukuba kukho amandla angabonakaliyo alwa nxamnye kwaneyona migudu ilungileyo yabantu xa belawula; nenjongo kaThixo yokumisela urhulumente wasezulwini oza kulawula ihlabathi lonke. Njengoko siphonononga ezi nkalo zintathu, siza kubona isizathu sokuba iye yasilela imizamo yomntu ukuphucula ihlabathi. Siza kubona nendlela okuya kuphunyezwa ngayo oku.

Ngaba Abantu Banokukwazi Ukuzilawula?

Xa uThixo wadala abantu, wabanika igunya lokulawula izilwanyana. (Genesis 1:26) Kodwa abantu babelawulwa nguThixo. Indoda nebhinqa lokuqala babeza kungqina ukuzithoba kwabo kuThixo ngokuthobela bangadli kwiziqhamo zomthi othile, “umthi wokwazi okulungileyo nokubi.” (Genesis 2:17) Okubuhlungu kukuba, uAdam noEva balisebenzisa kakubi ilungelo labo lokuzikhethela baza abamthobela uThixo. Ukutya kwabo eso siqhamo salelweyo kwakungesosenzo nje sobusela. Kwakuthetha ukuvukela ulongamo lukaThixo. Umbhalo osemazantsi weGenesis 2:17 kwiThe New Jerusalem Bible uthi uAdam noEva bafuna “ukuzimela geqe nto leyo ethetha ukungavumi komntu ukwamkela ukuba usisidalwa . . . Isono sokuqala yaba kukuhlasela ulongamo lukaThixo.”

Ngenxa yokubaluleka kwemigaqo ebandakanyekileyo koku, uThixo wavumela uAdam noEva nenzala yabo ukuba bazikhethele indlela yokuphila, yaye bazimisela eyabo imilinganiselo ngokulungileyo nokubi. (INdumiso 147:19, 20; Roma 2:14) Lilonke, abantu baqalisa ngoko ukuzikhethela indlela abayifunayo. Ngaba baye baphumelela? Xa sikhangela oko kuye kwenzeka kumawaka eminyaka, sinokuthi abakhange baphumelele! INtshumayeli 8:9 isichazela oku: ‘Umntu alawule umntu ibe kukwenzakala kwakhe.’ Le ngxelo yokugcuma ngenxa yolawulo lomntu ingqina ukuchana kwamazwi akuYeremiya 10:23 athi: “Ndazi kakuhle, Yehova, ukuba ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.” Imbali iye yanikela ubungqina bokuba abantu abanakukwazi ukuzilawula ngempumelelo ngaphandle koMdali wabo.

UYesu wakungqina ngokupheleleyo oku. Ukuzimela geqe kuThixo kwakulisikizi kuye. Wathi: “Andenzi nto ngokwam.” “Ndisoloko ndisenza izinto ezikholekileyo kuye [uThixo].” (Yohane 4:34; 8:28, 29) Ngoko, ngaphandle kwegunya likaThixo, uYesu akazange akucinge nokukucinga ukwamkela ubukumkani ebantwini. Noko ke, oku akuthethi ukuba wayesala ukunceda abanye abantu. Kunoko, wenza konke okusemandleni akhe ukuze ancede abantu bafumane olona lonwabo lubalaseleyo ngoko nakwikamva. Wada wanikela ngobomi bakhe ngenxa yoluntu. (Mateyu 5:3-11; 7:24-27; Yohane 3:16) Kodwa uYesu wayesazi ukuba “yonke into inexesha layo elimisiweyo,” kuquka ixesha likaThixo lokumisela ulongamo lwakhe phezu koluntu. (INtshumayeli 3:1; Mateyu 24:14, 21, 22, 36-39) Kwakhona, khumbula ukuba e-Eden abazali bethu bokuqala bazithoba kwisidalwa sokomoya esingendawo esathetha sisebenzisa inyoka ebonakalayo. Oku kusizisa kwisizathu sesibini sokuba uYesu engazange azibandakanye kwezobupolitika.

Umlawuli Ongaqondakaliyo Wehlabathi

IBhayibhile isixelela ukuba uSathana wathembisa uYesu “zonke izikumkani zehlabathi nozuko lwazo” ukuba wayenokuthi nje amnqule. (Mateyu 4:8-10) Lilonke, uYesu wathenjiswa ulawulo lwehlabathi—kodwa ngokutsho kukaMtyholi. UYesu akazange akhohliswe seso silingo. Ngaba kwakusisilingo ngokwenene oko? Ngaba eneneni uSathana wayenokwenza eso sithembiso sikhulu kangako? Ewe, kuba noYesu wambiza uMtyholi ngokuthi “umlawuli wehlabathi,” yaye umpostile uPawulos wamchaza ‘njengothixo wale nkqubo yezinto.’—Yohane 14:30; 2 Korinte 4:4; Efese 6:12.

Kakade ke, uYesu wayesazi ukuba uMtyholi akanazinjongo zintle ngabantu. Wachaza uSathana ‘njengesibulala-mntu’ “noyise wobuxoki nako konke oko kububuxoki.” (Yohane 8:44, The Amplified Bible) Kucacile ukuba, kwihlabathi ‘elisemandleni’ omoya ongendawo onjalo akunakuze kubekho ulonwabo lokwenene. (1 Yohane 5:19) Kodwa uMtyholi akayi kuba nalo ngonaphakade eli gunya. UYesu, ngoku osisidalwa sokomoya esinamandla, kungekudala uya kumshenxisa uSathana aze ayiphelise nya impembelelo yakhe.—Hebhere 2:14; ISityhilelo 20:1-3.

USathana wazi kakuhle ukuba zibaliwe iintsuku zokulawula kwakhe ihlabathi. Ngoko, wenza konke okusemandleni ukuze onakalise abantu, njengokuba wenzayo ngaphambi koMkhukula womhla kaNowa. (Genesis 6:1-5; Yude 6) ISityhilelo 12:12 sithi: “Yeha kuwo umhlaba nakulo ulwandle, ngenxa yokuba uhlile weza kuni uMtyholi, enomsindo omkhulu, esazi ukuba ixesha analo lifutshane.” Isiprofeto seBhayibhile neziganeko zehlabathi zibonisa ukuba siphila ngasekuqoshelisweni kwelo ‘xesha lifutshane.’ (2 Timoti 3:1-5) Sekumbovu ukuba sikhululeke.

Urhulumente Oza Kuzisa Ulonwabo

Isizathu sesithathu sokuba uYesu angazibandakanyi kwezobupolitika kukuba wayesazi ukuba kwixesha elizayo elimiselweyo, uThixo wayeza kumisela urhulumente wasezulwini oza kulawula umhlaba. Loo rhulumente iBhayibhile imbiza ngokuthi buBukumkani bukaThixo, yaye waba ngowona mxholo wemfundiso kaYesu. (Luka 4:43; ISityhilelo 11:15) UYesu wafundisa abafundi bakhe ukuba bathandazele obo Bukumkani bufike, kuba kuphantsi kolawulo lwabo kuphela apho ‘ukuthanda kukaThixo kuya kwenziwa emhlabeni njengasezulwini.’ (Mateyu 6:9, 10) Usenokuba uyazibuza, ‘Ukuba obu Bukumkani buza kulawula phezu komhlaba wonke, kuza kwenzeka ntoni koorhulumente babantu?’

Impendulo ifumaneka kuDaniyeli 2:44: “Ngemihla yabo kumkani [balawula ekupheleni kwale nkqubo ikhoyo] uThixo wezulu uya kumisa ubukumkani obungenakuze bonakaliswe. Yaye obo bukumkani abuyi kudluliselwa kubo nabaphi na abanye abantu. Buya kuzityumza buziphelise zonke ezi zikumkani [zimiselwe ngabantu], buze bona bume ukusa kwixesha elingenammiselo.” Kutheni uBukumkani bukaThixo buza “kuzityumza” izikumkani zomhlaba? Kungenxa yokuba zityhalela phambili nomoya wokuzikhethela owakhuthazwa nguSathana emva kumyezo wase-Eden zimgatya uThixo. Ukongezelela ekwenzeni izinto nxamnye nokona kulungele uluntu, abo batyhalela phambili naloo moya bazifaka engxakini yokulwa noMdali. (INdumiso 2:6-12; ISityhilelo 16:14, 16) Ngoko, sifanele sizibuze, ‘Ngaba simela ulawulo lukaThixo okanye silwa nalo?’

Uya Kukhetha Ulongamo Lukabani?

Ukuze ancede abantu benze isigqibo esichanileyo ngolawulo, uYesu wathuma abafundi bakhe ukuba baye kushumayela ‘iindaba ezilungileyo zobukumkani kuwo wonke umhlaba omiweyo kube bubungqina kuzo zonke iintlanga’ ngaphambi kokuba sifike isiphelo sale nkqubo ikhoyo. (Mateyu 24:14) Ngoobani namhlanje abaziwa ehlabathini lonke ngokushumayela ngoBukumkani bukaThixo? NgamaNgqina kaYehova. Enyanisweni, kwiphepha lalo lokuqala elingaphandle, eli phephancwadi kudala laba namazwi athi, “Evakalisa UBukumkani BukaYehova.” Namhlanje, kukho amaNgqina amalunga nezigidi ezithandathu kumazwe angaphezu kwama-230 anceda abantu bazuze ulwazi oluchanileyo ngobo Bukumkani.a

Iintsikelelo Eziya Kufunyanwa Ngabalawulwa Bobo Bukumkani

UYesu wayesoloko esenza izinto ngendlela kaThixo. Ngoko, endaweni yokukhetha ikhondo lokuzimela geqe ezama ukuxhasa okanye aphucule le nkqubo yezinto ikhoyo esebenzisa ezobupolitika, wazibhokoxa ekuhambiseleni phambili izilangazelelo zoBukumkani bukaThixo, obukuphela kwesicombululo kwiingxaki zehlabathi. Ngenxa yokunyaniseka kwakhe wavuzwa ngokunikwa itrone ezukileyo yasezulwini njengeyona Kumkani ephakamileyo yobo Bukumkani. Onjani wona ukuzuka umvuzo ngenxa yokuthobela kwakhe uThixo!—Daniyeli 7:13, 14.

Namhlanje, izigidi ezixelisa uYesu ekubekeni uBukumkani bukaThixo kwindawo yokuqala zize zithobele ukuthanda kukaThixo nazo zinandipha isipho esimangalisayo—ilungelo lokuba ngabalawulwa boBukumkani bukaThixo abasemhlabeni. (Mateyu 6:33) Phantsi kolawulo lothando lobo bukumkani, ziya kufezekiswa, zinethemba lobomi obungunaphakade. (ISityhilelo 21:3, 4) Eyoku-1 kaYohane 2:17 ithi: “Ihlabathi liyadlula nenkanuko yalo, kodwa lowo wenza ukuthanda kukaThixo uhleli ngonaphakade.” Olunjani lona uvuyo lokusala apha ngonaphakade, xa uSathana nabalandeli bakhe betshayelwe nomhlaba uguqulwe waba yiparadesi yehlabathi lonke, lungasekho ucalucalulo lobuhlanga, iinkqubo zorhwebo ezirhwaphilizayo, nonqulo lobuxoki!—INdumiso 37:29; 72:16.

Ewe, uBukumkani bukaThixo sesona sitshixo sehlabathi ekuya kubakho ulonwabo lokwenene kulo, yaye ngokufanelekileyo isigidimi esivakalisa ngobo bukumkani sichazwa njengeendaba ezilungileyo. Ukuba akukakwenzi oko, kwixesha elizayo xa omnye wamaNgqina kaYehova esiza ekhayeni lakho, kutheni ungazamkeli nje ezi ndaba zilungileyo uziphathelweyo?

[Umbhalo osemazantsi]

[Imifanekiso ekwiphepha 5]

Imbali ingqina ukuba abantu abanakukwazi ukuzilawula ngempumelelo ngaphandle kukaThixo

[Umfanekiso okwiphepha 5]

Ngenxa yokuba elawula le “nkqubo yezinto” ikhoyo, uSathana wakwazi ukuthembisa uYesu ‘ngazo zonke izikumkani zehlabathi’

[Imifanekiso ekwiphepha 7]

UYesu wafundisa ukuba phantsi kwelungiselelo loBukumkani bukaThixo, ihlabathi liya kuba yindawo emangalisayo