Ngaba Unako Ukuliphucula Ihlabathi? — IWatchtower LAYBRARI EKWI-INTANETHI

Ngaba Unako Ukuliphucula Ihlabathi?

“Ezobupolitika azikwazi ukulungisa undonakele ophakathi koluntu. Azinazo izixhobo zokuphinda zakhe inkolo yokuziphatha eyayikade ikho. Ezona nkqubo zazo ziphambili azinakuyibuyisa imilinganiselo yokuthandana ngaphambi komtshato okanye yomtshato eyayisetyenziswa ngaphambili, zenze oobawo babe nembopheleleko ngabantwana babo, zenze abantu baphinde bazive behlazekile njengangaphambili . . . Inkoliso yeengxaki zokuziphatha esijamelene nazo ayinakupheliswa ngumthetho.”

NGABA uyavumelana naloo mazwi alowo wayesakuba sisandla sorhulumente waseUnited States? Ukuba kunjalo, sisiphi isicombululo seengxaki ezininzi namhlanje ezibangelwa kukubawa, ukungabi nomsa wemvelo ezintsatsheni, ukungakwazi ukuziphatha, ukungakhathali, nabanye oothunywashe abatshabalalisa isiseko sebutho labantu? Abanye abantu bavakalelwa kukuba asikho isicombululo, ngoko ke basuke bazixakekise ngemicimbi yobomi babo bemihla ngemihla. Abanye banethemba lokuba ngenye imini kuya kusuka kuvele iqhajana lenkokeli ekrelekrele, mhlawumbi inkokeli yonqulo, ize ibalathisele kwindlela elungileyo.

Enyanisweni, kwiminyaka engamawaka amabini eyadlulayo, abantu babefuna ukwenza uYesu Kristu ukumkani wabo ngenxa yokuba baqonda ukuba wayethunywe nguThixo yaye wayeza kuba ngoyena mlawuli ufanelekileyo. Sekunjalo, wathi uYesu akuziqonda iinjongo zabo, wakhawuleza waphel’ emehlweni kuloo ndawo. (Yohane 6:14, 15) Kamva, wacacisela irhuluneli yamaRoma wathi: “Ubukumkani bam abuyonxalenye yeli hlabathi.” (Yohane 18:36) Noko ke, kule mihla bambalwa abenza ngendlela uYesu awenza ngayo—nkqu neenkokeli zonqulo ezithi zingabalandeli bakhe. Ezinye zazo ziye zazama ukuphucula eli hlabathi, enoba kungokuzama ukuphembelela abalawuli okanye ngokuthabathela kuzo ulawulo. Oku sinokukubona ngokukhangela kwiminyaka ye-1960 neye-1970.

Imigudu Yonqulo Ekuphuculeni Ihlabathi

Ekupheleni kweye-1960, abefundisi abathile kumazwe akwiLatin-America baqalisa ukulwela amahlwempu nabacinezelekileyo. Ukuze bafeze oku baveza imfundiso yezakwalizwi yokulwela inkululeko, apho uKristu wachazwa njengomsindisi kungekhona ngokwembono yeBhayibhile kuphela kodwa nakwezobupolitika nezoqoqosho. EUnited States, iqela leenkokeli zecawa ezazixhalatyiswe ngokunzulu kukuwohloka kwemilinganiselo yokuziphatha laseka umbutho obizwa ngokuba yiMoral Majority. Iinjongo zawo yayikukufaka kwizikhundla zezobupolitika abantu ababeza kumisela imithetho ngemilinganiselo efanelekileyo yentsapho. Ngokufanayo, kumazwe amaninzi amaSilamsi, kukho amaqela aye azama ukulwa ubuqhetseba norhwaphilizo ngokukhuthaza ukuba kulandelwe iKoran.

Ngaba ucinga ukuba ihlabathi liye laphucuka ngenxa yaloo migudu? Ngokubanzi, izibakala zibonisa ukuba imilinganiselo yokuziphatha iya iwohloka yaye umsantsa ophakathi kwezityebi namahlwempu uya usiba mkhulu, kuquka nakuloo mazwe yayibalasele kuwo imfundiso yezakwalizwi yokulwela inkululeko.

Ngenxa yokuba iMoral Majority yasilela kwezona njongo zayo eUnited States, umseki wayo uJerry Falwell, wawuphelisa loo mbutho ngowe-1989. Yathatyathelw’ indawo yeminye imibutho. Sekunjalo, uPaul Weyrich, umntu wokuqala ukusebenzisa igama elithi “moral majority,” kwiphephancwadi iChristianity Today wabhala wathi: “Nokuba sele siphumelela kwezobupolitika, uloyiso lwethu luyasilela ukuphumeza ezo nkqubo sikholelwa ukuba zibalulekile.” Kwakhona wabhala wathi: “Olu qheliselo luya luthabatha unyawo ngakumbi. Sithe zwabha kwelona xesha lokuphela kwemilinganiselo embalini, iphela kangangokuba nezobupolitika ziyoyisakala.”

Ediza oko akujonga njengonobangela ophambili wokungaphumeleli kwemigudu yezobupolitika yokunceda abantu, umbhali wemihlathi yamaphephandaba nombhali weencwadi uCal Thomas wathi: “Eyona nguqu yokwenene yileyo yenzeka ebantwini, kungekhona ukuphumelela kunyulo, kuba ezona ngxaki zethu ziphambili asizizo ezoqoqosho nezobupolitika kodwa zinxulumene nokuziphatha nemeko yokomoya.”

Kodwa ziconjululwa njani iingxaki zokuziphatha nezokomoya kwihlabathi elingenayo imilinganiselo, apho abantu bazigqibelayo ngoko kulungileyo nokubi? Ukuba abantu abanempembelelo nabo baneenjongo ezintle—enoba ngabonqulo okanye akunjalo—abakwazi kwenza eli hlabathi libe yindawo elunge ngokwenene, ngubani onokukwazi? Njengoko siza kubona kwinqaku elilandelayo, ikho impendulo. Enyanisweni, impendulo yaba ngoyena nobangela wokuba uYesu athi uBukumkani bakhe yayingebubo obeli hlabathi.

[Inkcazelo Ngemifanekiso ekwiphepha 2]

[Inkcazelo Ngemifanekiso ekwiphepha 3]