Imibuzo Evela Kubafundi

Ngaba ulwalathiso lukaThixo olukuYeremiya 7:16 luthetha ukuba amaKristu akamele athandazele umntu osusiweyo ebandleni lamaKristu ngenxa yokuba engumoni ongaguqukiyo?

Emva kokuvakalisa umgwebo wakhe kuYuda onganyanisekanga, uYehova wathi kuYeremiya: “Nawe ke, ungasithandazeli esi sizwana, ungaphakamisi nesikhalo sokubongoza okanye umthandazo nokubongoza kum ngenxa yaso, kuba ndiya kube ndingakuphulaphulanga.”—Yeremiya 7:16.

Kwakutheni ukuze uYehova ayalele uYeremiya ukuba angawathandazeli amaSirayeli? Ngokucacileyo, kwakungenxa yokuba ayewutyeshele ngokupheleleyo uMthetho wakhe. ‘Ayesiba, ebulala yaye ekrexeza efunga ngobuxoki yaye eqhumisa umbingelelo kuBhahali yaye elandela abanye oothixo’ ekuhleni yaye engenazintloni ngezo zenzo. Ngenxa yoko, uYehova wawaxelela oku amaYuda angenalukholo: “Ndiza kunisusa phambi kobuso bam, kanye njengoko ndabasusayo bonke abantakwenu, inzala kaEfrayim iphela.” Ngokuqinisekileyo, kwakungayi kuba yinto efanelekileyo ukuba uYeremiya, okanye nabani na, athandaze kuYehova aze amcele ukuba asiguqule isigqibo Sakhe.—Yeremiya 7:9, 15.

Ngokuvumelana noku, umpostile uYohane wabhala ngomthandazo ofanelekileyo oya kuThixo. Okokuqala, wawaqinisekisa amaKristu ngelithi: “Kungakhathaliseki ukuba yintoni na esiyicelayo ngokuvumelana nokuthanda kwakhe, uyasiva.” (1 Yohane 5:14) Waza, ngokuphathelele umthandazo malunga nabanye, uYohane waqhubeka wenjenje: “Ukuba umntu uthe wabona umzalwana wakhe esenza isono esingasingisi kufeni, makambongozele, yaye yena uya kumnika ubomi lowo wenze isono esingasingisi kufeni. Sikho ke nesono esisingisa ekufeni. Anditsho ukuthi makacelele sona.” (1 Yohane 5:16) Kwakhona uYesu wathetha ngesono ‘esingayi kuxolelwa,’ oko kukuthi, isono esinxamnye nomoya oyingcwele.—Mateyu 12:31, 32.

Ngaba oku kuthetha ukuba bonke abenzi besono abangaguqukiyo abasusiweyo ebandleni lamaKristu benze isono “esisingisa ekufeni” yaye ngaloo ndlela abamele bathandazelwe? Oku akunjalo ngokuzenzekelayo kuba kwezinye iimeko izenzo eziphosakeleyo abazenzileyo asizizo izono ezisingisa ekufeni. Enyanisweni, kunzima ukwazi ukuba zinjalo ngokwenene kusini na. Umzekelo omhle ngumzekelo kaKumkani uManase wakwaYuda. Wakhela oothixo bobuxoki izibingelelo, wabingelela ngoonyana bakhe, wasebenzelana nemimoya waza wabeka imifanekiso eqingqiweyo kwitempile kaYehova. Eneneni, iBhayibhile isixelela ukuba uManase nabantu benza “okubi ngaphezu kweentlanga ezo uYehova wayezibhubhisile phambi koonyana bakaSirayeli.” Ngenxa yako konke oku, uYehova wamohlwaya uManase ngokuvumela ukuba athinjwe aze abotshwe ngamakhamandela asiwe eBhabhiloni.—2 Kumkani 21:1-9; 2 Kronike 33:1-11.

Ngaba izono zikaManase, zinzulu zinjalo, zazisingisa ekufeni? Kuyabonakala ukuba akunjalo, kuba ingxelo iqhubeka ithi ngaye: “Ekubandezelekeni kwakhe, wambongoza uYehova uThixo wakhe waqhubeka ezithoba kakhulu ngenxa kaThixo wookhokho bakhe. Yaye waqhubeka ethandaza Kuye, kangangokuba Yena wasabela kwisibongozo sakhe ibe Yena wakuva ukucela kwakhe ubabalo wambuyisela eYerusalem ebukumkanini bakhe; wamazi ke uManase uYehova ukuba unguThixo oyinyaniso.”—2 Kronike 33:12, 13.

Ngoko, asimele sikhawuleze sigqibe ekubeni umntu wenze isono esisingisa ekufeni kuphela nje ngenxa yokuba esusiwe ebandleni. Kunokuthabatha ixesha ngaphambi kokuba oko kusentliziyweni yomntu kubonakale. Eneneni, kusoloko kusitshiwo ukuba esinye sezizathu esibangela ukuba umntu ade asuswe kubudlelane kungenxa yokuba kufunwa umoni abubone ububi abenzileyo aze azisole yaye aguquke.

Ekubeni umntu lowo engasekho ebandleni, nakuphi na ukuguquka kwentliziyo nesimo sengqondo sakhe kunokubonwa ngabo basondele kuye, njengeqabane lomtshato okanye amalungu entsapho. Abo bazibonayo ezo nguqu banokugqiba kwelokuba umenzi wobubi ebengenzanga isono esisingisa ekufeni. Banokushukunyiselwa ukuba bathandazele ukuba afumane amandla kwiLizwi likaThixo eliphefumlelweyo nokuba uYehova enze oko akuthandayo ngomoni.—INdumiso 44:21; INtshumayeli 12:14.

Ngoxa abathile besenokukwazi ukubona ubungqina obubambekayo baze bakholwe ukuba umenzi wobubi uguqukile, ibandla ngokubanzi lisenokungakwazi ukwenjenjalo. Linokudideka, liphazamiseke de likhubeke xa lisiva ubani ethandaza ekuhleni ngomenzi wobubi. Ngenxa yeso sizathu, abo bavakalelwa kukuba bamele bathandazele umenzi wobubi bamele bakwenze oko ngasese, baze bawushiyele ezandleni zabadala bebandla abanembopheleleko loo mbandela.

[Umfanekiso okwiphepha 31]

Izono zikaManase ezinzulu zaxolelwa akuzithoba phambi koYehova

[Inkcazelo Ngomfanekiso okwiphepha 30]

Reproduced from Illustrierte Pracht-Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s