Ngaba Wone Umoya Oyingcwele?
“Sikho ke nesono esisingisa ekufeni.”—1 YOHANE 5:16.
1, 2. Sazi njani ukuba umntu unokuwona umoya oyingcwele kaThixo?
“NDANDIKHATHAZWA kukucinga ukuba ndone umoya oyingcwele.” Labhala lenjenjalo elinye ibhinqa laseJamani, nangona lalikhonza uThixo. Ngaba umKristu unokuwona umoya oyingcwele kaThixo, okanye amandla akhe asebenzayo?
2 Ewe, umntu unokuwona umoya oyingcwele kaYehova. UYesu Kristu wathi: “Lonke uhlobo lwesono nokunyelisa baya kukuxolelwa abantu, kodwa ukunyelisa umoya akuyi kuxolelwa.” (Mateyu 12:31) Siyalunyukiswa: “Ukuba siqhelisela isono ngabom emva kokufumana ulwazi oluchanileyo lwenyaniso, akusekho mbingelelo wezono useleyo, kodwa siya kulindelwa ngumgwebo owoyikekayo.” (Hebhere 10:26, 27) Nompostile uYohane wabhala wenjenje: “Sikho ke nesono esisingisa ekufeni.” (1 Yohane 5:16) Kodwa ngaba ngulowo wenze isono esinzulu ogqibayo enoba isono sakhe ‘sisingisa ekufeni’?
Ukuguquka Kubangela Ukuba Umntu Axolelwe
3. Ukuba sikhathazwa sisono esisenzileyo, yintoni esenokuba yenzeke ngokwenene?
3 NguYehova uMgwebi wabenzi bobubi. Enyanisweni, sonke simele siphendule kuye, yaye usoloko esenza okulungileyo. (Genesis 18:25; Roma 14:12) NguYehova ogqibayo enoba senze isono esingaxolelekiyo nonokuwususa umoya wakhe kuthi. (INdumiso 51:11) Noko ke, ukuba sikhathazwa sisono esisenzileyo, kunokwenzeka ukuba siguquke ngokwenene. Ngoko ke, kuthetha ukuthini ukuguquka ngokunyanisekileyo?
4. (a) Kuthetha ukuthini ukuguquka? (b) Kutheni ethuthuzela kangaka amazwi omdumisi akwiNdumiso 103:10-14?
4 Ukuguquka kuthetha ukuba sibuyekile ububi ebesibenza okanye ikhondo lobubi ebesizimisele ukuhamba ngalo. Kuthetha ukuba sibuhlungu okanye siyazisola, ngoko siyahlukana nesono ebesisenza. Ukuba senze isono esinzulu yaye sibonisa inguquko, sinokuthuthuzelwa ngamazwi omdumisi athi: “[UYehova] akenzanga kuthi kanye ngokwezono zethu; engasiziseli noko kusifaneleyo ngokweziphoso zethu. Kuba njengoko amazulu ephakamile kunomhlaba, ububele bakhe bothando bongamile kwabo bamoyikayo. Njengokuba kude kwempumalanga entshonalanga, kunjalo ukukukhwelelisa kwakhe kude nathi ukunxaxha kwethu. Njengoyise obenzela inceba oonyana bakhe, uYehova ubenzele inceba abo bamoyikayo. Kuba yena uyakwazi ukuyilwa kwethu, ekhumbula ukuba siluthuli.”—INdumiso 103:10-14.
5, 6. Chaza eyona ngongoma ibalaseleyo kweyoku-1 kaYohane 3:19-22, nentsingiselo yamazwi alo mpostile.
5 Kwakhona sithuthuzelwa ngamazwi ompostile uYohane athi: “Yiyo ke leyo indlela esiya kwazi ngayo ukuba siphuma kuyo inyaniso, yaye siya kuziqinisekisa iintliziyo zethu phambi kwakhe ngokubhekisele kuko nakuphi na oko iintliziyo zethu ezisenokusigwebela kuko, ngenxa yokuba uThixo mkhulu kuneentliziyo zethu yaye uyazazi zonke izinto. Zintanda, ukuba iintliziyo zethu azisigwebeli sohlwayo, sinenkululeko yokuthetha kuye uThixo; yaye nantoni na esiyicelayo siyayamkela kuye, ngenxa yokuba siyayigcina imiyalelo yakhe kwaye siyazenza izinto ezikholekileyo emehlweni akhe.”—1 Yohane 3:19-22.
6 ‘Siyazi ukuba siphuma kuyo inyaniso’ ngenxa yokuba sinothando lobuzalwana yaye asikuqheliseli ukona. (INdumiso 119:11) Ukuba siziva sinetyala ngesizathu esithile, kuhle ukukhumbula ukuba “uThixo mkhulu kuneentliziyo zethu yaye uyazazi zonke izinto.” UYehova usenzela inceba kuba uyazi ukuba ‘sinomsa wobuzalwana ongenaluhanahaniso,’ yaye silwa nesono, wazi nemigudu esiyenzayo ukuze senze ukuthanda kwakhe. (1 Petros 1:22) Iintliziyo zethu ‘azinakusigwebela isohlwayo’ ukuba sikholose ngoYehova, sinothando lobuzalwana, yaye asinatyala lokwenza isono ngabom. Siya kuba ‘nenkululeko yokuthetha noThixo’ ngomthandazo, yaye uya kusiphendula ngenxa yokuba siyayigcina imithetho yakhe.
Bone Umoya
7. Yintoni egqibayo enoba isono siyaxoleleka okanye akunjalo?
7 Ziziphi izono ezingenakuxoleleka? Ukuze sikwazi ukuphendula lo mbuzo, makhe siqwalasele eminye imizekelo eseBhayibhileni. Oku kunokusithuthuzela ukuba siguqukile kodwa sisakhathazwa ziziphoso ezinzulu esizenzileyo. Siza kubona ukuba asingombandela wokuba sisono esinjani umntu asenzileyo; kunoko, yintshukumisa, intliziyo nenjongo yokwenza eso sono egqibayo enoba eso sono siyaxoleleka okanye akunjalo kusini na.
8. Ezinye iinkokeli zonqulo ezingamaYuda zenkulungwane yokuqala zawona njani umoya oyingcwele?
8 Iinkokeli zonqulo ezingamaYuda zenkulungwane yokuqala ezamchasa ngenkohlakalo uYesu Kristu zazisona umoya oyingcwele. Zakubona ukusebenza komoya kaThixo njengoko uYesu wayesenza imimangaliso eyayizukisa uYehova. Sekunjalo, ezi ntshaba zikaKristu zathi loo misebenzi uyenza ngamandla kaSathana uMtyholi. Ngokutsho kukaYesu, abo babenyelisa umoya oyingcwele kaThixo babesenza isono esingenakuxoleleka “kule nkqubo yezinto kwanakuleyo izayo.”—Mateyu 12:22-32.
9. Kuthetha ukuthini ukunyelisa, yaye wathini uYesu ngako?
9 Ukunyelisa yintetho egxibhayo neyenzakalisayo. Ekubeni uMthombo womoya oyingcwele inguThixo, ukuthetha ngokunxamnye nalo moya kukuthetha nxamnye noYehova. Xa uqhubeka uthetha nxamnye noThixo ungaguquki akusayi kuxolelwa. UYesu uthetha ngabo bakuchasa ngabom ukusebenza komoya oyingcwele kaThixo. AbaFarisi bayibona indlela osebenza ngayo umoya kaYehova kuYesu, kodwa bathi yayingamandla kaMtyholi, ngaloo ndlela benyelisa umoya. Ngenxa yoko, uYesu wathi: “Nabani na onyelisa umoya oyingcwele akanakuxolelwa naphakade, kodwa unetyala lesono sikanaphakade.”—Marko 3:20-29.
10. Kwakutheni ukuze uYesu athi uYudas ‘ngunyana wentshabalalo’?
10 Kwakhona cinga ngemeko kaYudas Skariyoti. Akazange anyaniseke, weba kwibhokisi yemali ekwakuthiwe makayigcine. (Yohane 12:5, 6) Kamva waya kungcatsha uYesu ngamaqhosha angama-30 esilivere kubalawuli abangamaYuda. Ewe, uYudas wazisola emva kokuba emngcatshile uYesu, kodwa akazange aguquke kweso sono wasenza ngabom. Ngoko, uYudas akayi kuvuswa, yiloo nto uYesu wambiza ngokuba ‘ngunyana wentshabalalo.’—Yohane 17:12; Mateyu 26:14-16.
Abazange Bone Umoya
11-13. UKumkani uDavide wona njani noBhatshebha, yaye sinokuthuthuzelwa njani yindlela uThixo awabaphatha ngayo?
11 AmaKristu aye azixela izono zawo ezinzulu aza afumana uncedo lokomoya kubadala bebandla asenokuba asaman’ ekhathazwa kukuba aphula umthetho kaThixo. (Yakobi 5:14) Ukuba nathi sinjalo, mhlawumbi siya kungenelwa kukwazi ukuba iZibhalo zithini ngabo bazixolelwayo izono zabo.
12 UKumkani uDavide wenza isono esinzulu noBhatshebha, umfazi kaUriya. Eseluphahleni lwendlu yakhe, uDavide wathi xa ejonga ezantsi wabona eli bhinqa limanz’ andonga lihlamba, wathumela ukuba liziswe kwibhotwe lakhe waza walala nalo. Wathi akuva ukuba ibhinqa likhulelwe, wenza iyelenqe lokuba umyeni walo u-Uriya alale nalo ngenjongo yokufihla obo bubi wayebenzile. Lathi lakungaphumeleli elo yelenqe, ukumkani weza necebo lokuba u-Uriya abulawe edabini. Emva koko, uBhatshebha waba ngumfazi kaDavide, wamzalela umntwana owafa emva kokuba ezelwe.—2 Samuweli 11:1-27.
13 UYehova walithabathela ezandleni zakhe ityala likaDavide noBhatshebha. Wamxolela uDavide, mhlawumbi ebona ukuba uguqukile yaye ecinga nangomnqophiso woBukumkani awawenza naye. (2 Samuweli 7:11-16; 12:7-14) Kuyabonakala ukuba uBhatshebha waguquka, kuba wavuzwa ngokuba abe ngumama kaKumkani uSolomon nokhokho kaYesu Kristu. (Mateyu 1:1, 6, 16) Ukuba sonile, masingalibali ukuba uYehova uyasibona xa siguquka.
14. Siyibona njani indlela uThixo axolela ngayo kwimeko kaKumkani uManase?
14 Indlela axolela ngayo uYehova ibonakala nakwimeko kaKumkani uManase wakwaYuda. Wenza okubi emehlweni kaYehova. Wamisa izibingelelo zooBhahali, waqubuda “kuwo wonke umkhosi wamazulu,” wada wakhela oothixo bobuxoki izibingelelo kwiintendelezo ezimbini zetempile. Wadlulisa oonyana bakhe emlilweni, ekhuthaza ukusebenzelana nemimoya, waza wabangela ukuba abemi bakwaYuda nabaseYerusalem “benze okubi ngakumbi kuneentlanga ezo uYehova wayezibhubhisile phambi koonyana bakaSirayeli.” Azizange zithotyelwe izilumkiso ezazithunyelwe nguThixo ngabaprofeti bakhe. Ekugqibeleni, ukumkani waseAsiriya wamthimba uManase. Ngoxa wayethinjiwe, uManase waguquka waza waqhubeka ethandaza kuThixo ngokuzithoba, yaye uThixo wamxolela waza waphinda wamenza ukumkani eYerusalem, apho wakhuthaza unqulo lokwenyaniso.—2 Kronike 33:2-17.
15. Yintoni eyenzeka kumpostile uPetros ebonisa ukuba uYehova uxolela “ngokukhulu”?
15 Kwiinkulungwane kamva, umpostile uPetros wenza isono esinzulu ngokukhanyela uYesu. (Marko 14:30, 66-72) Sekunjalo, uYehova wamxolela “ngokukhulu” uPetros. (Isaya 55:7) Ngoba? Kuba uPetros waguquka ngokusuk’ entliziyweni. (Luka 22:62) Kwiminyaka engama-50 emva koko kwabonakala ngokucacileyo ukuba uThixo wamxolela, kuba ngomhla wePentekoste uPetros wajizekwa ngelungelo lokushumayela ngoYesu ngesibindi. (IZenzo 2:14-36) Ngaba sinesizathu sokucinga ukuba uThixo akayi kuwaxolela amaKristu aguquka ngokwenene namhlanje? Umdumisi uDavide wavuma le ngoma: “Ukuba ubulinda iziphoso, Ya, Owu Yehova, ngubani na obenokuma? Kuba ukuxolela kokwenyaniso kukuwe.”—INdumiso 130:3, 4.
Ukuphelisa Ixhala Lokuba Sone Umoya Oyingcwele
16. UThixo uxolela xa kutheni?
16 Le mizekelo ingasentla ifanele isincede siphelise ixhala lokuba siye sona umoya oyingcwele. Ibonisa ukuba uYehova uyabaxolela aboni abaguqukayo. Eyona nto ibalulekileyo kukuthandaza ngokunyanisekileyo kuThixo. Ukuba senze isono, sinokucela ukuxolelwa ngenxa yedini lentlawulelo likaYesu, inceba kaYehova, ukungafezeki esakuzuz’ ilifa kwanengxelo esinayo yokukhonza ngokuthembeka. Ukwazi ukuba uYehova usenzela ububele obungasifanelanga kusibangela siqiniseke ukuba uya kusamkela xa sicela ukuba asixolele.—Efese 1:7.
17. Yintoni efanele yenziwe xa sonile yaye sifuna uncedo lokomoya?
17 Kuthekani ukuba sonile, kodwa asikwazi ukuthandaza kuba isono esisenzileyo sibangela ukuba sibe buthathaka ngokomoya? Kwimeko enjalo, umfundi uYakobi wabhala wenjenje: “[Loo mntu] makabizele kuye amadoda amakhulu ebandla, aze wona amthandazele, amthambise ngeoli egameni likaYehova. Yaye umthandazo wokholo uya kumphilisa lowo ungaphilanga, uYehova amvuse. Kanjalo, ukuba uye wenza izono, uya kuxolelwa.”—Yakobi 5:14, 15.
18. Kutheni ukususwa komntu kubudlelane kungathethi kuthi wenze isono esingaxolelekiyo?
18 Kwanaxa umenzi-bubi engekaguquki yaye esusiwe kubudlelane, loo nto ayithethi kuthi wenze isono esingaxolelekiyo. Ethetha ngomthanjiswa owayesusiwe kubudlelane eKorinte, uPawulos wabhala wenjenje: “Oku kumkhalimela kwabaninzi kumlingene loo mntu, ngoko ke, nifanele nimxolele ngobubele nize nimthuthuzele, ukuze angadliwa kukuba buhlungu kwakhe ngokugqithiseleyo.” (2 Korinte 2:6-8; 1 Korinte 5:1-5) Noko ke, ukuze baphinde babe nolwalamano noYehova, abo bakreqileyo bafanele bamkele uncedo lokomoya olusekelwe eBhayibhileni abalufumana kubadala abangamaKristu. Bamele ‘bavelise iziqhamo ezifanele inguquko.’—Luka 3:8.
19. Yintoni enokusinceda ukuze sihlale ‘siphilile elukholweni’?
19 Yintoni ebangela ukuba sivakalelwe kukuba sone umoya oyingcwele? Kusenokwenzeka ukuba kukuxhalaba ngokugqithisileyo okanye ukuba buthathaka emzimbeni nasengqondweni. Xa kunjalo, sinokuncedwa kukuthandaza nokuphumla ngokwaneleyo. Esona sizathu siyintloko kukuba asifuni ukuvumela uSathana asidimaze, ukuze siyeke ukukhonza uThixo. Ekubeni uYehova engavuyiswa kukufa kwabangendawo, ngokuqinisekileyo akonwabi xa eshiywa ngomnye wabakhonzi bakhe. Ngoko ukuba sinoloyiko lokuba sone umoya, sifanele siqhubeke sizondla ngeLizwi likaThixo, kuquka amabinzana athuthuzelayo afana nalawo akwiiNdumiso. Kufuneka siye rhoqo kwiintlanganiso zebandla nakumsebenzi wokushumayela ngoBukumkani. Xa sisenjenjalo siya ‘kuphila elukholweni’ size singabi naxhala lokuba senze isono esingaxolelekiyo.—Tito 2:2.
20. Unokuqiqa njani umntu ukuze aqonde ukuba akonanga umoya oyingcwele?
20 Nabani na ovakalelwa kukuba wone umoya oyingcwele umele azibuze oku: ‘Ngaba ndinyelise umoya oyingcwele? Ekubeni ndiguqukile kwisono ebendisenza, ngaba ngoku andivumelani nenguquko endiyenzileyo? Ngaba ndiyakholelwa ukuba uThixo uyaxolela? Ngaba ndingumwexuki ongafuni nokuva ngokukhanya kokomoya?’ Mhlawumbi, loo mntu uya kuqonda ukuba akanyelisanga umoya oyingcwele kaThixo, okanye akangomwexuki. Uguqukile, yaye ukholelwa ngokupheleleyo ukuba uYehova uyaxolela. Ukuba kunjalo, akonanga umoya oyingcwele.
21. Yiyiphi imibuzo eza kuxutyushwa kwinqaku elilandelayo?
21 Hayi indlela ekuba sisiqabu ngayo ukwazi ukuba asonanga umoya oyingcwele! Noko ke, kwinqaku elilandelayo kuza kuxutyushwa ngemibuzo ephathelele lo mbandela. Ngokomzekelo, sisenokuzibuza oku: ‘Ngaba ngokwenene ndikhokelwa ngumoya oyingcwele kaThixo? Ngaba isiqhamo sawo siyabonakala kwindlela endiphila ngayo?’
Unokuphendula Uthini?
• Kutheni sisithi umntu unokuwona umoya oyingcwele?
• Kuthetha ukuthini ukuguquka?
• Ngoobani abona umoya ngoxa uYesu wayesemhlabeni?
• Sinokuloyisa njani ixhala lokuba senze isono esingaxolelekiyo?
[Umfanekiso okwiphepha 17]
Abo bathi uYesu wenza imimangaliso ngamandla kaSathana bona umoya oyingcwele kaThixo
[Umfanekiso okwiphepha 18]
Nangona wakhanyela uYesu, uPetros akazange enze isono esingaxolelekiyo