“Yizani Kum, . . . Yaye Ndiza Kunihlaziya”
‘Ukushumayela ILizwi’ Kuyahlaziya
WAYENGUMNTU ofezekileyo owenza umsebenzi obalulekileyo. Hayi indlela ezaziphumelela ngayo iindlela zakhe zokufundisa kangangokuba “zathi khamnqa izihlwele yindlela yakhe yokufundisa.” (Mateyu 7:28) Kwakhona wayengumshumayeli ongadinwayo. Ixesha, amandla kunye nobuncwane bakhe wabusebenzisa ngokukhethekileyo eshumayela ngoBukumkani bukaThixo. Eneneni, uYesu Kristu walihamba lonke elo lizwe lakowabo njengomshumayeli nomfundisi ongenakufaniswa nabani.—Mateyu 9:35.
Umsebenzi kaYesu ongxamisekileyo yayikukushumayela “iindaba ezilungileyo zobukumkani” kubantu bomhla wakhe nokuqeqesha abafundi bakhe ukuba bakwazi ukwenza umsebenzi ofanayo ehlabathini lonke. (Mateyu 4:23; 24:14; 28:19, 20) Ngaba ubunzima, ukungxamiseka nokubaluleka komsebenzi wokushumayela kwakuza kubongamela abalandeli bakhe abangafezekanga nabambalwa?
Nakanye! Emva kokuyalela abafundi bakhe ukuba bathandaze ‘kwiNkosi yesivuno,’ uYehova uThixo, bathandazele abasebenzi abangakumbi, uYesu wabathuma ukuba baye kufundisa abantu. (Mateyu 9:38; 10:1) Wandula ke wabaqinisekisa ukuba imbopheleleko yokuba ngumlandeli wakhe—kuquka nomsebenzi wokushumayela—iza kubahlaziya ize ibathuthuzele. UYesu wathi: “Yizani kum, . . . yaye ndiza kunihlaziya.”—Mateyu 11:28.
Unobangela Wovuyo
Hayi indlela esibonakalisa uvelwano, uthando nobubele ngayo eso simemo! Sibonakalisa inkxalabo enzulu uYesu anayo ngabalandeli bakhe. Abafundi bakhe bafumana ukuhlaziyeka ngokuphumeza imbopheleleko yabo yokushumayela “iindaba ezilungileyo” zoBukumkani bukaThixo. Oku kubenza bonwabe baze baneliseke.—Yohane 4:36.
Ngaphambi kokuba uYesu aze emhlabeni, iZibhalo zazigxininisa ukuba uvuyo lumele lube luphawu olubalaseleyo kwinkonzo engcwele kuThixo. Oku kwenziwa kwacaca xa umdumisi wavuma ingoma wenjenje: “Dumani kuYehova ngoloyiso, nonke nina bantu bomhlaba. Mkhonzeni uYehova ninemihlali. Ngenani phambi kwakhe ngentswahla yovuyo.” (INdumiso 100:1, 2) Namhlanje, abantu beentlanga zonke bamemelela ngovuyo kuYehova, yaye amazwi abo okudumisa afana nomdumo womkhosi owoyisileyo. Abo bazinikele ngokupheleleyo kuThixo basondela kuye “ngentswahla yovuyo.” Yaye enyanisweni, oku kuhle kuba uYehova ‘nguThixo onoyolo,’ ofuna abakhonzi bakhe bonwabe xa besenza ngokuvumelana nokuzinikela kwabo kuye.—1 Timoti 1:11.
Abalungiseleli Abahlaziyekileyo
Kwenzeka njani ukuba umsebenzi onzima kubulungiseleli basentsimini ungasenzi sidinwe kodwa usihlaziya? Kaloku, ukwenza umsebenzi kaYehova kwakufana nokutya okuhlaziyayo kuYesu. Wathi: “Okwam ukutya kukuba ndenze ukuthanda kondithumileyo nokuba ndiwugqibe umsebenzi wakhe.”—Yohane 4:34.
Ngokufanayo, namhlanje abashumayeli abangamaKristu anenzondelelo bayavuya njengoko ‘beshumayela ilizwi.’ (2 Timoti 4:2) UConnie, ibhinqa elingumKristu elisele liqinile elichitha ngaphezu kweeyure ezingama-70 nyanga nganye kumsebenzi wokushumayela, uthi: “Emva kokuqalisa ubulungiseleli, ndiziva ndanelisekile yaye ndonwabile, nokuba ndidiniwe ekupheleni kosuku.”
Kuthekani ukuba abantu abasamkeli isigidimi soBukumkani? UConnie uhlabela mgama enjenje: “Kungakhathaliseki indlela abasabela ngayo, andizange ndikhe ndizisole ngokuba nenxaxheba kubulungiseleli. Ngaphandle kokwazi ukuba ndenza into evuyisa uYehova, kuluvuyo kum ukuthetha ngenyaniso kuba njengoko ndisenjenjalo, lomelela ngakumbi entliziyweni yam ithemba elimangalisayo leBhayibhile.”
Abanye bafumanisa ukuba ukunceda abantu bafumane ulwazi oluchanileyo ngoThixo kwenza ubomi babo bube nenjongo. UMeloney, ibhinqa eliselula elichitha ngaphezu kweeyure ezingama-50 nyanga nganye kumsebenzi wokushumayela, ugqabaza enjenje: “Ubulungiseleli buyandihlaziya kuba benza ubomi bam bube nenjongo. Iingxaki zobuqu namaxhala emihla ngemihla ayancipha xa ndisiba nenxaxheba enkonzweni.”
UMillicent, omnye umlungiseleli onenzondelelo wamaNgqina kaYehova, ugqabaza enjenje: “Ubulungiseleli bulwenza luxabiseke usuku ngalunye endilichitha ndithetha nabanye ngenjongo kaThixo ngoluntu yaye ndicacisa indlela iParadesi eya kubuyiselwa ngayo emhlabeni. Benza ukuba uYehova abe ngowokwenene kum yonke imihla yaye bundenza ndibe noxolo lwengqondo nomlinganiselo othile wolonwabo olungafumanekiyo ngezinye iindlela.”
Abahlaziyekileyo Ngenxa Yokufumana Isigidimi
Ngokuqinisekileyo abashumayeli boBukumkani bayahlaziywa bubulungiseleli bamaKristu, yaye abo bamkela isigidimi esinika ubomi bayathuthuzelwa siso. Nangona umfundisi-ntsapho wasePortugal wayeqeqeshwe ngoonongendi nabefundisi, wayevakalelwa kukuba iimfuno zakhe zokomoya azaneliswa yicawa yakhe. Akazange afumane mpendulo kwimibuzo yeBhayibhile awayenayo. Isifundo seBhayibhile esiqhutywa rhoqo ngomnye wamaNgqina kaYehova sabangela ukuba imibandela yeZibhalo iye ityhileka ngokutyhileka kuye. Lo mfundisi-ntsapho wayengakwazi ukuzibamba yimincili. Uthi: “Rhoqo ngoLwesithathu ndandilinda ixesha lesifundo ngolangazelelo olukhulu njengoko imibuzo yam yayiphendulwa ngobungqina obeyisayo obusekelwe eBhayibhileni.” Namhlanje, eli bhinqa lingumkhonzi kaYehova ozahluleleyo, kwaye nalo lihlaziya abanye ngenyaniso yeBhayibhile.
Kucacile ke ngoko ukuba, amaNgqina kaYehova akonganyelwa kukubaluleka komsebenzi wawo wokushumayela okanye ubukhulu bentsimi asebenza kuyo. Yaye ukujongelwa phantsi okanye inkcaso ayiwenzi atyhafe. Ngokuzincama aphumeza umsebenzi wawo wokushumayela ngoBukumkani. Abelana nabantu ngeendaba ezilungileyo naphi na apho bafumaneka khona—kwindawo yokumisa iilori eUnited States (1), kwisikhululo seenqwelo-moya eKorea (2), kwiiAndes (3), okanye kwindawo yentengiso eLondon (4). Ngovuyo abalandeli bakaYesu banamhlanje benza umsebenzi wabo onomvuzo owenziwa ehlabathini lonke. Yaye ngokuvumelana nesithembiso sakhe, uye wabahlaziya yaye uye wabasebenzisa ukuhlaziya abanye abaninzi.—ISityhilelo 22:17.