Kholosa NgoYehova—UThixo Wokwenene

Ngaba wakhe wajonga kwisibhakabhaka esingenamafu ebusuku waza wabona amakhulukhulu eenkwenkwezi? Ucinga ukuba zabakho njani?

KUBUSUKU obuzolileyo, iinkwenkwezi zathetha ngokomfuziselo noKumkani uDavide wakwaSirayeli wamandulo, zimshukumisela ukuba abhale athi: “Amazulu avakalisa uzuko lukaThixo; yaye isibhakabhaka sixela umsebenzi wezandla zakhe.” (INdumiso 19:1) Ewe, nguMdali ofanele “ukwamkela uzuko nembeko namandla” ingeyiyo indalo.—ISityhilelo 4:11; Roma 1:25.

IBhayibhile ithi: “Lowo wazakhayo zonke izinto nguThixo.” (Hebhere 3:4) Eneneni, uThixo wokwenyaniso, ‘ogama linguYehova, nguye yedwa Oyena Uphakamileyo phezu komhlaba wonke.’ (INdumiso 83:18) Yaye akayonkohliso. UYesu Kristu wathi ngokuphathelele uBawo wakhe wasezulwini, uYehova: “Lowo undithumileyo uyinene.”—Yohane 7:28.

UYehova—UMzalisekisi Weenjongo Zakhe

Igama likaThixo, elilelakhe yedwa, elithi, Yehova, livela phantse izihlandlo ezingama-7 000 kwiZibhalo zesiHebhere kuphela. Elo gama libonisa ukuba uyinene. Ngokoqobo igama likaThixo lithetha ukuthi “Ubangela Kubekho.” Ngaloo ndlela uYehova uThixo uzichaza njengoMzalisekisi weenjongo zakhe. Xa uMoses wabuza uThixo igama lakhe, uYehova wayichaza ngokubhekele phaya intsingiselo yalo ngale ndlela: “Ndinguye lowo ndiya kuzingqina ndinguye.” (Eksodus 3:14) Inguqulelo kaRotherham ikubeka ngokucacileyo oku isithi: “Ndiya Kuba yiyo nantoni endiyithandayo.” UYehova ungulowo, okanye ukhetha ukuba abe nantoni na efunekayo ukuze kufezeke iinjongo nezithembiso zakhe. Ngaloo ndlela, unezibizo ezininzi ezihlab’ umxhelo, njengesithi uMdali, uBawo, iNkosi uMongami, uMalusi, uYehova wemikhosi, uMphulaphuli wemithandazo, iJaji, umYaleli Ozukileyo, uMhlawuleli.—ABagwebi 11:27; INdumiso 23:1; 65:2; 73:28; 89:26; Isaya 8:13; 30:20; 40:28; 41:14.

NguThixo oyinyaniso kuphela onelungelo lokuba negama elithi Yehova, kuba abantu abanakuqiniseka ukuba amacebo abo aya kuphumelela. (Yakobi 4:13, 14) NguYehova kuphela onokuthi: “Njengokuba kusihla imvula nekhephu emazulwini, yaye zingabuyeli kuwo zingawunyakamisanga umhlaba, ziwenze uvelise kwaye uhlume, umnike imbewu umhlwayeli, umnike nesonka odlayo, ngoko ilizwi lam eliphuma emlonyeni wam liya kuba njalo. Aliyi kubuyela kum ngaphandle kwemiphumo, kodwa ngokuqinisekileyo liya kukwenza oko ndiyoliswa kuko, likuphumelelise ngokuqinisekileyo oko ndilithumele kona.”—Isaya 55:10, 11.

Ngokuqinisekileyo, uYehova uyayizalisekisa injongo yakhe kangangokuba oko kubonakala kungenakwenzeka kubantu kunokwenzeka emehlweni akhe. Emva kwethuba elide uAbraham, uIsake noYakobi bafayo, uYesu wabakhankanya waza wathi: “[UYehova] akangoThixo wabafileyo, kodwa ngowabaphilayo.” (Luka 20:37, 38) Oosolusapho ababini abathembekileyo babefile, kodwa uThixo wayeqinisekile ngenjongo yakhe yokubavusa ukuba iya kuzaliseka, kangangokuba kuye babefana nabaphilayo. Ukubuyisela aba bakhonzi bathembekileyo bakudala ebomini kuyafana kuYehova nokudala kwakhe indoda yokuqala ngothuli lomhlaba.—Genesis 2:7.

Umpostile uPawulos unikela omnye umzekelo ongqina ukuba uThixo uyazizalisekisa iinjongo zakhe. KwiZibhalo, uAbraham ubizwa ngokuthi “uyise weentlanga ezininzi.” (Roma 4:16, 17) Nakuba uAbram wayengenabantwana, uYehova waliguqula igama lakhe languAbraham, elithetha “uYise Wesihlwele (Wendimbane).” UYehova wenza intsingiselo yelo gama ifezeke ngokuthi ngommangaliso abuyisele amandla okuvelisa inzala ka-Abraham okhulileyo nomfazi wakhe owalupheleyo, uSara.—Hebhere 11:11, 12.

Ngenxa yokuba enikwe amandla negunya, uYesu Kristu wathetha ngeziganeko zokwenene ngembono ephakamileyo kweyabantu. Nangona umhlobo wakhe osenyongweni uLazaro wayefile, uYesu waxelela abalandeli bakhe esithi: “ULazaro umhlobo wethu uye kuphumla, kodwa ndiyahamba ndiya apho ukuze ndimvuse ebuthongweni.” (Yohane 11:11) Kwakutheni ukuze uYesu athethe ngomntu ofileyo njengoleleyo?

Xa uYesu wafika kwidolophu yakuloLazaro iBhetani, waya engcwabeni waza wayalela ukuba ilitye elalivale ingcwaba lisuswe. Emva kokuthandaza ngokuvakalayo, wathi: “Lazaro, phuma!” Yaye babebukele abo babelapho, “waphuma umntu lowo obefile, iinyawo nezandla zakhe zibotshwe ngezithandelo, nobuso bakhe busongelwe ngelaphu.” Wandula ke uYesu wathi: “Mkhululeni nize nimyeke ahambe.” (Yohane 11:43, 44) UYesu wavusa uLazaro—ebuyisela ubomi kumntu owayesele efe iintsuku ezine! UKristu wayengaxoki xa wayesithi umhlobo wakhe wayelele. Ngokwembono kaYehova noYesu, uLazaro wayefana nokungathi ulele nje. Ewe, uYesu noYise osezulwini basingatha iingxaki zokwenene.

UYehova Unokwenza Amathemba Ethu Azaliseke

Hayi umahluko okhoyo phakathi kwezithixo ezikhohlisayo noThixo wokwenene! Ngokuphosakeleyo abanquli bezithixo bathi izinto abazinqulayo zinamandla angaphezu kwawomntu. Noko ke, akukho senzo sonqulo esinokubangela ukuba ezi zithixo zibe namandla angummangaliso. Kwelinye icala, uYehova uThixo unokutsho ngokufanelekileyo ukuba abakhonzi bakhe abafa kudala bayaphila, kuba unokubanika ubomi kwakhona. “UYehova enyanisweni nguThixo,” yaye akasoze abakhohlise abantu bakhe.—Yeremiya 10:10.

Hayi indlela ekuthuthuzela ngayo ukwazi ukuba ngexesha likaYehova elifanelekileyo, abafileyo abakwinkumbulo yakhe baya kuvuswa—babuyiselwe ebomini! (IZenzo 24:15) Ewe, ukuvuswa kuquka ukubuyisela indlela yokuphila yaloo mntu. Ukukhumbula indlela yokuphila yabantu abafileyo nokubavusa akuyongxaki kuMdali, onobulumko namandla angenasiphelo. (Yobhi 12:13; Isaya 40:26) Ekubeni uYehova ebalasele ngothando, uya kusebenzisa inkumbulo yakhe efezekileyo ukubuyisela abafileyo ebomini emhlabeni oyiparadesi benobuntu ababenabo ngaphambili.—1 Yohane 4:8.

Njengoko isiphelo sehlabathi likaSathana sisemnyango, ngokuqinisekileyo ikamva liqaqambile kwabo bakholose ngoThixo oyinyaniso. (IMizekeliso 2:21, 22; Daniyeli 2:44; 1 Yohane 5:19) Umdumisi uyasiqinisekisa esithi: “Kusele ithutyana, angabikho ongendawo; . . . kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.” (INdumiso 37:10, 11) Ulwaphulo-mthetho nogonyamelo ziya kuba zizinto zezolo. Kuya kubakho okusesikweni, yaye iingxaki zoqoqosho ziya kuba zingasekho. (INdumiso 37:6; 72:12, 13; Isaya 65:21-23) Yonke imizila yocalucalulo lwasekuhlaleni, lweentlanga, lwezizwe iya kutshayelwa. (IZenzo 10:34, 35) Iimfazwe nezixhobo zokulwa ziya kupheliswa. (INdumiso 46:9) Ngelo xesha “akakho ummi wakhona oya kuthi: ‘Ndiyagula.’” (Isaya 33:24) Wonke umntu uya kunandipha impilo efezekileyo engumqabaqaba. (ISityhilelo 21:3, 4) Kungekudala iya kubakho ngokwenene iparadesi emhlabeni. Yinjongo kaYehova leyo!

Ewe, kungekudala onke amathemba asekelwe eBhayibhileni aya kuzalisekiswa. Kutheni sifanele sizivumele sikhohliswe ngoko kunqulwa leli hlabathi xa sinokukholosa ngokupheleleyo ngoYehova? Uthanda ukuba “zonke iintlobo zabantu zisindiswe zize zifikelele elwazini oluchanileyo lwenyaniso.” (1 Timoti 2:3, 4) Kunokuba sichithe ixesha nobuncwane bethu kwiinkolelo eziyinkohliso zale nkqubo yezinto noothixo bayo, masikhule elwazini lukaThixo wokwenene size sikholose ngaye ngayo yonke intliziyo yethu.—IMizekeliso 3:1-6; Yohane 17:3.

[Umfanekiso okwiphepha 6]

Ngokwembono kaYehova noYesu, uLazaro wayelele

[Imifanekiso ekwiphepha 7]

Kungekudala kuya kubakho iparadesi emhlabeni