Abafundisi BeLizwi LikaThixo Babongozwa Ukuba Bafeze Uthumo Lwabo

KWIINYANGA zakutshanje amakhulu amawaka abafundisi aye ahlanganisana ukuze afundiswe. Ukususela ngoMeyi odluleyo, ahlanganisana kwiiNdibano ZeSithili ezingamakhulu ‘Zabafundisi BeLizwi LikaThixo’ zamaNgqina kaYehova emhlabeni wonke. Ababezile babongozwa ukuba bazifundise, ukuze bafaneleke nangakumbi, baze bafeze uthumo lwabo njengabafundisi.

Ngaba uye waya kwenye yezi ndibano? Ukuba kunjalo, alithandabuzeki elokuba uye wakuxabisa ukutya kokomoya okwalungiselelwa kwezi ndibano zokunqula uThixo wenyaniso, uYehova. Ngoku makhe senze impinda ngocwangciso olufundisayo lwale ndibano.

Usuku Lokuqala—IZibhalo Ezingcwele Ziyingenelo Ekufundiseni

Usihlalo wendibano wabamkela ngokufudumeleyo abo babelapho ngentetho ethi, “Yamkelani Umyalelo, Nina Bafundisi BeLizwi LikaThixo.” Ngokufunda kuYehova, “umYaleli Ozukileyo,” uYesu Kristu waba nguMfundisi Omkhulu. (Isaya 30:20; Mateyu 19:16) Ukuba sifuna ukwenza inkqubela njengabafundisi beLizwi likaThixo, nathi simele sifundiswe nguYehova.

Kwandula ke kwalandela inxalanye ethi, “Ukufundisa NgoBukumkani Kuvelisa Isiqhamo Esihle.” Uvuyo neentsikelelo zokwenza abafundi zabalaseliswa ngokuba nodliwano-ndlebe nabafundisi beLizwi likaThixo abanamava.

Kwalandela intetho ekhuthazayo enomxholo othi, “Ukuchukunyiswa ‘Zizinto Zobungangamela ZikaThixo.’” Ngenkulungwane yokuqala, “izinto zobungangamela” ezibandakanya uBukumkani bukaThixo zashukumisela abantu ukuba bathabathe amanyathelo. (IZenzo 2:11) Nathi sinokushukumisela abantu ukuba benze okufanayo ngokuvakalisa “izinto zobungangamela” ezinjalo njengeemfundiso zeZibhalo ezingentlawulelo, uvuko nomnqophiso omtsha.

Intetho elandelayo yabakhuthaza bonke isithi, “Yoliswa Bubulungisa BukaYehova.” (INdumiso 35:27) Siyancedwa ukuba sihlakulele ubulungisa ngokufunda ukuthanda oko kulungileyo size sithiye okubi, ngokufundisisa iBhayibhile, ngokuxhathisa ngamandla iimpembelelo eziyingozi ngokomoya nokuhlakulela ukuthobeka. Amanyathelo anjalo aya kusinceda sikhuseleke kunxulumano olubi, kwimilinganiselo yehlabathi yezinto eziphathekayo nakukuzonwabisa ngokuziphatha okubi nogonyamelo.

Intetho engumxholo ethi, “Sixhotyiswe Ngokupheleleyo Njengabafundi BeLizwi LikaThixo,” iye yasikhumbuza ukuba uYehova usenza abalungiseleli bakhe abafanelekileyo ngeLizwi lakhe, umoya wakhe oyingcwele nentlangano yakhe esemhlabeni. Ngokuphathelele ukusebenzisa iLizwi likaThixo, isithethi sasibongoza sisithi: “Usukelo lwethu kukuwenza uphile umbandela oseBhayibhileni ukuze ufikelele iintliziyo zabaphulaphuli.”

Ungcelele lokuqala lweentetho lwale ndibano lwalunomxholo othi, “Ukuzifundisa Thina Ngoxa Sifundisa Abanye.” Inxalenye yokuqala yabethelela ukuba sifanele sigcine umlinganiselo ophakamileyo ofanayo wokuziphatha komKristu esiwufundisa abanye. Inxalenye elandelayo iye yasibongoza ukuba ‘siliphathe ngokufanelekileyo ilizwi lenyaniso.’ (2 Timoti 2:15) Ufundisiso lobuqu lweBhayibhile oluthe rhoqo nolwenziwa ngenkuthalo lubalulekile ukuze sizifundise, kungakhathaliseki ukuba sinexesha elingakanani na sikhonza uThixo. Inxalenye yokugqibela yolu ngcelele ibonise ukuba uMtyholi usibukele, ukhangela isimo sengqondo esinjengekratshi, umoya wokuzimela-geqe, ukuzicingela ukuba sibalulekile, umona, intiyo, ubukrakra, ingqumbo nokuhlab’ amadlala. Noko ke, ukuba simchasa ngamandla uMtyholi, uya kusibaleka. Ukuze simchase, sifanele sisondele kuThixo.— Yakobi 4:7, 8.

Intetho efike ngexesha ethi, “Menyanyeni Ubhubhani Wehlabathi Wokubukela Amanyala” isibonise indlela yokuhlabangezana nesisongelo esithob’ isidima kwimeko yethu yokomoya. Umprofeti uHabhakuki wathi ngoYehova: “Usulungeke kakhulu emehlweni ukuba ungabona okubi; yaye akukwazi ukukhangela inkathazo.” (Habhakuki 1:13) Sifanele ‘sikwenyanye oko kungendawo.’ (Roma 12:9) Abazali babongozwe ukuba bayibek’ esweni indlela abantwana babo abayisebenzisa ngayo i-Internet noko bakubukelayo kumabonwakude. Isithethi sathi, abo batsaleleka kwimifanekiso engamanyala, bafanele bafumane uncedo kumhlobo oqolileyo ngokomoya. Kuya kuba luncedo ukucamngca nokukhumbula iZibhalo ezifana neNdumiso 97:10; Mateyu 5:28; 1 Korinte 9:27; Efese 5:3, 12; Kolose 3:5; neyoku-1 kwabaseTesalonika 4:4, 5.

Intetho elandelayo ethi, “Vumelani Uxolo LukaThixo Lunilinde,” yasikhuthaza ngokusiqinisekisa ukuba xa sixhalabile, sinokulahlela umthwalo wethu kuYehova. (INdumiso 55:22) Ukuba sizityand’ igila ngomthandazo, uYehova uya kusinika “uxolo lukaThixo,” ukuzola noxolo lwangaphakathi olubangelwa lulwalamano lwethu oluxabisekileyo naye.—Filipi 4:6, 7.

Usuku lokuqala lwaphela kakuhle ngentetho ethi, “UYehova Uhombisa Abantu Bakhe Ngokukhanya,” eyacacisa ukuzaliseka kukaIsaya isahluko 60. Phakathi kobumnyama obukhoyo behlabathi, “abasemzini”—isihlwele esikhulu esisekukhanyeni sabanjengezimvu—banandipha ukukhanya kukaYehova kwakunye namaKristu athanjisiweyo. Xa sibhekisela kwindinyana 19 neyama-20, isithethi sacacisa: “UYehova akayi ‘kutshona’ njengelanga okanye ‘afe’ njengenyanga. Uya kuqhubeka ebahombisa abantu bakhe ngokubakhanyisela. Hayi indlela okusikhuthaza ngayo oko njengoko siphila kwimihla yokugqibela yeli hlabathi lobumnyama!” Ekupheleni kwale ntetho, isithethi savakalisa ukukhululwa kwencwadi ethi Isiprofeto SikaIsaya—Ukhanyiselo Lwalo Lonke Uluntu, uMqulu Wesibini. Ngaba sele ugqibile ukuyifunda le mpapasho intsha?

Usuku Lwesibini—Nikufanelekele Ukufundisa Abanye

Emva kokuxutyushwa kwetekisi yosuku kusuku lwesibini, saphulaphula ngenyameko ungcelele lweentetho olunomxholo othi, “Abalungiseleli Ekuthi Ngenxa Yabo Abanye Babe Ngamakholwa.” Izithethi kwezi nxalenye zintathu zolu ngcelele zabalaselisa amanqanaba amathathu abandakanyekileyo ekuncedeni abantu babe ngamakholwa—ukusasaza isigidimi soBukumkani, ukuhlakulela umdla ofunyenweyo, nokufundisa abanomdla ukuze bagcine oko uKristu akuyaleleyo. Ngoncedo lodliwano-ndlebe nemiboniso, sakwazi ukubona ngokungqalileyo indlela esinokufundisa ngayo abanye babe ngabafundi.

Inxalenye elandelayo yayinomxholo othi, “Yongezelelani Uzinikelo Lobuthixo Ekunyamezeleni Kwenu.” Isithethi sabonisa ukuba eyona nto ibalulekileyo ‘kukunyamezela kude kube sekupheleni.’ (Mateyu 24:13) Sifanele sisebenzise onke amalungiselelo kaThixo—umthandazo, ufundisiso lobuqu, iintlanganiso nobulungiseleli—ukuze sihlakulele uzinikelo lobuthixo. Sifanele sithintele iminqweno yehlabathi nemisebenzi yalo ukuze ingasiphembeleli okanye itshabalalise uzinikelo lwethu lobuthixo.

Banokukufumana njani ukuhlaziyeka abantu ababulalekayo nabasindwa ngumthwalo namhlanje? Intetho ethi “Ukuhlaziyeka Ngaphantsi Kwedyokhwe KaKristu” yawuphendula loo mbuzo. Ngobubele uYesu wamema abalandeli bakhe ukuba bangene ngaphantsi kwedyokhwe yakhe baze bafunde kuye. (Mateyu 11:28-30) Sisenokungena ngaphantsi kwedyokhwe kaYesu ngokulandela ngenyameko umzekelo wakhe wokuphila ubomi obulula nobulungeleleneyo. Iingongoma ezibalulekileyo kule ntetho zaveliswa ngodliwano-ndlebe nabo baye babenza lula ubomi babo.

Enye yezona zinto zibalulekileyo kwiindibano zethu ezinkulu zamaNgqina kaYehova kukubhaptizwa kwabakhonzi bakaThixo abasandul’ ukuzahlulela. Umzalwana owayenikela le ntetho ethi “Ubhaptizo Lukhokelela Kumalungelo Amakhulu Okufundisa” ngokufudumeleyo wamkela ababeza kubhaptizwa waza wabamema ukuba babe nesabelo kumalungiselelo amakhulu enkonzo. Abafundisi abasandul’ ukubhaptizwa beLizwi likaThixo abafanelekileyo ngokweZibhalo banokuzabalazela ukufumana iimbopheleleko ezahlukahlukeneyo ebandleni.

Umxholo wentetho yokuqala ngaloo mvakwemini wawusithi: “Xelisa Umfundisi Omkhulu.” Kangangamawaka eminyaka eyadlulayo ezulwini, ngenyameko uYesu wabukela waza waxelisa uYise, ngaloo ndlela esiba nguMfundisi Omkhulu. Ngoxa wayesemhlabeni, wasebenzisa iindlela eziluncedo zokufundisa, njengemibuzo echukumisayo nemizekeliso elula kodwa ecacileyo. UYesu wasekela imfundiso yakhe kwiLizwi likaThixo yaye wayethetha ngenzondelelo, ngobubele nangegunya. Ngaba asizange sishukunyiswele ekubeni sixelise uMfundisi Omkhulu?

Enye intetho echukumis’ intliziyo yayisithi, “Ngaba Ukulungele Ukukhonza Abanye?,” yaye yasikhuthaza ukuba sixelise umzekelo kaYesu ekukhonzeni abanye. (Yohane 13:12-15) Isithethi sawabongoza ngokungqalileyo amadoda afanelekileyo ukuba abe njengoTimoti ekusebenziseni amathuba okunceda abanye. (Filipi 2:20, 21) Abazali bakhuthazwa ukuba baxelise uElikana noHana ekuncedeni abantwana babo ukuba basukele ubulungiseleli bexesha elizeleyo. Yaye abaselula babongozwa ukuba baxelise umzekelo kaYesu Kristu noTimoti oselula ngokuzinikela ngokuzithandela. (1 Petros 2:21) Kwakhona sashukunyiswa ngamazwi abo baye baxhakamfula amathuba okukhonza abanye.

Umxholo wongcelele lweentetho lwesithathu wawusithi, “Ngenelwa Ngokuzele Ngakumbi Kwimfundiso Yobuthixo.” Isithethi sokuqala sagxininisa ukubaluleka kokwandisa amandla ethu okunikela ingqalelo. Ukuze silufikelele olo sukelo, sinokuqalisa ngokuba namathuba amafutshane ofundisiso lobuqu size sizame ukuwandisa. Kwakhona sakhuthaza abaphulaphuli ukuba bajonge imibhalo baze bathabathe amanqaku ebudeni beentlanganiso. Isithethi sesibini sasilumkisa ngemfuneko yokubambelela ‘kumazwi aphilileyo.’ (2 Timoti 1:13, 14) Ukuze siphephe ukubukela imifanekiso engcolileyo ekumabonwakude, siphulaphule iingcamango zabantu, uhlalutyo oluqatha nemfundiso yabawexuki, sifanele sithengisise ixesha lofundisiso lobuqu nelokuya kwiintlanganiso. (Efese 5:15, 16) Isithethi sokugqibela solu ngcelele sabalaselisa imfuneko yokusebenzisa izinto esizifundileyo ukuze singenelwe ngokupheleleyo kwimfundiso yobuthixo.—Filipi 4:9.

Hayi indlela esavuya ngayo ukuva intetho ethi “Amalungiselelo Amatsha Okusinceda Sihambele Phambili Ngokomoya”! Savuya ukuva ukuba incwadi entsha enomxholo othi Zuza Iingenelo Kwimfundo Yesikolo Sobulungiseleli Sobuthixo iza kupapashwa kungekudala. Sakhangela phambili ekufumaneni le ncwadi njengoko isithethi sanikela ulwandlalo lweziqulatho zayo. Ngokuphathelele icandelo lale ncwadi eliqulethe iingongoma zesiluleko, sathi: “Kule ncwadi intsha akusetyenziswanga zimbo zakubhala zabantu xa kuchazwa ezi nkalo zingama-53 zokufunda, ukuthetha nokufundisa kakuhle. Indlela ebhalwe ngayo isekelwe kwimigaqo yeZibhalo.” Le ncwadi iya kubonisa indlela abaprofeti, uYesu nabafundi bakhe ababonisa ngayo ubuchule bokufundisa. Ewe, le ncwadi neenkalo ezintsha zeSikolo Sobulungiseleli Sobuthixo ziya kusinceda sibe ngabafundisi abanobuchule ngakumbi beLizwi likaThixo.

Usuku Lwesithathu—Yibani Ngabafundisi Ngenxa Yexesha

Emva kokuxubusha itekisi yosuku ngosuku lokugqibela, bonke baphulaphula ngenyameko kungcelele lokugqibela lweentetho oluthi, “Isiprofeto SikaMalaki Sisilungiselela Imini kaYehova.” UMalaki waprofeta malunga neminyaka elikhulu emva kokuba amaYuda abuyayo evela eBhabhiloni. Kwakhona ayephambukele kuwexuko nobubi, egculela igama likaYehova ngokutyeshela imithetho yakhe elungileyo nangokuzisa izilwanyana ezimfamekileyo, eziqhwalelayo nezigulayo njengombingelelo. Ngaphezu koko, ayeqhawula imitshato nabafazi bobutsha bawo, mhlawumbi etshata nabafazi abangabahedeni.

Isahluko sokuqala kwisiprofeto sikaMalaki sisiqinisekisa ngothando lukaYehova ngabantu bakhe. Sibalaselisa imfuneko yokumoyika ngentlonelo uThixo nokuba noxabiso ngezinto ezingcwele. UYehova ulindele ukuba simnike konke okusemandleni ethu, simkhonze ngothando lokungazingci. Inkonzo yethu engcwele ayifanele ibe kukudlulisa usana kunina, yaye simele siphendule kuThixo.

Sithetha ngesahluko sesibini sikaMalaki kumhla wethu, isithethi sesibini songcelele lweentetho sabuza: “Ngaba thina ngokobuqu sikulumkele ukuba ‘kungafumaneki ntswela-bulungisa emilebeni yethu’?” (Malaki 2:6) Abo bakhokelayo ekufundiseni bafanele baqiniseke ukuba oko bakuthethayo kusekelwe ngokupheleleyo kwiLizwi likaThixo. Sifanele sibuthiye ubuqhophololo obunjengokuqhawula umtshato ngokungekho sikweni.—Malaki 2:14-16.

Xa sasithetha ngomxholo othi, “Ngoobani Abaya Kusinda Ngemini KaYehova?” isithethi sokugqibela solu ngcelele sasinceda ukuba silungiselele imini kaYehova. Esi sithethi sathi: “Hayi indlela okubakhuthaza ngayo abakhonzi bakaYehova ukwazi ukuba uMalaki isahluko 3, indinyana 17, uzaliseka kubo ngokuyintloko! Yena uthi: ‘“Ngokuqinisekileyo baya kuba ngabam,” utsho uYehova wemikhosi, “ngemini yokuvelisa kwam inqobo. Kwaye ndiza kubabonisa imfesane, kanye njengomntu obonisa imfesane kunyana wakhe omkhonzayo.”’”

Enye into eye yabalasela kwindibano ibingumdlalo owawunabadlali ababenxibe isinxibo samandulo nesale mihla othi, “Lihlonele Igunya LikaYehova,” owawubalaselisa oonyana bakaKora. Phezu kwaso nje isimo sengqondo sikayise sokuvukela uMoses noAron, bahlala bethembekile kuYehova nakubameli bakhe. Nangona uKora nabalandeli bakhe batshabalala, oonyana bakaKora basinda. Intetho elandelayo ethi, “Lithobele Ngokuthembeka Igunya LikaThixo,” yasebenzisa umongo womdlalo kuthi ngabanye. Isithethi salumkisa ngeenkalo ezintandathu apho uKora nabalandeli bakhe basilela khona: ukungalixhasi ngokuthembeka igunya likaYehova; ukuvumela ikratshi, amabhongo, nomona uboyise; ukunikela ingqalelo kukungafezeki kwabo banyulwa nguYehova; ukuba nesimo sengqondo sokukhalaza; ukunganeliseki ngamalungelo enkonzo; nokuvumela abahlobo nentsapho ize kuqala kunokuthembeka kuYehova.

“Ngoobani Abafundisa Zonke Iintlanga Inyaniso?,” lowo yayingumxholo wentetho yesidlangalala. Inyaniso eyayixutyushwa yayingeyonyaniso nje eqhelekileyo, kodwa yinyaniso ngenjongo kaYehova uYesu Kristu awanikela ubungqina ngayo. Isithethi sathetha ngenyaniso ehlobene neenkolelo, inyaniso engendlela yonqulo, nenyaniso ngokuphathelele ihambo yomntu. Ngokuthelekisa amaKristu enkulungwane yokuqala namaNgqina kaYehova namhlanje, ukweyiseka kwethu ukuba ‘uThixo uphakathi kwethu’ komelezwa ngokwenene.—1 Korinte 14:25.

Emva koshwankathelo lwenqaku elifundisiswayo leMboniselo laloo veki, bonke abafundisi belizwi likaThixo ababekho bashukunyiselwa ukuba bathabathe amanyathelo ngentetho yokuqukumbela ethi, “Ukuphumeza Ngongxamiseko Uthumo Lwethu Lokufundisa.” Kwenziwa impinda emfutshane yocwangciso eyagxininisa ukubaluleka kokusebenzisa iZibhalo ekufundiseni, iindlela esinokuba ngabafundisi abafanelekileyo ngazo, nemfuneko yokuba nentembelo ngenyaniso esiyifundisa abanye. Isithethi sasiluleka ukuba ‘ukuhambela kwethu phambili kubonakale’ size ‘sizilumkele thina nemfundiso yethu.’—1 Timoti 4:15, 16.

Hayi indlela esasinandipha ngayo isidlo sokomoya kwiNdibano YeSithili ‘Yabafundisi BeLizwi LikaThixo!’ Ngamana singaxelisa uMyaleli wethu Ozukileyo, uYehova, noMfundisi Omkhulu, uYesu Kristu, ekufundiseni abanye ilizwi likaThixo.

[Ibhokisi/Imifanekiso ekwiphepha 28]

Iimpapasho Ezintsha Ukuze Kufikelelwe Iimfuno Ezikhethekileyo

Ababeze kwiNdibano YeSithili ‘Yabafundisi BeLizwi LikaThixo’ bezaliswe luvuyo bafumana iimpapasho ezimbini eziza kuba luncedo kakhulu ekufundiseni iinyaniso zeZibhalo kubantu abakwiindawo ezithile emhlabeni. Iphecana elinomxholo othi Ngaba Unomoya Ongafiyo? liya kuba sisixhobo esiluncedo ekuqaliseni incoko nabo bahlala kumazwe apho iilwimi zasekuhlaleni zingawubonisiyo umahluko phakathi “komphefumlo” “nomoya.” Eli phecana litsha libonisa ngokucacileyo ukuba amandla okomoya ahlukile kwisidalwa somoya yaye abantu abaguquki babe zizidalwa zomoya xa besifa.

Incwadana enemifanekiso ethi A Satisfying Life—How to Attain It yakhululwa ekupheleni kosuku lwesibini lwendibano. Le ncwadana yalungiselelwa injongo yokuqalisa izifundo zeBhayibhile nabo bangaqondiyo ukuba uMdali ungumntu nokuba kukho incwadi ephefumlelweyo. Ngaba uye wakwazi ukusebenzisa ezi mpapasho zintsha kubulungiseleli bakho?

[Imifanekiso ekwiphepha 26]

EMilan, eItali, nakwiindibano ezisehlabathini lonke kwabhaptizwa abangamakhulu

[Umfanekiso okwiphepha 29]

Ababephulaphule bashukunyiswa ngumdlalo othi “Lihlonele Igunya LikaYehova”