Hlalani Niphaphile, Qhubelani Phambili Ngenkalipho!

Ingxelo Yeentlanganiso Ezikhethekileyo

NGUBANI onokuyikhanyela into yokuba siphila ‘kumaxesha amanqam ekunzima ukujamelana nawo.’? NjengamaNgqina kaYehova, asigonywanga kwiingcinezelo zokuphila ‘kwimihla yokugqibela.’ (2 Timoti 3:1-5) Kodwa siyaqonda ukuba abantu bafuna uncedo. Abakuqondi oko kuthethwa ziziganeko zehlabathi. Bafuna intuthuzelo nethemba. Ngokuyintloko, yiyiphi indima yethu ekuncedeni abamelwane bethu?

Sinothumo esilunikwe nguThixo lokuvakalisa iindaba ezilungileyo zoBukumkani bukaThixo obumiselweyo. (Mateyu 24:14) Abantu bamele bazi ukuba obu Bukumkani basezulwini bukuphela kwethemba loluntu. Noko ke, isigidimi sethu asisoloko sisamkeleka. Kwezinye iindawo umsebenzi wethu uye wavalwa yaye abazalwana bethu baye batshutshiswa. Sekunjalo asinikezeli. Sithembele ngokupheleleyo kuYehova, sizimisele ukuhlala siphaphile nokuqhubela phambili ngenkalipho, sivakalisa iindaba ezilungileyo ngaphandle kokuyekelela.—IZenzo 5:42.

Ukuzimisela okunjalo kwabonakala kwiintlanganiso ezikhethekileyo ezazingo-Oktobha 2001. NgoMgqibelo, Oktobha 6, intlanganiso yonyaka yeWatch Tower Bible and Tract Society of Pennsylvania yaqhutyelwa kwisiXeko saseJersey, eNew Jersey, kwiHolo YeNdibano yamaNgqina kaYehova eUnited States.a Ngemini elandelayo, iintlanganiso ezongezelelekileyo zaqhutywa kwiindawo ezine, ezintathu eUnited States nenye eKhanada.b

Kumagqabaza akhe okuvula le ntlanganiso yonyaka, usihlalo, uSamuel F. Herd, ilungu leQumrhu Elilawulayo lamaNgqina kaYehova, wabhekisela kwiNdumiso 92:1, 4 waza wathi: “Sifuna ukuzingqina sinombulelo.” Enyanisweni, zachazwa izizathu zokuba nombulelo kwiingxelo ezintlanu ezivela ehlabathini lonke.

Iingxelo Ezivela Kwiindawo Ezikude

UMzalwan’ uAlfred Kwakye wanikela ingxelo ngenkqubela yomsebenzi wokushumayela eGhana, ngaphambili eyayisaziwa njengeGold Coast. Umsebenzi wethu kwelo lizwe wawuvaliwe kangangeminyaka emininzi. Abantu babebuza: “Kutheni uvaliwe nje? Nenze ntoni?” Oku kwavula ithuba lokunikela ubungqina, watsho njalo uMzalwan’ uKwakye. Ngowe-1991 xa umsebenzi wavulwayo, kwakukho amaNgqina kaYehova angama-34 421 eGhana. NgoAgasti 2001, isimbuku sasingama-68 152—ulwando lwama-98 ekhulwini. Kucetywa ukwakhiwa iHolo YeNdibano enezihlalo ezingama-10 000. Licacile elokuba, abazalwana bethu bokomoya eGhana bayisebenzisa ngokuzeleyo inkululeko yabo yonqulo.

Phezu kwazo nje izidubedube zezobupolitika, abazalwana bethu eIreland bazimisele ukuba nenxaxheba kubulungiseleli, yaye bayahlonelwa ngobundilele babo. I-Ireland inamabandla ali-115 neziphaluka ezi-6, utshilo umlungelelanisi weKomiti Yesebe uPeter Andrews. UMzalwan’ uAndrews wabalisa amava kaLiam, inkwenkwe eneminyaka elishumi ubudala enikela ubungqina ngenkalipho esikolweni. ULiam wahambisa Incwadi Yam Yamabali EBhayibhile, epapashwe ngamaNgqina kaYehova, kwabangama-25 afunda nabo kwanakumfundisi-ntsapho wakhe. ULiam wafuna ukubhaptizwa, kodwa mntu uthile wayevakalelwa kukuba usemncinane gqitha. ULiam waphendula wathi: “Eyona nto ibalulekileyo asiyominyaka yam kodwa luthando ngoYehova. Ukubhaptizwa kwam kuya kubonisa indlela endimthanda ngayo.” Usukelo lukaLiam kukuba ngumvangeli wasemazweni.

Ngowe-1968 babengama-5 400 abavakalisi beendaba ezilungileyo eVenezuela. Kodwa ngoku bangaphezu kwama-88 000, utshilo uStefan Johansson, umlungelelanisi weKomiti Yesebe. Yaye kusenokwenzeka ukuba kubekho ulwando olungakumbi ngenxa yokuba abangaphezu kwama-296 000 babekho kwiSikhumbuzo sowe-2001. NgoDisemba 1999, izikhukula zabangela iimpuphuma zodaka ezabulala abantu abaqikelelwa kuma-50 000, kuquka namaNgqina aliqela. Enye iHolo yoBukumkani yayizaliswe ludaka kangangeemitha ezintlanu ukuya kutsho eluphahleni. Xa omnye umntu wacebisa ukuba singasetyenziswa eso sakhiwo, abazalwana bathi: “Unotshe! Le yiHolo yethu yoBukumkani, kwaye asinakuyishiya ngoku.” Baqalisa ukusebenza apho bekhupha iitoni zodaka, amatye nenye ingqushu. Esi sakhiwo saphinda senziwa ngokutsha yaye abazalwana bathi intle ngakumbi ngoku kunokuba yayinjalo ngaphambi kwentlekele!

Kukho iilwimi neziyelelane ezingama-87 ezithethwa kwiiPhilippines, watsho njalo uMzalwan’ uDenton Hopkinson, umlungelelalinisi weKomiti Yesebe. Kunyaka odluleyo wenkonzo, INguqulelo Yehlabathi Elitsha YeZibhalo Ezingcwele epheleleyo yakhululwa ngeelwimi eziphambili ezintathu zelo lizwe—isiCebuano, isi-Iloko nesiTagalog. UMzalwan’ uHopkinson wabalisa amava enkwenkwe eneminyaka esithoba ubudala eyafunda incwadi ethi Iindaba Ezilungileyo—Zokonwabisa Wena, epapashwe ngamaNgqina kaYehova. Yafumana nezinye iincwadi kwisebe, eyathi yazifunda nazo, kodwa intsapho yakowayo yayichasa. Kwiminyaka kamva xa yayikwisikolo sokufundela ubugqirha, yaqhagamshelana nesebe yaza yacela isifundo seBhayibhile. Yabhaptizwa ngowe-1996 yaza kungekudala yangenelela ubulungiseleli bexesha elizeleyo. Ngoku ikhonza nomfazi wayo kwiofisi yesebe.

‘IPuerto Rico “ithumela amaNgqina kumazwe angaphandle,”’ watsho njalo umlungelelanisi weKomiti Yesebe uRonald Parkin. Kukho malunga nabavakalisi abangama-25 000 kweso siqithi, yaye elo nani liye lahlala linjalo kangangeminyaka. Ngoba? Kaloku kuqikelelwa ukuba iPuerto Rico “ithumela” abavakalisi abamalunga ne-1 000 ngonyaka eUnited States, uninzi lwabo lusimka ngenxa yezizathu zezoqoqosho. Umzalwan’ uParkin wabalisa ngesigqibo senkundla esingenakulibaleka esibandakanya uLuis, iNgqina elineminyaka eli-17 elalinesifo seleukemia. Ngenxa yokuba uLuis wala ukutofelwa igazi, wasiwa enkundleni. Ijaji yafuna ukuthetha naye ngokuthe ngqo, ngoko yamtyelela esibhedlele. ULuis wayibuza; “Ukuba bendaphule umthetho ngokunzulu, ubuya kundigweba njengomntu okhulileyo, kodwa xa ndifuna ukuthobela uThixo, kutheni undiphatha njengomntwana?” Ijaji yaqonda ukuba wayengumntwana oqolileyo nokwaziyo ukuzigqibela.

Emva kweengxelo ezivela kumazwe akude, uHarold Corkern, weKomiti Yesebe yaseUnited States, wadlan’ indlebe nabakhonzi bakaYehova abane abangamagqala. UArthur Bonno uchithe iminyaka engama-51 ekwinkonzo yexesha elizeleyo yaye ngoku ukhonza kwiKomiti Yesebe yase-Ecuador. UAngelo Catanzaro uchithe iminyaka engama-59 ekwinkonzo yexesha elizeleyo, uninzi lwaloo minyaka engumveleli ohambahambayo. URichard Abrahamson waphumelela kwiSikolo saseGiliyadi ngowe-1953, yaye wafumana ilungelo lokuvelela umsebenzi eDenmark kangangeminyaka engama-26 ngaphambi kokuba abuyele kwiBheteli yaseBrooklyn. Ekugqibeleni, bonke bavuyiswa kukuphulaphula uCarey W. Barber oneminyaka engama-96 ubudala. Njengoko wabhaptizwa ngowe-1921, uMzalwan’ uBarber uchithe iminyaka engama-78 kubulungiseleli bexesha elizeleyo yaye ebelilungu leQumrhu Elilawulayo ukususela ngowe-1978.

Iintetho Ezikhuthazayo

Intlanganiso yonyaka yaquka uthotho lweentetho ezichukumis’ intliziyo. UMzalwan’ uRobert W. Wallen wanikela intetho enomxholo othi “Abantu Begama Lakhe.” Singabantu begama likaThixo yaye sifumaneka kumazwe angaphezu kwangama-230. UYehova usinike “ikamva nethemba.” (Yeremiya 29:11) Simele siqhubeke sivakalisa uBukumkani bukaThixo, sisabelana nabanye ngesigidimi esimangalisayo sentuthuzelo. (Isaya 61:1) UMzalwan’ uWallen waqukumbela ngelithi: “Ngamana mini nganye, singaqhubeka siphila ngokuvisisana negama esibizwa ngalo, amaNgqina kaYehova.”—Isaya 43:10.

Inxalenye yokugqibela yolo cwangciso yayilungcelele lweentetho olwalunikelwa ngamalungu amathathu eQumrhu Elilawulayo. Lwalunomxholo othi: “Ngoku Lixesha Lokuhlala Niphaphile, Nime Niqinile Nize Nomelele.”—1 Korinte 16:13.

Okokuqala, uMzalwan’ uStephen Lett wathetha ngomxholo othi “Hlalani Niphaphile Kweli Lixa.” Ukulala okuqhelekileyo kusisipho, watsho uMzalwan, uLett. Kuyasihlaziya. Noko ke, ukulala ngokomoya akufanelekanga. (1 Tesalonika 5:6) Ngoko ke, sinokuhlala njani sithe qwa ngokomoya? UMzalwan’ uLett wachaza “iipilisi” ezintathu zokomoya: (1) Ukuba nokuninzi kokwenza emsebenzini weNkosi. (1 Korinte 15:58) (2) Ukuyiphaphela intswelo yakho yokomoya. (Mateyu 5:3) (3) Ukuthobela isiluleko esisekelwe eBhayibhileni ukuze wenze ngobulumko.—IMizekeliso 13:20.

UMzalwan’ uTheodore Jaracz wanikela intetho ekhuthazayo ethi “Yomelela Xa Uvavanywa.” Ebhekisela kwiSityhilelo 3:10, uMzalwan’ uJaracz wabuza: “Liliphi ‘ilixa lovavanyo’?” Olo vavanyo lufika ‘ngemini yeNkosi,’ esiphila kuyo ngoku. (ISityhilelo 1:10) Olu vavanyo lusekelwe kwimbambano eyintloko—ngaba simele uBukumkani bukaThixo obumiselweyo okanye inkqubo yezinto engendawo kaSathana? De liphele elo lixa lovavanyo, simele sijamelane nezilingo okanye ubunzima. Ngaba siya kuqhubeka sinyanisekile kuYehova nakwintlangano yakhe? UMzalwan’ uJaracz wathi: ‘Mntu ngamnye kuya kufuneka ukuba abonise ukunyaniseka okulolo hlobo.’

Ekugqibeleni, uMzalwan’ uJohn E. Barr wathetha ngomxholo othi “Yomelela Njengomntu Wokomoya.” Ebhekisela kuLuka 13:23-25, wathi simele sizibhokoxele “ukungena ngomnyango omxinwa.” Abaninzi bayasilela ngenxa yokuba abazimiselanga ngokwaneleyo ukomelela. Ukuze sibe ngamaKristu akhule ngokwaneleyo, kufuneka sifunde ukusebenzisa imigaqo yeBhayibhile kuzo zonke iinkalo zobomi. UMzalwan’ uBarr wabongoza ngelithi: “Ndiqinisekile niya kuvumelana nam kwelokuba ngoku lixesha (1) lokubeka uYehova kuqala; (2) lokomelela; (3) nelokuzibhokoxa ekwenzeni ukuthanda kukaYehova. Ngale ndlela siya kukwazi ukungena ngomnyango omxinwa okhokelela kubomi obumangalisayo obungenasiphelo.”

Njengoko intlanganiso yonyaka yayifikelela esiphelweni, kwakukho umbuzo omnye owawungekaphendulwa: Uthini umxholo wonyaka wama-2002? Loo mbuzo waphendulwa ngemini elandelayo.

Intlanganiso Eyongezelelekileyo

Kwakulindelwe lukhulu ngentsasa yangeCawa njengoko ucwangciso lwentlanganiso eyongezelelekileyo lwaluqalisa. Lwaqalisa ngoshwankathelo lwesifundo seMboniselo saloo veki, olwalandelwa ziimbalasane ezithile zentlanganiso yonyaka. Emva koko, kwavuya wonke umntu esakuva intetho engomxholo wonyaka wama-2002: “Yizani kum, . . . yaye ndiya kunihlaziya.” (Mateyu 11:28) Le ntetho yayisekelwe kumanqaku afundisiswayo awapapashwa kamva kwinkupho yeMboniselo kaDisemba 15, 2001.

Emva koko, ezinye iindwendwe zeeNdibano ezikhethekileyo ‘ZaBafundisi BeLizwi LikaThixo’ eFransi naseItali ngoAgasti 2001 zachaza indlela ezivakalelwa ngayo.c Ekugqibeleni, njengembalasane yocwangciso lwaloo mini, iintetho ezimbini zokugqibela zanikelwa zizithethi ezityeleleyo ezivela kwiBheteli yaseBrooklyn.

Eyokuqala yayinomxholo othi “Ukuthembela Ngenkalipho KuYehova Ngala Maxesha Amanqam.” Isithethi saphuhlisa ezi ngongoma ziphambili: (1) Ukuthembela ngenkalipho kuYehova bekusoloko kuyinto ebalulekileyo kubantu bakaThixo. IBhayibhile inemizekelo emininzi yabo baba nenkalipho nokholo xa babejamelene nenkcaso. (Hebhere 11:1–12:3) (2) UYehova usinika isizathu esibambekayo sokuthembela ngaye ngokupheleleyo. Izinto azenzileyo neLizwi lakhe liyasiqinisekisa ukuba ubakhathalele abakhonzi bakhe yaye akasayi kuze abalibale. (Hebhere 6:10) (3) Inkalipho nentembelo zifuneka ngamandla namhlanje. ‘Sithiyiwe,’ njengoko uYesu waxela kwangaphambili. (Mateyu 24:9) Ukuze sinyamezele, kufuneka sithembele ngeLizwi likaThixo, sinentembelo yokuba umoya wakhe ukunye nathi, sinenkalipho yokuvakalisa iindaba ezilungileyo. (4) Imizekeliso ibonisa ukuba sijamelene nenkcaso ngoku. Bonke bachukumiseka njengoko isithethi sasibalisa ngoko kuye kwanyanyezelwa ngabazalwana bethu eArmenia, eFransi, eGeorgia, eKazakhstan, eRashiya naseTurkmenistan. Enyanisweni ngoku lixesha lokuba nenkalipho nokukholosa ngoYehova!

Isithethi sokugqibela saphuhlisa umxholo othi “Ukuqhubela Phambili Ngomanyano Kunye Nentlangano KaYehova.” Le ntetho yagubungela iinkalo eziliqela ezisexesheni. (1) Ukuqhubela phambili kwabantu bakaYehova kwaziwa ngokubanzi. Umsebenzi wethu wokushumayela neendibano esiba nazo kusenza sijongwe nguwonke-wonke. (2) UYehova uye waseka intlangano emanyeneyo. Ngowama-29 C.E., uYesu wathanjiswa ngomoya oyingcwele ngenjongo yokwenza “zonke izinto”—ezo zinethemba lokuphila ezulwini kwakunye nezo zinethemba lokuphila emhlabeni—zibe yintsapho kaThixo emanyeneyo. (Efese 1:8-10) (3) Iindibano ziyimbonakaliso emangalisayo yomanyano lwezizwe ngezizwe. Oku kwabonakala ngokucacileyo kwiindibano ezikhethekileyo ezaqhutyelwa eFransi naseItali ngoAgasti odluleyo. (4) Kwamkelwa isindululo esichukumisayo eFransi naseItali. Isithethi sacaphula iindawo ezithile zesindululo esichukumisayo. Isindululo esipheleleyo sifumaneka ngezantsi.

Ekuqukunjelweni kwentetho yokugqibela, isithethi esityeleleyo safunda isaziso esichukumisayo esilungiselelwe liQumrhu Elilawulayo. Sathi ngokuyinxenye: “Ngoku lixesha lokuhlala niphaphile nize nilumke, niqonda indlela ezibonakala ngayo iziganeko zehlabathi. . . . Sifuna ukudlulisela le nkxalabo inothando iQumrhu Elilawulayo elinayo ngani nangabo bonke abantu bakaThixo. Ngamana anganisikelela kakhulu njengoko nisenza ukuthanda kwakhe ngomphefumlo uphela.” Abantu bakaYehova kuyo yonke indawo bazimisele ukuhlala bephaphile kula maxesha amanqam nokuqhubela phambili ngenkalipho nentlangano kaYehova emanyeneyo.

[Imibhalo esemazantsi]

[Ibhokisi/Imifanekiso ekwiphepha 29-31]

Isindululo

NgoAgasti 2001, kwaqhutywa iiNdibano ezikhethekileyo ‘ZaBafundisi BeLizwi LikaThixo’ eFransi naseItali. Kwezo ndibano, kwenziwa isindululo esichukumisayo. Nasi eso sindululo.

“NJENGAMANGQINA KAYEHOVA, sonke thina bahlanganisene kule Ndibano ‘YaBafundisi BeLizwi LikaThixo’ siye sanikwa imfundiso eyingenelo gqitha. Umthombo wale mfundiso uchazwe kakuhle. Le mfundiso ayiveli mntwini. Ivela kuLowo uchazwe ngumprofeti wamandulo uIsaya ‘njengomYaleli wethu Ozukileyo.’ (Isaya 30:20) Phawula isikhumbuzo sikaYehova njengoko siboniswe kuIsaya 48:17: ‘Mna, Yehova, ndinguThixo wakho, Lowo ukufundisa okuyingenelo kuwe, Lowo ukubangela unyathele endleleni ofanele uhambe ngayo.’ Ukufeza njani oku? Eyona ndlela iphambili akwenza ngayo oku kungeyona ncwadi iguqulelwe nesasazwe ngokubanzi ehlabathini, iBhayibhile, esixelela oku ngokungqalileyo: ‘Sonke iSibhalo siphefumlelwe nguThixo kwaye siyingenelo.’—2 Timoti 3:16.

“Namhlanje, uluntu luyifuna gqitha loo mfundiso iyingenelo. Kutheni kunokutshiwo nje? Xa bejonga ukutshintsha nokugabadela kweli hlabathi, abantu abanengqiqo babona ntoni? Nantsi into abayibonayo: Nangona izigidi zabantu ziye zanikwa imfundo yeli hlabathi, basilela ngokulusizi kwimilinganiselo yokuziphatha yaye abakwazi ukwahlula phakathi kokubi nokulungileyo. (Isaya 5:20, 21) Abazi nto ngeBhayibhile. Ngoxa ezobugcisa zinikela into eninzi yenkcazelo ngeekhompyutha, ngaba ikho impendulo yemibuzo ebalulekileyo enjengale, Yintoni injongo yobomi? Simele sizijonge njani iziganeko zexesha lethu? Ngaba likho ithemba eliqinisekileyo ngekamva? Ngaba uxolo nonqabiseko luya kuze lubekho? Ukongezelela, imizi yogcino-zincwadi izaliswe zizigidi zeencwadi ezigubungela phantse zonke izinto abantu abanomdla kuzo. Sekunjalo, uluntu luyaziphinda iimpazamo zexa elidluleyo. Ulwaphulo-mthetho luhambela phambili. Izifo ekwakucingwa ukuba zitshayelwe ziyaphinda ziyabuya, ngoxa, ezinye ezifana noGawulayo, zisanda ngendlela emangalisayo. Iintsapho ziqhekeka ngomlinganiselo owothusayo. Ungcoliso lonakalisa imeko-bume. Abanqolobi nezixhobo eziyingozi basongela uxolo nonqabiseko. Iingxaki ezingacombululekiyo ziyaqhubeka zisanda. Thina yiyiphi indima esinayo ekuncedeni abamelwane bethu kula maxesha amanqam? Ngaba ikho imfundiso echaza unobangela wentlungu olukuyo uluntu nengabonisi kuphela indlela eyiyo yobomi kodwa enikela ithemba eliqaqambileyo neliqinisekileyo ngekamva?

“Uthumo lwethu olungokweZibhalo lukukuba ‘sihambe siye kubenza abafundi abantu beentlanga zonke, sibafundise ukuba bazigcine zonke izinto uKristu aziyaleleyo.’ (Mateyu 28:19, 20) Olu thumo lwakhutshwa nguYesu Kristu emva kokufa nokuvuka kwakhe, xa wafumana igunya ezulwini nasemhlabeni. Lodlula nawuphi umsebenzi owakha wenziwa ngabantu. Ngokwembono kaThixo, uthumo lwethu, olugxininisa kwiimfuno zokomoya zabo balambele ubulungisa lukwindawo yokuqala. Sinezizathu ezivakalayo ezingokweZibhalo ezibangela ukuba siwuthabathe nzulu lo msebenzi.

“Oku kubangela ukuba umsebenzi ololo hlobo ube phambili ebomini bethu. Ngentsikelelo noncedo lukaThixo, lo msebenzi uya kwenziwa, phezu kwayo nje inkitha yeziphazamiso, imiqobo nenkcaso evela kunqulo nezobupolitika, eyenzelwe ukutsalela emva inkqubela yale nkqubo yokufundisa yomhlaba wonke. Sinethemba nokholo lokuba lo msebenzi uya kuqhubela phambili uze ufikelele incopho yawo ezukileyo. Sinokuqiniseka njani? Ngenxa yokuba iNkosi uYesu Kristu yathembisa ukuba iya kuba nathi kubulungiseleli esibunikwe nguThixo kude kuse ekuphelisweni kwale nkqubo.

“Ixesha sele lisondele kubantu abaxinezelekileyo. Uthumo lwethu ngoku lumele lufezwe ngaphambi kokuba isiphelo sifike. Ngoko ke, thina njengamaNgqina kaYehova, sigqiba kweli:

“Okokuqala: Njengabalungiseleli abazahluleleyo, sizimisele ukugcina izilangazelelo zethu zoBukumkani kuqala ebomini bethu nokuqhubeka sikhula ngokomoya. Ngenxa yoko, umthandazo wethu uvisisana namazwi eNdumiso 143:10: ‘Ndifundise ukwenza ukuthanda kwakho, kuba wena unguThixo wam.’ Oku kufuna ukuba sibe ngabafundi abazimiseleyo, sizibekele usukelo lokufunda iBhayibhile imihla ngemihla, senze ufundisiso lobuqu nophando. Ukuze senze uhambelo lwethu phambili lubonakale kubantu bonke, siya kwenza nawuphi na umgudu ukulungiselela nokungenelwa ngokupheleleyo kwimfundo yobuthixo efumaneka kwiintlanganiso zebandla, kwiindibano zesiphaluka, nezesithili, ezamazwe nezezizwe ngezizwe.—1 Timoti 4:15; Hebhere 10:23-25.

“Okwesibini: Ukuze sifundiswe nguThixo, siya kuzondla ngokupheleleyo kwitafile yakhe size ngobulumko sithobele isilumkiso seBhayibhile esiphathelele iimfundiso ezilahlekisayo zeedemon. (1 Korinte 10:21; 1 Timoti 4:1) Siya kulumka ngokukhethekileyo ukuze siphephe izinto eziyingozi, kuquka ubuxoki becawa, ukucinga okuphuthileyo, isini esigqwetheke ngokulihlazo, isibetho sezinto ezibonisa amanyala, ukuzonwabisa okuthob’ isidima, nayo nantoni na ‘engavisisaniyo nemfundiso ephilileyo.’ (Roma 1:26, 27; 1 Korinte 3:20; 1 Timoti 6:3; 2 Timoti 1:13) Sibonisa intlonelo ‘ngezipho ezingabantu,’ ezikufanelekelayo ukufundisa oku kunyulu, siya kuyihlonela ngokunyanisekileyo imigudu yazo size sisebenzisane nazo ngentliziyo yethu yonke ekuphakamiseni imilinganiselo ecocekileyo enobulungisa neyokomoya yokuziphatha ekwiLizwi likaThixo.—Efese 4:7, 8, 11, 12; 1 Tesalonika 5:12, 13; Tito 1:9.

“Okwesithathu: Njengabazali abangamaKristu, uzimiselo lwethu olusuka entliziyweni luya kuba kukufundisa abantwana bethu kungekuphela nje ngezwi kodwa nangomzekelo. Eyona nkxalabo yethu iphambili kukubanceda ukususela ebusaneni ‘ukuba bafunde imibhalo engcwele ukuze bafumane ubulumko obusa elusindisweni.’ (2 Timoti 3:15) Siya kukhumbula ukuba ukubakhulisela kwingqeqesho nasekweyiselweni kwengqondo kuYehova kuya kubanika elona thuba lihle lokufumana isithembiso sikaThixo sokuba ‘kuya kulunga kubo baze bahlale ixesha elide emhlabeni.’—Efese 6:1-4.

“Okwesine: Xa sihlangabezana namaxhala neengxaki ezinzima, okokuqala, ‘siya kwazisa izibongozo zethu kuThixo,’ sinesiqinisekiso sokuba ‘uxolo lukaThixo olungaphaya kokuqonda’ luya kusikhusela. (Filipi 4:6, 7) Njengoko siphantsi kwedyokhwe kaKristu, siya kufumana ukuhlaziyeka. Njengoko sisazi ukuba uThixo usikhathalele, asisayi kuthandabuza ukuphosela onke amaxhala ethu kuye.—Mateyu 11:28-30; 1 Petros 5:6, 7.

“Okwesihlanu: Ngelokubonisa umbulelo wethu kuYehova ngelungelo lokuba ngabafundisi beLizwi lakhe, siya kuyihlaziya imigudu esiyenzayo ‘yokuliphatha ngokufanelekileyo ilizwi lakhe lenyaniso’ size ‘sibufeze ngokupheleleyo ubulungiseleli bethu.’ (2 Timoti 2:15; 4:5) Ngenxa yokuba sikuqonda kakuhle oko kubandakanyekileyo, umnqweno wethu osuka entliziyweni kukukhangela abafanelekayo size sihlakulele imbewu etyaliweyo. Ngaphezu koko, siya kuphucula indlela yethu yokufundisa ngokuqhuba izifundo zeBhayibhile zamakhaya ezingakumbi ngokunempumelelo. Oku kuya kusenza senze ngokuvisisana nokuthanda kukaThixo kokuba ‘zonke iintlobo zabantu zisindiswe zize zifikelele elwazini oluchanileyo lwenyaniso.’—1 Timoti 2:3, 4.

“Okwesithandathu: Ukutyhubela inkulungwane edluleyo ukuza kutsho kule, amaNgqina kaYehova kumazwe amaninzi aye achaswa aza atshutshiswa ngeendlela ezahlukeneyo. Kodwa uYehova ungqineke engakuthi. (Roma 8:31) ILizwi lakhe elichanileyo liyasiqinisekisa ukuba ‘akukho sixhobo esiyilwe nxamnye nathi’ esenzelwe ukuphazamisa, ukuthothisa okanye ukuthintela umsebenzi wethu wokushumayela nokufundisa ngoBukumkani esiya kuphumelela. (Isaya 54:17) Enoba kungexesha elilungileyo okanye elineengxaki, asinakuyeka ukuthetha inyaniso. Sizimisele ukuzalisekisa uthumo lwethu lokushumayela nokufundisa ngokungxamisekileyo. (2 Timoti 4:1, 2) Usukelo lwethu lukukuba nesabelo ngokuzeleyo kangangoko kunokwenzeka ekusasazeni iindaba ezilungileyo zoBukumkani bukaThixo kubantu bazo zonke iintlanga. Ngenxa yoko, baya kuqhubeka besiba nethuba lokufunda ngelungiselelo lokufumana ubomi obungunaphakade kwihlabathi elitsha lobulungisa. Njengendimbane emanyeneyo yabafundisi beLizwi likaThixo, sizimisele ukuqhubeka silandela umzekelo woMfundisi Omkhulu, uYesu Kristu, size sibonise iimpawu zakhe zobuthixo. Konke oku siya kukwenza ukuze kuzukiswe kuze kudunyiswe uMyaleli wethu Ozukileyo noMniki-bomi, uYehova uThixo.

“Bonke abakhoyo kule ndibano abasamkelayo esi sindululo, sicela bathi EWE!”

Xa kwabuzwa umbuzo wokugqibela wesi sindululo kubantu abangama-160 000 ababehlanganisene eFransi nabangama-289 000 ababekwiindawo ezisithoba eItali, bathi “Ewe!” ngentswahla enkulu.