Abantu Baneziphene Ezahlukahlukeneyo Emhlabeni Wonke
UCHRISTIAN, ohlala kwilizwe elithile laseAfrika, wagxagxanyiswa ngamajoni awayezama ukumnyanzela ukuba abe lijoni, kodwa wala ngenxa yesazela sakhe esiqeqeshwe ngeBhayibhile. Andula ke loo majoni amsa kwinkampu yawo, yaye emva kokuba ebethwe iintsuku ezine, elinye lawo lamdubula emlenzeni. UChristian wakwazi ukuya esibhedlele, kodwa kwafuneka anqunyulwe umlenze ukususela edolweni. Kwelinye ilizwe laseAfrika, nabantwana abancinane baye banqunyulwa amalungu omzimba ngabavukeli abaxhobileyo. Yaye ukususela eKhambodiya ukuya kuthi ga ngeeBalkans, ukususela eAfghanistan ukusa eAngola, zingakhethi bani, izigcayiseli ziqhubeka zisenzakalisa yaye zibangela iziphene kwabaselula nabakhulileyo.
Kwakhona ezinye izinto ezibangela iziphene ziingozi nezifo, njengesifo seswekile. Neetyhefu ezikwimeko-bume zinokubangela iziphene. Ngokomzekelo, kwiidolophu ezithile ezimelene nesixeko esiseMpuma Yurophu, kuye kwazalwa iqela labantwana elinenye yeengalo engaphelelanga. Banesiqwengana nje esifutshane ngezantsi kwengqiniba. Ubungqina bubonisa ukuba oku kubangelwe kukungcola kwemichiza. Abantu abaninzi basenawo onke amalungu abo omzimba kodwa baneziphene ngenxa yokufa kwamalungu athile emzimbeni okanye enye inkxwaleko. Eneneni, abantu baneziphene ezahlukahlukeneyo emhlabeni wonke.
Enoba zibangelwa yintoni, iziphene zinokunxunguphalisa. UJunior waphulukana nomlenze wasekhohlo eneminyaka engama-20 ubudala. Kamva wathi: “Ndandidandatheke ngeyona ndlela. Ndakhala gqitha xa ndicinga ukuba andisayi kuphinda ndibe nomlenze. Ndandingazi ukuba ndithini. Ndandididekile.” Noko ke, ekuhambeni kwexesha, isimo sengqondo sikaJunior saguquka ngokumangalisayo. Waqalisa ukufundisisa iBhayibhile waza wafunda izinto ezamnceda kungekhona nje kuphela ukuba asingathe le meko, kodwa zamnika nethemba elihle lekamva elonwabisayo apha emhlabeni. Ukuba unesiphene, ngaba ungathanda ukuba nelo themba?
Ukuba kunjalo, nceda ufunde inqaku elilandelayo. Sincomela ukuba ukhangele iZibhalo ezalathiweyo kwiBhayibhile yakho uze uzibonele ngawakho amehlo oko uMdali aza kubenzela kona abo bafunda ngenjongo yakhe baze baphile ngokuvisisana nayo.