Indlela Unyana Awamnceda Ngayo Uyise
UJAMES waseNgilani, osekuqaleni kweminyaka yakhe yama-30 ubudala, uyagula ngengqondo yaye unesifo ekuthiwa yiautism esimbangela afune ukuhlala yedwa nakuba singenzulu kangako. Sekunjalo, kangangeminyaka emininzi ubesiya kwiintlanganiso zamaNgqina kaYehova nonina nodadewabo. Noko ke, uyise akazange abonakalise mdla ungako kwiinkolelo zabo. Ngobunye ubusuku emva kwentlanganiso eyayinomboniso wendlela yokumema umntu omaziyo kwiSikhumbuzo sokufa kukaKristu, ngokukhawuleza uJames waya egumbini lakhe. Enexhala, unina wamlandela waza wamfumana ebhuduzela ehlola iinkupho zakhe ezindala zeMboniselo nezikaVukani! Wakhetha enye enomfanekiso wesimemo seSikhumbuzo kwiphepha elingasemva waza wabaleka waya kuyise. Waqala walatha kumfanekiso wandula walatha kuyise waza wathi “Wena!” Unina noyise bajongana bothukile njengoko beqonda ukuba uJames wayememela uyise kwiSikhumbuzo. Uyise wathi kusenokwenzeka aye.
Ngobusuku beSikhumbuzo, uJames waya kwiwodrophu kayise, wakhetha ibhulukhwe, wayisa kuyise, waza wabonisa ukuba ufanele ayinxibe. Uyise waphendula wathi akayi entlanganisweni. Ngoko ke, uJames nonina bahamba bodwa ukuya kwiHolo yoBukumkani.
Noko ke, kamva, uJames wayengafuni xa unina wayezama ukumlungisa ukuze aye kwiintlanganiso zebandla, ekhetha ukuhlala ekhaya noyise. Ngenye intsasa yangeCawa, kwakhona uJames akazange avume njengoko unina ezama ukumlungiselela iintlanganiso. Wothuka xa uyise kaJames wamjonga waza wathi: “James, ukuba ndiyaya kwiintlanganiso namhlanje, ngaba nawe uza kuya?” Ubuso bukaJames batyhileka. Wamanga uyise waza wathi “Ewe!” yaye bobathathu baya kwiHolo yoBukumkani.
Ukususela ngaloo mini, uyise kaJames waqhubeka esiya kuzo zonke iintlanganiso zangeCawa yaye kungekudala wathi ukuba uza kwenza inkqubela, ufanele aye nakwezinye iintlanganiso. (Hebhere 10:24, 25) Wakwenza oku, yaye kwiinyanga ezimbini kamva waqalisa ukufundisisa iBhayibhile rhoqo. Wenza inkqubela ekhawulezileyo, esenza iinguqu ngokukhawuleza kubomi bakhe, yaye kungekudala waqalisa ukushumayela ngoBukumkani. Kunyaka nje emva kokuba eqalise ukufundisisa iBhayibhile, wahlulela ubomi bakhe kuYehova waza wakufuzisela oku ngokubhaptizwa emanzini. Ngoku ukhonza njengesicaka solungiselelo kwibandla lakhe. Yaye bonke entsatsheni bakhonza uYehova ngokumanyeneyo.