Imibuzo Evela Kubafundi

Xa uYohane wabona “isihlwele esikhulu” sinikela inkonzo engcwele etempileni kaYehova, oku sasikwenza sikwiyiphi indawo etempileni?—ISityhilelo 7:9-15.

Kusengqiqweni ukuthi isihlwele esikhulu sinqula uYehova kwenye yeentendelezo ezisemhlabeni zetempile yakhe enkulu yokomoya, ingakumbi leyo inxulumene nentendelezo engaphandle yetempile kaSolomon.

Ngaphambili, kuye kwathiwa isihlwele esikhulu sikwiNtendelezo yabeeNtlanga yokomoya okanye kwindawo enjengayo, eyayikho ngomhla kaYesu. Noko ke, uphando olongezelelekileyo luye lwatyhila ubuncinane izizathu ezihlanu zokuba oko kungenjalo. Okokuqala, izinto zazingenziwa ngendlela efanayo kwitempile kaHerode nakwitempile kaYehova enkulu yokomoya. Ngokomzekelo, itempile kaHerode yayineNtendelezo Yamabhinqa neNtendelezo yakwaSirayeli. Amadoda namabhinqa ayenokungena kwiNtendelezo Yamabhinqa, kodwa ngamadoda kuphela awayevunyelwa ukuba angene kwiNtendelezo yakwaSirayeli. Kwiintendelezo zasemhlabeni zetempile kaYehova enkulu yokomoya, amadoda akahlulwa kubafazi xa kunqulwa. (Galati 3:28, 29) Ngenxa yoko, akukho ndawo emela iNtendelezo Yamabhinqa neNtendelezo yakwaSirayeli kwitempile yokomoya.

Okwesibini, yayingekho iNtendelezo yabeeNtlanga kwiplani yokwakha kaThixo yetempile kaSolomon, okanye kwitempile yombono kaHezekile, ingekho nakwitempile eyaphinda yakhiwa nguZerubhabheli. Yiyo loo nto kungekho sizathu sakuthi iNtendelezo yabeeNtlanga inendima kwilungiselelo lonqulo kwitempile enkulu kaYehova yokomoya, ingakumbi xa kucingwa ngale ngongoma ilandelayo.

Okwesithathu, iNtendelezo yabeeNtlanga yakhiwa nguKumkani uHerode, owayengumEdom ukuze azizukise nokuze azicengezele kwiRoma. UHerode waqalisa ukulungisa itempile eyayakhiwe nguZerubhabheli malunga nenkulungwane ye-18 okanye ye-17 B.C.E. IThe Anchor Bible Dictionary ithi: “Ngenxa yomgangatho ophakamileyo wezinto zobukhosi baseNtshona [eRoma] . . . kwafuneka kwakhiwe itempile enkudlwana xa ithelekiswa nezo zamazwe asempuma.” Noko ke, imilinganiselo yetempile yantlandlolo yayisele ikho. Esi sichazi-magama sithi: “Ngoxa kwakuza kufuneka le Tempile ibe nemilinganiselo efanayo neyezingaphambili [ekaSolomon nekaZerubhabheli], iNtaba yeTempile yayingasikelwanga mda ukuba imele ibe ngakanani.” Ngenxa yoko, uHerode wayandisa itempile ngokongezelela oko namhlanje kuthiwa yiNtendelezo yabeeNtlanga. Yintoni eyayinokubangela ukuba isakhiwo esinemvelaphi elolu hlobo sifuzisele ilungiselelo letempile yokomoya kaYehova?

Okwesine, phantse wonke umntu—iimfama, iziqhwala, nabeeNtlanga abangalukanga—babenokungena kwiNtendelezo yabeeNtlanga. (Mateyu 21:14, 15) Liyinyaniso elokuba, le ntendelezo yayiluncedo kwabeeNtlanga abaninzi abangalukanga ababefuna ukwenza iminikelo kuThixo. Yaye maxa wambi uYesu wayedla ngokuthetha apho nezihlwele yaye izihlandlo ezibini wagxotha abatshintshi bemali nabathengisi, esithi bayayihlazisa indlu kaYise. (Mateyu 21:12, 13; Yohane 2:14-16) Sekunjalo, iThe Jewish Encyclopedia ithi: “Enyanisweni, le ntendelezo ingaphandle asiyonxalenye yeTempile. Umhlaba wayo wawungekho ngcwele, yaye nabani na wayenokungena kuyo.”

Okwesihlanu, igama lesiGrike (hi·e·ron’) eliguqulelwe ngokuthi “itempile” elisetyenziselwa ukubhekisela kwiNtendelezo yabeeNtlanga “libhekisela kwisakhiwo xa sisonke, kunokuba libhekisele kwiTempile ngokunokwayo,” itsho njalo iA Handbook on the Gospel of Matthew, ebhalwe nguBarclay M. Newman noPhilip C. Stine. Ngokwahlukileyo koko, igama lesiGrike (na·os’) eliguqulelwe ngokuthi “itempile” kumbono kaYohane wesihlwele esikhulu lingqale ngakumbi. Xa kuthethwa ngetempile yaseYerusalem, kudla ngokubhekiselwa kwiNgcwele kaNgcwele, kwisakhiwo setempile okanye kummandla wetempile. Maxa wambi lidla ngokuguqulelwa ngokuthi “ingcwele.”—Mateyu 27:5, 51; Luka 1:9, 21; Yohane 2:20.

Amalungu esihlwele esikhulu anokholo kwidini lentlawulelo likaYesu. Acocekile ngokomoya, kuba ‘ayihlambile imiwunduzo yawo ayenza mhlophe egazini leMvana.’ Ngenxa yoko, avakaliswa engamalungisa anethemba lokuba ngabahlobo bakaThixo nelokusinda kwimbandezelo enkulu. (Yakobi 2:23, 25) Ngeendlela ezininzi, anjengabangeni kwaSirayeli abawuthobelayo umnqophiso woMthetho baza banqula kunye namaSirayeli.

Kambe ke, abo bangeni abazange bakhonze kwintendelezo engaphakathi, apho ababingeleli babenikela khona inkonzo yabo. Yaye amalungu esihlwele esikhulu akakho kwintendelezo engaphakathi yetempile kaYehova enkulu yokomoya, intendelezo emela ilungelo lokuba ngoonyana abafezekileyo nabalungileyo kwamalungu “obubingeleli obungcwele” bukaYehova ngoxa esemhlabeni. (1 Petros 2:5) Kodwa njengoko umdala osezulwini watsho kuYohane, ngokwenene isihlwele esikhulu sisetempileni, kungekhona ngaphandle kwetempile egqalwa njengeNtendelezo yokomoya yabeeNtlanga. Eli lilungelo elikhulu ngokwenene! Yaye libalaselisa imfuneko yokuba mntu ngamnye alondoloze ubunyulu bokomoya nobokuziphatha ngamaxesha onke!

[Umzobo/Umfanekiso okwiphepha 31]

(Ukuba ufuna inkcazelo ehlahlelwe kakuhle, yiya kwimpapasho)

ITempile kaSolomon

1. ISakhiwo seTempile

2. INtendelezo Engaphakathi

3. INtendelezo Engaphandle

4. Izinyuko eziya kwiNtendelezo yeTempile