“Indlu Yomthandazo Yazo Zonke Iintlanga”
“Akubhalwanga na kwathiwa, ‘Indlu yam iya kubizwa ngokuthi yindlu yomthandazo yazo zonke iintlanga’?”—MARKO 11:17.
1. Ekuqaleni uAdam noEva babenaluphi ulwalamano noThixo?
EKUDALWENI kwabo, uAdam noEva babenolwalamano oluhle noYise wasezulwini. UYehova uThixo wayenxibelelana nabo yaye wabachazela ngenjongo yakhe ezukileyo ngoluntu. Ngokuqinisekileyo, indalo kaYehova engummangaliso yayihlala ibashukumisela ekubeni bamdumise. Ukuba uAdam noEva babefuna ukhokelo njengoko babecinga ngendima yabo njengabazali bentsapho engabantu, babenokuthetha noThixo kwindawo ababekuyo kwikhaya labo eliyiParadisi. Zazingeyomfuneko kubo iinkonzo ezinikelwa ngumbingeleli etempileni.—Genesis 1:28.
2. Yiyiphi inguqulelo eyenzekayo xa uAdam noEva bonayo?
2 Izinto zaguquka xa ingelosi enemvukelo yahendela uEva ekucingeni ukuba ubomi bakhe babuya kuba bhetele ukuba wayelugatya ulongamo lukaYehova, imxelela ukuba wayeza ‘kuba njengoThixo.’ Ngokuvisisana noko, uEva wasitya isiqhamo somthi ababewalelwe nguThixo. Emva koko uSathana wasebenzisa uEva ukuhenda indoda yakhe. Okulusizi kukuba, uAdam wamphulaphula umfazi wakhe onesono, ebonakalisa ukuluxabisa ngakumbi ulwalamano lwakhe naye kunolwalamano lwakhe noThixo. (Genesis 3:4-7) Ngokwenjenjalo, uAdam noEva bakhetha uSathana njengothixo wabo.—Thelekisa eyesi-2 kwabaseKorinte 4:4.
3. Yaba yintoni imiphumo emibi yemvukelo ka-Adam noEva?
3 Ngeso senzo, isibini sokuqala esingabantu asizange siphulukane nolwalamano lwaso oluxabisekileyo noThixo kuphela kodwa kwanethemba lokuphila ngonaphakade kwiparadisi esemhlabeni. (Genesis 2:16, 17) Imizimba yabo enesono yonakala de bafa ekugqibeleni. Inzala yabo yasizuza njengelifa isono sabo. IBhayibhile iyachaza: “Ngaloo ndlela ukufa kwasasazeka kubo bonke abantu.”—Roma 5:12.
4. Liliphi ithemba uThixo awalinika uluntu olunesono?
4 Kwakufuneka okuthile ukuxolelanisa uluntu olunesono noMdali walo ongcwele. Xa wayegweba uAdam noEva, uThixo wanikela ithemba ngenzala yabo ngokuthembisa ‘ngembewu’ eyayiya kusindisa uluntu kwimiphumo yemvukelo kaSathana. (Genesis 3:15) Kamva, uThixo watyhila ukuba le Mbewu olwaluza kusikelelwa ngayo uluntu yayiya kuvela ngoAbraham. (Genesis 22:18) Ngenxa yale njongo yothando, uThixo wakhetha inzala ka-Abraham, amaSirayeli, ukuba abe luhlanga lwakhe olukhethekileyo.
5. Kutheni sifanele sibe nomdla kwiinkcukacha zomnqophiso woMthetho kaThixo namaSirayeli?
5 Ngowe-1513 B.C.E., amaSirayeli enza umnqophiso noThixo aza avuma ukuba aya kuyithobela imithetho yakhe. Bonke abafuna ukunqula uThixo namhlanje bafanele bawugqale njengobalulekileyo umnqophiso woMthetho kuba wawusalatha kwiMbewu yesithembiso. UPawulos wathi wawuqulethe ‘isithunzi sezinto ezilungileyo eziza kuza.’ (Hebhere 10:1) Xa uPawulos wayethetha la mazwi, wayexubusha ngeenkonzo ezazinikelwa ngababingeleli bakwaSirayeli kumnquba awayehamba ewugxumeka, okanye intente yonqulo. Wawubizwa ngokuba ‘libhotwe likaYehova’ okanye ‘indlu kaYehova.’ (1 Samuweli 1:9, 24) Ngokuhlolisisa inkonzo engcwele eyayinikelwa kwindlu kaYehova esemhlabeni, sinokuliqonda ngakumbi ilungiselelo lenceba lokuxolelanisa abantu abanesono banamhlanje noThixo.
INgcwele KaNgcwele
6. Yintoni eyayikwiNgcwele kaNgcwele, yaye ubukho bukaThixo apho babufuziselwa yintoni?
6 IBhayibhile ithi: “Oyena Uphakamileyo akahlali kwizindlu ezenziwe ngezandla.” (IZenzo 7:48) Noko ke, ubukho bukaThixo kwindlu yakhe yasemhlabeni babufuziselwa lilifu elalikweyona nxalenye yayo iphakathi neyayibizwa ngokuba yiNgcwele kaNgcwele. (Levitikus 16:2) Kubonakala ukuba eli lifu lalinobuqaqawuli, lisenza kukhanye kwiNgcwele kaNgcwele. Lalihlala phezu kwetyesi engcwele eyayibizwa ngokuba ‘yityeya yomnqophiso,’ eyayinamacwecwe amatye aneminye yemithetho uThixo awayinika amaSirayeli. Ngaphezu kwaloo Tyeya kwakukho iikerubhi zegolide ezimbini ezinamaphiko olulekileyo, ezifanekisela izidalwa zomoya ezikwizigxina eziphezulu kwintlangano kaThixo yasezulwini. Ilifu elalikhanyisa ngokungummangaliso laliphezu kwetyeya yaye liphakathi kwezo kerubhi. (Eksodus 25:22) Oku kwakufanekisela uThixo uSomandla ohleli kwitrone ephezu kwenqwelo yasezulwini ephahlwe ziikerubhi eziphilayo. (1 Kronike 28:18) Oku kuchaza isizathu sokuba uKumkani uHezekiya wathandaza esithi: “Yehova wemikhosi, Thixo wakwaSirayeli, wena uhleli phakathi kweekerubhi.”—Isaya 37:16.
INgcwele
7. Ziintoni ezazikho kwiNgcwele?
7 Igumbi lesibini lomnquba lalibizwa ngokuba yiNgcwele. Kule ndawo, kwicala elingasekhohlo lomnyango kwakukho isiphatho sezibane ezisixhenxe, yaye ekunene kwakukho itafile yezonka ezingenagwele. Ngaphambilana kwakukho isibingelelo ekwakutshiswa kuso isiqhumiso esinevumba elimnandi. Sasimi ngaphambi komkhusane owawusahlula iNgcwele kwiNgcwele kaNgcwele.
8. Yiyiphi imisebenzi ababeyenza rhoqo ababingeleli kwiNgcwele?
8 Rhoqo kusasa nangokuhlwa, umbingeleli wayefanele angene emnqubeni aze atshise isiqhumiso kwisibingelelo sesiqhumiso. (Eksodus 30:7, 8) Kusasa, ngoxa isiqhumiso sisaqhubeka sisitsha, izibane ezisixhenxe ezazikwisiphatho segolide kwakufuneka zizaliswe ngeoli. Ngokuhlwa ezo zibane zazibanekwa ukuze zikhanyise kwiNgcwele. Rhoqo ngeSabatha, umbingeleli wayefanele abeke izonka ezisandul’ ukubhakwa ezili-12 kwitafile yezonka ezingenagwele.—Levitikus 24:4-8.
Intendelezo
9. Yayiyintoni injongo yesitya esinamanzi, yaye sisiphi isifundo esinokusifumana koku?
9 Emnqubeni kwakukho nentendelezo, ibiyelwe ngamalengalenga entente. Kule ntendelezo kwakukho isitya esikhulu ababehlamba izandla neenyawo kuso ababingeleli ngaphambi kokungena kwiNgcwele. Babefanele bahlambe nangaphambi kokunyusa amadini kwisibingelelo esasilapho entendelezweni. (Eksodus 30:18-21) Lo mgaqo wococeko usisikhumbuzo esinamandla kubakhonzi bakaThixo banamhlanje ukuba bamele bazabalazele ukuhlala becocekile emzimbeni, ngokokuziphatha, engqondweni nangokomoya ukuba bafuna uThixo alwamkele unqulo lwabo. (2 Korinte 7:1) Ekuhambeni kwexesha yaba ngumsebenzi wabakhonzi betempile abangengawo amaSirayeli ukutheza iinkuni zomlilo wesibingelelo nokukha amanzi esitya sokuhlambela.—Yoshuwa 9:27.
10. Yiyiphi eminye yeminikelo eyayisondezwa kwisibingelelo samadini?
10 Rhoqo kusasa nangokuhlwa, kwakutshiswa imvana esibingelelweni kunye nomnikelo wokudla nothululwayo. (Eksodus 29:38-41) Amanye amadini ayesenziwa ngeentsuku ezikhethekileyo. Maxa wambi kwakufuneka kunyuswe idini ngenxa yesono somntu othile. (Levitikus 5:5, 6) Maxa wambi umSirayeli wayenokunikela idini loxolo elalityiwa ngababingeleli nangulowo wayesenza umbingelelo. Oku kwakubonisa ukuba abantu abanesono babenokuba seluxolweni noThixo, ngokungathi kunjalo, banandiphe isidlo kunye naye. Kwanomphambukeli wayenokuba ngumnquli kaYehova aze abe nelungelo lokusondeza iminikelo yokuzithandela kwindlu Yakhe. Kodwa ukuze bamnike intlonelo emfaneleyo uYehova, ababingeleli babefanele bamkele iminikelo esemgangathweni kuphela. Umgubo womnikelo wokudla wawufanele ucolwe kakuhle, yaye izilwanyana zamadini zazifanele zingabi nasiphako.—Levitikus 2:1; 22:18-20; Malaki 1:6-8.
11. (a) Kwakusenziwa ntoni ngegazi lezilwanyana zedini, yaye oku kwakusalatha entwenini? (b) UThixo ulijonga njani igazi lomntu nelesilwanyana?
11 Igazi lala madini lalisondezwa esibingelelweni. Injongo yoku yayikukukhumbuza olo hlanga ukuba lwalungaboni abafuna umntu wokubakhulula elaliya kuthi igazi lakhe lizicamagushele ngokupheleleyo izono zabo yaye libasindise ekufeni. (Roma 7:24, 25; Galati 3:24; thelekisa amaHebhere 10:3.) Kwakhona le ndlela ingcwele yokusebenzisa igazi yayikhumbuza amaSirayeli ukuba igazi lifanekisela ubomi kwanokuba ubomi buvela kuThixo. Zonke ezinye iindlela abantu ebebelisebenzisa ngazo igazi uThixo wazalela kwakudala.—Genesis 9:4; Levitikus 17:10-12; IZenzo 15:28, 29.
UMhla Wocamagusho
12, 13. (a) Wawuyintoni uMhla Wocamagusho? (b) Ngaphambi kokuba umbingeleli omkhulu eze negazi kwiNgcwele kaNgcwele, wayefanele enze ntoni?
12 Kanye ngonyaka ngosuku olwalubizwa ngokuba nguMhla Wocamagusho, lonke uhlanga lakwaSirayeli, kuquka abaphambukeli ababenqula uYehova, kwakufuneka bangenzi namnye umsebenzi yaye bazile ukudla. (Levitikus 16:29, 30) Ngalo mhla ubalulekileyo, ngokungathi kunjalo, isono solo hlanga sasicocwa ukuze lube seluxolweni noThixo kunyaka olandelayo. Makhe sibe nombono woko kwakusenzeka size sihlolisise ezinye zeembalasane.
13 Umbingeleli omkhulu ukwintendelezo yomnquba. Emva kokuhlamba kwisitya esinamanzi, uxhela inkomo yedini. Igazi laloo nkomo ligalelwa esityeni; liza kusetyenziselwa injongo ekhethekileyo yokucamagushela izono zesizwe sabaLevi esingababingeleli. (Levitikus 16:4, 6, 11) Kodwa ngaphambi kokuba aqhubeke nelo dini, kukho into afanele ayenze umbingeleli omkhulu. Uthabatha isiqhumiso esinevumba elimnandi (mhlawumbi ngecephe elithile) aze athabathe amalahle abomvu ngesiphatho samalahle esibingelweni. Ngoku ungena kwiNgcwele aze aye ngakumkhusane weNgcwele kaNgcwele. Ehamba kancinane ujikela ngaphaya komkhusane aze eme ngaphambi kwetyeya yomnqophiso. Emva koko, engabonwa nangumntu omnye, ugalela isiqhumiso kuloo malahle atshisayo, yaye iNgcwele kaNgcwele izaliswa lilifu elinevumba elimnandi.—Levitikus 16:12, 13.
14. Sasiyintoni isizathu sokuba umbingeleli omkhulu angene kwiNgcwele kaNgcwele ephethe igazi lezilwanyana ezimbini ezahlukeneyo?
14 Ngoku uThixo ukulungele ukubonakalisa inceba aze ngokungathi kunjalo axoliswe. Ngenxa yoko isigubungelo seTyeya sasibizwa ngokuba ‘sisihlalo senceba’ okanye “isigubungelo socamagushelo.” (Hebhere 9:5, bona umbhalo osemazantsi weNW.) Umbingeleli omkhulu uyaphuma kwiNgcwele kaNgcwele, athabathe igazi lenkomo, aze abuyele kwiNgcwele kaNgcwele. Ngokuvisisana noMthetho, ufaka umnwe wakhe kwelo gazi aze afefe izihlandlo ezisixhenxe ngaphambi kwesigubungelo seTyeya. (Levitikus 16:14) Emva koko ubuyela kwasentendelezweni aze axhele ibhokhwe, elidini lesono ‘ngenxa yabantu.’ Elinye igazi laloo bhokhwe uya nalo kwiNgcwele kaNgcwele aze enze into efanayo nayenze ngegazi lenkomo. (Levitikus 16:15) Kwakunikelwa nezinye iinkonzo ezibalulekileyo ngoMhla Wocamagusho. Ngokomzekelo, umbingeleli omkhulu wayefanele abeke izandla zakhe phezu kwentloko yebhokhwe yesibini aze avume “ubugwenxa boonyana bakaSirayeli” phezu kwayo. Emva koko le bhokhwe yayikhatshelelwa entlango ukuze, ngokungathi kunjalo, imke nesono solo hlanga. Ucamagusho lwalusenziwa ngaloo ndlela minyaka le, lusenzelwa “ababingeleli, nabantu bonke besikhungu.”—Levitikus 16:16, 21, 22, 33.
15. (a) Itempile kaSolomon yayifana njani nomnquba? (b) Incwadi yamaHebhere ithini ngenkonzo engcwele eyayinikelwa emnqubeni nasetempileni?
15 Kwimbali yeminyaka engama-486 yokuqala amaSirayeli engabantu bakaThixo bomnqophiso, ayesebenzisa umnquba awayehamba ewugxumeka njengendawo yokunqula uThixo wawo, uYehova. Kamva, uSolomon wakwaSirayeli wanikwa ilungelo lokwakha isakhiwo esisigxina. Nangona loo tempile yayiza kuba nkulu yaye ibe neenkcukacha ezingakumbi, iplani eyayivela kuThixo yayifana neyomnquba. Njengomnquba, yayifanekisela ilungiselelo lonqulo elikhulu nelisebenza ngakumbi nelaliya ‘kumiswa, kungekhona ngumntu,’ kodwa nguYehova.—Hebhere 8:2, 5; 9:9, 11.
Itempile Yokuqala Neyesibini
16. (a) Sisiphi isicelo sothando esenziwa nguSolomon xa wayenikezela itempile? (b) UYehova wakubonakalisa njani ukuba uyawamkela umthandazo kaSolomon?
16 Xa wayenikezela loo tempile izukileyo, uSolomon waquka esi sicelo siphefumlelweyo: “Owolunye uhlanga, ongengowabantu bakho amaSirayeli, xa athe wavela ezweni elikude ngenxa yegama lakho elikhulu . . . ; beza bathandaza bekule ndlu: yiva ke wena emazulwini, endaweni ohlala kuyo, wenze ngako konke athe wakunqula owolunye uhlanga, ukuze zonke izizwe zehlabathi zilazi igama lakho, zikoyike njengabantu bakho amaSirayeli, zazi ukuba le ndlu ndiyakhileyo ibizwa ngegama lakho.” (2 Kronike 6:32, 33) UThixo wakubonisa ngokuphandle ukuba uyawamkela umthandazo kaSolomon wokunikezela isakhiwo. Kwehla umlilo ezulwini waza wawadla amadini ezilwanyana awayesesibingelelweni, yaye itempile yazaliswa bubuqaqawuli bukaYehova.—2 Kronike 7:1-3.
17. Yintoni eyenzekayo kwitempile eyayakhiwe nguSolomon ekugqibeleni, yaye kwakutheni?
17 Okulusizi kukuba, amaSirayeli akuyeka ukumoyika ngokufanelekileyo uYehova. Kamva, alingcolisa igama lakhe elizukileyo ngokuphalaza igazi, ukunqul’ izithixo, ukukrexeza, umbulo, nangokuziphatha kakubi iinkedama, abahlolokazi nezinye iintlanga. (Hezekile 22:2, 3, 7, 11, 12, 26, 29) Ngoko, ngonyaka wama-607 B.C.E., uThixo wawagweba ngokuvumela imikhosi yaseBhabhiloni ukuba itshabalalise itempile. AmaSirayeli awasindayo athinjelwa eBhabhiloni.
18. Kwitempile yesibini, ngawaphi amalungelo avulekayo kumadoda angengomaSirayeli awayeluxhasa ngeentliziyo ezipheleleyo unqulo lukaYehova?
18 Emva kweminyaka engama-70 intsalela yamaYuda eguqukileyo yabuyela eYerusalem yaza yanikwa ilungelo lokuvusa itempile kaYehova. Okubangel’ umdla kukuba ababingeleli nabaLevi bokukhonza kule tempile yesibini babenganelanga. Ngoko, amaNethini, awayeyinzala yabakhonzi basetempileni abangengawo amaSirayeli, anikwa amalungelo angakumbi njengabalungiseleli bendlu kaThixo. Noko ke, ayengafikeleli kumgangatho wababingeleli nabaLevi.—Ezra 7:24; 8:17, 20.
19. Sisiphi isithembiso awasenzayo uThixo ngokuphathelele itempile yesibini, yaye sazaliseka njani eso sithembiso?
19 Ekuqaleni kwakubonakala ngathi itempile yesibini yayingayi kubalasela njengeyokuqala. (Hagayi 2:3) Kodwa uYehova wathembisa oku: “Ndizinyikimise zonke iintlanga, zifike izinto ezinqwenelekayo zeentlanga zonke, ndiyizalise le ndlu ngobuqaqawuli . . . Buya kuba bukhulu ubuqaqawuli bamva bale ndlu, ngaphezu kobokuqala.” (Hagayi 2:7, 9) La mazwi azaliseka, kuba itempile yesibini yaba nobuqaqawuli ngakumbi. Yahlala iminyaka eli-164 engakumbi, ibe iintendelezo zayo zazaliswa ngabanquli abaninzi ngakumbi abasuka kwamanye amazwe. (Thelekisa IZenzo 2:5-11.) Ukuhlaziywa kwale tempile yesibini kwaqalisa ngemihla kaKumkani uHerode, yaye iintendelezo zayo zandiswa. Ekubeni yayakhelwe kwindawo ephakamileyo yaye ijikelezwe ziintsika ezintle, yayizuke ngakumbi kunetempile yokuqala eyayakhiwe nguSolomon. Yayikwanentendelezo enkulu engaphandle, eyayenzelwe abantu beentlanga ababefuna ukunqula uYehova. Le Ntendelezo yeeNtlanga yayisahlulwa ludonga lwamatye kwiintendelezo ezingaphakathi ezazisetyenziswa ngamaSirayeli kuphela.
20. (a) Nguwuphi umahluko omkhulu owawukule tempile yesibini? (b) Yintoni ebonisa ukuba amaYuda ayengayixabisi itempile, yaye uYesu wenza ntoni ngenxa yoko?
20 Le tempile yesibini yabalasela ngakumbi kuba uNyana kaThixo, uYesu Kristu, wafundisa kwiintendelezo zayo. Kodwa njengetempile yokuqala, inkoliso yamaYuda ayizange ilixabise ilungelo lokuba nendlu kaThixo. Ayevumela nabathengisi ukuba bashishine kwintendelezo yeeNtlanga. Ngaphezu koko, abantu babevunyelwa ukuba banqumle etempileni xa bethwele imithwalo eYerusalem. Kwiintsuku ezine ngaphambi kokufa kwakhe, uYesu wayicoca itempile kwizenzo ezinjalo ezingenakuthanani nonqulo, yaye wayemane esithi: “Akubhalwanga na kwathiwa, ‘Indlu yam iya kubizwa ngokuthi yindlu yomthandazo yazo zonke iintlanga’? Kodwa niyenze umqolomba wabaphangi.”—Marko 11:15-17.
UThixo Uyishiya Ngonaphakade Indlu Yakhe Yasemhlabeni
21. Wathini uYesu ngokuphathelele itempile yaseYerusalem?
21 Ngenxa yesenzo sikaYesu senkalipho sokuphakamisa unqulo lukaThixo olunyulu, iinkokeli zonqulo zamaYuda zazimisela ukumbulala. (Marko 11:18) Esazi ukuba kungekudala wayeza kubulawa, uYesu wathi kwiinkokeli zonqulo zamaYuda: “Indlu yenu ishiyelwa kuni.” (Mateyu 23:37, 38) Ngaloo mazwi wayebonisa ukuba kungekudala uThixo wayeza kuyeka ukulwamkela unqulo olwalunikelwa kuloo tempile yaseYerusalem. Yayiza kuyeka ukuba “yindlu yomthandazo yazo zonke iintlanga.” Xa abafundi bakaYesu babembonisa iindonga ezintle zaloo tempile, wathi: “Aniziboni na zonke ezi zinto? . . . Akusayi kuze nangayiphi na indlela kushiywe apha ilitye phezu kwelitye lize lingadilizwa.”—Mateyu 24:1, 2.
22. (a) Azaliseka njani amazwi kaYesu aphathelele itempile? (b) Kunokusekela amathemba awo kwisixeko sasemhlabeni, yintoni awayeyifuna amaKristu okuqala?
22 Isiprofeto sikaYesu sazaliseka kwiminyaka engama-37 kamva ngonyaka wama-70 C.E., xa imikhosi yamaRoma yatshabalalisa iYerusalem netempile yayo. Oko kwanikela ubungqina obuhle bokuba uThixo wayeyishiye ngenene indlu yakhe yokomfuziselo. UYesu akazange aprofete ngokwakhiwa kwenye itempile eYerusalem. Ngokuphathelele eso sixeko sasemhlabeni, umpostile uPawulos wawabhalela oku amaKristu angamaHebhere: “Apha asinaso isixeko esiqhubeka sikho, kodwa sifuna ngokunyamekileyo eso siza kuza.” (Hebhere 13:14) AmaKristu okuqala ayekhangele phambili ekubeni yinxalenye ‘yeYerusalem yasezulwini’—uBukumkani bukaThixo obufana nesixeko. (Hebhere 12:22) Ngoko, unqulo lokwenyaniso lukaYehova alusasekelwanga kwitempile yokoqobo esemhlabeni. Kwinqaku lethu elilandelayo, siza kuxubusha ngelungiselelo elikhulu uThixo alenzele bonke abafuna ukumnqula “ngomoya nenyaniso.”—Yohane 4:21, 24.
Imibuzo Yempinda
◻ Luluphi ulwalamano uAdam noEva abaphulukana nalo noThixo?
◻ Kutheni sifanele sibe nomdla kwiinkalo ezithile zomnquba?
◻ Yintoni esiyifundayo kwizinto ezazisenzeka kwintendelezo yomnquba?
◻ Kwakutheni ukuze uThixo akuvumele ukutshatyalaliswa kwetempile yakhe?
[Imifanekiso ekwiphepha 10, 11]
ITEMPILE Eyahlaziywa Nguherode
1. INgcwele KaNgcwele
2. INgcwele
3. Isibingelelo Sedini Elinyukayo
4. Ulwandle Lwegilasi
5. Intendelezo Yababingeleli
6. Intendelezo YamaSirayeli
7. Intendelezo Yabafazi