Ukuqwalasela Ezinye Iinkolelo Ngokufa

UKUTYHUBELA imbali, umntu ebesoloko edidekile yaye esoyika xa ecinga ngokufa. Ukongezelela, abantu baye bakoyika ngakumbi ukufa xa becinga ngeenkolelo zonqulo ezibubuxoki, amasiko aqhelekileyo neenkolelo zabo ezendeleyo. Ingxaki ngokoyika ukufa kukuba kunokubenza bungabi mnandi ubomi baloo mntu kuze kumbangele angaqiniseki enoba ubomi bunenjongo kusini na.

Iinkonzo ezinkulu zibekek’ ityala ngokukhethekileyo ngokufundisa iinkolelo ezamkelwa ngokubanzi ngokufa. Ngokuhlolisisa inyaniso yeBhayibhile ngezinye zezi nkolelo, bona enoba oko ukukholelwayo ngokufa kuyinyaniso kusini na.

Inkolelo 1: Ukufa kudaliwe.

Incwadi ethi Death—The Final Stage of Growth ithi: “Umntu akasosimakade.” Amazwi anjengala angqina inkolelo yokuba ukufa kuyinto edaliweyo, isiphelo sazo zonke izinto eziphilayo. Ngenxa yoko, ukuqiqa ngale ndlela kuye kwabangela abantu abaninzi bazakhela ezabo iinkolelo, baza baphila unothanda.

Kodwa ngaba ngokwenene ukufa kudaliwe? Abaphengululi abakholelwa koko bonke. Ngokomzekelo, uCalvin Harley, isazi sebhayoloji esifunda ngokwaluphala kwabantu, sathi kolunye udliwano-ndlebe asikholelwa ukuba abantu “badalelwe ukufa.” Ingcali engokuthintelwa kwezifo uWilliam Clark wathi: “Ukufa akunxulumananga nobomi.” Yaye uSeymour Benzer, weCalifornia Institute of Technology, uthi “ukwaluphala kunokuchazwa, kungekhona njengento efanele yenzeke kodwa, njengemeko esinethemba lokuba inokuguqulwa.”

Xa izazinzulu zifunda ngendlela umzimba womntu oyilwe ngayo, ziyadideka. Zifumanisa ukuba abantu banamandla okuphila iminyaka engaphezulu lee kunengama-70 ukusa kwengama-80 ephilwa ngabantu ngokuqhelekileyo. Ngokomzekelo, izazinzulu ziye zafumanisa ukuba ubuchopho bomntu bunamandla okukhumbula angenakuthelekiswa nanto. Omnye umphengululi ethelekelela wathi ubuchopho bethu bunokugcina inkcazelo “enokuzalisa imiqulu enokuba zizigidi ezingamashumi amabini, inani elifumaneka kweyona mizi mikhulu yokugcina iincwadi ehlabathini .” Izazi ezithile ngemithambo-luvo zikholelwa ukuba ebudeni bexesha aliphilayo umntu oqhelekileyo, usebenzisa kuphela isinye kwisinye ekhulwini (,0001) samandla akhe obuchopho. Kufanelekile ukuba sibuze, ‘Kutheni sinobuchopho obunamandla angako xa sisebenzisa kuphela inxalenye encinane nje yabo kubomi ngokuqhelekileyo esibuphilayo?’

Kwakhona cinga indlela abantu ababa buhlungu ngayo xa befelwe! Kwinkoliso yabantu, ukufelwa ngumfazi, yindoda okanye ngumntwana kusenokuba yeyona nto ibuhlungu gqitha ebomini. Ngokufuthi abantu baba buhlungu ixesha elide emva kokufelwa ngumntu abamthandayo. Kwanabo bathi ukufa kudaliwe bakufumanisa kunzima ukuyamkela ingcamango yokuba ukufa kwabo kuya kuthetha isiphelo sayo yonke into. IBritish Medical Journal yathetha “ngento eqhelekileyo yokuba wonke umntu ufuna ukuphila ixesha elide kangangoko kunokwenzeka.”

Ngenxa yendlela ngokuqhelekileyo umntu avakalelwa ngayo ngokufa, amandla anawo amangalisayo okukhumbula nokufunda, nomnqweno wakhe ongaphakathi wokuphila ngonaphakade, ngaba oko akubonisi ukuba wayedalelwe ukuphila? Enyanisweni, uThixo wadala abantu, kungekhona ukuba bafe, kodwa ngenjongo yokuba baphile ixesha elingenasiphelo. Phawula oko uThixo wakuxelela isibini sokuqala esingabantu ngokuphathelele ikamva labo: “Qhamani, nande, niwuzalise umhlaba nize niwoyise, nibe nobukhosi kwiintlanzi zolwandle nakwizidalwa eziphaphazelayo emazulwini nakuzo zonke izidalwa eziphilayo ezinambuzelayo emhlabeni.” (Genesis 1:28) Eli, yayilikamva eliqaqambileyo nelingapheliyo!

Inkolelo 2: Xa umntu esifa, uThixo umthathile.

Umama oneminyaka engama-27 ubudala owayesifa nowayeshiya abantwana abathathu wathi kunongendi ongumKatolika: “Ungandixeleli ukuba oku kukuthanda kukaThixo. . . . Andifuni nokuyiva loo nto.” Ukanti, leyo yinto efundiswa kwiicawa ezininzi ngokufa—yokuba xa umntu esifa, uThixo umthathile.

Ngaba uMdali ukhohlakele ngaloo ndlela kangangokuba angade asibulale, esazi ukuba oko kusixhel’ intliziyo? Unotshe, akunjalo ngoThixo weBhayibhile. Ngokutsho kweyoku-1 kaYohane 4:8, “uThixo uluthando.” Phawula ukuba le ndinyana ayithi uThixo unothando okanye uThixo ubonakalisa uthando, kodwa ithi uThixo uluthando. Uthando lukaThixo lunzulu, lunyulu, lugqibelele kangangokuba lubonakala kubo bonke ubuntu nakwizenzo zakhe kangangokuba ngokufanelekileyo kunokuthiwa yena ubuqu uluthando. Lo asinguye uThixo othatha abantu xa besifa.

Unqulo lobuxoki luye lwashiya abantu abaninzi bedidekile ngendawo abaya kuyo nemeko yabo xa befile. Izulu, isihogo, intlambululo miphefumlo, neLimbo—ezi nezinye iindawo ekuthiwa uya kuzo umntu xa esifa aziqondakali yaye ziyothusa. Kwelinye icala, iBhayibhile isixelela ukuba abafileyo abazi nto; bakwimeko efanayo nomntu oleleyo. (INtshumayeli 9:5, 10; Yohane 11:11-14) Ngoko ke, akuyomfuneko ukuba sikhathazeke ngoko kwenzekayo emva kokufa, njengoko singakhathazeki xa sibona umntu elele ubuthongo. UYesu wathetha ngexesha xa “bonke abo bakumangcwaba enkumbulo” beya ‘kuphumela’ kubomi obutsha kwiparadesi esemhlabeni.—Yohane 5:28, 29; Luka 23:43.

Inkolelo 3: UThixo uthatha abantwana ukuze abenze iingelosi.

UElisabeth Kübler-Ross, owayephanda ngabantu abagulel’ ukufa, wathetha ngenye inkolelo eqhelekileyo kubantu bonqulo. Echaza ngento eyenzekayo, wathi “asibobulumko ukuxelela umntwana omncinane ofelwe ngumntakwabo ukuba uThixo uwathanda gqitha amakhwenkwana kangangokuba uthathe uJohnny wamsa ezulwini.” Amazwi anjalo abonisa ukuba uThixo ungumntu ombi yaye akathethi nyaniso ngobuntu bakhe nangendlela azenza ngayo izinto. UGqr. Kübler-Ross uhlabela mgama esithi: “Yakuba le ntombazana ikhulile ayizange ikwazi ukumxolela uThixo, nto leyo eyayenza yagula ngengqondo xa yafelwa ngunyana wayo omncinane kwiminyaka engamashumi amathathu kamva.”

Yintoni enokubangela ukuba uThixo axhwile umntwana kuba efuna enye ingelosi—ngokungathi uThixo ebemfuna lo mntwana ngaphezu kokuba abazali bakhe bemfuna? Ukuba kuyinyaniso ukuba uThixo uthatha abantwana, ngaba oko bekungenakumenza uMdali ongenaluthando nocinga ngesiqu sakhe kuphela? Ngokwahlukileyo kulo nkolelo, iBhayibhile ithi: “Uthando luvela kuThixo.” (1 Yohane 4:7) Ngaba uThixo onothando ebeya kubangela abantu baphulukane nezinto abathi nabantu abahluzeke ngokupheleleyo bangakwazi ukwahlukana nazo?

Ngoko ke kutheni abantwana besifa? Inxalenye yempendulo yeBhayibhile ibhalwe kwiNtshumayeli 9:11: “Bonke behlelwa lixesha nasisihlo esingenakubonwa kwangaphambili.” Yaye INdumiso 51:5 isixelela ukuba sonke asifezekanga, sinesono, ukususela ekukhawulweni, yaye isiphelo sawo wonke umntu ngoku kukufa okubangelwa zizinto ezahlukahlukeneyo. Maxa wambi umntu ufa engekazalwa, nto leyo ebizwa ngokuba yimfambilini. Kwezinye iimeko, abanye abantwana bafa ngenxa yeemeko ezibuhlungu okanye bafumane iingozi baze bafe. Asinakutyhola uThixo ngezinto ezinjalo.

Inkolelo 4: Abanye abantu bayathuthunjiswa emva kokufa.

Iinkonzo ezininzi zifundisa ukuba abangendawo baza kuya esihogweni somlilo baze bathuthunjiswe ngonaphakade. Ngaba le mfundiso isengqiqweni yaye isekelwe eZibhalweni? Umntu uphila iminyaka engama-70 okanye engama-80 ubudala. Enoba umntu ebenetyala elikhulu kangakanani na ebomini bakhe, ngaba bekuya kuba sisigwebo esisesikweni ukuba athuthunjiswe ngonaphakade? Hay’ khona. Ibiya kuba kukumdlel’ indlala ngeyona ndlela ukuthuthumbisa umntu ngonaphakade ngenxa yezono azenze kwixesha nje elifutshane lokuphila kwakhe.

NguThixo kuphela onokuchaza oko kwenzekayo emva kokufa komntu, yaye oko ukuchaze kwiLizwi lakhe elibhaliweyo, iBhayibhile. IBhayibhile ithi: “Njengoko kunjalo ukufa kwaso [isilo], kunjalo nokufa kwabo [abantu]; yaye zonke zinomoya omnye . . . Zonke ziya ndaweni nye. Zonke zavela eluthulini, yaye zonke zibuyela eluthulini.” (INtshumayeli 3:19, 20) Apha akuthethwa nto ngesihogo somlilo. Abantu babuyela eluthulini—ababikho—xa besifa.

Ukuze umntu athuthunjiswe, kufuneka abe sezingqondweni. Ngaba abafileyo basezingqondweni? Kwakhona iBhayibhile iphendula isithi: “Abaphilayo bayazi ukuba baya kufa; kodwa abafileyo, abazi nto konke konke, abasenamvuzo, ngenxa yokuba balityelwe, abasakhunjulwa nganto.” (INtshumayeli 9:5) Akunakwenzeka ukuba abantu abafileyo, ‘abangazi nto konke konke,’ bave iintlungu naphi na.

Inkolelo 5: Ukufa kuthetha ukungabikho ngokupheleleyo.

Xa sisifa asibikho, kodwa oku akuthethi ukuba iphelile into ibithethwa. Indoda ethembekileyo uYobhi wayesazi ukuba wayeza kuya engcwabeni, eShiyol, xa efile. Kodwa phulaphula xa wayethandaza kuThixo: “Owu akwaba ubungandifihla eShiyol, undigcine ndifihlakele de ubuye umsindo wakho, undibekele umda wexesha uze undikhumbule! Ukuba indoda eyomeleleyo iyafa ngaba inokuphila kwakhona? . . . Uya kubiza, ndisabele.”—Yobhi 14:13-15.

UYobhi wayekholelwa ukuba ukuba wayenokuhlala ethembekile kude kuse ekufeni, wayeya kukhunjulwa nguThixo aze ekuhambeni kwexesha avuswe. Le yayiyinkolelo yabo bonke abakhonzi bakaThixo bamandulo. Naye uYesu waliqinisekisa eli themba waza wabonisa ukuba uThixo wayeya kumsebenzisa ekuvuseni abafileyo. Amazwi kaKristu asiqinisekisa esithi: “Liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe [uYesu] baze baphume, abo benze izinto ezilungileyo beze kuvuko lobomi, abo baqhelisele izinto ezimbi kuvuko lomgwebo.”—Yohane 5:28, 29.

Kungekudala uThixo uya kususa bonke ubungendawo aze aseke ihlabathi elitsha phantsi kolawulo lwasezulwini. (INdumiso 37:10, 11; Daniyeli 2:44; ISityhilelo 16:14, 16) Oku kuya kubangela ukuba umhlaba wonke ube yiparadesi, umiwe ngabantu abakhonza uThixo. EBhayibhileni sifunda oku: “Ndeva ilizwi elikhulu livela etroneni lisithi: ‘Khangela! Intente kaThixo iphakathi koluntu, yaye uya kuhlala nalo, lube ngabantu bakhe. Naye abe nguThixo walo. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.’”—ISityhilelo 21:3, 4.

Akusekho Loyiko

Ulwazi ngethemba lovuko kunye nolwazi lwaLowo wenze elo lungiselelo kusenokukuthuthuzela. UYesu wathembisa: “Niya kuyazi inyaniso, yaye inyaniso iya kunikhulula.” (Yohane 8:32) Oku kuquka ukungoyiki ukufa. NguYehova kuphela onokuphelisa ukwaluphala nokufa aze asibabale ngobomi obungunaphakade. Ngaba unokuzikholelwa izithembiso zikaThixo? Ewe, unokuzikholelwa kuba iLizwi likaThixo lisoloko lizaliseka. (Isaya 55:11) Sikubongoza ukuba ufunde ngakumbi ngeenjongo uThixo anazo ngoluntu. AmaNgqina kaYehova aya kukuvuyela ukukunceda.

[Amagama acatshulweyo akwiphepha 6]

Ingxaki ngokoyika ukufa kukuba kunokubenza bungabi mnandi ubomi baloo mntu

[Isicangca esikwiphepha 7]

IINKOLELO EZIQHELEKILEYO NGOKUFA ZITHINI IZIBHALO?

● Ukufa kudaliwe Genesis 1:28; 2:17; Roma 5:12

[Umfanekiso okwiphepha 8]

Ukwazi inyaniso ngokufa kusenza singakoyiki

[Inkcazelo Ngomfanekiso okwiphepha 5]

Barrators—Giampolo/The Doré Illustrations For Dante’s Divine Comedy/Dover Publications Inc.