Abavakalisi BoBukumkani Bayabalisa

Ukufumana Inyaniso Kwindawo Engalindelekanga

KUKUTHANDA kukaThixo ukuba “zonke iintlobo zabantu zisindiswe zize zifikelele elwazini oluchanileyo lwenyaniso.” (1 Timoti 2:3, 4) Ukuze afeze loo njongo, amaNgqina kaYehova aye ashicilela aze asasaza izigidi zemibhalo yeBhayibhile neencwadi zokufundisisa iBhayibhile. Maxa wambi, ezi mpapasho ziye zanceda abantliziyo zinyanisekileyo ukuba bafunde inyaniso ngeendlela ezingalindelekanga. Ngokuphathelele oku, abavakalisi boBukumkani baseFreetown, eSierra Leone bayabalisa.

UOsman wayengunyana wesibini kwintsapho enabantwana abasithoba. Ekubeni intsapho yakowabo yayiluxabisile unqulo, wayesoloko ehamba noyise ukuya enkonzweni. Noko ke, uOsman wayekhathazeka gqitha yinto eyayifundiswa ecaweni yakhe ngesihogo. Wayengayiqondi into yokuba uThixo onenceba angathuthumbisa abantu abangendawo ngokubatshisa emlilweni. Nayiphi na inkcazelo uOsman awayeyifumana ukuze aqonde imfundiso yesihogo somlilo, ayizange imanelise.

Ngenye imini, xa uOsman wayeneminyaka engama-20 ubudala, wabona incwadi eluhlaza ivele kancinane kumgqomo wenkunkuma. Kuba ezithanda iincwadi, wayichola, wayisula, waza wabona umxholo wayo othi—INyaniso eKhokelela kuBomi obungunaPhakade.a

UOsman wazibuza, ‘Yiyiphi le nyaniso?’ UOsman waba nomdla, wagoduka nayo le ncwadi waza wayifunda yonke ngemini enye. Hayi indlela awavuya ngayo xa wafunda ukuba uThixo unegama lakhe—uYehova! (INdumiso 83:18) Kwakhona uOsman wafunda ukuba uphawu olubalaseleyo lukaThixo luthando yaye nengcamango yokuthuthumbisa abantu emlilweni yinto ecekisekayo Kuye. (Yeremiya 32:35; 1 Yohane 4:8) Ekugqibeleni, uOsman wafunda ukuba kungekudala uYehova uza kuwenza umhlaba ube yiparadesi apho abantu baya kukwazi ukuphila ngonaphakade. (INdumiso 37:29; ISityhilelo 21:3, 4) Le yinyaniso evuyisayo evela kuThixo onenceba nonothando! Enombulelo ongazenzisiyo, uOsman wambulela uYehova ngokumnika ithuba lokufumana inyaniso kwindawo engalindelekanga.

Kwiintsuku ezimbalwa kamva, encediswa ngabanye babahlobo bakhe, uOsman wayifumana iHolo yoBukumkani yamaNgqina kaYehova waza waya ezintlanganisweni okwesihlandlo sokuqala. Ngoxa elapho, wacela elinye iNgqina ukuba limqhubele isifundo seBhayibhile. Phezu kwako nje ukuchaswa ngamandla yintsapho yakowabo, uOsman waqhubeka esenza inkqubela ngokomoya waza wabhaptizwa. (Mateyu 10:36) Namhlanje, ungumdala ebandleni. Hayi indlela okumangalisa ngayo ukuba konke oku kungenxa yokufumana kwakhe impapasho yeBhayibhile emgqomeni!

[Umbhalo osemazantsi]