Hlwayela Ubulungisa, Uvune Ububele Bothando BukaThixo

“UBANI uya kuhlelwa bububi ngenxa yokuba emela owasemzini, kodwa okuthiyayo ukuxhawulana akakhathazeki.” (IMizekeliso 11:15) Hayi indlela ayinyaniso ngayo amazwi alo mzekeliso ungqalileyo okhuthaza ukuba senze ngobulumko! Ukumela umntu oboleka imali ongaqinisekanga ngaye kusenokukufaka engxakini. Kuphephe ukuxhawulana—isenzo esasifuzisela ukutyobela isivumelwano kwaSirayeli wamandulo—uze ungangeni kumgibe onento yokwenza nemali.

Ngokucacileyo, umgaqo osetyenziswa apha ngulo: “Loo nto ayihlwayelayo umntu, uya kuvuna kwayona.” (Galati 6:7) Umprofeti uHoseya wathi: “Zihlwayelele imbewu ngobulungisa, vuna ngokuvumelana nobubele bothando.” (Hoseya 10:12) Ewe, hlwayela ubulungisa ngokwenza izinto ngendlela kaThixo, uze uvune ububele bakhe bothando. Esebenzisa lo mgaqo ngokuphindaphindiweyo, uKumkani uSolomon wakwaSirayeli egxininisa usikhuthaza ukuba sizenze izinto ngendlela efanelekileyo, sisebenzise intetho ethe tye, yaye siziphathe kakuhle. Ukuwahlolisisa ngocoselelo amazwi akhe obulumko ngokwenene kuya kusikhuthaza ukuba sizihlwayelele imbewu ngobulungisa.—IMizekeliso 11:15-31.

Hlwayela ‘Umtsalane,’ Uvune “Uzuko”

UKumkani osisilumko uthi: “Ibhinqa elinomtsalane libamba uzuko; kodwa oozwilakhe babamba ubutyebi.” (IMizekeliso 11:16) Le ndinyana ibonisa umahluko phakathi kozuko olungapheliyo ibhinqa elinomtsalane, “umfazi osimilo silungileyo,” elisenokulufumana nobutyebi obukhawuleza buphele obufunyanwa nguzwilakhe.—IBhayibhile yesiXhosa.

Ubani unokuwufumana njani umtsalane onokuphumela kuzuko? USolomon waluleka esithi: “Londoloza ubulumko bobuqili namandla okucinga, yaye oko kuya kuba . . . nomtsalane emqaleni wakho.” (IMizekeliso 3:21, 22) Yaye umdumisi uthetha ‘ngomtsalane ogalelwe emilebeni kakumkani.’ (INdumiso 45:1, 2) Ewe, ubulumko bobuqili, amandla okucinga, nokusetyenziswa kakuhle kolwimi kumenza ubani axabiseke yaye abe nomtsalane. Oko kunjalo ngebhinqa elilumkileyo. UAbhigali, umfazi wendoda esisiyatha uNabhali, ungomnye umzekelo. Lo mfazi “wayeqiqa yaye eyinzwakazi,” yaye uKumkani uDavide wamzukisa ngenxa yokuba ‘nengqiqo’ kwakhe.—1 Samuweli 25:3, 33.

Ibhinqa elihlonel’ uThixo elinomtsalane wokwenene ngokuqinisekileyo liya kuzukiswa. Abanye baya kuthetha kakuhle ngalo. Ukuba litshatile, liya kuzukiswa yindoda yalo. Eneneni, intsapho yalo iphela iya kuzukiswa ngenxa yalo. Yaye uzuko lwalo alusayi kukhawuleza luphele. “Igama elilungileyo linokunyulwa ngaphezu kobutyebi obuninzi; ubabalo lulunge ngakumbi kunesilivere negolide.” (IMizekeliso 22:1) Lizenzela igama elilungileyo nelingapheliyo noThixo.

Oku kwahluke ngokupheleleyo ngendoda enguzwilakhe. (IMizekeliso 11:16) Uzwilakhe unxulunyaniswa namadoda angendawo nabo baziintshaba zabakhonzi bakaYehova. (Yobhi 6:23; 27:13) Indoda enjalo ‘ayimbekanga uThixo phambi kwayo.’ (INdumiso 54:3) Ngokucinezela nokuxhaphaza abamsulwa, umntu onjalo ‘usenokufumba isilivere njengothuli.’ (Yobhi 27:16) Sekunjalo, ekuhambeni kwexesha, usenokulala aze angavuki, yaye nanini na usenokuba uwavula amehlo akhe okokugqibela. (Yobhi 27:19) Bonke ubutyebi bakhe nezinto azenzileyo ziya kuba lilize.—Luka 12:16-21.

IMizekeliso 11:16 isifundisa esona sifundo sibalulekileyo! Eshwankathela oko kuya kuba ngumvuzo wokuba nomtsalane nowokuba nguzwilakhe, ukumkani wakwaSirayeli usibongoza ukuba sihlwayele ubulungisa.

“Ububele Bothando” Bunomvuzo

Efundisa esinye isifundo ngolwalamano lwabantu, uSolomon uthi: “Umntu onobubele bothando uqhubana ngokunomvuzo nomphefumlo wakhe, kodwa umntu okhohlakeleyo uyizisela ishwangusha inyama yakhe.” (IMizekeliso 11:17) Omnye umphengululi uthi: “Ingongoma yalo mzekeliso ikukuba indlela ubani abaphatha ngayo abanye, enoba ilungile okanye imbi, isenokuba nemivuzo elindelekileyo okanye engalindelwanga.” Khawucinge ngebhinqa eliselula uLisa.a Nangona engakwenzi ngabom oku, usoloko engafiki ngexesha kumadinga akhe. Akuyonto ingaqhelekanga ukuba afike emva kwemizuzu engama-30 okanye ngaphezulu xa efanele ahlanganisane nabanye abavakalisi boBukumkani xa besiya kushumayela. ULisa uzakhela igama elibi. Ngaba unokubasola abanye xa benokukruquka kukusoloko belahlekelwa lixesha labo elixabisekileyo baze bangaphindi benze idinga naye?

Umntu ozibekela imilinganiselo ephakame gqitha—naye uyazikhohlakalela. Ngokusoloko ezibekela usukelo olungafikelelekiyo, usenokuzidinisa yaye aphoxeke. Kwelinye icala, xa sizibekela usukelo olufanelekileyo nolusengqiqweni oko kuya kusizisela ulwaneliseko. Mhlawumbi sisenokungaziqondi ngokukhawuleza izinto njengokuba kunjalo ngabanye. Okanye kusenokwenzeka ukuba ukugula okanye ukwaluphala kusenza singakwazi ukuzenza ezinye izinto. Masingaze sixhalatyiswe kukuba singenzi nkqubela ngokomoya, kodwa masiqhubeke sibonakalisa ingqiqo xa sijamelene neentsilelo zethu. Siya kuba novuyo xa ‘sisenza unako-nako’ ngamandla esinawo.—2 Timoti 2:15; Filipi 4:5.

Echaza ngokubhekele phaya indlela lowo ulilungisa azuza ngayo ngoxa lowo ukhohlakeleyo ezenzakalisa, ukumkani osisilumko uthi: “Ongendawo wenza umvuzo wobuxoki, kodwa ohlwayela ubulungisa, unomvuzo oyinyaniso. Obumela ngokuqinileyo ubulungisa usingise ebomini, kodwa lowo usukela okubi usingise ekufeni kwakhe. Abo bantliziyo zigwenxa bayinto ecekisekayo kuYehova, kodwa abo bangenakusoleka endleleni yabo uyakholiswa ngabo. Nangona isandla sibambana nesandla, akayi kungohlwaywa onobubi; kodwa inzala yamalungisa ngokuqinisekileyo iya kusinda.”—IMizekeliso 11:18-21.

Ngeendlela ezahlukahlukeneyo ezi ndinyana zigxininisa le ngongoma ibalulekileyo: Hlwayela ubulungisa uze uvune iziqhamo zabo. Ongendawo usenokubhenela ekukhohliseni okanye ekungcakazeni ukuze afumane izinto simahla. Ekubeni umvuzo onjalo ingowenkohliso, ubani usenokuphoxeka. Lowo usebenza ngokunyaniseka ufumana umvuzo ofanelekileyo ngenxa yokuba unqabisekile. Lowo uThixo akholiswa nguye, ongenakusoleka uya kuzuza ubomi. Kodwa ziya kumhambela njani izinto umntu ongendawo? “Nangona isandla sibambana nesandla” ekucebeni ubungendawo, ongendawo akasayi kubhungca, uya kohlwaywa. (IMizekeliso 2:21, 22) Esi sisibongozo esihle sokuhlwayela ubulungisa!

Lowo Unengqiqo Unobuhle Bokwenene

USolomon uhlabela mgama esithi: “Njengekhonkco legolide empumlweni yehagu, linjalo ibhinqa elihle kodwa lingenangqiqo.” (IMizekeliso 11:22) Ikhonkco lempumlo yayiyindlela eqhelekileyo yokuzilungisa ngexesha lokubhalwa kweBhayibhile. Ikhonkco lempumlo legolide elalifakwa ecaleni empumlweni okanye ekudibaneni kwemingxuma yempumlo beliya kuba yinto yegolide ephawulekayo kwibhinqa. Hayi indlela ibingayi kufaneleka ngayo into exabiseke ngolo hlobo empumlweni yehagu! Oku kufana nobuhle bangaphandle bomntu ‘ongenangqiqo.’ Umntu onjalo akafanelwanga likhonkco lokuhombisa enoba libhinqa okanye yindoda. Alifanelekanga—yaye libi.

Liyinyaniso elokuba, kuyinto engokwemvelo ukukhathazeka ngendlela abanye abasijonga ngayo. Kodwa ngaba sinesizathu sokuzixhalabisa ngokugqithiseleyo okanye sokunganeliseki yinkangeleko yethu? Asikwazi kuyilawula indlela esikhangeleka ngayo. Yaye inkangeleko yethu ayibalulekanga kangako. Ngaba aliyonyaniso na elokuba inkoliso yabantu esibathandayo ngabantu abanenkangeleko nje eqhelekileyo? Ubuhle abunguye undoqo wolonwabo. Eyona nto ibalulekileyo bubuhle bangaphakathi obuziimpawu zobuthixo ezihlala zihleli. Ngoko masibonakalise ingqiqo size sihlakulele ezo mpawu.

“Umphefumlo Onesisa Uya Kutyetyiswa”

UKumkani uSolomon uthi: “Umnqweno wamalungisa ngokuqinisekileyo ulungile, ithemba labangendawo kukuvutha komsindo.” Ezekelisa indlela okuyiyo oku, wongezelela esithi: “Kukho ochithachithayo kodwa abe esanda; ukwakho ozinqandayo kokulungileyo, kodwa umphumo kukuswela kuphela.”—IMizekeliso 11:23, 24.

Njengoba sihlwayela ngenzondelelo—sidlulisela kwabanye—ulwazi ngeLizwi likaThixo, ngokuqinisekileyo sandisa ulwazi lwethu ‘ngobubanzi ngobude nokuphakama nobunzulu’ balo. (Efese 3:18) Kwelinye icala, lowo ungalusebenzisiyo ulwazi lwakhe usengozini yokuphulukana noko akwaziyo. Ewe, “lowo uhlwayela ngokuvimba uya kuvuna ngokuvimba; yaye lowo uhlwayela ngokuyintabalala uya kuvuna intabalala.”—2 Korinte 9:6.

Ukumkani uhlabela mgama esithi: “Umphefumlo onesisa uya kutyetyiswa [uya kuphumelela], yaye oseza abanye ngesisa naye uya kusezwa ngesisa.” (IMizekeliso 11:25) Xa sisebenzisa ixesha nezinto zethu eziphathekayo ngesisa ekuhambiseleni phambili unqulo lokwenyaniso, uYehova uyakholiswa sithi. (Hebhere 13:15, 16) Uya ‘kusivulela amasango ezikhukula emazulwini aze aqongqothele phezu kwethu intsikelelo side singasweli nto.’ (Malaki 3:10) Khawufan’ ukhangele nje impumelelo engokomoya abanayo abakhonzi bakhe namhlanje!

Enikela omnye umzekelo owahlukileyo weminqweno yelungisa nongendawo uSolomon uthi: “Owala nokudla okuziinkozo—uluntu luya kumshwabulela, kodwa kukho intsikelelo entlokweni yalowo uthengisayo.” (IMizekeliso 11:26) Ukuthenga izinto xa amaxabiso ephantsi uzigcine de zibe mbalwa eziseleyo yaye naxa amaxabiso enyukile kusenokuba yinzuzo. Nangona kusenokuba yinzuzo ukonga uze ufake kuvimba, ngokuqhelekileyo abantu bayamthiya umntu oligogotya. Kwelinye icala, lowo ungasebenzisi kakubi amaxesha onxunguphalo ukuze axhaphaze abanye ngokuzenzela inzuzo enkulu uyathandwa ngabantu.

Esikhuthaza ukuba siqhubeke sinqwenela okulungileyo okanye ubulungisa, lo kumkani wakwaSirayeli uthi: “Ofuna okulungileyo uya kuqhubeka efuna inkoliseko; kodwa lowo ufuna ububi, buya kumfikela. Okholosa ngobutyebi bakhe—uya kuwa; kodwa kanye njengamahlamvu amalungisa aya kuchuma.”—IMizekeliso 11:27, 28.

Olilungisa Uzuza Imiphefumlo

Ezekelisa indlela izenzo zobuyatha eziba nemiphumo emibi ngayo uSolomon uthi: “Ke ozisa ishwangusha endlwini yakhe, uya kudla ilifa elingumoya.” (IMizekeliso 11:29a) Isenzo esibi sika-Akan ‘samzisela ishwangusha,’ yaye yena namalungu entsapho yakhe baxulutywa ngamatye bafa. (Yoshuwa, isahluko 7) Namhlanje, intloko-ntsapho engumKristu nabanye bentsapho yayo basenokwenza ububi obusenokuphumela ekususweni kubudlelane kwibandla lamaKristu. Ngokungayithobeli imithetho kaThixo nangokunyamezela ububi obunzulu kwintsapho yayo, indoda izisela indlu yayo ishwangusha. Yona mhlawumbi namanye amalungu entsapho yayo ayagxothwa kulwalamano lobuKristu njengabenzi bobubi abangaguqukiyo. (1 Korinte 5:11-13) Yaye iya kuzuza ntoni? Iya kuzuza umoya—into engenaxabiso.

Le ndinyana ihlabela mgama isithi: “Umntu osisidenge uya kuba ngumkhonzi wonentliziyo elumkileyo.” (IMizekeliso 11:29b) Ekubeni umntu osisidenge engenabulumko bobuqili, akanakunikwa imbopheleleko enkulu. Ngapha koko, ukungakwazi kwakhe ukusingatha imicimbi yakhe usenokuyona eyabanye abantu ngandlela ithile. Isiyatha esinjalo siya kuba “ngumkhonzi wonentliziyo elumkileyo.” Ngokucacileyo ke ngoko, kubalulekile ukuba sisebenzise ubulumko bobuqili xa sisebenzisana nabanye.

Ukumkani osisilumko usiqinisekisa oku: “Isiqhamo selungisa ngumthi wobomi, nozuza imiphefumlo sisilumko.” (IMizekeliso 11:30) Kwenzeka njani oku? Kaloku, ngendlela athetha ngayo naziphatha ngayo, umntu olilungisa ubatsho bahlaziyeke ngokomoya abanye. Bakhuthazwa ukuba bakhonze uYehova yaye ekugqibeleni basenokufumana ubomi obuvela kuThixo.

‘Umoni Uya Kufumana Umvuzo Ongakumbi’

Imizekeliso ekuthethwe ngayo ngasentla isikhuthaza ngokungqongqo ukuba sihlwayele ubulungisa! Esebenzisa umgaqo othi “loo nto ayihlwayelayo umntu, uya kuvuna kwayona,” nangenye indlela uSolomon uthi: “Khangela! Ilungisa—emhlabeni liya kuvuzwa. Kukangakanani na ke kongendawo nomoni!”—IMizekeliso 11:31.

Nangona umntu olilungisa esenza umgudu wokwenza okulungileyo, maxa wambi wenza iimpazamo. (INtshumayeli 7:20) Yaye ngeempazamo zakhe uya “kuvuzwa” ngokufumana isohlwayo. Noko ke, kuthekani ngomntu ongendawo othi ngabom akhethe ukwenza okubi yaye angenzi mgudu wokuguqukela kwindlela yobulungisa? Ngaba akafanelwe ‘ngumvuzo’ omkhulu—isohlwayo esiqatha? Umpostile uPetros wabhala: “Ukuba umntu olilungisa usindiswa nzima, wobonakala phi na ke yena umntu ongahloneli Thixo nomoni?” (1 Petros 4:18) Ngoko ke, masizimisele ukusoloko sizihlwayelela imbewu yobulungisa.

[Umbhalo osemazantsi]

[Umfanekiso okwiphepha 28]

‘Umtsalane’ wazisela uAbhigali “uzuko”

[Imifanekiso ekwiphepha 30]

‘Ongendawo wenza umvuzo wobuxoki, olilungisa, umvuzo oyinyaniso’

[Umfanekiso okwiphepha 31]

‘Hlwayela ngokuyintabalala, uya kuvuna ngokuyintabalala’