Abavakalisi Bobukumkani Bayabalisa

IHolo YoBukumkani Iwongwa Ngembasa

ISEBE LEZENDALO eFinland liye lamisela unyaka wama-2000 ‘Njengonyaka Wokunyamekela Umhlaba.’ Omnye wabaququzeleli wathi “injongo yalo mxholo wonyaka kukusikhumbuza sonke ngendlela izinto eziluhlaza ezisingqongileyo ezinempembelelo ngayo kubomi bethu bemihla ngemihla nakwimpilo yethu.”

NgoJanuwari 12, 2001, iofisi yesebe yamaNgqina kaYehova eFinland yafumana ileta evela kwiFinnish Association of Landscape Industries. Le leta yayichaza ukuba iHolo yoBukumkani yamaNgqina kaYehova yaseTikkurila iye yawongwa ngenye yeembasa zonyaka ngenxa yokugqwesa kwendlela ekhangeleka nelungiswe ngayo iyadi yayo. Le leta yongezelela isithi “indlela ekhangeleka ngayo iyadi yayo, ehlotyeni nasebusika, iyabukeka yaye intle, yaye ikumgangatho ophezulu.”

Le mbasa yanikezelwa kumaNgqina kaYehova kwiRosendahl Hotel eTampere, eFinland, kumsitho ekwakuze izifundiswa noosomashishini abangama-400. IFinnish Association of Landscape Industries yathumela kwiphephandaba nakwamanye amajelo eendaba ingxelo ethi: “Kwiindawo ezahlukahlukeneyo, iiHolo zoBukumkani zamaNgqina kaYehova zisoloko zakhiwe kakuhle. Indlela ezilungiswe ngayo iiyadi zazo ithi ndijonge. IHolo yoBukumkani yaseTikkurila ngomnye umzekelo weyadi entle. Isakhiwo nendlela elungiswe ngayo le yadi inkulu ikwenza ube noxolo lwengqondo.”

EFinland kukho iiHolo zoBukumkani ezingama-233, yaye uninzi lwazo zineeyadi ezintle. Noko ke, eyona nto ezenza ezi zakhiwo zibe ntle ngokwenene, kukuba zisisazulu sonqulo lokwenyaniso nemfundo yeBhayibhile. KumaNgqina kaYehova angaphezu kwezigidi ezithandathu ehlabathini lonke, iHolo yoBukumkani—enoba ikumgangatho ophezulu okanye nje eqhelekileyo—yeyona ndawo ithandwayo. Ngenxa yeso sizathu, ayikhuthalele yaye ayiphatha kakuhle. Nabani na ekuhlaleni wamkelekile kwiiHolo zoBukumkani!