Indlela UYesu Awazalwa Ngayo—Nesizathu Sokuzalwa Kwakhe
“AYINAKWENZEKA loo nto!” Abantu abaninzi abangengomaKristu banokuthetha la mazwi emva kokuba beve ibali elingokuzalwa kukaYesu. Bavakalelwa kukuba akunakwenzeka ukuba intombi enyulu ikhulelwe ize izale unyana ingenandoda. Ucinga ntoni wena?
Ngowe-1984, iThe Times yaseLondon yapapasha ileta eyayithetha ngalo mbandela, isithi: “Akukho ngqiqweni ukungqina imimangaliso ibubuxoki ngokusebenzisa inzululwazi. Ukukholelwa ukuba imimangaliso ayinakwenzeka kufuna ukholo olufana nokuthi zinokwenzeka.” Le leta yatyobelwa ngoonjingalwazi benzululwazi abali-14 kwiiyunivesithi zaseBritani. Bathi: “Siyavuma ukuba intombi enyulu yazala, imimangaliso ekwiincwadi zeVangeli yenzeka yaye noKristu wavuswa.”
Sekunjalo, siyaqondakala isizathu sokuba ubani adideke xa eqala ukuva ngebali likaYesu lokuzalwa yintombi enyulu. Umama kaYesu owayeyintombi enyulu naye wayedidekile xa ingelosi kaThixo yathi: “Khangela! uya kukhawula esibelekweni sakho uze uzale unyana, umbize ngokuba nguYesu igama lakhe.” Ephendula, uMariya wabuza: “Kuza kubakho njani na oku, ekubeni ndingenazintlobano zokwazana nandoda?” Yandula ke ingelosi yamchazela ukuba uThixo wayeza kwenza lo mmangaliso ngomoya Wakhe oyingcwele, yongezelela isithi: “UThixo akavakalisi nto ingenakwenzeka.” (Luka 1:31, 34-37) Ngokuqinisekileyo, Lowo wadala inkqubo emangalisayo yokuzala komntu wayesenokukwazi ukubangela ukuba uYesu azalwe yintombi enyulu. Ukuba uThixo udale yonke indalo nemithetho yayo eneenkcukacha, wayenokulisebenzisa iqanda eliphuma esibelekweni sikaMariya ukuze avelise uNyana ongumntu ofezekileyo.
Isizathu Sokuba Kube Yimfuneko
Indoda eyayihlonela uThixo uYosefu yayiganelwe ukutshata noMariya ngexesha lokukhulelwa kwakhe. Ephupheni, ingelosi kaThixo yacacisela uYosefu isizathu esihle sokuba intombi enyulu awayeza kutshata nayo yayikhulelwe. Le ngelosi yathi: “Musa ukoyika ukumthabatha umse ekhaya uMariya umfazi wakho, kuba oko akukhawuleyo kungomoya oyingcwele. Uya kuzala unyana, uze umbize ngokuba nguYesu igama lakhe, kuba uya kusindisa abantu bakowabo ezonweni zabo.” (Mateyu 1:20, 21) Igama likaYesu ngesiHebhere lithetha ukuthi “UYehova Ulusindiso.” Eli gama lisikhumbuza imfuneko yokusindiswa esonweni nasekufeni nelungiselelo likaYehova uThixo lolu sindiso ngoYesu.
Kuba umntu wokuqala, uAdam, wonayo, yonke inzala yakhe yazalwa ingafezekanga, ityekele ekwaphuleni imithetho kaThixo. (Roma 5:12) Inzala ka-Adam yayinokusindiswa njani kwisono ize ifezeke? Ukuze kuzaliswe ubulungisa, kwakufanele kuhlawulwe ngobunye ubomi bomntu ofezekileyo, obabunexabiso elilinganayo nelika-Adam. Yiloo nto uThixo wabangela ukuba umntu ofezekileyo, uYesu, azalwe ngokungummangaliso yaye yiloo nto noYesu wavumela iintshaba zakhe ukuba zimbulale. (Yohane 10:17, 18; 1 Timoti 2:5, 6) Emva kokuvuswa nokunyukela kukaYesu kubomi basezulwini, eqinisekile wayenokuthi: “Ndandifile, kodwa, khangela! Ndiyaphila ngonaphakade kanaphakade, yaye ndinazo izitshixo zokufa nezeHadesi [ingcwaba eliqhelekileyo lomntu].”—ISityhilelo 1:18.
Enezitshixo zokomfuziselo zokufa neHadesi, uYesu uvulela abantu abanesono indlela yokufumana oko kwalahlwa nguAdam. UYesu wathi: “Ndim uvuko nobomi. Lowo ubonisa ukholo kum, nokuba uyafa, uya kubuyela ebomini; kwaye wonk’ ubani ophilayo aze abonise ukholo kum akasayi kuze afe konke konke.” (Yohane 11:25, 26) Hayi indlela esisihle ngayo esi sithembiso! Yaye sekunjalo, kukho isizathu esingakumbi sokuba uYesu azalwe.
Esona Sizathu Sibalulekileyo
Ukukhawulwa kukaYesu kwisibeleko sikaMariya kwakungekokuqalisa kobomi bakhe. Ngokucacileyo wathi: ‘Ndihle ezulwini.’ (Yohane 6:38) UYesu wayephila kummandla womoya noYise wasezulwini ekuqaleni kwendalo. Enyanisweni, iBhayibhile imchaza ‘njengesiqalo sendalo kaThixo.’ (ISityhilelo 3:14) Esezulwini, uYesu wabona ukuvukela kwengelosi engendawo eyenza ukuba abantu bokuqala bavukele ulawulo lukaThixo. Oku kwanika uYesu esona sizathu sibalulekileyo sokufuna ukuzalwa njengoNyana kaThixo ongumntu ofezekileyo. Yayisisiphi eso sizathu?
Yayikukungqina ukuba uYise wasezulwini unelungelo lokulawula indalo iphela. Ngokuhlala ethembekile ukususela ekuzalweni kwakhe ukusa ekufeni kwakhe emhlabeni, uYesu wabonakalisa ukufuna kwakhe ukuthobela indlela kaYehova yokulawula izidalwa Zakhe. Ngaphambi kokuba abulawe ziintshaba zikaThixo, uYesu wachaza ngokucacileyo isizathu sokuba afune ukunikela ngobomi bakhe. Wathi wayesenzela ukuze ihlabathi lazi ukuba wayemthanda uYise. (Yohane 14:31) Ukuba abantu bokuqala ababini, uAdam noEva, babenothando olunjalo, ngebabezingqine bethembekile kuvavanyo lwabo olwalulula gqitha.—Genesis 2:15-17.
Kwakhona ukuthembeka kukaYesu kwabhenca ingelosi engendawo, uSathana, njengexoki. USathana wayehlebe uThixo nabantu ngokuthetha la mazwi phambi kweengelosi ezulwini: “Umntu angancama yonke into anayo ngenxa yobomi bakhe.” (Yobhi 2:1, 4, IBhayibhile yesiXhosa yowe-1996) USathana exoka wathi abantu abayi kumthobela uThixo ukuze basindise ubomi babo.
Ezi mbambano zikhankanyiweyo zacela umngeni ukulunga kolawulo lukaThixo. Ukuzizinzisa, uYesu wayekulungele ukuzalwa njengomntu aze azingqine ethembekile kude kuse ekufeni.
Ngaloo ndlela, esona sizathu esiyintloko sokuzalwa kukaYesu emhlabeni, njengoko watsho, ‘kukuze angqinele inyaniso.’ (Yohane 18:37) Wakwenza oko ngokubonisa ngamazwi nangezenzo ukuba ulawulo lukaThixo lulungile ngokupheleleyo yaye ukuzithoba kulo kuphumela kulonwabo oluhlala luhleli. Kwakhona uYesu wacacisa ukuba wayeze emhlabeni ukuze anikele ngobomi bakhe bomntu ‘njengentlawulelo ngenxa yabaninzi,’ evulela indlela abantu abanesono ukuba bafezeke baze bafumane ubomi obungunaphakade. (Marko 10:45) Ukuze abantu baziqonde ezi ngongoma zibalulekileyo, kwakufuneka kubekho ingxelo engokuzalwa kukaYesu. Ukongezelela, iziganeko ezenzeka ebudeni bokuzalwa kukaYesu ziqulethe ezinye izifundo ezibalulekileyo, njengoko inqaku elilandelayo liza kubonisa.
[Imifanekiso ekwiphepha 4]
Inzala ka-Adam yayiza kusindiswa njani esonweni?