‘Kutheni Thixo Uvumele Oku Kwenzeke?’
URICARDO usakhumbula ehleli nomfazi wakhe, uMaria, belindele ugqirha.a Akukho namnye kubo owayenenkalipho yokufunda incwadi eyayibhalwe ngugqirha emva kokuba exilonge uMaria. Wandula ke uRicardo wayivula loo mvulophu, baze bayijonga ngokukhawuleza le ngxelo kagqirha. Baphawula igama elithi “umhlaza,” yaye bobabini baqalisa ukulila njengoko beqonda oko kuthethwa lelo gama.
URicardo uthi: “Lo gqirha wayenobubele kakhulu, kodwa wayeyiqonda indlela eyayinzima ngayo le meko kuba wayesoloko esithi sifanele sithembe uThixo.”
Ngaphambi kokuba kuqaliswe unyango olubizwa ngokuba yiradiation, ugqirha kaMaria waphawula ukuba unyawo lwakhe lwasekunene lwaluzishukumela. Xa waphinda waxilongwa kwaphawulwa ukuba umhlaza wawusele ufikelele nasebuchotsheni. Emva nje kokunyangwa iveki enye, olu nyango lweradiation lwayekwa. UMaria wasuka akabikho zingqondweni waza wafa kwiinyanga ezimbini kamva. URicardo uthi: “Ndiyavuya kuba ngoku engaseva zintlungu, kodwa ndimkhumbula kakhulu kangangokuba nam ndiye ndinqwenel’ ukufa. Ndandidla ngokumkhalela uThixo ndithi: ‘Kutheni uvumele oku kwenzeke?’”
Xa Kusehla Iintlekele, Kubakho Imibuzo Emininzi
NjengoRicardo, abantu abaninzi ehlabathini lonke bayabandezeleka. Ngamaxesha amaninzi, kubandezeleka abantu abangenatyala. Khawucinge ngentlungu engathethekiyo ebangelwa ziimfazwe ezithwaxa uluntu. Okanye khawucinge ngentlungu ebangelwa kubantu abaninzi abadlwengulwayo, abantwana abaxhatshazwayo, ukubethwa ekhaya nezinye izinto ezimbi ezibangelwa ngabantu. Kuyo yonke imbali abantu bebesoloko bephathana ngolunya nto leyo eye yabangela intlungu. (INtshumayeli 4:1-3) Kwakhona kukho abantu abehlelwa ziintlekele zokwemvelo okanye abagula ngokweemvakalelo, ngengqondo nasemzimbeni. Akumangalisi ke ngoko ukuba abaninzi bebuza, “Kutheni uThixo evumele ukubandezeleka?”
Kwanakwabo bangamakholwa, akubi lula ukujamelana neembandezelo. Nawe usenokuzibuza isizathu sokuba uThixo onothando, nonamandla avumele ukuba abantu babandezeleke. Ukufumana impendulo eyanelisayo neyinyaniso kulo mbuzo udidayo kubalulekile ukubeni noxolo lwengqondo nokuba nolwalamano noThixo. IBhayibhile iyawuphendula lo mbuzo. Phawula oko ikuthethayo njengoko kuboniswe kwinqaku elilandelayo.
[Umbhalo osemazantsi]
a Amagama atshintshiwe.
[Imifanekiso ekwiphepha 3]
Ugqirha wayesoloko esithi sifanele sithembe uThixo