Indlela Yokuhlakulela Isimo Sengqondo Esilungeleleneyo Ngomsebenzi

KWIHLABATHI lanamhlanje elinengcinezelo egqithiseleyo kurhwebo lwehlabathi, ukhuphiswano oluqatha nokuveliswa kwezinto ngamanani amakhulu, suku ngalunye abantu abaninzi baphelelwa ngumdla wokuya emsebenzini. Sekunjalo, sifanele siwuvuyele umsebenzi wethu. Ngoba? Kuba sidalwe ngokomfanekiso kaThixo—yaye uThixo uyawuthanda umsebenzi wakhe. Ngokomzekelo, xa wayejonga oko wayekwenzile ekupheleni ‘kweentsuku’ ezintandathu zokudala, okanye ixesha elide, iGenesis 1:31 ithi: “UThixo wazibona zonke izinto awayezenzile, khangela! zilunge gqitha.”

Ukuwuthanda kukaYehova umsebenzi ngokuqinisekileyo sesinye isizathu esimenza abizwe ngokuba ‘nguThixo onoyolo.’ (1 Timoti 1:11) Ngoko ke, ngaba akukho ngqiqweni ukuba okukhona simxelisa, kokukhona siya konwaba? Ngokuphathelele oku, uKumkani uSolomon wakwaSirayeli wamandulo, umakhi nomququzeleli obalaseleyo, wabhala esithi: “Wonk’ umntu ufanele adle, asele aze ngokwenene abone okulungileyo kuko konke ukusebenza kwakhe nzima. Sisipho sikaThixo eso.”—INtshumayeli 3:13.

Kusenokuba nzima ukuhlakulela isimo sengqondo esilungeleleneyo nesifanelekileyo ngomsebenzi kwiindawo zengqesho eziguquguquka ngokukhawuleza namhlanje. Kodwa uYehova uThixo uyabasikelela abo baphulaphula ulwalathiso lwakhe lothando. (INdumiso 119:99, 100) Abo banjalo baba ngabaqeshwa abaxatyisiweyo nabanokuthenjwa yaye ngaloo ndlela abanakufane baphulukane nomsebenzi wabo. Kwakhona bafunda ukubujonga ubomi babo nomsebenzi kungekhona ngokwembono yokwenyama kodwa ngeyokomoya. Oku kubenza bakwazi ukwenza izigqibo ezifanelekileyo ebomini baze babone ukuba ukonwaba nokunqabiseka kwabo akuxhomekekanga emsebenzini wabo okanye kwiimeko zengqesho ezingaqinisekanga ngamaxesha amaninzi. (Mateyu 6:31-33; 1 Korinte 2:14, 15) Oku kuyabanceda ukuba bahlakulele imilinganiselo yokwenene nelungeleleneyo yokusebenza.

Hlakulela Imilinganiselo Yokusebenza Ekholisa UThixo

Abanye abantu bangamakhoboka omsebenzi, kubo umsebenzi uza kuqala kunezinye izinto. Abanye basebenza bengxamele ukugoduka. Yiyiphi imbono elungeleleneyo? IBhayibhile iyaphendula: “Kulunge ngakumbi ukuzalisa isandla ngokuphumla kunokuzalisa izandla zozibini ngomsebenzi onzima nokusukelana nomoya.” (INtshumayeli 4:6) Eneneni, ukusebenza kakhulu okanye ixesha elide, kubangela iingxaki—kulilize, ‘kukusukelana nomoya.’ Kutheni kunjalo? Kuba kusenokonakalisa ezona zinto zisenza sonwabe: ulwalamano lwethu nentsapho nabahlobo, impilo yethu yokomoya, eyokwenyama kwanamathuba ethu okuphila ixesha elide. (1 Timoti 6:9, 10) Eyona mbono ilungeleleneyo kukwaneliseka zizinto eziphathekayo ezimbalwa ndawonye nomlinganiselo osengqiqweni woxolo lwengqondo kunokuba sizifombe ngomsebenzi ohambisana nokukhathazeka nentlungu.

Ngoxa ikhuthaza imbono enjalo elungeleleneyo, iBhayibhile ayikhuthazi ubuvila. (IMizekeliso 20:4) Ubuvila bunokusenza singazihloneli baze nabanye bangasihloneli. Eyona nto imbi kakhulu, kukuba bonakalisa ulwalamano lwethu noThixo. IBhayibhile itsho ngokucacileyo ukuba xa umntu engafuni ukusebenza akafanelanga aphiwe ukutya. (2 Tesalonika 3:10) Kunoko, ufanele atshintshe iindlela zakhe aze azibhokoxe emsebenzini, ngaloo ndlela ondle yena nentsapho yakhe. Ngokuzibhokoxa emsebenzini usenokude akwazi ukunceda nabo baswele ngokwenene—nto leyo ekhuthazwa liLizwi likaThixo.—IMizekeliso 21:25, 26; Efese 4:28.

Ukuqeqeshwa Kwasebuntwaneni Ukuze Uwuxabise Umsebenzi

Imikhwa emihle yokusebenza ayizenzekeli, ifundwa kwasebuntwaneni. Ngenxa yoko, iBhayibhile ibongoza abazali isithi: “Yiqeqeshe inkwenkwe [okanye intombazana] ngokwendlela yayo; naxa indala ayisayi kuphambuka kuyo.” (IMizekeliso 22:6) Ngaphandle kokubabekela umzekelo omhle njengabasebenzi, abazali abalumkileyo baqalisa ukuqeqesha abantwana babo ekhaya ngokubanika imisetyenzana ngokobudala babo. Nangona abantwana basenokungayithandi le misebenzi, baya kuzibona bengamalungu entsapho axatyisiweyo—ingakumbi xa uMama noTata bebancoma ngomsebenzi abawenze kakuhle. Okubuhlungu kukuba, abanye abazali babenzela yonke into abantwana babo, mhlawumbi ngokuphosakeleyo becinga ukuba babenzela ububele. Abazali abanjalo bafanele bacinge ngeMizekeliso 29:21, ethi: “Ukuba ubani umtefisa kwasebutsheni umkhonzi [okanye umntwana] wakhe, kamva ekuphileni kwakhe uya kuba ngongenambulelo.”

Kwakhona abazali abanenyameko banomdla ngokwenene kwimfundo yabantwana babo, bebakhuthaza ukuba bafunde yaye bazibhokoxe ngoxa besesesikolweni. Oku kuya kubanceda kamva aba baselula xa kufuneka baqalise ukusebenza.

Wukhethe Ngobulumko Umsebenzi

Nangona ingasixeleli ukuba sikhethe hlobo luni lomsebenzi, iBhayibhile isinika imilinganiselo emihle ukuze ukuhambela phambili kwethu ngokomoya, ukukhonza uThixo, nezinye iimbopheleleko ezibalulekileyo zingatyeshelwa. Ngokomzekelo, umpostile uPawulos wabhala: “Ixesha eliseleyo lifinyele. Ukususela ngoku abo . . . balisebenzisayo eli hlabathi babe njengabangalisebenzisi ngokupheleleyo; kuba imeko yeli hlabathi iyatshintsha.” (1 Korinte 7:29-31) Ayikho into esisigxina okanye ezinze ngokupheleleyo kule nkqubo ikhoyo yezinto. Ukuchitha lonke ixesha namandla ethu kuyo kufana nokuchitha yonke imali yethu kwindlu eyakhiwe kwindawo enezikhukula. Enjani yona ukuba bubudenge into!

Ezinye iinguqulelo zeBhayibhile ziguqulele ibinzana elithi “njengabangalisebenzisi ngokupheleleyo” ngokuthi “njengabangangenanga zwabha” nokuthi “njengabangathanga phithi.” (The Jerusalem Bible; Today’s English Version) Abantu abalumkileyo abasibethi ngoyaba isibakala sokuba ixesha lale nkqubo ikhoyo “lifinyele” yaye ‘ukungena zwabha’ okanye ‘ukuthi phithi’ yiyo kuya kukhokelela ekuphoxekeni nasekuzisoleni.—1 Yohane 2:15-17.

‘UThixo Akasoze Akutyeshele’

UYehova uyazazi iintswelo zethu ngaphezu kokuba sizazi. Kwakhona uyazi ukuba siphila kwiliphi ixesha ngokuphathelele iinjongo zakhe. Ngenxa yoko, usikhumbuza esithi: “Musani ukuba ngabathandi bemali, kunoko yanelani zizinto ezikhoyo. Kuba [uThixo] uthe: ‘Andiyi kuze ndikushiye, ndingayi kuze ndikutyeshele.’” (Hebhere 13:5) Hayi indlela ayintuthuzelo ngayo loo mazwi! Exelisa indlela uThixo abaxhalabele ngothando ngayo abantu bakhe, uYesu wachitha ixesha elininzi kwiNtshumayelo yakhe edumileyo yaseNtabeni efundisa abalandeli bakhe imbono efanelekileyo ngomsebenzi nangezinto eziphathekayo.—Mateyu 6:19-33.

AmaNgqina kaYehova azabalazela ukuzisebenzisa ezo mfundiso. Ngokomzekelo, xa umqeshi wacela iNgqina eliligcisa lombane ukuba lisebenze ixesha elongezelelekileyo ngokusisigxina, lo mqeshwa akazange avume. Kwakutheni? Kungokuba wayengafuni ukuba umsebenzi wakhe wengqesho uphazamisane nexesha alichitha nentsapho yakhe nakwimibandela yokomoya. Ekubeni wayengumsebénzi okhutheleyo nothenjiweyo, umqeshi wakhe wavumelana nesi sicelo. Kakade ke, izinto azisoloko zihamba ngaloo ndlela, yaye ubani kusenokufuneka aye kufuna omnye umsebenzi ukuze aphile ubomi obulungeleleneyo. Sekunjalo, abo bakholosa ngokupheleleyo ngoYehova ngokuqhelekileyo bafumanisa ukuba ukuziphatha kwabo kakuhle nokuba nemilinganiselo efanelekileyo emsebenzini kubenza bathandwe ngabaqeshi babo.—IMizekeliso 3:5, 6.

Xa Wonke Umsebenzi Uya Kuba Uvuyisa

Kule nkqubo ikhoyo nengafezekanga yezinto, azisoze ziphele iingxaki zomsebenzi nokungaqiniseki kwamathuba awo. Eneneni, izinto zisenokuya zisiba mbi njengoko ihlabathi nezoqoqosho zisiya zingazinzi okanye zidodobala. Kodwa izinto azisayi kuhlala zinjalo. Kungekudala, akukho mntu ongayi kuba namsebenzi. Ngaphezu koko, wonke umsebenzi uya kuba nenjongo uze uvuyise. Kunokwenzeka njani oko? Yintoni enokuzisa inguqulelo enjalo?

Esebenzisa umprofeti wakhe uIsaya, uYehova walatha phambili kwelo xesha. UYehova wathi: “Ndidala amazulu amatsha nomhlaba omtsha; kwaye izinto zangaphambili aziyi kukhunjulwa, zinganyuki zithi qatha entliziyweni.” (Isaya 65:17) Wayethetha ngorhulumente wakhe omtsha, apho kuya kuphila ibutho elitsha labantu nelahlukileyo.—Daniyeli 2:44.

Ngokuphathelele indlela abantu abaya kuphila baze basebenze ngayo, esi siprofeto sihlabela mgama sisithi: “Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kwakha kuhlale abanye; abayi kutyala kudle abanye. Kuba njengemihla yomthi iya kuba njalo imihla yabantu bam; nomsebenzi wezandla zabanyuliweyo bam baya kuwusebenzisa ngokupheleleyo. Abayi kubulalekela ilize, bengayi kuzalela ukuphazamiseka; ngenxa yokuba bayinzala eyenziwe ngabasikelelweyo bakaYehova, nabaphume kubo bakunye nabo.”—Isaya 65:21-23.

Hayi indlela eliya kuba ngumahluko ngayo ihlabathi elitsha likaThixo! Ngaba akufuni ukuphila kwihlabathi elinjalo, apho ungasayi “kubulalekela ilize” kodwa apho uya kuvuyiswa ‘sisiqhamo’ semisebenzi yakho? Noko ke, phawula ukuba abo baya kufumana ezi ntsikelelo: “Bayinzala eyenziwe ngabasikelelweyo bakaYehova.” Nawe unokuba ngomnye wabo “basikelelweyo” ngokufunda ngoYehova nokwenza oko akufunayo. UYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” (Yohane 17:3) AmaNgqina kaYehova aya kukuvuyela ukukunceda ukuze ufumane ulwazi olunika ubomi ngokufundisisa ngokucwangcisiweyo iLizwi likaThixo, iBhayibhile.

[Ibhokisi ekwiphepha 6]

“ASOLOKO EFUNWA”

IBhayibhile ithi: “Nayiphi na into eniyenzayo, yenzeni ngomphefumlo uphela ngokungathi niyenzela uYehova, kungekhona abantu.” (Kolose 3:23) Ngokucacileyo, umntu onemilinganiselo yokusebenza elawulwa ngulo mgaqo mhle uya kusoloko engumsebénzi ofunwayo. Ngenxa yeso sizathu, uJ. J. Luna kwincwadi yakhe ethi How to Be Invisible, ucebisa abaqashi abafuna abasebénzi ukuba bakhangele abantu abangamalungu eenkonzo ezithile, kodwa wongezelela esithi: “Enyanisweni ekugqibeleni siye sikhethe ukuqesha amaNgqina [kaYehova].” Phakathi kwezizathu azinikelayo kukuba aziwa ngokuthembeka, yaye oko kuwenza “asoloko efunwa” kwimisebenzi eyahlukahlukeneyo.

[Imifanekiso ekwiphepha 5]

Ukulungelelanisa umsebenzi nezinto zokomoya nokuzihlaziya kubangela ulwaneliseko