Unqabiseko Nolwaneliseko Emsebenzini Lusengozini
BONKE abantu “banelungelo lokusebenza” ngokutsho kweUniversal Declaration of Human Rights, uxwebhu olwapapashwa ziZizwe Ezimanyeneyo. Noko ke, elo lungelo alisoloko liqinisekile. Unqabiseko emsebenzini luxhomekeke kwizinto ezininzi—ukususela kwimeko yezoqoqosho yasekuhlaleni ukusa kweyomhlaba wonke. Sekunjalo, xa abantu bephelelwa ngumsebenzi okanye besengozini yokuphulukana nawo, badla ngokuqhankqalaza, kubekho izidubedube nodushe. Ambalwa amazwe ezingenzekiyo kuwo ezi zinto. Omnye umbhali wathi kwanegama elithi “umsebenzi, njengokuba bekusoloko kunjalo, ligama elicaphukisayo.”
Umsebenzi ubaluleke kuthi ngezizathu ezininzi. Ngaphandle kokuba usenza sifumane imali, usenza siphile engqondweni nangokweemvakalelo. Umsebenzi wanelisa umnqweno womntu wokuba lilungu eliluncedo ebantwini nokuba nenjongo ebomini. Ukwasenza sizive sizihlonela. Ngenxa yoko, kwanabo banemali eninzi ukwanelisa iintswelo zabo okanye abanokukwazi ukuthabatha umhlala-phantsi basakhetha ukuqhubeka besebenza. Ewe, umsebenzi ubalulekile kangangokuba xa ungekho, udala iingxaki ezininzi zentlalo.
Kwelinye icala, kukho abo basebenzayo kodwa abaneengxaki ezininzi emsebenzini kangangokuba abasafumani lwaneliseko kuwo. Ngokomzekelo, ngenxa yokhuphiswano olukhoyo namhlanje emsebenzini, iinani elandayo leenkampani liye laphungula abasebenzi ukuze linciphise iindleko. Oku kusenokubangela umthwalo ongakumbi kwabo baseleyo, ekusenokufuneka basebenze nzima ngakumbi.
Ubugcisa bezi mini, obebufanele benze ubomi bube lula nomsebenzi wenziwe ngobuchule obungakumbi, busenokuba buye bongezelela ingcinezelo engakumbi emsebenzini. Ngokomzekelo, iikhompyutha, oomatshini befax neInternet, ezo zinto ziye zenza abantu bakwazi ukuthabatha umsebenzi baye kuwenza ekhaya ekupheleni kosuku nto leyo ebangela kube nzima ukwenza umahluko phakathi kwekhaya neofisi. Omnye umsebénzi wayevakalelwa kukuba ipager necell phone yenkampani awayeyisebenzela zazifana nomkhala ongabonakaliyo, otsalwa ngumqashi wakhe kwelinye icala.
Olona loyiko lwandayo phakathi kwabantu abadala kwimeko yezoqoqosho eguquguquka ngokukhawuleza nasemsebenzini kukujongwa njengabantu abangaselulo uncedo. Ngokuphathelele lo mba, owayesakuba nguMmeli Wamalungelo Abantu uChris Sidoti wathi: “Kukho ingcamango yokuba ngaphandle kokuba uneminyaka engaphantsi kwama-40 ubudala, akunakukwazi ukuyisebenzisa kakuhle ikhompyutha nobugcisa bezi mini.” Ngenxa yoko, abasebenzi abaninzi abakhutheleyo ababegqalwa njengabanempumelelo ebomini ngoku kuthiwa badala kakhulu ukuba bangaba luncedo. Enjani yona intlungu!
Kuyaqondakala ukuba kwiminyaka yakutshanje, imilinganiselo yokusebenza nokunyaniseka kwinkampani ubani ayisebenzelayo iye yawohloka. Kwiphephancwadi lesiFrentshi iLibération kuthiwa: “Xa iinkampani zidenda abantu ngenxa nje yokuhla kancinane kwamaxabiso ezorhwebo, abantu abasakuboni kubalulekile ukunyaniseka kwiinkampani abasebenza kuzo. Kakade ke ufanele uzisebenzele, ungasebenzeli inkampani ethile.”
Phezu kwazo nje ezi ngxaki zandayo, kuseyimfuneko ukuba abantu baqhubeke besebenza. Ngoko ke, kula maxesha ethu aguquguquka ngokukhawuleza, ubani unokusihlakulela njani isimo sengqondo esilungeleleneyo ngomsebenzi, kwangaxeshanye azive enqabisekile yaye enelisekile emsebenzini?
[Umfanekiso okwiphepha 3]
Kusenokwenzeka ukuba ubugcisa bezi mini buye babangela ingcinezelo engakumbi emsebenzini