Ngaba Umntwana Wam Ufanele Aye Esikolweni?

UCINGA ukuba ubuya kuziva njani ukuba ubungakwazi ukufunda amagama akweli phepha? Kuthekani ukuba ubungakwazi ukuthetha ulwimi olusemthethweni kwilizwe lakho? Masithi ubungakwazi ukwalatha indawo ozalelwe kuyo kwimaphu yehlabathi? Abantwana abaninzi baza kukhula benjalo. Kuthekani ngomntwana wakho?

Ngaba umntwana wakho ufanele aye esikolweni? Kumazwe amaninzi, imfundo yamabanga aphantsi naphakathi isisinyanzelo yaye idla ngokufumaneka ngesisa. IConvention on the Rights of the Child iyigqala imfundo yamabanga aphantsi njengelungelo elisisiseko. Oku kunjalo nangeUniversal Declaration of Human Rights. Noko ke, kwamanye amazwe, imfundo isenokungafumaneki ngesisa yaye oku kusenokuthetha imali eninzi kubazali. Makhe siwukhangele lo mbandela ngokweliso labazali abangamaKristu abafuna abantwana babo bafunde, esikolweni okanye ngezinye iindlela.

Imizekelo EseBhayibhileni Yemfundo

Inkoliso yabakhonzi bakaThixo ekuthethwe ngabo eBhayibhileni babekwazi ukufunda nokubhala. Abapostile bakaYesu uPetros noYohane babengabalobi abangamaYuda kodwa babhala iincwadi zesiGrike zeBhayibhile, kungekhona ngolwimi lwesizwana saseGalili.a Kubonakala ukuba abazali babo baqiniseka ukuba abantwana babo bayifumene imfundo esisiseko. Abanye ababhali beBhayibhile ababekwimeko efanayo baquka uDavide owayengumalusi, uAmosi owayengumlimi, nomntakwaboYesu ngonina uYude, ekunokwenzeka ukuba wayengumchweli.

Indoda enguYobhi yayikwazi ukufunda nokubhala, yaye incwadi yeBhayibhile ebizwa ngegama lakhe ibonisa ukuba wayenolwazi oluthile ngenzululwazi. Kusenokwenzeka ukuba wayekwazi nokubhala imibongo, kuba amazwi akhe acatshulwe kwincwadi kaYobhi abumbongo. Yaye siyazi ukuba amaKristu okuqala ayefundile kuba amanye amanqaku eZibhalo awayewabhala kwiintlanganiso zawo aye afumaneka kwiingcedevu okanye iingceba zezitya zodongwe ezaphukileyo.

Imfundo Ibalulekile KumaKristu

Onke amaKristu afanele enze inkqubela kulwazi lwawo lweBhayibhile ukuze akholise uThixo. (Filipi 1:9-11; 1 Tesalonika 4:1) Ukuzisebenzisa ngenkuthalo iZibhalo neencwadi eziluncedo ekufundisiseni iBhayibhile kunokwenza ubani aqhubele phambili ngokomoya. Ekubeni uThixo elungiselele iLizwi lakhe elibhaliweyo, ulindele ukuba abakhonzi bakhe bakwazi ukufunda kangangoko kunokwenzeka. Ukufunda iBhayibhile uyiqonda kwenza kube lula ukusebenzisa isiluleko sayo. Kakade ke, kusenokufuneka sifunde iinxalenye zayo ngaphezu kwesihlandlo esinye ukuze siziqonde iingongoma ezithile size sikwazi ukucamngca ngazo.—INdumiso 119:104; 143:5; IMizekeliso 4:7.

Nyaka ngamnye, abantu bakaYehova bafumana umbandela obhaliweyo omninzi wokubanceda olungiselelwe ngolwalathiso ‘lwekhoboka elithembekileyo neliyingqondi.’ (Mateyu 24:45-47) Ezi ncwadi zithetha ngobomi bentsapho, amasiko, unqulo, inzululwazi neminye imibandela emininzi. Okona kubalulekileyo, ziqulethe isiluleko seZibhalo ngemibandela yokomoya. Ukuba abantwana bakho abakwazi ukufunda, baya kulahlekelwa yinkcazelo ebalulekileyo.

Ukufunda ngemvelaphi yabantu kubalulekile kuba kusinceda siqonde isizathu sokuba kukho imfuneko yoBukumkani bukaThixo. Ulwazi olusisiseko ngokuma komhlaba nalo lubalulekile. IBhayibhile ithetha ngeendawo ezininzi, njengakwaSirayeli, iYiputa neGrisi. Ngaba umntwana wakho angakwazi ukuzifumana ezo ndawo kwimaphu yehlabathi? Ngaba angalalatha ilizwe lakhe? Ukungakwazi ukufunda imaphu kusenokubangela ubani angakwazi ukubufeza kakuhle ubulungiseleli kwintsimi ayabelweyo.—2 Timoti 4:5.

Amalungelo Ebandleni

Abadala abangamaKristu nezicaka zolungiselelo baneembopheleleko ezininzi ezibandakanya ukufunda. Ngokomzekelo, kufuneka balungiselele iintetho zeentlanganiso zebandla. Kufuneka bagcine iingxelo zeencwadi ezihanjisiweyo neminikelo. Ukuba akafundanga kwaphela, ubani uya kukufumanisa kunzima ukusingatha ezi zabelo ngendlela ephumelelayo.

Kumakhaya aseBheteli ehlabathini lonke kukho abasebenzi bokuzithandela. Ukuze aba basebenzi bakwazi ukuncokola kakuhle nokwenza imisebenzi yabo, njengokuguqulela iincwadi nokulungisa oomatshini, bafanele bakwazi ukufunda nokubhala ngolwimi olusemthethweni lwelizwe abahlala kulo. Ukuze abantwana bakho bakwazi ukufumana la malungelo, ngokuqhelekileyo kungafuneka ukuba babe banayo imfundo esisiseko. Ziziphi ezinye izizathu ezibalulekileyo zokuba kufuneke ukuba abantwana bakho bafunde?

Indlala Neenkolelo

Abantu abajamelene nendlala kusenokwenzeka ukuba kwezinye iimeko akukho nto banokuyenza. Noko ke, kwezinye iimeko umlinganiselo othile wemfundo unokusinceda thina nabantwana bethu ukuze sikuphephe ukubandezeleka ngokungeyomfuneko. Bambalwa abantu abangafundanga abaphila ubomi obunqabisekileyo. Abantwana kunye nabazali ngamanye amaxesha bayafa kuba bafumana umvuzo omncinane nto leyo ekwenza kube nzima ukufumana unyango. Ukungondleki nokuhlala kwizindlu ezikumgangatho ophantsi kudla ngokuba yingxaki abantu abangafundanga kuyaphi okanye abangafundanga kwaphela abajamelana nayo. Imfundo okanye ubuncinane ukukwazi ukufunda nokubhala kusenokuba luncedo kwezi nkalo.

Kwakhona imfundo inciphisa amathuba okuba neenkolelo. Kakade ke, ukuba neenkolelo kuxhaphakile kubantu abafundileyo nabangafundanga. Kodwa abo bangafundanga basenokukhohliseka lula baze baxhatshazwe ngabanye, ekubeni bengakwazi ukufunda izinto ezibhaliweyo ezityhila loo nkohliso. Ngenxa yoko, badla ngokuba neenkolelo ezingakumbi yaye bakholelwe ukuba banokuphiliswa ngamagqirha ngommangaliso.—Duteronomi 18:10-12; ISityhilelo 21:8.

Imfundo Ayisenzi Sifumane Umsebenzi Kuphela

Abaninzi bacinga ukuba eyona njongo yemfundo kukufumana imali kuphela. Kanti, abanye abantu abafundileyo abasebenzi okanye abafumani mali yaneleyo yokuziphilisa. Abanye abazali basenokucinga ukuba akuncedi nto ukuthumela umntwana esikolweni. Kodwa isikolo asincedi nje kuphela ukuba ubani afumane imali; sinceda abantwana ukuba bakwazi ukujamelana nobomi ngokubanzi. (INtshumayeli 7:12) Ukuba ubani uyakwazi ukuthetha, ukufunda nokubhala ulwimi olusemthethweni lwelizwe ahlala kulo, kuba lula kuze kube yinto nje eqhelekileyo ukusebenzisana nabezonyango, amagosa karhulumente, okanye abantu abasebenza ebhankini kunokuba koyikise.

Kwezinye iindawo, abantwana abangafundanga basenokunikwa umntu othile oza kubafundisa ukwakha, ukuloba, ukuthunga okanye eminye imisebenzi. Kuhle ukufunda umsebenzi wezandla, kodwa ukuba aba bantwana abazange baye esikolweni, kusenokwenzeka ukuba abasoze bakwazi ukufunda nokubhala kakuhle. Ngokuqinisekileyo baya kukwazi ngakumbi ukukuphepha ukuxhatshazwa yaye basenokuphila ubomi obunenjongo ngakumbi ukuba baqale bafumana imfundo esisiseko emva koko ke bafunde umsebenzi wezandla.

UYesu waseNazarete wayengumchweli yaye kubonakala ukuba wafundiswa nguyise owayemkhulisa, uYosefu. (Mateyu 13:55; Marko 6:3) Kwakhona uYesu wayefundile, kuba naxa waneminyaka eli-12 ubudala, wayekwazi ukuthetha into enengqondo nabantu abafundileyo etempileni. (Luka 2:46, 47) Kwimeko kaYesu, ukufunda umsebenzi wezandla akuzange kumphazamise kwezinye izinto awayefanele azifunde.

Ngaba Namantombazana Afanele Afundiswe?

Ngamanye amaxesha abazali bathumela oonyana esikolweni kodwa kungekhona amantombazana. Mhlawumbi abanye abazali bacinga ukuba kubiza imali eninzi ukufundisa amantombazana yaye bakholelwa kukuba amantombazana anokuba luncedo ngakumbi xa ehleli ekhaya imini yonke. Kodwa ukungafundi kuya kumbangela ingxaki umntwana wakho oyintombazana. Incwadi yeUnited Nations Children’s Fund (UNICEF) ithi: “Uhlolisiso olwenziwe izihlandlo ezininzi lubonise ukuba ukufundisa amantombazana yenye yezona ndlela zibalaseleyo zokuphelisa ubuhlwempu.” (Poverty and Children: Lessons of the 90s for Least Developed Countries) Amantombazana afundileyo aphumelela ngakumbi ebomini yaye enza izigqibo zobulumko ezingakumbi, ngaloo ndlela enceda bonke entsatsheni.

Uhlolisiso olwenziwe ngokufa kweentsana eBenin, eNtshona Afrika, lubonise ukuba oomama abangafundanga bafelwa ngabantwana abaneminyaka engaphantsi kwemihlanu abali-167 kwabali-1 000, ngoxa amabhinqa anemfundo yamabanga aphakathi afelwa ngabangama-38. I-UNICEF igqiba ngelithi: “Ngenxa yoko umgangatho wemfundo unegalelo ekufeni kweentsana eBenin, njengokuba kunjalo ehlabathini lonke.” Ngoko ke, ukufundisa amantombazana akho kunokuba luncedo ngeendlela ezininzi ezahlukahlukeneyo.

Ngaba Kwanele Ukufunda Kwiiklasi Zokufundisa Ukulesa Nokubhala?

Apho kuyimfuneko, amaNgqina kaYehova aneeklasi zokufundisa ukulesa nokubhala ukunceda amalungu ebandla angakwaziyo ukufunda.b Eli lungiselelo linceda abantu bafunde ukulesa nokubhala, ngokuqhelekileyo ngolwimi lwabo lwasekuhlaleni. Ngaba oku kuthabathel’ indawo imfundo yasesikolweni? Ngaba ibandla lilindeleke ukuba lifundise umntwana wakho enoba zikho izikolo eziqhelekileyo?

Nangona iiklasi zokufunda ukulesa nokubhala zililungiselelo lothando elenziwa ngamabandla amaNgqina kaYehova, injongo yazo kukunceda abantu abadala abangazange bawafumane amathuba okuya esikolweni ngoxa babengabantwana. Kusenokwenzeka ukuba, abazali babo abazange bakubone ukubaluleka kokukwazi ukufunda, okanye kwakungekho zikolo. Abantu abanjalo banokuncedwa ngokuya kwiiklasi zokufunda ukulesa nokubhala eziqhutywa emabandleni. Kodwa ezi klasi azithabathel’ indawo isikolo esiqhelekileyo yaye azenzelwanga ukufundisa imfundo yamabanga aphantsi. Kwezi klasi zokufunda ukulesa nokubhala akufundiswa inzululwazi, izifundo zezibalo okanye zembali. Noko ke, ezi zifundo zinokufundwa kucwangciso oluqhelekileyo lwasesikolweni.

EAfrika, ubukhulu becala iiklasi zokufunda ukulesa nokubhala ziqhutywa ngeelwimi zezizwana yaye azifane ziqhutywe ngolwimi olusemthethweni lwelizwe. Noko ke, imfundo yasesikolweni ngokuqhelekileyo iqhutywa ngolwimi olusemthethweni. Oku kuluncedo ngakumbi ebantwaneni kuba bafumana iincwadi nezinye izinto ezahlukahlukeneyo zokufunda ngolwimi olusemthethweni. Nangona iiklasi zokufundisa ukulesa nokubhala zinokongeza kwimfundo yomntwana yasesikolweni, azinakuyithabathel’ indawo. Ukuba kunokwenzeka, ngaba abantwana abafanele bafumane imfundo yasesikolweni?

Imbopheleleko Yabazali

Amadoda akhokelayo ekunyamekeleni iintswelo ezingokomoya zebandla afanele abe ngamaKristu ayimizekelo. Afanele azongamele “kakuhle” iintsapho zawo. (1 Timoti 3:4, 12) Ukongamela “kakuhle” kuya kuquka ukwenza nantoni na ukunceda abantwana bethu baphephe iingxaki ezizayo.

UThixo unike abazali abangamaKristu imbopheleleko enkulu. Bafanele bakhulise abantwana babo ngokuvumelana neLizwi lakhe baze babancede kukuba ‘bathande ulwazi.’ (IMizekeliso 12:1; 22:6; Efese 6:4) Umpostile uPawulos wabhala: “Ngokuqinisekileyo ukuba nabani na akabalungiseleli abo bangabakhe, ngokukodwa amalungu endlu yakhe, ngokuqinisekileyo ulukhanyele ukholo yaye mbi ngaphezu kongakholwayo.” (1 Timoti 5:8) Nabo abantwana bafanele bafumane imfundo efanelekileyo.

Maxa wambi nayo inkqubo yesikolo isenokuba kumgangatho ophantsi ngenxa yokuba nabantwana abaninzi gqitha, ukungabi namali yaneleyo, okanye mhlawumbi abafundisi-ntsapho abangonwabanga nabangahlawulwa ngokufanelekileyo. Ngoko ke, kubalulekile ngabazali ukuba babe nomdla koko kufundwa ngabantwana babo esikolweni. Kububulumko ukuqhelana nabafundisi-ntsapho, ingakumbi ekuqaleni konyaka, mhlawumbi bade bafune necebiso labo lokwenza abantwana babo abafundi abanenkqubela. Ngaloo ndlela abafundisi-ntsapho banokuziva bexatyiswa baze bakhuthazeke ukuze benze umgudu ongakumbi wokubafundisa abantwana.

Imfundo ibalulekile ekukhuleni komntwana. IMizekeliso 10:14 ithi: “Izilumko ziyalugcina ulwazi.” Oko kuyinyaniso ingakumbi kulwazi lweBhayibhile. Abantu bakaYehova—abaselula nabakhulileyo—bafanele babe nolwazi kangangoko banako ukuze bancede abanye ngokomoya nokuze ‘bazinikele bekholekile kuThixo, bengabasebénzi abangenazintloni nganto, beliphatha ngokufanelekileyo ilizwi lenyaniso.’ (2 Timoti 2:15; 1 Timoti 4:15) Ngoko ke, ngaba abantwana bakho bafanele baye esikolweni? Ngokuqinisekileyo, uya kuvuma ukuba bafanele baye, nangona oku kuya kuxhomekeka koko kuluncedo kwilizwe lakho. Kodwa abazali abangamaKristu bafanele bawuphendule lo mbuzo obaluleke ngakumbi othi, ‘Ngaba abantwana bam bafanele bafunde?’ Enoba uhlala phi, ngaba akuvumi ukuba impendulo ifanele ibe nguewe omkhulu?

[Imibhalo esemazantsi]

[Ibhokisi/Umfanekiso okwiphepha 12, 13]

Xa Kungenakwenzeka Ukuba Aye Esikolweni

Kwezinye iindawo akunakwenzeka ukuba umntwana aye esikolweni. Ngokomzekelo, iphephancwadi iRefugees lathi ngumntwana omnye kuphela kwabahlanu onokuya esikolweni kwiinkampu zeembacu. Kwezinye iimeko, izixholoxholo ziye zabangela ukuba izikolo zivalwe kangangexesha elide. Izikolo zisenokuba kude gqitha okanye zingabikho kwaukubakho kummandla othile. Ukutshutshiswa kwamaKristu kusenokwenza abantwana bagxothwe esikolweni.

Unokubanceda njani abantwana bakho kwiimeko ezinjalo? Yintoni enokwenziwa ukuba unabantwana abaliqela yaye uhlala kwindawo apho iindleko zibangela kube nzima ukubathumela esikolweni? Ngaba unokukwazi ukuthumela umntwana omnye okanye ababini esikolweni ngaphandle kokubabeka engozini ngokomoya? Ukuba kunjalo, banokukwazi ukufundisa abanye abantwana oko bakufundayo esikolweni.

Kwamanye amazwe abantwana bafunda ekhaya.c Ukuba oku kunjalo, omnye wabazali udla ngokuchitha iiyure ezimbalwa efundisa loo mntwana suku ngalunye. Kumaxesha oosolusapho abazali babebafundisa ngokuphumelelayo abantwana babo. Kubonakala ukuba ngenxa yokuqeqeshwa kakuhle ngabazali bakhe, unyana kaYakobi uYosefu wakwazi ukongamela eselula.

Kwiindawo ezinjengeenkampu zeembacu kusenokuba nzima ukufumana ucwangciso lokufunda, kodwa abazali basenokukwazi ukusebenzisa iincwadi ezipapashwe ngamaNgqina kaYehova ukuze babafundise. Ngokomzekelo, Incwadi Yam Yamabali EBhayibhile inokuba luncedo ekufundiseni abantwana abancinane. Iphephancwadi uVukani linamanqaku athetha ngemibandela emininzi eyahlukahlukeneyo. Incwadi ethi Life—How Did It Get Here? By Evolution or by Creation? inokusetyenziswa ekufundiseni inzululwazi. INcwadi Yonyaka YamaNgqina KaYehova inemaphu yehlabathi encinane yaye ithetha ngobomi nangomsebenzi wokushumayela owenziwa kumazwe awahlukahlukeneyo.

Abantwana banokuzuza lukhulu ukuba oko bakufundiswayo kulungiselelwe kakuhle yaye kuvisisana nomgangatho womntwana wokuziqonda izinto. Ukuba bayaqhubeka belesa yaye befunda, kuya kuba lula kubo ukuqhelana nesikolo esiqhelekileyo xa sikho. Ngokuthabatha amanyathelo nokwenza umgudu, unokubanceda abantwana bakho bafumane imfundo efanelekileyo. Oko kunokuba nomvuzo ngokwenene!

[Umbhalo osemazantsi]

[Umfanekiso]

Yintoni enokwenziwa ukuba uhlala kwindawo apho abantwana bakho bengenakuya esikolweni?