“Iye Yanelisa Umnqweno Wentliziyo Yam”
“NDIBAMBA ngazibini ngesipho esihle sencwadi ethi Sondela KuYehova. Iye yanelisa umnqweno wentliziyo yam—umnqweno wokuthandwa nokuxatyiswa nguYehova. Ngoku ndiziva ndisondele kakhulu kuYehova noNyana wakhe othandekayo. Ndifuna ukuxelela wonk’ umntu ngale ncwadi ndize ndinike bonke abo ndibathandayo umbhalo wayo.” Lavakalelwa ngaloo ndlela elinye iNgqina likaYehova ngencwadi entsha enamaphepha angama-320 ekhutshwe kwiiNdibano ZeSithili ‘Zabavakalisi BoBukumkani Abanenzondelelo’ eziqhutywe ngowama-2002/03. Makhe sihlolisise iinkalo ezithile zale ncwadi intsha nesizathu sokupapashwa kwayo.
Iinkalo Ezithile Zale Ncwadi Intsha
Yintoni equlethwe yile ncwadi intsha? Iqulethe yonke inkcazelo ekumanqaku afundisiswayo amabini akule nkupho—nenye engakumbi! Le ncwadi inezahluko ezingama-31, ngasinye kuzo silingana nenqaku elifundisiswayo leMboniselo. Emva kwentshayelelo nezahluko ezithathu zokuqala, le ncwadi yahlulahlulwe yangamacandelo amane, ngalinye lixubusha ngophawu oluyintloko lukaYehova. Candelo ngalinye liqala ngoshwankathelo lophawu elixubusha ngalo. Izahluko ezimbalwa ezilandelayo zixubusha ngendlela uYehova alubonakalisa ngayo olo phawu. Candelo ngalinye linesahluko esithetha ngoYesu. Ngoba? Kaloku, uYesu wathi: “Lowo undibonileyo mna umbonile noBawo.” (Yohane 14:9) Njengoko uYesu emfanekisela ngokugqibeleleyo uYehova, ngoko ungumzekelo ocacileyo wokusebenza kweempawu zikaThixo. Candelo ngalinye liqukumbela ngesahluko esisifundisa indlela esinokumxelisa ngayo uYehova ekubonakaliseni uphawu ekuxutyushwa ngalo. Ekuxubusheni kwayo ngeempawu zikaYehova, le ncwadi intsha icaphula kuzo zonke iincwadi zeBhayibhile.
Le ncwadi ithi Sondela KuYehova ikwanazo nezinye iinkalo ezikhethekileyo. Ukususela kwisahluko 2, sahluko ngasinye sinebhokisi enomxholo othi “Imibuzo Onokucamngca Ngayo.” Izibhalo nemibuzo elapho aziyompinda yesahluko. Kunoko, zikho ngenjongo yokukunceda usebenzise iBhayibhile ekucingisiseni nzulu ngombandela oxutyushwayo. Kunconyelwa ukuba ufundisise ngenyameko Sibhalo ngasinye. Emva koko camngca ngombuzo olapho nangendlela okuchaphazela ngayo wena siqu. Ukucamngca ngolo hlobo kunokuyishukumisa intliziyo yakho, kuze kukuncede ukuba usondele ngakumbi kuYehova.—INdumiso 19:14.
Imifanekiso ekwincwadi ethi Sondela KuYehova ikhethwe ngenyameko ngenjongo yokufundisa nokukhuthaza. Izahluko ezili-17 zinemifanekiso emihle ezalise iphepha nebonisa iziganeko ezichazwe eBhayibhileni.
Siyintoni Isizathu Sokupapashwa Kwayo?
Siyintoni isizathu sokupapashwa kwencwadi ethi Sondela KuYehova? Injongo eyintloko yale mpapasho intsha kukusinceda simazi ngakumbi uYehova khon’ ukuze siqinise ulwalamano lwethu kunye naye.
Ngaba kukho umntu onokucinga ngaye onokuncedwa yile ncwadi ithi Sondela KuYehova, mhlawumbi isifundo seBhayibhile kwanokuba ngumzalwana okanye udade ongumKristu opholileyo? Kuthekani ngawe—ngaba sele uqalile ukuyifunda le ncwadi intsha? Ukuba akukaqali, kutheni ungazibekeli ixesha lokuqala ngokukhawuleza kangangoko kunokwenzeka? Zinike ixesha lokucingisisa ngoko ukufundayo. Ngamana le mpapasho intsha ingakunceda usondele ngakumbi kuYehova uThixo, khon’ ukuze uzivakalise ngovuyo nangenzondelelo engakumbi iindaba ezilungieyo zoBukumkani bakhe!