Ngenelwa Ngokufundisisa Incwadi Ethi Sondela KuYehova
1 KwiiNdibano zeSithili, ‘Zabavakalisi BoBukumkani Abanenzondelelo’ savuya sakufumana incwadi ethi Sondela KuYehova. Abaninzi bayifunda ngoko nangoko le ncwadi. Ngokungathandabuzekiyo abangakumbi bakhuthazwa ngumxholo wonyaka wama-2003 othi: “Sondelani kuThixo, naye uya kusondela kuni.”—Yak. 4:8.
2 KwiSifundo Sencwadi Sebandla ngoMatshi siza kuqalisa incwadi ethi Sondela KuYehova. Sinokungenelwa njani kwisifundo sethu? Ukulungiselela kubalulekile. Isahluko ngasinye siya kuthabatha iiveki ezimbini, zimbalwa iziqendu eziza kufundwa veki nganye. Oku kuza kunivulela ithuba lokuba nigqabaze ngokusuka entliziyweni ngombandela ofundisiswayo nokuba nicamngce ngawo. Ukongezelela, kuza kuxutyushwa iziqendu ezimbalwa xa kufundisiswa iziqendu zokugqibela zesahluko, ukuze kubekho ixesha elaneleyo lokusebenzisa iinkalo ezikhethekileyo zale ncwadi.
3 Ukususela kwisahluko 2, kukho ibhokisi enomxholo othi “Imibuzo Onokucamngca Ngayo” ekupheleni kwesahluko ngasinye. Emva kokuxubusha isiqendu sokugqibela sesahluko, umveleli wesifundo sencwadi uya kuxubusha ibhokisi neqela. Uya kukhuthaza abo baseqeleni lakhe ukuba bagqabaze ngeengongoma abaye bazifumana xa bebecamngca ngeZibhalo. (IMize. 20:5) Ukongezelela kwimibuzo esebhokisini, maxa wambi usenokubuza imibuzo efana nale ilandelayo: “Ikuxelela ntoni le nkcazelo ngoYehova? Ibuchaphazela njani ubomi bakho? Unokuyisebenzisa njani ukuze uncede abanye?” Usukelo lwakhe luya kuba kukufumana amagqabaza asuka entliziyweni, kungekhona ukuvavanya iqela ukuba lazi kangakanani.
4 Incwadi ethi Sondela KuYehova ikhethekile. Nangona iimpapasho ‘zekhoboka elithembekileyo neliyingqondi’ zizukisa uYehova, ubukhulu becala le ncwadi ixubusha ngeempawu zakhe. (Mat. 24:45-47) Elinjani ukuchukumisa ithuba elisilindele ngaphambili! Siya kungenelwa kakhulu ngokufundisisa ubuntu bukaYehova. Ngamana esi sifundo singasinceda sisondele ngakumbi kuBawo wethu wasezulwini, yaye ngamana singaba nobuchule obungakumbi ekuncedeni abanye benze okufanayo.