Ubuhlwempu—Ukufumana Isicombululo Esihlala Sihleli

PHEZU kwazo nje iingxelo ezingathandekiyo ngobuhlwempu ezivela ehlabathini lonke, kukho abo banethemba lokuba kukho into enokwenziwa ngabo. Ngokomzekelo, ngokutsho komxholo okwiManila Bulletin, iAsian Development Bank yathi “iAsia inokubuphelisa ubuhlwempu kwiminyaka engama-25.” Le bhanki yathi kufuneka kunyuswe ezoqoqosho ukuze kuncothulwe bonke ubuhlwempu neengcambu zabo.

Eminye imibutho nabanye oorhulumente baye beza nothotho lwamacebiso neendlela zokucombulula le ngxaki. Phakathi kwazo kukho ezi: imigalelo, ukuphuculwa kwemfundo, ukucinywa kwamatyala anawo amazwe asakhasayo, ukushenxiswa kwemiqobo yokuthunyelwa kwemveliso kwamanye amazwe ukuze abantu abangamahlwempu bakwazi ukuthengisa izinto lula, nokwakhelwa kwamahlwempu izindlu ezikumgangatho ophantsi.

Ngowama-2000, iNgqungquthela YeZizwe Ezimanyeneyo yazenzela usukelo oluza kufikelelwa ngowama-2015. Olu sukelo luquka ukuphelisa ubuhlwempu nokulamba kwakunye nokungalingani kwemivuzo abantu abayifumanayo kumazwe abo. Nangona luluhle ngokwenene olo sukelo, abantu abaninzi bayathandabuza ukuba lunokufikelelwa kweli hlabathi lingamanyenanga.

Iindlela Zokuhlangabezana Nobuhlwempu

Ekubeni kungekho themba lingako ngenkqubela enokwenziwa ehlabathini, umntu unokulufumana phi uncedo? Njengokuba kukhankanyiwe ngaphambili, kukho umthombo wobulumko onokunceda abantu ngoku. Uyintoni? LiLizwi likaThixo, iBhayibhile.

Yintoni eyenza iBhayibhile yahluke kuzo zonke ezinye iincwadi? Ivela kwelona gunya liphakamileyo, uMdali wethu. Kuyo uye waquka ubulumko—imigaqo eluncedo esebenzayo kubo bonke abantu, kuzo zonke iindawo nangalo lonke ixesha. Ukuba le migaqo iyalandelwa, oko kunokunceda amahlwempu anandiphe ubomi obanelisa ngakumbi. Makhe siqwalasele eminye imizekelo.

Yiba nesimo sengqondo esifanelekileyo ngemali. IBhayibhile ithi: “Ubulumko buyakhusela njengokuba nemali ikhusela; kodwa ingenelo yolwazi kukuba ubulumko bubagcina bephila abo banabo.” (INtshumayeli 7:12) Sithetha ukuthini esi sibhalo? Imali ayinakuthenga yonke into. Liyinyaniso elokuba ngokomlinganiselo othile inokusenza sinqabiseke. Isenza sikwazi ukuthenga izinto ezithile eziyimfuneko, kodwa isikelwe umda. Kukho izinto ezibaluleke kakhulu imali engenako ukuzithenga. Ukwazi oku kuya kusinceda sizijonge ngendlela elungeleleneyo izinto eziphathekayo, ngaloo ndlela sikuphephe ukukhathazeka njengabo banikela ingqalelo enkulu ekuqokeleleni ubutyebi. Imali ayikwazi ukuthenga ubomi, kodwa ukwenza izinto ngobulumko kunokusikhusela ngoku yaye kunokusivulela ithuba lokuphila ngonaphakade.

Phila ngoko unako. Izinto esizifunayo akuthethi ukuba zizinto esizisweleyo. Simele siqale ngeentswelo zethu. Sisenokuthi sifuna into ethile ngoxa enyanisweni ingeyonto esiyisweleyo. Umntu onobulumko uya kuqala ngokuyisebenzisela izinto eziyintswelo imali ayamkeleyo—ukutya, impahla, ikhusi njalo njalo. Andule ke, abone enoba imali eseleyo yanele na ukuze athenge izinto ezingakumbi. Kweminye yemizekeliso yakhe, uYesu wancomela ukuba umntu ‘ahlale phantsi kuqala, abale indleko, ukuze abone ukuba unokwaneleyo kusini na.’—Luka 14:28.

KwiiPhilippines, uEufrosina, umzali ongenaqabane onabantwana abathathu, ebetsala nzima yaye efuna ukusebenzisa imali anayo ngobuchule ekubeni umyeni wakhe wamshiya kwiminyaka eliqela eyadlulayo. Ngoxa kunjalo, uye wafundisa abantwana bakhe bakwazi ukuyisebenzisa imali kwizinto ezibalulekileyo. Ngokomzekelo, abantwana basenokubona into abayithandayo. Kunokuba ale, uqiqa nabo ngokuthi: “Unokuyifumana le nto ukuba ukhetha njalo, kodwa umele wenze isigqibo. Imali esinayo yanele ukuthenga into nje enye. Sinokuthenga le nto uyithandayo, okanye sinokuthenga inyama encinane okanye imifuno siyitye nerayisi kule veki. Ngoku ukhetha ntoni? Yenza isigqibo.” Ngokuqhelekileyo, abantwana bayayifumana ingongoma baze bavume ukuba bafuna ukufumana ukutya kunenye into.

Yaneliseka. Omnye umgaqo weBhayibhile uthi: “Ukuba sinesixhaso nesambatho, masaneliswe zezo zinto.” (1 Timoti 6:8) Imali ngokwayo ayizisi lonwabo. Abantu abaninzi abazizityebi abonwabanga, ngoxa abantu abaninzi abangamahlwempu bonwabe gqitha. Aba bantu bangamahlwempu baye bafunda ukwaneliswa zizinto ezilula eziyimfuneko ebomini. UYesu wathetha ngokugcina ‘iliso elingenakumbi’ elinikele ingqalelo kwizinto ezibaluleke ngakumbi. (Mateyu 6:22) Oku kunceda umntu aneliseke. Abantu abaninzi abangamahlwempu banelisekile ngenxa yokuba baye baba nolwalamano oluhle noThixo yaye banobomi obonwabisayo bentsapho—zinto ezo ezingenako ukuthengwa ngemali.

Le yimizekelo nje embalwa yamacebiso eBhayibhile asebenzayo anokunceda abo bangamahlwempu bakwazi ukujamelana neemeko. Mininzi neminye. Ngokomzekelo, yiphephe imikhuba enjengokutshaya nokungcakaza, nto leyo echitha imali; zazi izinto ezibaluleke ngakumbi ebomini, ingakumbi usukelo lokomoya; xa inqongophele imisebenzi, zama ukusebenzisa ubuchule okanye wenze into ethile efunwa ngabantu. (IMizekeliso 22:29; 23:21; Filipi 1:9-11) IBhayibhile ikhuthaza ukuba usebenzise “ubulumko bobuqili namandla okucinga” kuba “oko kuya kuba bubomi emphefumlweni wakho.”—IMizekeliso 3:21, 22.

Nangona amacebiso eBhayibhile anokuba luncedo kwabo bangamahlwempu, kusekho imibuzo ngekamva. Ngaba amahlwempu aya kuhlala ehlwempuzeka ngonaphakade? Ngaba umsantsa ophakathi kwabantu abazizityebi nabangamahlwempu uya kuze uvaleke? Makhe siqwalasele isicombululo abantu abaninzi abangasaziyo.

IBhayibhile Isinika Isizathu Sokuba Nethemba

Abantu abaninzi bayavuma ukuba iBhayibhile yincwadi eluncedo. Noko ke, badla ngokungazi ukuba inikela inkcazelo engqalileyo ethetha ngeenguqu ezinkulu eziza kubakho kungekudala.

UThixo uzimisele ukwenza okuthile ukuze acombulule iingxaki zabantu, kuquka nobuhlwempu. Ekubeni oorhulumente babantu baye abakwazi okanye abafuna ukwenjenjalo, uThixo uzimisele ukuyithabatha indawo yabo. Njani? IBhayibhile igxininisa ithi kuDaniyeli 2:44: “UThixo wezulu uya kumisa ubukumkani obungenakuze bonakaliswe. Yaye obo bukumkani abuyi kudluliselwa kubo nabaphi na abanye abantu. Buya kuzityumza buziphelise zonke ezi zikumkani, buze bona bume ukusa kwixesha elingenammiselo.”

Emva kokuba esuse bonke obo “bukumkani,” okanye oorhulumente, uMlawuli omiselwe nguThixo uya kwenza okuthile. Loo Mlawuli asingomntu oqhelekileyo kodwa sisidalwa esinamandla sasezulwini esinjengoThixo, esinamandla okwenza iinguqu ezinkulu ezifunekayo ukuze kupheliswe ukungalingani okukhoyo. UThixo uye wamisela uNyana wakhe ukwenjenjalo. (IZenzo 17:31) INdumiso 72:12-14 ichaza oko lo Mlawuli aza kukwenza, isithi: “Uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi. Uya kuba nosizi ngesisweli nangehlwempu, nemiphefumlo yabangamahlwempu uya kuyisindisa. Uya kuwukhulula umphefumlo wabo kwingcinezelo nakugonyamelo. Negazi labo liya kuxabiseka emehlweni akhe.” Elinjani lona ithemba! Ekugqibeleni kuya kubakho isiqabu! UMlawuli omiselwe nguThixo uya kuwenzela okuthile abangamahlwempu nabasweleyo.

Iingxaki ezininzi ezinxulumene nobuhlwempu ziya kuconjululwa ngelo xesha. Indinyana 16 yeNdumiso 72 ithi: “Kuya kubakho ukudla okuziinkozo okuninzi emhlabeni; encotsheni yeentaba kuya kubakho ukuphuphuma.” Akusayi kuphinda kubekho ukunqongophala kokutya ngenxa yendlala, ukungabikho kwemali okanye ukungalawulwa kakuhle.

Nezinye iingxaki ziya kuconjululwa. Ngokomzekelo, namhlanje abantu abaninzi ehlabathini abanakhaya ilelabo. Noko ke, uThixo uyathembisa: “Ngokuqinisekileyo baya kwakha izindlu baze bahlale; batyale izidiliya baze badle isiqhamo sazo. Abayi kwakha kuhlale abanye; abayi kutyala kudle abanye. Kuba njengemihla yomthi iya kuba njalo imihla yabantu bam; nomsebenzi wezandla zabanyuliweyo bam baya kuwusebenzisa ngokupheleleyo.” (Isaya 65:21, 22) Wonke umntu uya kuba nekhaya elilelakhe aze awunandiphe umsebenzi wakhe. Ngoko uThixo uthembisa isicombululo esipheleleyo nesiya kuhlala sihleli ngobuhlwempu. Akusayi kubakho msantsa phakathi kwabazizityebi namahlwempu, akusayi kubakho bantu batsala nzima.

Xa umntu eziva okokuqala ezi zithembiso zeBhayibhile, usenokuvakalelwa ukuba azinakwenzeka. Noko ke, xa sihlolisisa iBhayibhile ibonisa ukuba zonke izithembiso uThixo awazenzayo ngaphambili zazaliseka. (Isaya 55:11) Ngoko asikuthandabuzi ukuba oko kuya kwenzeka. Kunoko, umbuzo ngulo, Yintoni omele uyenze ukuze uzuze xa zizaliseka ezi zithembiso?

Ngaba Uya Kuba Lapho?

Ekubeni lo rhulumente engokaThixo, sifanele sibe luhlobo lwabantu uThixo afuna sibe lulo phantsi kolo lawulo. Akasishiyanga kwesinomhlwa ngokuphathelele oko simele sikwenze ukuze sifaneleke. Imigaqo ifumaneka eBhayibhileni.

UMlawuli omiselwe nguThixo, uNyana wakhe, ulilungisa. (Isaya 11:3-5) Ngaloo ndlela, abo baza kuphila phantsi kwalo rhulumente nabo balindelwe ukuba babe ngamalungisa. IMizekeliso 2:21, 22 ithi: “Abathe tye bona baya kuhlala emhlabeni, nabangenakusoleka baya kusala kuwo. Bona ke abangendawo, baya kunqunyulwa emhlabeni; ke wona amaqhophololo, aya kuncothulwa kuwo.”

Ngaba ikho indlela esinokufunda ngayo ukulandela le milinganiselo? Ewe, ikho. Ngokufundisisa iBhayibhile nokusebenzisa isiluleko sayo, nawe unako ukulinandipha eli kamva liqaqambileyo. (Yohane 17:3) AmaNgqina kaYehova aya kukuvuyela ukukunceda ngesifundo esinjalo. Siyakumema ukuba usebenzise eli thuba ukuze ube phakathi kwabantu abangasayi kuphinda bahlwempuzeke okanye baphathwe ngokungekho sikweni.

[Umfanekiso okwiphepha 5]

UEufrosina: “Ukusebenzisa imali esinayo ngobuchule kunceda intsapho yam ukuze ifumane oko kuyimfuneko”

[Imifanekiso ekwiphepha 6]

Ulwalamano oluhle noThixo nobomi bentsapho obonwabisayo abunakuthengwa ngemali