Thembela NgoYehova
“Ulithemba lam, Nkosi enguMongami Yehova, endithembele ngaye kususela ebutsheni.”—INDUMISO 71:5.
1. Luluphi ucelomngeni eyajamelana nalo inkwenkwana engumalusi uDavide?
KWAKUKHO ingxilimbela yomfo owayemalunga neemitha ezintathu ubude. Ayimangalisi ke ngoko into yokuba wayesoyikwa ngumkhosi wamaSirayeli! Kwaqengqeleka iiveki, le ngxilimbela yomFilisti enguGoliyati igculela umkhosi wamaSirayeli rhoqo kusasa nangokuhlwa, isithi mawukhuphe iqhawe lawo lize kulwa nayo. Ekugqibeleni, kwathi gqi, kungekhona iqhawe, kodwa ityendyana nje lomfana. Le nkwenkwana inguDavide yayilicekecekana nje lomalusi xa ithelekiswa nale ngxilimbela. Kaloku, ubunzima bayo babungaphantsi nakunobo besambatho nobezixhobo zikaGoliyati! Sekunjalo, le nkwenkwana yabonisa inkalipho engasokuze ilibaleke, yokujamelana neso sigantsontso.—1 Samuweli 17:1-51.
2, 3. (a) Kwakutheni ukuze uDavide akwazi ukujamelana noGoliyati ngenkalipho? (b) Ngawaphi amanyathelo amabini esiza kuxubusha ngawo esifanele siwathabathe ukuze sithembele ngoYehova?
2 Wayeyithatha phi inkalipho engako uDavide? Yena uqobo wabhala wathi kwiminyaka eyalandelayo: “Ulithemba lam, Nkosi enguMongami Yehova, endithembele ngaye kususela ebutsheni.” (INdumiso 71:5) Ewe, kwasebutsheni bakhe, uDavide wathembela ngoYehova ngokupheleleyo. Wathi kuGoliyati: “Uza kum unekrele nomkhonto nentshuntshe, kodwa mna ndiza kuwe ngegama likaYehova wemikhosi, uThixo wezintlu zedabi zakwaSirayeli, omngcikivileyo.” (1 Samuweli 17:45) Ngoxa uGoliyati wayethembele ngamandla akhe nangezixhobo zakhe, yena uDavide wayethembele ngoYehova. Ekubeni uDavide wayexhaswa yiNkosi enguMongami wendalo iphela, yintoni eyayinokumenza oyike umntu, kungakhathaliseki ukuba wayesisigantsontso okanye exhobe kangakanani na?
3 Njengoko ufunda ngoDavide, ngaba unqwenela ukuba nawe ubuthembele ngamandla ngolo hlobo ngoYehova? Kunokwenzeka ukuba abaninzi bethu banqwenela njalo. Ngoko makhe sihlolisise amanyathelo amabini esinokuwathabatha ukuze sithembele ngoYehova. Okokuqala, sifanele soyise umqobo odla ngokusithintela ukuba singathembeli ngaye. Okwesibini, sifanele sifunde ngoko kubandakanyekileyo ekuthembeleni ngoYehova.
Ukoyisa Umqobo Odla Ngokusithintela Singathembeli NgoYehova
4, 5. Kutheni abantu abaninzi bekufumanisa kunzima ukuthembela ngoThixo?
4 Yintoni ethintela abantu ukuba bangathembeli ngoThixo? Ubukhulu becala, abanye badidwa kukungasazi isizathu sokwenzeka kwezinto ezimbi. Abaninzi bafundiswe ukuba nguThixo obangela ukubandezeleka. Xa kuvela intlekele, abefundisi basenokuthi nguThixo “owathathileyo” loo maxhoba ukuze abe kunye naye ezulwini. Ngaphezu koko, iinkokeli zonqulo ezininzi zifundisa ukuba uThixo wakumisela kwakude kudala ukwenzeka kwesiganeko ngasinye apha emhlabeni—kuquka zonke iintlekele nobungendawo. Bekuya kuba nzima ukuthembela ngoThixo ongqwabalala ngolo hlobo. USathana, omfamekisa iingqondo zabangakholwayo, nguye okhuthaza zonke ezi “mfundiso zeedemon.”—1 Timoti 4:1; 2 Korinte 4:4.
5 USathana ufuna abantu bangathembeli ngoYehova. Olo tshaba lukaThixo alufuni sibazi abona nobangela bokwenene bokubandezeleka kwabantu. Yaye ukuba siye safunda eZibhalweni ngezizathu zokubandezeleka kwabantu, uSathana angathanda ukuba sikulibale oko. Ngoko kuhle ukuba sihlolisise rhoqo izizathu ezithathu eziyintloko zokuba kubekho ukubandezeleka ehlabathini. Ngaloo ndlela, sakuhlala siqinisekile ukuba iinkathazo ezikhoyo ebomini azibangelwa nguYehova.—Filipi 1:9, 10.
6. Eyoku-1 kaPetros 5:8 isichaza njani esinye isizathu sokubandezeleka kwabantu?
6 Esinye isizathu sokubandezeleka kwabantu kukuba uSathana ufuna ukwaphula ingqibelelo yabantu abathembekileyo bakaYehova. Wazama ukwaphula ingqibelelo kaYobhi. USathana woyisakala ngoko, kodwa akakancami. Njengomlawuli weli hlabathi, ufuna ‘ukuqwenga’ abakhonzi abathembekileyo bakaYehova. (1 Petros 5:8) Oko kuquka ngamnye wethu! USathana ufuna ukusenza siyeke ukukhonza uYehova. Ngoko, udla ngokubangela ukuba sitshutshiswe. Nangona intshutshiso ibuhlungu, sinesizathu esihle sokunyamezela. Ngokunyamezela kwethu, simngqina uSathana elixoki size ngaloo ndlela sivuyise uYehova. (Yobhi 2:4; IMizekeliso 27:11) Njengoko uYehova esomeleza ukuze sikwazi ukunyamezela intshutshiso, sithembela ngakumbi ngaye.—INdumiso 9:9, 10.
7. EyabaseGalati 6:7 isinceda ukuba siqonde siphi isizathu sokubandezeleka?
7 Isizathu sesibini sokubandezeleka kwabantu ngumgaqo othi: “Loo nto ayihlwayelayo umntu, uya kuvuna kwayona.” (Galati 6:7) Maxa wambi abantu bahlwayela ngokwenza ukhetho oluphosakeleyo baze bavune ukubandezeleka. Basenokukhetha ukuqhuba ngokungakhathali, baze benze ingozi. Abaninzi bakhetha ukutshaya, baze babe nesifo sentliziyo okanye umhlaza wemiphunga. Abo bakhetha ukuziphatha okubi ngokwesini bazibeka esichengeni sokonakalisa ulwalamano lwentsapho, ukuphelelwa sisidima, ukufumana izifo ezibangelwa ziintlobano zesini, nokukhulelwa okungafunwayo. Abantu basenokufuna ukubeka ityala uThixo ngokubandezeleka okunjalo, kodwa eneneni bangamaxhoba ezigqibo zabo eziphosakeleyo.—IMizekeliso 19:3.
8. Ngokutsho kweNtshumayeli 9:11, kutheni abantu bebandezeleka?
8 Isizathu sesithathu sokubandezeleka sichazwe kwiNtshumayeli 9:11: “Ndabuya ndabona phantsi kwelanga ukuba ukukhawuleza asikokwababalekayo, idabi asilolabanamandla, nokutya asikokwezilumko, nobutyebi asibobabanokuqonda, kwanobabalo asilolwabanokwazi; ngenxa yokuba bonke behlelwa lixesha nasisihlo esingenakubonwa kwangaphambili.” Maxa wambi, abantu baba kwindawo engafanelekanga ngexesha elibi. Kungakhathaliseki ukuba impilo yethu intle okanye inkenenkene, sisenokubandezeleka ngandlel’ ithile okanye siqutyulwe kukufa nanini na. Ngokomzekelo, ngomhla kaYesu kwadilika inqaba eYerusalem yaza yabulala abantu abali-18. UYesu wabonisa ukuba babengohlwaywa nguThixo ngenxa yezono ababezenzile. (Luka 13:4) Akunakugxekwa uYehova ngokubandezeleka okunjalo.
9. Yintoni abaninzi abangayiqondiyo ngokubandezeleka?
9 Kubalulekile ukuqonda abanye boonobangela bokubandezeleka. Noko ke, kukho inkalo ebalulekileyo abaninzi abakufumanisa kunzima ukuyiqonda. Yile yokuba: Kutheni uYehova uThixo ekuvumela ukubandezeleka?
Kutheni UYehova Ekuvumela Ukubandezeleka?
10, 11. (a) Ngokutsho kweyabaseRoma 8:19-22, yintoni eye yenzeka kuyo “yonke indalo”? (b) Sazi njani ukuba ngubani oye walulamisela indalo kokuphuthileyo?
10 Umpostile uPawulos wakhe wayithi thsuphe le nkalo ibalulekileyo kwileta yakhe eyayisiya kwabaseRoma. UPawulos wabhala wathi: “Indalo ilinde ngentumekelelo ukutyhilwa koonyana bakaThixo. Kuba indalo yalulanyiselwa kokuphuthileyo, kungengakuthanda kwayo kodwa ngalowo wayilulamisayo, ngethemba lokuba nayo indalo ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo. Kuba siyazi ukuba yonke indalo iyagcuma kwaye isentlungwini de kube ngoku.”—Roma 8:19-22.
11 Ukuze siziqonde kakuhle ezi ndinyana, simele siphendule kuqala imibuzo ethile eyintloko. Ngokomzekelo, Ngubani olulamisele indalo kokuphuthileyo? Bambi bathi nguSathana; abanye bathi nguAdam. Kodwa ayinakuba ngomnye wabo. Ngoba? Kuba lowo ululamisela indalo kokuphuthileyo, ukwenza oko “ngethemba.” Unik’ ithemba lokuba abo bathembekileyo baza “kukhululwa ekukhotyokisweni kukonakala.” UAdam noSathana abanakukwazi ukunik’ ithemba elinjalo. NguYehova kuphela onokukwazi. Ngoko licacile elokuba, nguye olulamisele indalo kokuphuthileyo.
12. Kukuphi ukudideka okuye kwabakho ngokuphathelele “indalo,” yaye kunokuconjululwa njani?
12 Kodwa ke, iyintoni “indalo” ekubhekiselwa kuyo kwesi sibhalo? Abanye bathi “indalo” ekubhekiselwa kuyo apha lihlabathi liphela kuquka izilwanyana nezityalo. Kodwa ngaba izilwanyana nezityalo zinethemba lokufumana ‘inkululeko ezukileyo yabantwana bakaThixo’? Akunjalo. (2 Petros 2:12) Ngoko “indalo” ekubhekiselwa kuyo apha ngabantu kuphela. Ngabo abayindalo eye yachatshazelwa sisono nokufa ngenxa yemvukelo yase-Eden ibe ngabo abalangazelela ukunikwa ithemba.—Roma 5:12.
13. Nguwuphi umonakalo oye wabangelwa yimvukelo yase-Eden eluntwini?
13 Nguwuphi umonakalo oye wabangelwa yiloo mvukelo eluntwini? UPawulos uwuchaza ngegama elinye ngokuthi: kukuphutha.a Ngokutsho kwenye incwadi yeembekiselo, eli gama lichaza “into ephuthileyo engasebenzi ngendlela efanelekileyo.” Abantu badalelwe ukuba baphile ngonaphakade, basebenze kunye njengentsapho efezekileyo nemanyeneyo ekunyamekeleni umhlaba oyiparadesi. Endaweni yoko, baphila ubomi obufutshane, obuzaliswe ziintlungu nokudandatheka. UYobhi wakungqina oku esithi, “umntu, ozelwe ngumfazi, unobomi obufutshane obuzele kukuphazamiseka.” (Yobhi 14:1) Ngokwenene ubomi buphuthile!
14, 15. (a) Bubuphi ubungqina bokuba uYehova walugweba ngokusesikweni uluntu? (b) Kutheni uPawulos wathi indalo yalulanyiselwa kokuphuthileyo “kungengakuthanda kwayo”?
14 Ngoku siza kumbuzo oyintloko othi: Kwakutheni ukuze “uMgwebi womhlaba wonke” alulamisele uluntu kule meko ibuhlungu nedandathekisa ngolu hlobo? (Genesis 18:25) Ngaba wayesenza okusesikweni? Kaloku, khumbula oko kwenziwa ngabazali bethu bokuqala. Ngokuvukela uThixo, babexhasa uSathana, owalucel’ umngeni kanobom ulongamo lukaYehova. Izenzo zabo zabonisa ukuba babeyixhasa ingcamango yokuba umntu angaphila bhetele ngaphandle kukaYehova, azilawule ngokwakhe ngaphantsi kolwalathiso lwesidalwa somoya esivukelayo. Enyanisweni, ngokubagweba kwakhe abo bavukeli, uYehova wayebanika oko kanye babekucelile. Wamvumela umntu ukuba azilawule ngaphantsi kwempembelelo kaSathana. Phantsi kwezo meko, sisiphi isigqibo esinokuba sesikweni ngakumbi kunokululamisela uluntu kokuphuthileyo kodwa ngenjongo yokulunika ithemba?
15 Kakade ke, oku ‘kwakungekokuthanda’ kwendalo. Sizalwa singamakhoboka esono nokonakala yaye asinayo inkululeko yokuzikhethela kule meko. Kodwa ngenceba uYehova wamvumela uAdam noEva ukuba baqhubeke bephila baze bavelise inzala. Nangona thina, nzala yabo, silulanyiselwe esonweni nasekufeni, sinethuba lokwenza oko uAdam noEva basilelayo ukukwenza. Sinokumphulaphula uYehova size sifunde ukuba ulongamo lwakhe lolobulungisa yaye lugqibelele, ngoxa ukuzilawula kwabantu ngaphandle kukaYehova kuba nemiphumo ephuthileyo, ebuhlungu nedandathekisayo. (Yeremiya 10:23; ISityhilelo 4:11) Yaye impembelelo kaSathana iyenza ibe mbi nangakumbi le meko. Imbali yabantu iyayingqina le nyaniso.—INtshumayeli 8:9.
16. (a) Yintoni eyenza siqiniseke ukuba ukubandezeleka esikubonayo ehlabathini namhlanje akubangelwa nguYehova? (b) Liliphi ithemba aye ngothando uYehova walinika abantu abathembekileyo?
16 Ngokucacileyo, uYehova wenza okusesikweni ngokululamisela uluntu kokuphuthileyo. Noko ke, ngaba oko kuthetha ukuba nguYehova obangela iimeko eziphuthileyo nokubandezeleka okuthwaxa ngamnye wethu namhlanje? Kaloku, cinga nje ngomgwebi onika isaphuli-mthetho isigwebo esifanelekileyo. Elo banjwa lisenokubandezeleka gqitha ebudeni bokuvalelwa kwalo, kodwa ngaba linokubek’ ityala umgwebi ngokuthi nguye obangele ukubandezeleka kwalo? Akunjalo! Ngaphezu koko, uYehova akazange nanini na abe ngumthombo wobungendawo. UYakobi 1:13 uthi: “UThixo akanakulingwa ngezinto ezimbi yaye naye akalingi namnye.” Kwakhona masikhumbule ukuba uYehova wanikela ‘ithemba’ ekuwiseni kwakhe esi sigwebo. Uye ngothando wenza ilungiselelo lokuba inzala ethembekileyo ka-Adam noEva ibone ukupheliswa kweemeko eziphuthileyo ize inandiphe ‘inkululeko ezukileyo yabantwana bakaThixo.’ Uluntu oluthembekileyo alunakuze nanini na luxhalatyiswe kukuba indalo isenokuphinda ilulanyiselwe kwiimeko ezibuhlungu neziphuthileyo. Ukuyilungisa kukaYehova ngokusesikweni le meko kuya kuqinisekisa ukuba ulongamo lwakhe lolobulungisa.—Isaya 25:8.
17. Kufanele kusichaphazele njani ukuhlolisisa izizathu zokubandezeleka okukhoyo ehlabathini namhlanje?
17 Njengoko sihlolisisa ezi zizathu zokubandezeleka kwabantu, ngaba ngokwenene singamgxeka uYehova ngokuthi nguye obangela ubungendawo okanye obangela ukuba singathembeli ngaye? Endaweni yokumgxeka, sinesizathu esingakumbi sokuvumelana namazwi kaMoses athi: “NguLiwa, ugqibelele umsebenzi wakhe, ngokuba zonke iindlela zakhe zisesikweni. NguThixo wentembeko, tu ubugqwetha; lilungisa yaye uthe tye yena.” (Duteronomi 32:4) Ngoko masihlale sizikhumbuza rhoqo ngezi ngongoma ngokucamngca ngazo. Ngaloo ndlela, xa sijamelene nezilingo, siya kukwazi ukumelana namalinge kaSathana okuhlwayela amathandabuzo ezingqondweni zethu. Noko ke, kuthekani ngenyathelo lesibini elikhankanywe ekuqaleni? Yintoni ebandakanyekileyo ekukholoseni ngoYehova?
Oko Kuthethwa Kukukholosa NgoYehova
18, 19. IBhayibhile isikhuthaza njani ukuba sikholose ngoYehova, kodwa yiyiphi ingcamango ephosakeleyo abanayo abanye ngokuphathelele oko?
18 ILizwi likaThixo lisibongoza lisithi: “Kholosa ngoYehova ngayo yonke intliziyo yakho, ungayami ngokwakho ukuqonda. Uze umgqale yena ezindleleni zakho zonke, kwaye uya kuwenza uthi tye umendo wakho.” (IMizekeliso 3:5, 6) Lawo ngamazwi akhuthazayo nanik’ ithemba. Ngokuqinisekileyo akukho namnye kwindalo iphela othembeke ngaphezu kukaBawo wethu wasezulwini onothando. Kodwa nangona kulula ukuwafunda loo mazwi eMizekeliso, kusenokuba nzima ukuwasebenzisa.
19 Abaninzi abaqondi ukuba kuthetha ukuthini ukukholosa ngoYehova. Bambi bacinga ukuba oku kukholosa kuyimvakalelo nje yokuchulumanca okuzenzekela ngokwemvelo. Abanye bakholelwa ukuba ukukholosa ngoThixo kuthetha ukuba sinokulindela ukuba asikhusele kubo bonke ubunzima esijamelana nabo, acombulule zonke iingxaki zethu, aze aphelise onke amagingxigingxi emihla ngemihla—yaye akwenze oko ngesiquphe! Kodwa iingcamango ezilolo hlobo azinasihlahla. Ukukholosa kubandakanya okungakumbi kuneemvakalelo nje kuphela. Kubantu abakhulileyo, ukukholosa kubandakanya ukwenza izigqibo ezisengqiqweni.
20, 21. Yintoni ebandakanyekileyo ekukholoseni ngoYehova? Zekelisa.
20 Phawula kwakhona oko kuthethwa yiMizekeliso 3:5. Ithelekisa ukukholosa ngoYehova kunye nokwayama ngokwethu ukuqonda, ibonisa ukuba asinakwenza kokubini. Ngaba oko kuthetha ukuba asivumelekanga ukusebenzisa amandla ethu okuqonda? Akunjalo, kuba uYehova, osinike loo mandla, ulindele ukuba siwasebenzise ekumkhonzeni. (Roma 12:1) Kodwa sayame okanye sixhomekeke entwenini? Ukuba iingcamango zethu azivumelani nezikaYehova, ngaba siyabamkela ubulumko bakhe njengobungaphezulu lee kunobethu? (Isaya 55:8, 9) Ukukholosa ngoYehova kuthetha ukuvumela iingcamango zethu ukuba zalathiswe zezakhe.
21 Ngokomzekelo: Khawucinge nje ngomntwana omncinane ohleli kwisihlalo esingasemva kwinqwelo-mafutha, bona abazali bakhe behleli ngaphambili. Uyise uyaqhuba. Xa kuvela iingxaki ebudeni bohambo lwabo—mhlawumbi ukungaqiniseki okuthile ngendlela abamele bayithabathe okanye ingxaki ephathelele imozulu okanye ephathelele imeko yendlela abahamba ngayo—usabela njani umntwana othobelayo, nokholose ngabazali bakhe? Ngaba unikela imiyalelo, exelela uyise indlela amele aqhube ngayo? Ngaba uyazithandabuza izigqibo zabazali bakhe okanye akhalaze xa besithi makaqhoboshe amabhanti? Akunjalo, kuba ngokwemvelo uyabathemba abazali bakhe ukuba baya kuyisingatha kakuhle le meko, nangona bengafezekanga. UYehova unguBawo ogqibeleleyo. Ngaba asifanelanga kusini na sikholose ngaye ngokupheleleyo, ingakumbi xa sijamelene neemeko ezinzima?—Isaya 30:21.
22, 23. (a) Kutheni sifanele sikholose ngoYehova xa sijamelene neengxaki, yaye sinokukwenza njani oko? (b) Yintoni eza kuxutyushwa kwinqaku elilandelayo?
22 Noko ke, IMizekeliso 3:6 ibonisa ukuba sifanele ‘simgqale uYehova ezindleleni zethu zonke,’ kungekuphela nje xa sijamelene neemeko ezinzima. Ngoko izigqibo zemihla ngemihla esizenzayo ebomini zimele zibonise ukuba sikholose ngoYehova. Xa kuvela iingxaki, asifanele siphelelwe lithemba, siphakuzele, okanye singalwamkeli ulwalathiso lukaYehova ngokuphathelele eyona ndlela ifanelekileyo yokusingatha imeko esijamelene nayo. Sifanele sizigqale izilingo njengethuba lokuxhasa ulongamo lukaYehova, lokumngqina uSathana elixoki, nelokuhlakulela ukuthobeka nezinye iimpawu ezimkholisayo uYehova.—Hebhere 5:7, 8.
23 Sinako ukubonisa ukuba sikholose ngoYehova kungakhathaliseki ukuba yiyiphi imiqobo esijamelana nayo. Sikwenza oko ngokuthandaza nangokufuna ulwalathiso eLizwini likaYehova nakwintlangano yakhe. Kodwa ke, singakholosa njani ngokungqalileyo ngoYehova xa sijamelene neengxaki zale mihla? Oku siza kukuxubusha kwinqaku lethu elilandelayo.
[Umbhalo osemazantsi]
a Igama lesiGrike alisebenzisileyo uPawulos eliguqulelwe ngokuthi ‘ukuphutha’ liyafana nelo lisetyenzisiweyo kwiSeptuagint yesiGrike eliguqulela ibinzana alisebenzise rhoqo uSolomon kwincwadi yeNtshumayeli, elithi “yonk’ into ingamampunge!”—INtshumayeli 1:2, 14; 2:11, 17; 3:19; 12:8.
Ubunokuphendula Uthini?
• UDavide wabonisa njani ukuba wayethembele ngoYehova?
• Ziziphi izizathu ezithathu zokubandezeleka kwabantu namhlanje, yaye kutheni kufanelekile nje ukuzihlolisisa maxa wambi?
• Sisiphi isigwebo aye uYehova wasiwisa eluntwini, yaye kutheni isisigwebo esisesikweni nje?
• Yintoni ebandakanyekileyo ekukholoseni ngoYehova?
[Imifanekiso ekwiphepha 8]
UDavide wathembela ngoYehova
[Umfanekiso okwiphepha 10]
UYesu wabonisa ukuba ukuwa kwenqaba yaseYerusalem kwakungabangelwanga nguYehova