Dumisani UYehova “Phakathi Ebandleni”

IINTLANGANISO zamaKristu lilungiselelo likaYehova lokugcina abantu bakhe bomelele ngokomoya. Xa sisiya rhoqo kwiintlanganiso, sibonisa ukuba siyawaxabisa amalungiselelo kaYehova. Ukongezelela koko, zisinceda sikwazi ‘ukuvuselelana [nabazalwana bethu] eluthandweni nasemisebenzini emihle,’ indlela ebalulekileyo yokubonisa uthando omnye komnye. (Hebhere 10:24; Yohane 13:35) Ngoko ke, singabavuselela njani abazalwana bethu kwiintlanganiso?

Livakalise Esidlangalaleni

UKumkani uDavide wabhala wathi ngaye: “Ndiya kulivakalisa kubazalwana bam igama lakho; phakathi ebandleni ndiya kukudumisa. Wena uya kundizukisa ebandleni elikhulu.” “Ndiya kukubonga ebandleni elikhulu; ndiya kukudumisa phakathi kwesizwana esikhulu.” “Iindaba ezilungileyo zobulungisa ndizixelile ebandleni elikhulu. Khangela! Imilebe yam andiyithinteli.”—INdumiso 22:22, 25; 35:18; 40:9.

Ngendlela efanayo, ngomhla kampostile uPawulos xa amaKristu ehlanganisene ukuze anqule, ayevakalisa ukholo lwawo kuYehova nozuko lwakhe. Ngokwenjenjalo ayekhuthazana yaye evuselelana eluthandweni nasemisebenzini emihle. Namhlanje, emva kweenkulungwane ezininzi bafayo uDavide noPawulos, ‘sibona ngokwenene ukuba imini kaYehova iyasondela.’ (Hebhere 10:24, 25) Le nkqubo yezinto kaSathana isondela entshabalalweni, yaye neengxaki ziya zisanda. Kunanini na ngaphambili, ‘kufuneka sinyamezele.’ (Hebhere 10:36) Ukuba asikhuthazwa ngabazalwana bethu, ngubani omnye onokukwazi ukusikhuthaza ukuze sinyamezele?

Njengamandulo, namhlanje kwenziwe amalungiselelo okuba amakholwa akwazi ukuvakalisa ukholo lwawo “phakathi ebandleni.” Elinye ithuba lokwenjenjalo elifunyanwa nguye wonk’ ubani kukugqabaza kwiintlanganiso zebandla. Ungaze ukuthabathe lula okuphunyezwa ngamagqabaza. Ngokomzekelo, xa amagqabaza ebonisa indlela yokoyisa iingxaki okanye yokuziphepha, abomeleza ngakumbi abazalwana bethu abazabalazela ukusebenzisa imigaqo yeBhayibhile. Xa amagqabaza echaza iZibhalo ezikhankanywe nje azacatshulwa okanye equka inkcazelo efunyenwe ngumntu xa ebesenza uphando, anokubakhuthaza abanye baqhelisele imikhwa emihle yokufundisisa.

Ukuyiqonda into yokuba ngokugqabaza kwiintlanganiso siya kungenelwa kufanele kushukumisele onke amaNgqina kaYehova oyise uloyiko okanye ukungazithembi. Kubaluleke ngokukhethekileyo ukuba abadala nezicaka zolungiselelo bagqabaze, njengoko kulindeleke ukuba bakhokele ekubeni nenxaxheba yaye babekho kwiintlanganiso. Noko ke, umntu unokuphucula njani ukuba ukufumanisa kunzima ukugqabaza?

Amacebiso Okuphucula

Khumbula ukuba ukugqabaza yinxalenye yokunqula kwethu uYehova. Omnye udade ongumKristu ohlala eJamani usichazela indlela akujonga ngayo ukugqabaza. “Yindlela yam yokuphendula kwimizamo kaSathana yokuval’ imilomo abantu bakaThixo bayeke ukuvakalisa ukholo lwabo.” Omnye umzalwana naye okwelo bandla osandul’ ukubhaptizwa uthi: “Ndithandaza gqitha xa ndiza kugqabaza.”

Lungiselela kakuhle. Xa ungawufundisisanga kusengaphambili umbandela, kuya kuba nzima ukugqabaza yaye amagqabaza akho akayi kubakha kangako abanye. Amacebiso aphathelele ukugqabaza kwiintlanganiso zebandla afumaneka kwimpapasho ethi Zuza Kwimfundo YeSikolo Sobulungiseleli Sobuthixo, iphepha 70.a

Zibekele usukelo lokugqabaza nokuba kukanye kwintlanganiso nganye. Oku kuthetha ukulungiselela iimpendulo eziliqela, ekubeni ukuphakamisa kaninzi kuya kukunika amathuba amaninzi okubizwa ngumzalwana oqhuba eso sifundo. Usenokumxelela kusengaphambili imibuzo othanda ukuphendula kuyo. Oku kuluncedo ngokukhethekileyo ukuba usaqala. Ekubeni kusenokuba nzima ukuphakamisa isandla “ebandleni elikhulu,” xa usazi ukuba esi sisiqendu oza kuphendula kuso yaye umqhubi waloo ntlanganiso uza kube ejonge kuwe, oko kuya kukukhuthaza ugqabaze.

Gqabaza kwasekuqaleni. Umsebenzi onzima awusuke ube lula nje kuba umane uwubekela amangomso. Ukugqabaza kwasekuqaleni kwiintlanganiso kunokuba luncedo. Uya kumangaliswa yindlela ekuba lula ngayo ukugqabaza xa sele uqalile.

Hlala kwindawo efanelekileyo. Abanye bakufumanisa kulula ukugqabaza xa behleli ngaphambili kwiHolo yoBukumkani. Ngaphambili ziba mbalwa izinto eziphazamisayo, yaye umqhubi wesifundo uzibona lula izandla zabantu abahleli ngaphambili. Ukuba uhleli ngaphambili, ungalibali ukuphakamisa ilizwi ukuze bakuve bonke, ngakumbi ukuba ibandla alinayo imibhobho yesandisi-lizwi.

Phulaphula kakuhle. Oku kuya kukunceda ungaphindi iimpendulo zabanye. Kwakhona, amagqabaza abanye anokukunceda ukhumbule isibhalo okanye ingongoma ephuhlisa oko kuthethiweyo. Maxa wambi, amava amafutshane anokuyicacisa kakuhle loo ngongoma ixutyushwayo. Amagqabaza anjalo aba luncedo gqitha.

Funda ukuphendula ngamazwi akho. Ukuwafunda phantsi amagqabaza akho kunokubonisa ukuba uyifumene impendulo echanileyo, yaye oko kunokuba yindlela efanelekileyo yokuqalisa ukugqabaza. Kodwa ukugqabaza ngamazwi akho kubonisa ukuba uyayiqonda ingongoma. Akuyomfuneko ukuwafunda ngokuthe ngqo amazwi abhalwe kwiimpapasho zethu. AmaNgqina kaYehova akazozikhwenene eziphindaphinda oko kuthethwa ziimpapasho zawo.

Amagqabaza makahambisane nombandela. Amagqabaza angenakuthanani nombandela okanye aphum’ emgceni koko kuxutyushwayo akafanelekanga. Oku kuthetha ukuba amagqabaza akho amele ahambisane nombandela oxutyushwayo. Ngoko aya kwenza loo mxholo uxutyushwayo ube yingenelo eyakhayo ngokomoya.

Injongo mayibe kukukhuthaza. Ekubeni esona sizathu sokugqabaza ikukukhuthaza abanye, sifanele sikuphephe ukuthetha izinto ezinokubadimaza. Ukongezelela koko, musa ukuphendula sonke isiqendu de abanye bangabi nanto yokuthetha. Xa iimpendulo zinde okanye zintsonkothile, idla ngokungacaci kakuhle eyona ngongoma yazo. Iimpendulo ezimfutshane zinokuba luncedo gqitha, yaye ziya kukhuthaza abasebatsha banikele ezabo ezimfutshane.

Indima Yabo Baqhuba Iintlanganiso

Xa kuthethwa ngokukhuthaza, umqhubi wesifundo ngoyena unembopheleleko enkulu. Ubonisa umdla onyanisekileyo kuwo onke amagqabaza, ngokuphulaphula ngenyameko nokubajonga abo bagqabazayo kunokuba axakeke zezinye izinto. Hayi indlela ekungayi kufaneleka ngayo xa enokuthi ngenxa yokungaphulaphuli kakuhle aze ngokungeyomfuneko aphinde into esele ithethiwe okanye abuze umbuzo osele uphendulwe!

Kwakhona bekuya kudimaza ukuba umqhubi usoloko elungisa izinto ezincinane kumagqabaza abantu, ngokungathi loo magqabaza akafanelekanga ngandlel’ ithile. Kwelinye icala, kuya kukhuthaza gqitha ukuba loo magqabaza akhe aphuhlisa ingongoma ebalulekileyo. ‘Sinokukusebenzisa njani oku kwibandla lethu?’ okanye, ‘Kwesi siqendu sisiphi isibhalo esixhasa oku?’ imibuzo enjalo iyabakhuthaza abantu bagqabaze ngendlela eyakhayo, nexabisekileyo.

Kakade ke, abasebatsha okanye abaneentloni bafanele banconywe ngokukhethekileyo xa begqabaza. Oku kunokwenziwa kumntu ngokobuqu emva kwesifundo ukuze kuphetshwe ukumenza abe neentloni yaye oku kuya kunceda umqhubi akwazi ukunikela amacebiso xa kufanelekile.

Incoko idla ngokuphela xa kukho umntu oyithabathela kuye. Abo ancokola nabo badla ngokungayiboni imfuneko yokuba nabo bathethe. Bayayeka ukumphulaphula. Kunokwenzeka into efanayo naxa umqhubi wesifundo eyilawula ingxubusho ngokusoloko egqabaza. Noko ke, maxa wambi umqhubi usenokwenza abaphulaphuli bathethe aze abenze bacinge ngaloo mbandela ngokubuza imibuzo ethile eyongezelelekileyo. Imibuzo enjalo ifanele isetyenziswe ngamathuba athile kuphela.

Akuyomfuneko ukuba umqhubi abuze umntu kuba eqale waphakamisa. Oku kuya kubadimaza abo baphakamisa kade. Xa elinda ithutyana, uya kunceda umntu ongekagqabazi afumane ithuba lokuphendula. Kwakhona uya kubonisa ingqiqo angaphendulisi abantwana abancinane imibuzo ephathelele imibandela abangenakuyiqonda.

Kuthekani xa kunikelwe impendulo engachananga? Umqhubi wesifundo ufanele akuphephe ukwenza loo mntu uphenduleyo abe neentloni. Kwanokuba impendulo ayichananga, isoloko inento ethile echanileyo. Xa enokukhetha loo nto ichanileyo, aze ayisebenzise ngobuchule ukuphinda loo mbuzo, okanye abuze omnye, umqhubi wesifundo unokuyilungisa loo mpendulo ngaphandle kokumenza abe neentloni loo mntu.

Ukuze akhuthaze abantu bagqabaze, umqhubi wesifundo ufanele ayiphephe imibuzo enje ngethi, ‘Ngaba ukho ofuna ukugqabaza kule nkalo?’ Nokuba athi, ‘Ngaba ukho ongekagqabazi? Eli lithuba lakho lokugqibela!’ kusenokuba kwenziwa ngeenjongo ezintle, kodwa kuya kwenza kube nzima ukuba umntu athethe ngokukhululekileyo. Abazalwana abafanele benziwe bazive benetyala ngokungagqabazi kwasekuqaleni. Kunoko, bafanele bakhuthazwe babelane nabanye ngoko bakwaziyo kuba ukwenjenjalo yimbonakaliso yothando. Ukongezelela, emva kokuba umqhubi ebize umntu oza kugqabaza, ufanele akuphephe ukuthi, “Emva kwakhe, kuza kugqabaza uMzalwana uZibani-bani kuze emva kwakhe kulandele uDade uZibani-bani.” Umqhubi ufanele awaphulaphule amagqabaza aze ke abone enoba kuyimfuneko kusini na ukongezelela kuwo.

Ukugqabaza Kulilungelo

Ukubakho kwiintlanganiso zamaKristu yimfuneko yokomoya; ukugqabaza kuzo kulilungelo. Indlela esiba nenxaxheba ngayo kweli lungiselelo likhethekileyo lokudumisa uYehova “phakathi ebandleni,” iya kubonisa ukuba sixelisa umzekelo kaDavide yaye sithobela isiluleko sikaPawulos. Ukuba nenxaxheba kwethu kwiintlanganiso bubungqina bokuba siyabathanda abazalwana bethu yaye siyinxalenye yebandla elikhulu likaYehova. Yiyiphi enye indawo obungathanda ukuba kuyo njengoko ‘ubona ukuba imini iyasondela’?—Hebhere 10:25.

[Umbhalo osemazantsi]

[Imifanekiso ekwiphepha 20]

Kubalulekile ukuphulaphula nokugqabaza kwiintlanganiso zamaKristu

[Umfanekiso okwiphepha 21]

Umqhubi wesifundo umele abe nomdla onyanisekileyo kuwo onke amagqabaza