Unokukholelwa Kumhlaba Oyiparadesi

UKUTYHUBELA imbali, izigidi zabantu bezikholelwa ukuba ekugqibeleni ziya kuwushiya umhlaba zize ziye ezulwini. Bambi bavakalelwa kukuba uMdali wethu akazange abe nenjongo yokuba sihlale emhlabeni ngonaphakade. Ngenxa yoko, kukho abantu abazibandeza ulonwabo ngokugqithiseleyo. Kuninzi lwabo, umhlaba nazo zonke izinto eziphathekayo zingendawo—umqobo ekuzaneliseni ngezinto zokomoya nasekusondeleni kuThixo.

Abo beza nezi ngcamango mhlawumbi babengakwazi oko uThixo wakuthethayo ngomhlaba oyiparadesi okanye bakhetha ukukutyeshela. Kakade ke, namhlanje, abaninzi abanamdla wokuhlolisisa oko uThixo waphefumlela abantu ukuba bakubhale kwiLizwi lakhe iBhayibhile ngalo mbandela. (2 Timoti 3:16, 17) Kodwa ngaba asibobulumko ukukholosa ngeLizwi likaThixo kunokwamkela iingcamango zabantu? (Roma 3:4) Eneneni, kubalulekile ukuba senjenjalo, ekubeni iBhayibhile isilumkisa ukuba isidalwa esinamandla kodwa esingabonakaliyo siye samfamekisa abantu ngokomoya yaye ngoku ‘silahlekisa umhlaba omiweyo uphela.’—ISityhilelo 12:9; 2 Korinte 4:4.

Kutheni Abantu Bedidekile?

Iingcamango ezingqubanayo ngomphefumlo ziye zenza abantu badideka ngenjongo kaThixo ngomhlaba. Abaninzi bakholelwa ukuba sinomphefumlo ongafiyo—into eyahlukileyo kumzimba womntu nengafiyo. Abanye bakholelwa ukuba umphefumlo wawukho ngaphambi kokuba kudalwe umzimba womntu. Ngokutsho kwenye imbekiselo, isithandi sobulumko esingumGrike uPlato sasinengcamango yokuba umphefumlo “uvaleleke emzimbeni njengesohlwayo sezono owazenzayo ngoxa wawusezulwini.” Ngokufanayo, umfundi wezakwalizwi uOrigen wathi “imiphefumlo yona [ezulwini] ngaphambi kokuba imanyaniswe nemizimba” yaye “yavalelwa [kuloo mizimba emhlabeni] njengesohlwayo sezono zayo.” Yaye izigidi zikholelwa ukuba umhlaba yindawo nje yovavanyo ngaphambi kokuba umntu aye ezulwini.

Kwakhona kukho iingcamango ezahlukahlukeneyo ngoko kwenzeka kumphefumlo xa umntu esifa. Ngokutsho kwencwadi ethi History of Western Philosophy, amaYiputa ayenembono yokuba “imiphefumlo yabantu abafileyo iyehla iye kwelabafileyo.” Kamva izithandi zobulumko zathi imiphefumlo yabafileyo yayingehli iye kwelabafileyo kodwa yayinyuka iye kummandla ophakamileyo wokomoya. Isithandi sobulumko esingumGrike uSocrates kuthiwa wayenengcamango yokuba xa umntu esifa umphefumlo “uya kwindawo engabonakaliyo . . . uze uqhubeke uphila noothixo.”

Ithini IBhayibhile?

EBhayibhileni, iLizwi likaThixo eliphefumlelweyo, ayikho indawo ethi abantu banomphefumlo ongafiyo. Funda ingxelo ekwiGenesis 2:7. Ithi: “UYehova uThixo wabumba umntu ngothuli lomhlaba waza wavuthela impefumlo yobomi emathatheni akhe, umntu ke waba ngumphefumlo ophilayo.” Oko kucace gca. Xa uThixo wadala umntu wokuqala uAdam, akazange afake nto ithile kuye ngaphakathi. Ewe, kuba iBhayibhile ithi “umntu ke waba ngumphefumlo ophilayo.” Umntu wayengenamphefumlo. Wayengumphefumlo.

Xa wayedala umhlaba nabantu, uYehova wayengenanjongo yokuba umntu afe. Injongo kaThixo yayikukuba abantu bahlale emhlabeni ngonaphakade kwimeko eyiParadesi. UAdam wafa kuphela ngenxa yokungathobeli umthetho kaThixo. (Genesis 2:8, 15-17; 3:1-6; Isaya 45:18) Xa umntu wokuqala wafayo, ngaba waya kummandla othile wokomoya? Akunjalo! Umphefumlo onguAdam—wabuyela eluthulini awayedalwe ngalo.—Genesis 3:17-19.

Sonke sizuze isono nokufa njengelifa kukhokho wethu uAdam. (Roma 5:12) Oku kufa kukungaphili, njengoko kwakunjalo ngoAdam. (INdumiso 146:3, 4) Eneneni, kuzo zonke iincwadi zayo ezingama-66, iBhayibhile ayinxulumanisi ibinzana elithi “ukungafi” okanye “ngonaphakade” kunye negama elithi “umphefumlo.” Ngokwahlukileyo koko, iZibhalo zitsho ngokucacileyo ukuba umphefumlo—umntu—uyafa.—INtshumayelo 9:5, 10; Hezekile 18:4.

Ngaba Izinto Eziphathekayo Zingendawo?

Kuthekani ngengcamango yokuba izinto eziphathekayo, kuquka nomhlaba, zingendawo? Leyo yayiyingcamango yamaManichaean, ihlelo lonqulo elasekwa ePersi nguMani ebudeni benkulungwane yesithathu yeXesha Eliqhelekileyo. IThe New Encyclopædia Britannica ithi: “UbuManichaean babakho ngenxa yokubona ukubandezeleka kwabantu.” UMani wayekholelwa kwelokuba, ukuba ngumntu “akuyonto yokwemvelo, akwamkelekanga yaye kungendawo ngokupheleleyo.” Kwakhona wathi ekuphela kwendlela yokubaleka oku “kubandezeleka” kukuba umphefumlo ushiye umzimba nomhlaba, uze ube ngumoya ophila kwihlabathi lokomoya.

Ngokwahlukileyo koko, iBhayibhile isixelela ukuba “zonke izinto awayezenzile” uThixo xa wayedala umhlaba nabantu ‘zazilunge gqitha’ kuye. (Genesis 1:31) Ngelo xesha, kwakungekho mqobo phakathi kwabantu noThixo. UAdam noEva babenolwalamano olusondeleyo noYehova, kanye njengokuba umntu ofezekileyo uYesu Kristu wayenolwalamano olusondeleyo noYise wasezulwini.—Mateyu 3:17.

Ukuba abazali bethu bokuqala, uAdam noEva, babengazange bone, ngebabenolwalamano olusondeleyo noYehova uThixo ngonaphakade kumhlaba oyiparadesi. Ubomi babo babuqalisa eParadesi, kuba iZibhalo zithi: “UYehova uThixo watyala umyezo e-Eden, ngasempuma, waza wambeka khona umntu abembumbile.” (Genesis 2:8) UEva wadalwa kuloo myezo uyiparadesi. Ukuba uAdam noEva babengazange bone, bona nenzala yabo efezekileyo ngebabesebenze kunye ngolonwabo de umhlaba wonke wayiparadesi. (Genesis 2:21; 3:23, 24) Umhlaba oyiParadesi ngowulikhaya loluntu ngonaphakade.

Kutheni Abanye Besiya Ezulwini?

Mhlawumbi usenokuthi, ‘Kodwa, iBhayibhile iyathetha ngabantu abaya ezulwini, akunjalo?’ Ewe. Emva kokuba uAdam onile, uYehova walungiselela ukuseka uBukumkani basezulwini ekuya kuthi abanye benzala ka-Adam ‘balawule njengookumkani phezu komhlaba’ kunye noYesu Kristu. (ISityhilelo 5:10; Roma 8:17) Babeza kuvuselwa kubomi bokungafi ezulwini. Inani labo elipheleleyo li-144 000, yaye abokuqala kubo ngabafundi bakaYesu abathembekileyo benkulungwane yokuqala.—Luka 12:32; 1 Korinte 15:42-44; ISityhilelo 14:1-5.

Noko ke, yayingeyonjongo kaThixo yantlandlolo ukuba abantu abangamalungisa bawushiye umhlaba baze baye ezulwini. Eneneni, xa uYesu wayesemhlabeni, wathi: “Akukho mntu unyukele ezulwini ngaphandle kwalowo wehla evela ezulwini, uNyana womntu.” (Yohane 3:13) Esebenzisa “uNyana womntu,” uYesu Kristu, uThixo wenza ilungiselelo lentlawulelo ukuze abo banokholo kwidini likaYesu bafumane ubomi obungunaphakade. (Roma 5:8) Kodwa izigidi zabo bantu ziya kuhlala phi ngonaphakade?

Injongo KaThixo Yantlandlolo Iza Kuzaliseka

Nangona injongo kaThixo ikukuthabatha abanye abantu baye kulawula noYesu Kristu kuBukumkani basezulwini, oko akuthethi ukuba bonke abantu abalungileyo baya ezulwini. UYehova wadala umhlaba ukuze ube likhaya labantu eliyiParadesi. Kungekudala, uThixo uza kuzalisekisa loo njongo yantlandlolo.—Mateyu 6:9, 10.

Kulawulo lukaYesu Kristu nabo aza kulawula nabo ezulwini, wonke umhlaba uya kuzaliswa luxolo nolonwabo. (INdumiso 37:9-11) Abo bakwinkumbulo kaThixo baya kuvuswa baze banandiphe ubomi obufezekileyo. (IZenzo 24:15) Ngenxa yokuthembeka kwabo kuThixo, abantu abathobelayo baya kunikwa oko abazali bethu bokuqala baphulukana nako—ubomi obungunaphakade kubuntu obufezekileyo kumhlaba oyiparadesi.—ISityhilelo 21:3, 4.

UYehova uThixo akaze asilele ukuzalisekisa oko anenjongo yokukwenza. Esebenzisa umprofeti wakhe uIsaya, wathi: “Njengokuba kusihla imvula nekhephu emazulwini, yaye zingabuyeli kuwo zingawunyakamisanga umhlaba, ziwenze uvelise kwaye uhlume, umnike imbewu umhlwayeli, umnike nesonka odlayo, ngoko ilizwi lam eliphuma emlonyeni wam liya kuba njalo. Aliyi kubuyela kum ngaphandle kwemiphumo, kodwa ngokuqinisekileyo liya kukwenza oko ndiyoliswa kuko, likuphumelelise ngokuqinisekileyo oko ndilithumele kona.”—Isaya 55:10, 11.

Incwadi yeBhayibhile kaIsaya, isinika umfanekiso-ngqondweni wendlela ubomi obuza kuba yiyo kumhlaba oyiParadesi. KwiParadesi akukho mntu oya kuthi, “Ndiyagula.” (Isaya 33:24) Izilwanyana aziyi kuba yingozi ebantwini. (Isaya 11:6-9) Abantu baya kwakha izindlu ezintle baze batyale yaye baya kutya baneliseke. (Isaya 65:21-25) Ngaphezu koko, uThixo “uya kuginya ukufa ngonaphakade, yaye iNkosi enguMongami uYehova ngokuqinisekileyo iya kosula iinyembezi ebusweni bonke.”—Isaya 25:8.

Kungekudala, abantu abathobelayo baya kuhlala kwezo meko zintle ngolo hlobo. ‘Baya kukhululwa ekukhotyokisweni kukonakala baze babe nenkululeko ezukileyo yabantwana bakaThixo.’ (Roma 8:21) Hayi indlela ekuya kuba mnandi ngayo ukuphila ngonaphakade kumhlaba oyiParadesi othenjisiweyo! (Luka 23:43) Unokuba lapho ukuba wenza ngokuvisisana nolwazi oluchanileyo lweZibhalo uze ubonakalise ukholo kuYehova uThixo nakuYesu Kristu. Yaye ngoku unokuqiniseka ukuba kusengqiqweni ukukholelwa kumhlaba oyiparadesi.

[Umfanekiso okwiphepha 5]

UAdam noEva babedalelwe ukuba baphile ngonaphakade kumhlaba oyiparadesi

[Imifanekiso ekwiphepha 7]

Kumhlaba oyiParadesi . . .

baya kwakha izindlu

baya kutyala izidiliya

baya kusikelelwa nguYehova

[Inkcazelo Ngomfanekiso okwiphepha 4]

U.S. Fish & Wildlife Service, Washington, D.C./NASA