Imibuzo Evela Kubafundi
Kungayiphi ingqiqo awathi uHezekile waba “sisimumu” ebudeni bokungqingwa nokutshatyalaliswa kweYerusalem?
Kaloku akazange abe nento yokongeza kwisiprofeto uYehova awayesele esidlulisele.
Umprofeti uHezekile waqalisa inkonzo yakhe njengomlindi othembekileyo wamaSirayeli awayesekuthinjweni eBhabhiloni “ngonyaka wesihlanu wokuthinjwa kukaKumkani uYehoyakin,” ngamany’ amazwi, ngowama-613 B.C.E. (Hezekile 1:2, 3) Ngosuku lweshumi lwenyanga yeshumi yowama-609 B.C.E., wachazelwa ngumoya kaThixo ngokuqaliswa kokungqingwa kweYerusalem ngamaBhabhiloni. (Hezekile 24:1, 2) Wawuya kuba yintoni umphumo woko kungqingwa? Ngaba iYerusalem nabemi bayo ababengenalukholo babeya kusinda? Njengomlindi, uHezekile wayesele esidlulisele isigidimi sikaYehova esiqinisekileyo somgwebo, ibe kwakungeyomfuneko ukuba ongeze nto, ngokungathi eso sigidimi kwakufuneka senziwe sibe namandla nangakumbi. UHezekile waba sisimumu ngokuphathelele nayiphi na into eyayinokwenza nokungqingwa kweYerusalem.—Hezekile 24:25-27.
Kwiinyanga ezintandathu emva kokutshatyalaliswa kweYerusalem ngowama-607 B.C.E., umntu owayesinde apho weza neendaba zokutshatyalaliswa kwesixeko esingcwele kuHezekile eBhabhiloni. Ngengokuhlwa engaphambi kokufika kwaloo mntu wayesindile, uYehova “wawuvula umlomo [kaHezekile] . . . , [waza wakwazi] ukuthetha kwakhona.” (Hezekile 33:22) Waba ke uyayeka ukuba sisimumu uHezekile.
Ngaba uHezekile wayesisimumu ngokoqobo ngeloo xesha? Kucacile ukuba akunjalo kuba kwanasemva kokuba ebe “sisimumu,” wadlulisela iziprofeto ezaziphathelele amazwe awayevuyele ukuwa kweYerusalem. (Hezekile, isahluko 25-32) Xa uHezekile wayesandul’ ukuqalisa ukuprofeta nokuba ngumlindi, uYehova wathi kuye: “Nolwimi lwakho olo kanye ndiza kulunamathelisa enkalakahleni yomlomo wakho, yaye ngokuqinisekileyo uya kuba sisimumu, ungabi yindoda eyohlwayayo kubo, ngenxa yokuba bayindlu enemvukelo. Ndakuthetha nawe ndiya kuwuvula umlomo wakho.” (Hezekile 3:26, 27) Xa uYehova wayengenasigidimi awayefuna ukusidlulisela kuSirayeli, uHezekile wayefanele ahlale esisimumu ngokuphathelele olo hlanga. UHezekile wayefanele athethe oko uYehova wayefuna akuthethe ngexesha uYehova awayefuna akuthethe ngalo. Ukuba sisimumu kukaHezekile kuthetha ukuba wayengenanto yakuthetha enokwenza namaSirayeli.
Umlindi wale mihla, amaKristu athanjisiweyo, uye walumkisa ngokutshatyalaliswa kweNgqobhoko, iYerusalem yomfuziselo. Xa “imbandezelo enkulu” ihlasela ize itshabalalise “iBhabhiloni Enkulu,” ubukhosi behlabathi bonqulo lobuxoki, udidi lukaHezekile oluthanjisiweyo aluyi kuba nanto yakuthetha ngokupheliswa kweNgqobhoko, eyinxalenye enkulu yobo bukhosi.—Mateyu 24:21; ISityhilelo 17:1, 2, 5.
Ewe, iyeza imini eya kuthi ngayo intsalela ethanjisiweyo kunye nezinxulumani zayo ibe sisimumu, ingabi nanto yakuyibhekisa kwiNgqobhoko. Oko kuya kwenzeka xa “iimpondo ezilishumi” kunye “nerhamncwa” liyitshabalalisa lize liyihlube ibe ze iBhabhiloni Enkulu. (ISityhilelo 17:16) Kakade ke, oku akuyi kuthetha ukuba amaKristu aya kuba zizimumu ngokoqobo. Aya kumdumisa uYehova aze amkhankanye imihla ngemihla “kuzo zonke izizukulwana ezizayo” kanye njengokuba esenza ngoku.—INdumiso 45:17; 145:2.