Imibuzo Evela Kubafundi

• Sinokuwenza buhlungu njani umoya oyingcwele kaThixo ekubeni ungengomntu?

Umpostile uPawulos wabhala wathi: “Musani ukuwenza buhlungu umoya oyingcwele kaThixo.” (Efese 4:30) Abanye bavakalelwa kukuba la mazwi athetha ukuba umoya oyingcwele ungumntu. Noko ke, iimpapasho ‘zegosa elithembekileyo’ bezisoloko zinikela ubungqina obusekelwe eZibhalweni nobungokwembali bokuba amaKristu okuqala ayengawugqali umoya oyingcwele njengomntu okanye uthixo olingana noYena Uphakamileyo noyinxalenye kaBathathu Emnye.a (Luka 12:42) Ngoko uPawulos wayengabhekiseli kumoya oyingcwele kaThixo njengomntu.

Umoya oyingcwele kaThixo ungamandla akhe angabonakaliyo. (Genesis 1:2) UYesu wayeza kubhaptiza “ngomoya oyingcwele,” kanye njengokuba uYohane wayebhaptiza ngamanzi. (Luka 3:16) NgePentekoste yowama-33 C.E., abapostile abamalunga ne-120 “bazaliswa ngumoya oyingcwele”—ngokuqinisekileyo babengazaliswanga ngumntu. (IZenzo 1:5, 8; 2:4, 33) Aba bathanjiswa baba nethemba lokuphila ezulwini, yaye umoya oyingcwele kaThixo wabakhokelela kubomi bokuthembeka. (Roma 8:14-17; 2 Korinte 1:22) Lo moya wavelisa isiqhamo sikaThixo waza wabanceda ukuba baphephe “imisebenzi yenyama” enesono eyayinokwenza ukuba uThixo angakholiswa ngabo.—Galati 5:19-25.

Ukuba singabakhonzi bakaThixo abanethemba lokuphila emhlabeni, asithanjiswanga ngomoya oyingcwele. Kodwa ke, sinokufumana umlinganiselo ofanayo womoya kaThixo nabo banethemba lokuphila ezulwini. Ngenxa yoko, nathi sinokuwenza buhlungu lo moya. Kodwa njani?

Ukuba sityeshela isiluleko seZibhalo esiphefumlelwe ngomoya oyingcwele, sinokuba notyekelo olunokukhokelela ekuwoneni ngabom lo moya, siphulukane nenkoliseko kaYehova size sitshatyalaliswe ekugqibeleni. (Mateyu 12:31, 32) Enoba asenzanga sono sinzulu, kodwa sinokuqalisa ikhondo elingelilo, elinokuthi ekugqibeleni lisikhokelele kwihambo echasene nolwalathiso lwalo moya. Ukwenjenjalo bekuya kuwenza buhlungu umoya oyingcwele.

Ngoko sinokukuphepha njani ukuwenza buhlungu umoya kaThixo? Ngokuqinisekileyo simele silawule iingcinga nezenzo zethu. Kwincwadi yakhe eya kwabase-Efese, kwisahluko 4 sayo, uPawulos wathetha ngokuphepha utyekelo lokuxoka, ingqumbo, ukonqena nentetho engafanelekanga. Xa sisambatha “ubuntu obutsha” size sibuyele kwizinto ezilolo hlobo, besiya kuba senza ntoni? Besiya kuba senza ngokuchasene nesiluleko esiphefumlelweyo seLizwi likaThixo, iBhayibhile. Xa sisenza ngolo hlobo siya kuba siwenza buhlungu umoya oyingcwele.

Kwabase-Efese isahluko 5, sifunda ngesiluleko sikaPawulos sokuphepha umnqweno ongcolileyo wokuhenyuza, ihambo elihlazo neziqhulo ezingamanyala. Ukuba asifuni kuwenza buhlungu umoya oyingcwele kaThixo, simele sikuphaphele oku xa sikhetha uhlobo lokuzonwabisa. Yintoni ebinokude isenze sibonise umdla kwizinto ezinjalo ngokuncokola ngazo, sifunde ngazo size sizibukele kumabonwakude nakwamanye amajelo?

Kambe ke, sinokuwenza buhlungu lo moya nangezinye iindlela ezininzi. Umoya kaYehova ukhuthaza umanyano ebandleni, kodwa ukuba thina sisasaza intlebendwane eyingozi, sikhuthaze iiyantlukwano ebandleni, besingayi kuba senza ngokuchasene nolwalathiso lwalo moya ngokuphathelele umanyano? Ngokucacileyo, besiya kuwenza buhlungu lo moya, njengabo babebangela iiyantlukwano kwibandla laseKorinte. (1 Korinte 1:10; 3:1-4, 16, 17) Kwakhona besiya kuba siwenza buhlungu lo moya, ukuba besinokungawahloneli amadoda amiselwe ngomoya ebandleni.—IZenzo 20:28; Yude 8.

Ngoko ke, kucacile ukuba kububulumko ukuhlolisisa isimo sethu sengqondo ngokuphathelele oko sikwazi njengokhokelo lomoya oyingcwele nokuchazwe eBhayibhileni, kwakunye noko kufundiswa kwiintlanganiso zamaKristu. Kwakhona ‘masithandaze sinomoya oyingcwele,’ ngokuwuvumela ukuba usiphembelele size ngalo lonke ixesha senze ngokuvisisana noko kuchazwe kwiLizwi likaThixo eliphefumlelweyo. (Yude 20) Ngamana singazimisela ukuba singaze siwenze buhlungu lo moya, kodwa ngalo lonke ixesha sikhokelwe nguwo ukuze kuzukiswe igama elingcwele likaYehova.

• UYesu Kristu wathelekisa ukuba nzima kokungena kwesityebi eBukumkanini nokuzama kwenkamela ukuphumela kwintunja yenaliti. Ngaba uYesu wayethetha ngenkamela yokoqobo nenaliti yokuthunga yokoqobo?

Iingcaphulo zeZibhalo ezimbini kwezintathu ezithetha ngalo mbandela zibufana. Ngokwengxelo kaMateyu uYesu wathi: “Kulula ngakumbi ngenkamela ukuphumela kwintunja yenaliti kunokuba isityebi singene ebukumkanini bukaThixo.” (Mateyu 19:24) Ngokufanayo, uMarko 10:25 uthi: “Kulula ngakumbi ngenkamela ukuphumela kwintunja yenaliti kunokuba isityebi singene ebukumkanini bukaThixo.”

Ezinye iimbekiselo zithi “intunja yenaliti” yayilisango elincinane elaliphakathi kwamasango amakhulu aseYerusalem. Lalisithi xa livalwa isango elikhulu ebusuku, elo lincinane liqhubeke livuliwe. Kucingelwa ukuba inkamela yayinokuphumela kulo. Ngaba uYesu wayecinga ngoko?

Ngokucacileyo akunjalo. Kuyabonakala ukuba uYesu wayebhekisela kwinaliti yokuthunga. Ekubeni mandulo kwakukho inaliti eyenziwe ngethambo neyenziwe ngentsimbi, kumele ukuba ikhaya ngalinye kuloo mmandla lalinayo. ULuka 18:25 uphelisa nawaphi na amathandabuzo akhoyo ngamazwi kaYesu, kuba umcaphula esithi: “Enyanisweni, kulula ngakumbi ngenkamela ukuphumela entunjeni yenaliti yokuthunga kunokuba isityebi singene ebukumkanini bukaThixo.”

Ababhali bezichazi-magama abaliqela bayavumelana nebinzana elithi ‘inaliti yokuthunga’ njengoko ifumaneka kwiNguqulelo Yehlabathi Elitsha. Igama lesiGrike eliguqulelwe ngokuthi ‘inaliti’ kuMateyu 19:24 nakuMarko 10:25 (rha·phisʹ) lisuka kwisenzi esithetha “ukuthunga.” Nebinzana lesiGrike elifumaneka kuLuka 18:25 (be·loʹne) lidla ngokusetyenziswa xa kuthethwa ngenaliti yokutyanda. IVine’s Expository Dictionary of Old and New Testament Words ithi: “Ibonakala intsha into yokubhekisela ‘kwintunja yenaliti’ xa kuthethwa ngamasango amancinane; abukho ubungqina bokuba kwakunjalo mandulo. INkosi yayifuna ukubonisa indlela ekunzima ngayo ebantwini ibe akuyomfuneko ukuyenza ivakale ilula indlela yokungena ebukumkanini ngokutshintsha inaliti siyenze enye into.”—1981, Umqulu 3, iphepha 106.

Abanye bacebisa ukuba ‘inkamela’ kufuneka iguqulelwe ngokuthi “yintambo.” Igama lesiGrike eliguqulelwe ngokuthi intambo (kaʹmi·los) nelithi inkamela (kaʹme·los) ayelelene. Noko ke, kuMateyu 19:24 kuvela igama lesiGrike elithi ‘inkamela’ kunelo liguqulelwe ngokuthi “intambo” kwanakweyona mibhalo-ngqangi midala yesiGrike esafumanekayo yeVangeli kaMateyu (iSinaitic, iVatican No. 1209, neAlexandrine). Iingxelo zibonisa ukuba uMateyu waqala wayibhala ngesiHebhere incwadi yakhe yeVangeli yaye kusenokwenzeka ukuba wayiguqulela ngokwakhe kwisiGrike. Wayekwazi kakuhle oko kwathethwa nguYesu ibe ngenxa yoko wasebenzisa igama elifanelekileyo.

Ngoko ke, uYesu wayethetha ngenaliti yokuthunga yokoqobo nangenkamela yokoqobo. Ezi zinto wazisebenzisa ukubethelela ukuba nzima kwento ethile. Kodwa ngaba uYesu wayethetha ukuthi asikho isityebi esinokungena eBukumkanini? Akunjalo, kuba amazwi kaYesu ayengamele aqondwe ngengqiqo yokoqobo. Wayesebenzisa isibaxo ukuze abonise ukuba kanye njengokuba inkamela yokoqobo ingenakuphumela kwintunja yenaliti yokuthunga, kunganzima ngesityebi ukungena eBukumkanini ukuba siyaqhubeka sizixakekisa ngobutyebi baso size singambeki kuqala uYehova ebomini baso.—Luka 13:24; 1 Timoti 6:17-19.

UYesu wawathetha la mazwi emva nje kokuba umlawuli oselula nosisityebi walahla ilungelo elizukileyo lokuba ngumlandeli kaYesu. (Luka 18:18-24) Umntu osisityebi nobuthand’ egazini ubutyebi bakhe kunezinto zokomoya akanakulindela ukufumana ubomi obungunaphakade phantsi kwelungiselelo loBukumkani. Noko ke, bakho abanye abantu abazizityebi ababa ngabafundi bakaYesu. (Mateyu 27:57; Luka 19:2, 9) Ngoko umntu osisityebi oyiphapheleyo intswelo yakhe yokomoya nofuna uncedo lukaThixo unokusindiswa.—Mateyu 5:3; 19:16-26.

[Umbhalo osemazantsi]