UThixo Ukukhathalele Ngokwenene

KUSENGQIQWENI ukucela uncedo kuThixo xa sisengxakini. Ngapha koko, ‘mkhulu yaye unamandla amakhulu, yaye ukuqonda kwakhe akunakubaliswa.’ (INdumiso 147:5) Ungoyena unokusinceda sikwazi ukujamelana neengxaki zethu. Kwakhona, iBhayibhile isimema ukuba ‘siphalaze iintliziyo zethu’ kuye. (INdumiso 62:8) Ngoko ke, ukuba kunjalo kutheni abanye bevakalelwa kukuba uThixo akayiphenduli imithandazo yabo? Ngaba oko kuthetha ukuba akakhathali?

Kunokuba ukhawuleze umbek’ ityala uThixo ngokungangeneleli, khawucinge nje ngela xesha wawusengumntwana. Xa abazali bakho bengakuniki yonke into oyifunayo, ngaba wakha wavakalelwa kukuba abakuthandi? Abantwana abaninzi bavakalelwa ngolo hlobo. Noko ke, ekukhuleni kwakho wayiqonda into yokuba uthando lubonakaliswa ngeendlela ezininzi, yaye ukusoloko uvuma xa umntwana ecela into akuyondlela yokubonakalisa uthando.

Ngokufanayo, ukuba uYehova akasoloko eyiphendula imithandazo yethu ngendlela esifuna ngayo, oko akuthethi ukuba akasikhathalele. Enyanisweni, uThixo usikhathalele ngeendlela ezininzi.

“Ngaye Sinobomi”

Okokuqala, “sinobomi siyashukuma yaye sikho” ngenxa kaThixo. (IZenzo 17:28) Ukusinika kwakhe ubomi kubonisa ukuba usikhathalele!

Kwakhona, uYehova usinika oko sikufunayo ukuze sihlale siphilile. Sifunda oku: “Uhlumisela izilo ingca eluhlaza, notyani ukuze kuncedwe uluntu, ukuba kuphume ukutya emhlabeni.” (INdumiso 104:14) Eneneni, uMdali wethu akasiniki nje izinto ezisisiseko ebomini. Ngobubele ‘usinika iimvula ezivela ezulwini namaxesha emveliso, ezizalisa iintliziyo zethu ngokutya nangokuchwayita.’—IZenzo 14:17.

Sekunjalo, abanye basenokuzibuza, ‘Ukuba uThixo usithanda ngaloo ndlela, kutheni evumela ukuba sibandezeleke?’ Ngaba uyayazi impendulo yalo mbuzo?

Ngaba NguThixo Omele Abekw’ Ityala?

Abantu abaninzi babandezeleka ngenxa yemiphumo yezenzo zabo. Ngokomzekelo, abantu bayazazi izinto ezinokububeka esichengeni ubomi babo. Sekunjalo, babandakanyeka ekuziphatheni okubi ngokwesini, basebenzisa kakubi utywala neziyobisi, bayatshaya, badlala imidlalo eyingozi, babalekisa izithuthi, njalo njalo. Ukuba ukuzibandakanya kwizinto ezinjalo kuphumela ekubandezelekeni, ngubani omele abekw’ ityala? NguThixo okanye ngulowo wenza ngobuyatha? ILizwi likaThixo eliphefumlelweyo lithi: “Ningalahlekiswa: UThixo akanakwenziwa intlekisa. Loo nto ayihlwayelayo umntu, uya kuvuna kwayona.”—Galati 6:7.

Ukongezelela, idla ngokuba ngabantu abenzakalisa abanye. Xa ilizwe liqalisa imfazwe, ngokuqinisekileyo uThixo akanakubekw’ ityala ngomonakalo owenzekayo. Xa isaphuli-mthetho sihlasela omnye ummi, ngaba uThixo umele abekw’ ityala ngokwenzakala okanye ngokufa kwaloo mntu? Ngokuqinisekileyo akunjalo! Xa uzwilakhe ecinezela, ethuthumbisa, aze abulale abo abaphetheyo, ngaba sifanele simbek’ ityala uThixo? Oko bekungayi kuba sengqiqweni.—INtshumayeli 8:9.

Noko ke, kuthekani ngezigidi zabantu ezithwaxwa bubuhlwempu okanye yindlala? Ngaba nguThixo omele abekw’ ityala? Akunjalo. Ikhaya lethu elingumhlaba livelisa ukutya okwanele ukondla wonke umntu. (INdumiso 10:2, 3; 145:16) Kukungabiwa kakuhle kokutya okuveliswa nguThixo okukhokelela ekwandeni kwendlala nobuhlwempu. Yaye kunzima ukucombulula le ngxaki ngenxa yokuzingca kwabantu.

Oyena Nobangela

Ngoko ke, ngubani omele abekw’ ityala xa umntu egula okanye esifa ngenxa yokwaluphala? Ngaba kuya kukumangalisa ukwazi ukuba uThixo akabekeki tyala ngenxa yoko? Xa uThixo wayedala umntu wayengenanjongo yokuba aluphale aze afe.

Xa isibini sokuqala, uAdam noEva, sabekwa kumyezo wase-Eden, uYehova wasixelela ukuba siza kuphila ngonaphakade kwiparadesi esemhlabeni. Noko ke, wayefuna kuhlale abantu ababeza kukuxabisa oko bakufumene njengelifa. Ngenxa yoko, ukuze bahlale kuloo paradesi kwakufuneka benze okuthile. UAdam noEva babeza kuhlala eParadesi lo gama nje beqhubeka bezithoba kuMdali wabo onothando.—Genesis 2:17; 3:2, 3, 17-23.

Okubuhlungu kukuba, uAdam noEva bavukela. UEva wakhetha ukuphulaphula uSathana uMtyholi, owamxokisayo esithi uThixo umbandeza into ethile elungileyo. Ngoko waqalisa ngokuzama ukuzimela geqe efuna ‘ukuba njengoThixo, azi okulungileyo nokubi.’ UAdam wamthelela kuloo mvukelo yakhe.—Genesis 3:5, 6.

Ngokona kwabo, uAdam noEva bazingqina bengakufanelekeli ukuphila ngonaphakade. Bajamelana nemiphumo ebuhlungu yesono. Amandla abo okuphila ancipha, yaye ekugqibeleni bafa. (Genesis 5:5) Noko ke, imvukelo yabo yaba nemiphumo ebuhlungu gqitha. Nanamhlanj’ oku sisabandezeleka ngenxa yesono sika-Adam noEva. Umpostile uPawulos wabhala: “Isono sangena ngamntu mnye [uAdam] ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.” (Roma 5:12) Ewe, ngenxa yokuvukela kuka-Adam no-Eva, isono nokufa kwasasazeka njengesifo esibulalayo kulo lonke uluntu.

Obona Bungqina Bokuba UThixo Uyakhathala

Ngaba oko kuthetha ukuba indalo kaThixo engabantu yonakaliswa ngokupheleleyo? Akunjalo, yaye ngoku siza kubona obona bungqina bokuba uThixo usikhathalele. UThixo wangena ezindlekweni ngokwenza ilungiselelo lokukhulula abantu kwisono nasekufeni. Ixabiso lokusikhulula yayibubomi obufezekileyo bukaYesu. (Roma 3:24) Ngaloo ndlela, umpostile uYohane wabhala wathi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.” (Yohane 3:16) Ngenxa yolu thando lubalasele kangaka, siphinde sanalo ithemba lokuphila ngonaphakade. Ebhalela abaseRoma uPawulos wathi: “Ngesenzo esinye sothethelelo umphumo kubantu bazo zonke iintlobo ukukuvakaliswa kwabo bengamalungisa afanelwe bubomi.”—Roma 5:18.

Sinokuqiniseka ukuba ngexesha likaThixo elifanelekileyo, akusayi kuphinda kubekho ukubandezeleka okanye ukufa kwisijikelezi-langa esinguMhlaba. Kunoko, kuya kubalasela iimeko ezifana nezo zichazwe kwincwadi yeSityhilelo: “Khangela! Intente kaThixo iphakathi koluntu, yaye uya kuhlala nalo, lube ngabantu bakhe. Naye abe nguThixo walo. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” (ISityhilelo 21:3, 4) Usenokuthi, ‘Loo nto iya kwenzeka sendafa.’ Noko ke, kusenokungabi njalo. Yaye enoba ungafa, uThixo uthembisa ukuba uya kukuvusa kwabafileyo. (Yohane 5:28, 29) UThixo unaloo njongo ngathi, yaye iya kuphumelela. Obunjani bona ubuxoki, ukuthi uThixo akabakhathalele abantu!

“Sondelani KuThixo”

Kuyomeleza ukwazi ukuba uThixo sel’ eqalisile ukwenza ilungiselelo eliya kuhlala lihleli lokuphelisa ingxaki yokubandezeleka kwabantu. Noko ke, kuthekani ngeli xesha siphila kulo? Yintoni esinokuyenza xa siphulukana nabantu esibathandayo ekufeni okanye xa abantwana bethu behlaselwa kukugula? Kaloku, alikafiki ixesha lokuba uThixo aphelise ukugula nokufa. IBhayibhile ibonisa ukuba sifanele sikulindele emva kwethutyana oko. Kodwa uThixo akasishiyanga enyanyeni. Umfundi uYakobi wathi: “Sondelani kuThixo, naye uya kusondela kuni.” (Yakobi 4:8) Ewe, uMdali wethu uyasimema ukuba sibe nolwalamano olusondeleyo naye, yaye abo banolwalamano olunjalo naye basoloko bephumelela kwanaphantsi kwezona meko zinzima.

Sinokusondela njani kuThixo? Malunga neenkulungwane ezintathu ezadlulayo, uKumkani uDavide wabuza umbuzo ofanayo wathi: “Owu Yehova, . . . ngubani na oya kuhlala entabeni yakho engcwele?” (INdumiso 15:1) UDavide waphinda waziphendula ngokuthi: “Ngulowo uhamba ngokungenasiphoso eqhelisela ubulungisa yaye ethetha inyaniso ngentliziyo yakhe. Akanyelisanga ngolwimi lwakhe. Kwiqabane lakhe akenzanga nto imbi.” (INdumiso 15:2, 3) Ngeliphandle uYehova wamkela abo balandela ikhondo elagatywa nguAdam noEva. Usondela kwabo benza ukuthanda kwakhe.—Duteronomi 6:24, 25; 1 Yohane 5:3.

Sinokukwenza njani ukuthanda kukaThixo? Simele sifunde ukwenza ‘okuhle nokwamkelekileyo emehlweni oMsindisi wethu, uThixo’ size senze ngokuvisisana nako. (1 Timoti 2:3) Oko kuquka ukuzondla ngolwazi oluchanileyo lweLizwi likaThixo, iBhayibhile. (Yohane 17:3; 2 Timoti 3:16, 17) Akwanelanga ukuzifundela nje iBhayibhile. Simele sixelise amaYuda enkulungwane yokuqala aseBhereya akuvayo ukushumayela kukaPawulos. Sifunda oku ngawo: ‘Kuba alamkela ilizwi ngeyona ntumekelelo inkulu yengqondo, ezincina ngenyameko iZibhalo mihla le mayela nokuba zinjalo kusini na ezo zinto.’—IZenzo 17:11.

Ngokufanayo namhlanje, ukuyifundisisa ngenyameko iBhayibhile kuyalomeleza ukholo lwethu kuThixo yaye kuyasinceda sakhe ulwalamano olusondeleyo naye. (Hebhere 11:6) Kwakhona kusinceda siyiqonde kakuhle indlela uYehova aqhubana ngayo nabantu—kungekhona nje ngenxa yeengenelo zokwexeshana kodwa ngokukhethekileyo ngenxa yezo zihlala ixesha elide kubo bonke abo banotyekelo olufanelekileyo.

Khawucinge nje ngamagqabaza ala maKristu ambalwa anolwalamano olusondeleyo noThixo. UDanielle oneminyaka eli-16 ubudala uthi: “Ndimthanda gqitha uYehova, yaye ndinezizathu ezininzi zokumbulela. Wandipha abazali abanothando abamthanda ngokwenene nabandifundise ngokuvisisana neLizwi lakhe.” Omnye umKristu waseUruguay ubhala athi: “Intliziyo yam iyaphuphuma luxabiso yaye ndiyambulela uYehova ngobubele bakhe obungasifanelanga nangobuhlobo bakhe.” UThixo wamkela nabaselula. UGabriela oneminyaka esixhenxe uthi: “UThixo ndimthanda ngaphezu kwayo nantoni na ekhoyo emhlabeni! NdineBhayibhile yam. Ndiyakuthanda ukufunda ngoThixo nangoNyana wakhe.”

Namhlanje, izigidi zabantu zivumelana ngokusuka entliziyweni nomdumisi owathi: “Ukusondela kuThixo kulungile kum.” (INdumiso 73:28) Ziye zancedwa ukuba zikwazi ukuhlangabezana neengxaki ezijamelana nazo namhlanje yaye ziqinisekile ukuba ziya kuphila ngonaphakade kwiParadesi esemhlabeni. (1 Timoti 4:8) Kutheni ungazenzeli usukelo ‘lokusondela kuThixo’? Eneneni, siyaqinisekiswa: ‘Akakude kuye ngamnye wethu.’ (IZenzo 17:27) Ewe, ngokwenene uThixo ukukhathalele!

[Imifanekiso ekwiphepha 5]

Zininzi iindlela esibona ngazo ukuba uYehova usikhathalele

[Umfanekiso okwiphepha 7]

Nabantwana abaselula bangasondela kuThixo

[Imifanekiso ekwiphepha 7]

Namhlanje, uYehova usinceda sinyamezele. Ngexesha elifanelekileyo, uya kuphelisa ukugula nokufa