Imibuzo Evela Kubafundi

Kweyesi-2 kwabaseKorinte 6:14, uPawulos ubhekisela koobani xa esebenzisa ibinzana elithi “abangakholwayo”?

Kweyesi-2 kwabaseKorinte 6:14, sifunda oku: “Musani ukubotshwa edyokhweni kunye nabangakholwayo.” Xa sijonga umongo woku, kuyabonakala ukuba uPawulos uthetha ngabantu abangengawo kwaphela amalungu ebandla lamaKristu. Le ngcamango iyaxhaswa nazezinye iindinyana zeBhayibhile apho uPawulos asebenzisa ibinzana elithi “ongakholwayo” okanye “abangakholwayo.”

Ngokomzekelo, uPawulos ukhalimela amaKristu ngokuya enkundleni “phambi kwabangakholwayo.” (1 Korinte 6:6) Apha abangakholwayo ziijaji, ezikwiinkundla zaseKorinte. Kwileta yakhe yesibini, uPawulos uthi uSathana ‘uye wamfamekisa iingqondo zabangakholwayo.’ Iindaba ezilungileyo ‘zifihlakele’ emehlweni aba bangakholwayo. Bona aba bangakholwayo akukho nto bayenzayo ukuzama ukukhonza uYehova, ekubeni ngaphambilana uPawulos wathi: “Xa kukho ukuphethukela kuYehova, isigqubuthelo siyasuswa.”—2 Korinte 3:16; 4:4.

Abanye abangakholwayo babandakanyeka ekuchaseni umthetho okanye kunqulo-zithixo. (2 Korinte 6:15, 16) Noko ke, asingabo bonke abachase abakhonzi bakaYehova. Abanye banawo umdla kwinyaniso. Abaninzi banamaqabane angamaKristu yaye bayakuvuyela ukuhlala nawo. (1 Korinte 7:12-14; 10:27; 14:22-25; 1 Petros 3:1, 2) Noko ke, uPawulos ulisebenzisa ngokuphindaphindiweyo ibinzana elithi “ongakholwayo” xa ebhekisela kubantu abangeyonxalenye yebandla lamaKristu, elakhiwe ‘ngamakholwa eNkosini,’ njengoko kuchazwe ngasentla.—IZenzo 2:41; 5:14; 8:12, 13.

Umgaqo ofumaneka kweyesi-2 kwabaseKorinte 6:14 unikela ukhokelo oluxabisekileyo kumaKristu kwiinkalo zonke zobomi yaye uye wacatshulwa ngokufuthi njengesiluleko sobulumko kumaKristu afuna amaqabane omtshato. (Mateyu 19:4-6) Ngobulumko, umKristu obhaptiziweyo akafuni iqabane lomtshato phakathi kwabantu abangakholwayo, ekubeni imilinganiselo yokuziphatha, usukelo neenkolelo zabangakholwayo zahluke lee kwezo zamaKristu okwenyaniso.

Noko ke, kuthekani ngabo bafundisisa iBhayibhile baze banxulumane nebandla lamaKristu? Kuthekani ngabo bangabavakalisi abangabhaptizwanga? Ngaba bangabangakholwayo? Akunjalo. Abo baye bamkela inyaniso yeendaba ezilungileyo nabenza inkqubela entle ekhokelela kubhaptizo akufanele kubhekiselwe kubo njengabangakholwayo. (Roma 10:10; 2 Korinte 4:13) Kwanangaphambi kokubhaptizwa kwakhe, uKorneli kwakusithiwa ‘ngumntu ozinikeleyo nowoyika uThixo.’—IZenzo 10:2.

Ngoko ngaba bekuya kuba bubulumko ngomKristu ozahluleleyo ukuthandana aze atshate nomntu owaziwa njengomvakalisi ongabhaptizwanga ekubeni enyanisweni, isiluleko sikaPawulos esikweyesi-2 kwabaseKorinte 6:14 singabhekiseli kule meko? Bekungayi kuba bubulumko. Ngoba? Ngenxa yesiluleko esingqalileyo uPawulos awasibhekisa kubahlolokazi abangamaKristu. UPawulos wabhala: “Ukhululekile ukuba atshatiselwe kulowo amfunayo, kuphela eNkosini.” (1 Korinte 7:39) Ngokuvisisana neso siluleko, amaKristu azinikeleyo abongozwa ukuba afune amaqabane omtshato kuphela phakathi kwabo ‘baseNkosini.’

Libhekisela entwenini ibinzana elithi “eNkosini” kwanelo linxulumene nalo lithi “kuKristu”? UPawulos uthetha ngabantu ‘ababekuKristu’ okanye “eNkosini” kweyabaseRoma 16:8-10 nakweyabaseKolose 4:7. Xa ufunda ezo ndinyana, uya kufumanisa ukuba abo ‘bangabasebenzi abangamadlelane,’ ‘abakholekileyo,’ ‘abazalwana abaziintanda,’ ‘abalungiseleli abathembekileyo’ ‘namakhoboka angamadlelane.’

Umntu uba lilo nini ‘ikhoboka eNkosini’? Uba lilo xa ngokuzimisela esenza oko kwenziwa likhoboka aze azincame. UYesu uthi: “Ukuba nabani na ufuna ukundilandela, makazincame, athabathe isibonda sakhe sentuthumbo aze aqhubeke endilandela.” (Mateyu 16:24) Umntu uqalisa ukulandela uKristu aze azithobe ngokupheleleyo ekwenzeni ukuthanda kukaThixo xa ezahlulela kuThixo. Emva koko, uyabhaptizwa aze abe ngumlungiseleli onokuma okufanelekileyo phambi kukaYehova uThixo.a Ngoko ‘ukutshata eNkosini,’ kuthetha ukutshata nomntu oye wabonisa ukuba ngokwenene ulikholwa, ‘ikhoboka elizinikeleyo likaThixo neleNkosi uYesu Kristu.’—Yakobi 1:1.

Umntu ofundisisa iBhayibhile namaNgqina kaYehova, eqhuba kakuhle kakhulu ngokomoya umele anconywe. Kodwa ke, akakazahluleli kuYehova aze azibophelele njengoza kumkhonza ngokuzincama ubomi bakhe bonke. Usazama ukwenza utshintsho olufunekayo. Kusafuneka ezabalazele ukuba ngumKristu ozahluleleyo nobhaptiziweyo ngaphambi kokuthabatha elinye inyathelo elibalulekileyo ebomini, elinjengokutshata.

Ngaba bekuya kucebiseka ukuba umKristu athandane ngaphambi komtshato nomntu oqhutyelwa isifundo seBhayibhile, nobonakala eqhuba kakuhle—mhlawumbi ejonge ukuba uza kumlinda abhaptizwe aze atshate naye? Akunjalo. Lo mfundi weBhayibhile usenokuphazanyiswa kukwazi ukuba umKristu ufuna ukutshata naye kodwa uza kumlinda de abhaptizwe.

Ngokuqhelekileyo umntu uba ngumvakalisi ongabhaptizwanga kangangethutyana, de enze inkqubela ekhokelela ekubhaptizweni. Ngoko isiluleko sokutshata kuphela eNkosini ayisiso esingekho ngqiqweni. Noko ke, kuthekani ukuba umntu usexabisweni lokutshata, ukhulele kwintsapho yamaKristu, ebezimisele ebandleni kangangeminyaka ethile, yaye ngoku ungumvakalisi ongabhaptizwanga? Ukuba kunjalo, yintoni ebimbambile ukuba angazahluleli kuYehova? Kutheni ethandabuza nje? Ngaba ikho into angayiqondi kakuhle? Nakuba engenguye ongakholwayo, kwangaxeshanye akunakuthiwa ‘useNkosini.’

Esi siluleko sikaPawulos siphathelele umtshato senzelwe thina. (Isaya 48:17) Xa omabini amaqabane aza kutshata ezahlulele kuYehova, iqhina lawo lomtshato linesiseko esomeleleyo nesokomoya. Aba nemilinganiselo nosukelo olufanayo. Oku kuba negalelo elibonakalayo kumanyano olunolonwabo. Ngaphezu koko, ‘ngokutshata kuphela eNkosini,’ umntu ubonisa ukuba uthobela uYehova, yaye oko kukhokelela kwiintsikelelo ezingapheliyo kuba “kulowo unyanisekileyo [uYehova] uya kwenza ngokunyaniseka.”—INdumiso 18:25.

[Umbhalo osemazantsi]

[Umfanekiso okwiphepha 31]

“Kulowo unyanisekileyo [uYehova] uya kwenza ngokunyaniseka”