Ukufumana Elona Cebiso Liyingenelo
IMPUMELELO inqweneleka ngokwenene. Eyona nto iya kusinceda kweli hlabathi lizaliswe ziinzima, kukufumana icebiso eliyingenelo nokuzimisela ukulisebenzisa. Kodwa abantu abasoloko bezimisele ukulisebenzisa icebiso eliyingenelo. Abaninzi bathi umntu umele aphile ngendlela athanda ngayo. Eneneni, ingxelo yeBhayibhile ibonisa ukuba uSathana, olona tshaba lolongamo lukaThixo, wabanika inkululeko yokwenjenjalo abantu bokuqala. IGenesis 3:5 ithi xa isichazela ngoko wakuthetha kuEva: “UThixo uyazi ukuba mhla nithe nadla [kumthi wokwazi okulungileyo nokubi] aya kuvuleka amehlo enu nize nibe njengoThixo, nazi okulungileyo nokubi.”
Ngaba emva koko, uAdam noEva baphumelela ekwenzeni unothanda bengazange bafumane imiphumo elusizi? Akunjalo. Bakhawuleza badana yimiphumo eyabangelwa kukufuna ukwazi okulungileyo nokubi. Baphulukana nenkoliseko kaThixo, baqalisa ubomi obunzima bokungafezeki, baza bafa ekugqibeleni. (Genesis 3:16-19, 23) Sonke siyafa. IBhayibhile ithi: “Isono sangena ngamntu mnye [uAdam] ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.”—Roma 5:12.
Nakuba kukho imiphumo ebuhlungu ebangelwa koko kwakhethwa nguAdam noEva, abaninzi abakasiqondi isibakala sokuba kububulumko ukusebenzisa icebiso loMenzi womntu. Noko ke, iBhayibhile iyayichaza into yokuba ‘iphefumlelwe nguThixo kwaye iyingenelo’ yaye inokusinceda ukuba ‘siwufanelekele size siwuxhobele ngokupheleleyo wonke umsebenzi olungileyo.’ (2 Timoti 3:16, 17) Ngokuqinisekileyo siya konwaba ngakumbi xa sisebenzisa icebiso leBhayibhile. Eyona nkalo lisebenza kuyo bubomi bentsapho.
Ukuthembeka Emtshatweni
Ngokutsho kweBhayibhile, uThixo wamisela umtshato ngenjongo yokuba uhlale ixesha elingasikelwanga mda. (Genesis 2:22-24; Mateyu 19:6) Ukongezelela, iZibhalo zithi ‘isilili somtshato asifanele sidyojwe,’ nto leyo ethetha ukuba olu manyano alufanele lungcoliswe ziintlobano zesini ngaphandle komtshato. (Hebhere 13:4) Noko ke, usenokuba uyazi ukuba namhlanje imitshato emininzi ayiyifikeleli le milinganiselo. Abanye abantu banomkhwa wokudlala ngothando namaqabane angengowabo kwiindawo abasebenza kuzo. Abanye bayaxoka kwiintsapho zabo ukuze bachithe ixesha nabantu abathandana nabo nabangengawo amaqabane abo omtshato. Abanye bade bawashiye amaqabane abo ukuze baye kuhlala namaqabane aselula, besithi oko kubenza bazive bebatsha yaye bonwabile, njengakwimeko kaVerónica, okhankanywe kwinqaku elingaphambili.
Kodwa ke, ukufuna ukuzanelisa enoba sekumnyam’ entla akunakuzisa ulonwabo olungapheliyo. URonald ukwazi kakuhle oko. Eqinisekile ukuba wayenokubuphucula ubomi bakhe, washiya umfazi wakhe ukuze aye kuqalisa intsapho entsha nebhinqa awayethandana nalo ngokufihlakeleyo kangangeminyaka emithandathu nawayesele enabantwana ababini kulo. Noko ke, emva kwethuba elithile ewuqhawule umtshato wakhe wokuqala, eli bhinqa lamshiya! URonald waphela ehlala nabazali bakhe. Wayitsho into yokuba uziva “ehlazekile.” Ngumzekelo nje omnye lowo. Indlela enjalo yokwenza izinto eqhutywa ngumnqweno wokuzingca iye yabangela ukrozo loqhawulo-mtshato nokwahlukana kweentsapho, nto leyo ebangela ukubandezeleka kwintaphane yabantu—abantwana nabantu abakhulileyo ngokufanayo.
Kwelinye icala, ukuthobela icebiso leBhayibhile kuphumela kulonwabo lokwenene. Oko kwaba njalo kwimeko kaRoberto, othi: “Ngenxa yokuthobela icebiso leBhayibhile, ndisahlala nomfazi wam. Ulonwabo lokwenene asilufumananga ngokulingelwa ekwenzeni okubi nabantu abangengawo amaqabane ethu, enoba abo bantu banokubonakala benomtsalane kangakanani na. Imfundo yeBhayibhile iye yandinceda ndalixabisa iqabane lam ebendisoloko ndikunye nalo kangangeminyaka emininzi.” Icebiso leBhayibhile ‘lokungaqhubani ngobuqhophololo nomfazi wobutsha bakho’ liye lasebenza kakhulu ebomini bukaRoberto. (Malaki 2:15) Ziziphi ezinye iindlela esinokungenelwa ngazo kwicebiso likaThixo?
Indlela Esibakhulisa Ngayo Abantwana Bethu
Kumashumi eminyaka eyadlulayo, yayiqhelekile into yokuva kusithiwa, abazali abafanele babeke imiqathango emininzi xa bekhulisa abantwana. Kwakubonakala kusengqiqweni ukuvumela abantwana bazenzele izigqibo ngendlela abacinga ngayo noko bafuna ukukwenza. Eyona njongo yayikukuphepha ukudodobalisa ukukhula kwabo. Kwezinye iindawo, kwada kwasekwa amaziko emfundo angenamithetho ingqongqo kangako, apho abantwana babezigqibela enoba bayaya esikolweni okanye akunjalo baze bakhethe umlinganiselo wokuzihlaziya okanye bakhethe ukuba bafuna ukufunda kangakanani na. Injongo yesinye isikolo esifana nesi “yayikukuvumela abantwana ukuba bayivelise ngokupheleleyo indlela abavakalelwa ngayo benganqandwa ngumntu okhulileyo.” Nanamhlanje, abanye abacebisi abakavumelani nokuba ukusebenzisa iindlela ezithile zokohlwaya kuneengenelo, enoba abazali bakubona kufanelekile ukunikela isohlwayo sothando.
Kuphumele entwenini oko? Abantu abaninzi bacinga ukuba ukuvula zibhuqe kunika abantwana inkululeko eninzi gqitha. Bavakalelwa kukuba oku kuye kwabangela ulwaphulo-mthetho nokusetyenziswa kakubi kweziyobisi. Xa kwakusenziwa uhlolisiso eUnited States abantu abamalunga nama-70 ekhulwini ababuzwayo bathi abantwana nabantu abaselula abafumani lwalathiso lwaneleyo lwabazali njengoko bebefanele ukulufumana. Xa bekhangela unobangela wokudubulana kwabantwana ezikolweni nolunye ulwaphulo-mthetho oluhambis’ umzimba olwenziwa ngabakwishumi elivisayo, abaninzi bathi “abazali bayekelela gqitha.” Yaye enoba imiphumo ayibi mibi kangako, abazali nabantwana bayachaneka ngenxa yokukhuliswa ngendlela engeyiyo.
Ithini iBhayibhile kule nkalo? IZibhalo zicebisa ukuba igunya labazali liboniswe ngothando nangokungqongqo. IBhayibhile ithi: “Ubudenge bubotshiwe entliziyweni yenkwenkwe; intonga yengqeqesho iya kubushenxisela kude kuyo.” (IMizekeliso 22:15) Kakade ke, lonke uqeqesho lwabazali lumele lunikelwe ngendlela efanelekileyo. Nasiphi na isohlwayo esinikelwayo sifanele sinikelwe ngobulali, ukuzeyisa nolwazelelo. Ngaloo ndlela siba luphawu lothando. Xa abazali besebenzisa igunya labo ngothando, kungekhona ngendlela engqwabalala, badla ngokuphumelela.
Kubakho imiphumo emihle xa lisetyenziswa eli cebiso. UArturo, indoda eneminyaka engama-30 yaseMexico nesandul’ ukutshata, ithi: “Utata wayenza yacaca kum nabantakwethu into yokuba benomama banegunya kwintsapho yakowethu. Abazange bayeke ukusiqeqesha. Kodwa babenalo nexesha lokuncokola nathi. Ngoku njengoko sele ndikhulile, ndiyabuxabisa ubomi obuzinzileyo endibuphilayo, yaye ndiyayiqonda into yokuba oko kubangelwe kukukhuliswa kakuhle.”
Sebenzisa Elona Cebiso Liyingenelo
ILizwi likaThixo, iBhayibhile linawona macebiso ayingenelo kuluntu. Ukhokelo lwalo alupheleli entsatsheni. Lisixhobisa ngeendlela ezahlukeneyo kuba lisifundisa indlela yokuphila kwihlabathi apho abaninzi bengakulungelanga ukwamkela isibakala sokuba kukho uMthombo ophakamileyo wobulumko onokulawula ubomi babo ukuze bangenelwe.
UYehova uThixo, uMdali woluntu, wanikela esi siqinisekiso esebenzisa umdumisi uDavide: “Ndiya kukuqiqisa ndikuyalele ngendlela ofanele uhambe ngayo. Ndiya kukucebisa iliso lam likuwe.” (INdumiso 32:8) Ngaba unokukuthelekelela ukuba kuthetha ukuthini ukubeka iliso koMdali kuthi ukuze asikhusele engozini? Ngamnye kuthi ufanele azibuze oku: ‘Ngaba ndiya kuthi ngokuthobeka ndamkele ulwalathiso lukaYehova ukuze ndikhuseleke?’ Ngothando iLizwi lakhe lithi: “Kholosa ngoYehova ngayo yonke intliziyo yakho, ungayami ngokwakho ukuqonda. Uze umgqale yena ezindleleni zakho zonke, kwaye uya kuwenza uthi tye umendo wakho.”—IMizekeliso 3:5, 6.
Ukwazi uYehova kufuna umgudu nokuzinikela, kodwa abantu banokukufumana eBhayibhileni. Ukuphila ngendlela ayincomelayo ‘kusinika ithemba kobu bomi nakobo buzayo.’ Ngokwenene kuluncedo xa ucinga ngeengenelo zako.—1 Timoti 4:8; 6:6.
Ukuba uyakuthanda ukwazi okuseBhayibhileni neengenelo ezibangelwa kukuphila ngokuvisisana nako, ukufunda nokucamngca ngeLizwi likaThixo makube yeyona nto iphambili ebomini bakho. Xa usenjenjalo uya kujamelana nocelomngeni lwanamhlanje nalo naluphi olunye olusezayo. Ukongezelela, uya kufumana ithemba lokuphila kwihlabathi elitsha likaThixo, apho bonke abantu beya kufundiswa nguYehova luze lube lukhulu uxolo lwabo.—Isaya 54:13.
[Umfanekiso okwiphepha 5]
Icebiso leBhayibhile linokulomeleza iqhina lomtshato
[Imifanekiso ekwiphepha 6]
Icebiso leBhayibhile linokusikhokela kakuhle lize lisihlaziye kwangaxeshanye
[Imifanekiso ekwiphepha 7]
Abo balisebenzisayo icebiso leBhayibhile banokunandipha ubomi obulungeleleneyo