Ngaba Liyafuneka Icebiso Lobulumko?

NAMHLANJE, abaninzi bacinga ukuba bayakwazi okulungileyo nokubi yaye banelungelo lokwenza nantoni na abayithandayo. Abanye bathi nantoni na yamkelekile ukuba iyamanelisa lowo uyenzayo. Umtshato nobomi bentsapho, zinto ezo ezazigqalwa njengezisisiseko kwibutho labantu ngoku ziyaxengaxenga.—Genesis 3:5.

Khawucinge nje ngoVerónica,a ohlala eMexico. Unikela le ngxelo: “Ngaphambi nje kokuba sigqibe iminyaka eli-15 sitshatile, umyeni wam wandixelela ukuba uthandana nelinye ibhinqa. Wathi ekubeni eli bhinqa liselitsha yaye limonwabisa, akasayi kuze alishiye. Ndothuka gqitha ndakucinga ukuba umyeni wam endimthanda kunene akasayi kuphinda abe kunye nam. Ndandidla ngokucinga ukuba eyona nto ibuhlungu kukufelwa ngumntu omthandayo. Kodwa kum, ukukrexeza kwakhe kwakubuhlungu ngokwenene kuba andizange ndiphulukane nomntu endandimthanda ngokusuka entliziyweni kuphela kodwa waqhubeka esenza izinto ezaziyitsho ibe lihlwili intliziyo yam.”

Kukho nenye indoda eneminyaka engama-22 ubudala esele iqhawule umtshato nenonyana kodwa engaziphumeziyo iimbopheleleko zayo njengobawo. Ilindele ukuba ibe ngunina onyamekela yona nonyana wayo. Xa unina engenzi ngokuvisisana nokuthanda kwayo, iba nomsindo ize imthuke, kanye oku kwenjubaqa yomntwana. Unina uyaxakwa xa ithukisa ngolo hlobo.

Ezi asizozinto zinqabileyo. Ukwahlukana ngokusemthethweni noqhawulo-mtshato kwande kuyo yonke indawo. Abantwana abaninzi babukela omnye wabazali babo eshiya ikhaya esiya kuziphilela. Abanye abantwana abasahloneli kwamntu, kuquka abazali babo yaye benza izinto obungenakuze uzicinge ngaphambili. Ukuziphatha okubi ngokwesini, ukusebenzisa kakubi iziyobisi, ukuhlaselwa lulutsha nokubulawa kootitshala okanye abazali ngabantwana sele kuyinto eqhelekileyo kwezinye iindawo. Yaye kusenokwenzeka ukuba uye waphawula ukuba ukukhulisa abantwana nomtshato asikokuphela kweenkalo ezinamagingxigingxi kwihlabathi esiphila kulo namhlanje.

Njengoko sibona ezi nguqu, sisenokuzibuza ukuba kuqhubeka ntoni kwibutho labantu. Ukuba ngokwenene abantu bayakwazi okubi nokulungileyo, kutheni kukho iingxaki ezininzi kangaka ezingacombululekiyo? Ngaba liyafuneka icebiso lobulumko? Ngaba ukho umthombo othembekileyo welo cebiso lobulumko? Nakuba abaninzi besithi bayakholelwa kuThixo nakwiLizwi lakhe elibhaliweyo, kodwa alibonakali liziphembelela izigqibo abazenzayo. Kodwa ziziphi iingenelo esinokuzifumana xa sifuna icebiso kuThixo? Makhe sikuhlolisise oko kwinqaku elilandelayo.

[Umbhalo osemazantsi]